ສອງນະຄອນຫຼວງ ຫາລືຮ່ວມມືພັດທະນາເສດຖະກິດ-ສັງຄົມ

203 13 ຕ.ລ. 2017 ຂ່າວໜ້າ​ໜຶ່ງ

ການ​ພົບ​ປະ​ຂອງ​ຄະນະ​ຜູ້​ແທນສະມາຄົມ​ມິດຕະພາບ ຣັດ​ເຊຍ-ລາວ ນຳ​ໂດຍ​ທ່ານ ອີ​ກໍ ປານ​ຟີລົບ ຮັກສາ​ການປະທານ​ສະ​ມາຄົມ​ມິດຕະພາບ ຣັດ​ເຊຍ-ລາວ ນະຄອນຫຼວງ​ມົດ​ສະ​ກູ ສະຫະພັນຣັດ​ເຊຍ ພ້ອມ​ດ້ວຍ​ຄະນະ ແລະ ທ່ານ ມິຄາ​ອິນ ວ.ບາ​ຣາ​ນົບ ເອກອັກ​ຄະ​ລັດ​ຖະ​ທູດວິສາມັນ​ຜູ້​ມີ​ອຳນາດ​ເຕັມ ແຫ່ງ​ສະຫະພັນ​ຣັດເຊຍ ປະຈຳ​ລາວ ຝ່າຍ​ນະຄອນຫຼວງ​ວຽງ​ຈັນ ​ສປປ ລາວ ນຳໂດຍ​ທ່ານ ອານຸພາບ ຕຸ​ນາ​ລົມ ປະທານ​ສະພາ​ປະຊາຊົນ ນວ ພ້ອມ​ດ້ວຍ​ຄະນະ ຈັດ​ໃນ​ວັນ​ທີ 12 ຕຸລາ 2017 ທີ່​ຫ້ອງ​ວ່າການ​ປົກຄອງ ນວ.

ໂອກາດ​ນີ້ ທ່ານ ອານຸພາບ ຕຸ​ນາ​ລົມ ໄດ້​ລາຍ​ງານ​ສະພາບໂດຍ​ລວມ​ຂອງ​ນະຄອນຫຼວງ​ວຽງຈັນ ຕໍ່​ທາງ​ຄະນະ​ດັ່ງກ່າວ​ໃຫ້​ຮັບຊາບ ໂດຍ​ສະເພາະ ໄດ້​ຍົກ​ໃຫ້ເຫັນ​ເຖິງ​ການ​ພົວພັນ​ຮ່ວມ​ມື​ລະຫວ່າງ​ສອງ​ນະຄອນຫຼວງ​ວຽງ​ຈັນ ກັບ​ບັນດາ​ນະຄອນ​ຂອງ​ສະຫະພັນ​ຣັດ​ເຊຍ ເຊິ່ງ​ການ​ນຳ​ຂອງ ນວ ນຳ​ໂດຍທ່ານ ສິນ​ລະ​ວົງ ຄຸດໄພທູນ ເຈົ້າ​ຄອງ​ນະຄອນຫຼວງ ພ້ອມ​ດ້ວຍ​ຄະນະ ໄດ້​ເດີນທາງຢ້ຽມຢາມ​ທາງ​ການ ນະຄອນຫຼວງ​ມົດ​ສະ​ກູ ແລະ ນະຄອນ​ຊັງປີ​ເຕີ​ສະ​ເບີ ໃນ​ລະຫວ່າງ​ເດືອນ​ກໍລະ​ກົດ 2017 ຜ່ານ​ມາ ເຊິ່ງ​ທັງສອງ​ຝ່າຍ​ໄດ້​ປຶກສາ​ຫາລື​ກັນ 3 ໂຄງການ ການ​ສ້າງຕັ້ງ​ນະຄອນມິດຕະພາບ​ນຳ​ກັນ ສະເໜີ​ໃຫ້​ນະຄອນ​ຫຼວງ​ມົດ​ສະ​ກູ ສືບຕໍ່​ຊ່ວຍເຫຼືອ​ດ້ານ​ການ​ສຶກ​ສາ​ປີ​ລະ 5 ທຶນ ແກ່ ນວ ແລະ ຊຸກຍູ້​ສົ່ງເສີມການທ່ອງທ່ຽວ​ລະຫວ່າງ​ສອງ​ນະຄອນ ແລະ ອີກ​ຫຼາຍ​ບັນຫາ​ທີ່​ສຳຄັນ​ທີ່​ທັງ​ສອງ​ຝ່າຍ​ໃຫ້​ຄວາມ​ສົນໃຈ ຍົກ​ຂຶ້ນ​ມາ​ປຶກສາ​ຫາລື​ນຳກັນ.

ທັງ​ນີ້ ເພື່ອ​ເສີມ​ຂະຫຍາຍ​ສາຍພົວພັນ​ມິດຕະພາບ​ອັນ​ເປັນ​ມູນເຊື້ອ ແລະ ການ​ຮ່ວມ​ມື​ໄມຕີ​ຈິດມິດຕະພາບ​ອັນ​ດີລະຫວ່າງ ​ສປປ ລາວ ກັບ​ສະຫະພັນ​ຣັດ​ເຊຍ ເວົ້າ​ລວມ ເວົ້າ​ສະເພາະ ນະຄອນຫຼວງ​ວຽງ​ຈັນ ແລະ ນະຄອນຫຼວງ​ມົດ​ສະ​ກູ ທີ່​ມີ​ມາ​ແຕ່​ດົນນານໃຫ້​ນັບ​ມື້​ເຕີບ​ໃຫຍ່​ຂະຫຍາຍ​ຕົວ ​ເກີດ​ດອກ​ອອກ​ຜົນຢ່າງ​ບໍ່​ຢຸດ​ຢັ້ງ.

ຂ່າວທີ່ກ່ຽວຂ້ອງ