ຈະພັດທະນານະຄອນຫຼວງ ໃຫ້ເປັນເມືອງເອເລັກໂຕຣນິກ

373 13 ຕ.ລ. 2017 ຂ່າວໜ້າ​ໜຶ່ງ
ຈະພັດທະນານະຄອນຫຼວງ ໃຫ້ເປັນເມືອງເອເລັກໂຕຣນິກ

ເພື່ອ​ເສີມ​ຂະຫຍາຍ​ສາຍ​ພົວພັນ​ມິດຕະພາບ​ອັນ​ເປັນ​ມູນເຊື້ອ ແລະ ການ​ຮ່ວມ​ມື​ໄມຕີ​ຈິດ​ມິດຕະ​ພາບ​ອັນ​ດີ ລະຫວ່າງ ​ສປປ ລາວ ກັບ​ສະຫະພັນ​ຣັດ​ເຊຍ ເວົ້າລວມ ເວົ້າ​ສະເພາະ ນະຄອນຫຼວງ​ວຽງ​ຈັນ ແລະ ນະຄອນຫຼວງ​ມົດ​ສະ​ກູ ທີ່​ມີ​ມາ​ແຕ່​ດົນນານ ໃຫ້​ນັບ​ມື້​ເຕີບ​ໃຫຍ່​ຂະຫຍາຍ​ຕົວ​ເກີດ​ໝາກຜົນ​ຕົວ​ຈິງຫຼາຍ​ຍິ່ງ​ຂຶ້ນ​ໃນຕໍ່ໜ້າ ອົງການ​ປົກຄອງນະຄອນຫຼວງ​ວຽງ​ຈັນ ໄດ້ຕົກລົງ​ເຫັນ​ດີ​ເປັນ​ເອກະ​ພາບຮ່ວມ​ມື​ກັບບໍລິສັດ ເອັມ​ເຄ-ແອສພີ ​ຈຳກັດ ສະຫະພັນ​ຣັດ​ເຊຍ.

ການ​ຮ່ວມ​ມື​ຄັ້ງ​ນີ້ ເພື່ອ​ສຳຫຼວດ​ເກັບ​ກຳ​ຂໍ້​ມູນ​ຄວາມ​ເປັນ​ໄປໄດ້​ໃນ​ການ​ວາງ​ແຜນ ປະຕິບັດໂຄງການ​ພັດທະນາ​ວຽງ​ຈັນເອເລັກ​ໂຕຣ​ນິກ (E-Vientiane) ໂຄງການ​ດັ່ງກ່າວ​ລວມ​ມີການເກັບ​ພາສີ​ບໍລິການ​ຂອງ​ພາກ​ລັດແບບ​ອັດຕະໂນມັດ​ຄົບ​ວົງ​ຈອນ ການ​ຄຸ້ມ​ຄອງ​ຕົວ​ເມືອງແບບ​ເອເລັກ​ໂຕຣ​ນິກ ການ​ຄຸ້ມ​ຄອງ​ຂົນສົ່ງ​ສາທາລະນະ ການ​ຄຸ້ມ​ຄອງໜ່ວຍ​ງານ​ສຸກ​ເສີນ ການ​ຄຸ້ມ​ຄອງສາ​ທາ​ລະ​ນຸ​ປະ​ໂພກ ການ​ຊຳລະເງິນ​ແບບ​ເອ​ເລັກ​ໂຕຣ​ນິກ ແລະ ການ​ຂຶ້ນ​ແຜນ​ງົບປະມານແບບເອ​ເລັກ​ໂຕຣ​ນິກ ເຊິ່ງ​ຈະ​ໃຊ້​ເວລາໃນ​ການ​ເຮັດ​ທົດ​ລອງ​ພາຍ​ໃນ 1 ປີ ນັບ​ແຕ່​ມື້​ລົງ​ລາຍ​ເຊັນ​ນີ້​ເປັນຕົ້ນ​ໄປ ເຊິ່ງ​ໂຄງການ​ດັ່ງກ່າວ​ໄດ້ມອບ​ໃຫ້​ພະແນກການ​ເງິນ ນວ ແລະ ພາກສ່ວນ​ກ່ຽວຂ້ອງຮ່ວມມື​ເຮັດ​ວຽກ​ຕົວ​ຈິງ ແລະ ມອບ​ໃຫ້ພະແນກການ​ຕ່າງປະເທດ ນວ ເປັນໃຈ​ກາງ​ປະສານ​ງານ.

ພິທີ​ລົງ​ນາມ​ການ​ຮ່ວມ​ມືໂຄງການ​ພັດທະນາ​ວຽງ​ຈັນເອ​ເລັກໂຕຣ​ນິກ ຈັດ​ໃນ​ວັນ​ທີ 12 ຕຸລາ 2017 ທີ່​ຫ້ອງ​ວ່າການ​ປົກຄອງ ນວ ຕາງໜ້າ​ໃຫ້​ອົງການ​ປົກຄອງ ນວ ໂດຍ​ທ່ານ ຄຳ​ພັນ ມາລາ​ບັນດິດ ຫົວໜ້າ​ພະແນກການເງິນ ນວ ແລະ ທ່ານ ນິ​ໂກ​ລາຍ ອຸ​ສະຕິ​ນົບ ຜູ້ອຳນວຍການ​ໃຫຍ່ ບໍລິສັດ​ ເອັມ​ເຄ-ແອສ​ພີ ຈຳກັດ ເຂົ້າ​ຮ່ວມ​ເປັນ​ກຽດ​ມີ​ທ່ານ ສິນລະ​ວົງ ຄຸດ​ໄພທູນ ເຈົ້າ​ຄອງ​ນະຄອນ​ຫຼວງ​ວຽງ​ຈັນ ແລະ ພາກສ່ວນ​ກ່ຽວຂ້ອງ​ທັງ​ສອງ​ຝ່າຍ.

ຂ່າວທີ່ກ່ຽວຂ້ອງ