ສະຫຼອງໂຄງການລາງວັນຮອນດ້າ ສຳລັບນັກວິທະຍາສາດ-ວິສະວະກອນໜຸ່ມ

264 13 ຕ.ລ. 2017 ຂ່າວໜ້າ​ໜຶ່ງ
ສະຫຼອງໂຄງການລາງວັນຮອນດ້າ ສຳລັບນັກວິທະຍາສາດ-ວິສະວະກອນໜຸ່ມ

ພິທີ​ສະເຫຼີມສະຫຼອງ​ໂຄງການ ລາງວັນ​ຮອນ​ດ້າ ສຳລັບ​ນັກ​ວິ​ທະຍາ​ສາດ ແລະ ວິສະວະກອນ​ໜຸ່ມ (Honda Y-E-S Award) ຢູ່ ​ສປປ ລາວ ຄົບຮອບ 10 ປີ ແລະ ມອບ​ລາງວັນ​ດັ່ງກ່າວ ປະຈຳ​ປີ 2017 ໄດ້​ຈັດ​ຂຶ້ນ​ວັນ​ທີ 11 ຕຸລາ 2017 ຢູ່​ຄະນະ​ວິສະວະກຳ​ສາດ (​ມຊ) ໂດຍ​ມີ​ທ່ານ ກອງ​ສີ ແສງມະນີ ຮອງ​ລັດຖະມົນຕີ ກະຊວງສຶກ​ສາ​ທິ​ການ ແລະ ກີລາ (​ສສກ) ທ່ານ ພຸດ ສິມ​ມາລາ​ວົງ ຮອງ​ອະທິການ​ບໍດີ ​ມຊ ທ່ານ​ປະທານ​ການ​ແຂ່ງຂັນ​ລາງວັນ​ທຶນຮອນ​ດ້າ ທ່ານ ທາ​ເກ​ຊິ ຮິ​ກິ​ຮາຣະ ເອກ​ອັກ​ຄະ​ລັດ​ຖະ​ທູດ​ຍີ່ປຸ່ນ ປະຈຳ​ລາວ ທ່ານ ຮີ​ໂຣ​ໂຕະ ອິ​ຊິດະ ປະທານ​ມູນ​ນິທິ​ຮອນ​ດ້າ ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

ມູນ​ນິທິ​ຮອນ​ດ້າ​ໄດ້​ສ້າງຕັ້ງ​ປີ 1977 ໂດຍ​ທ່ານ ໂຊ​ອິ​ຈິ​ໂຣະ ຮອນ​ດ້າ ເຊິ່ງ​ມູນ​ນິ​ທີ​ດັ່ງກ່າວ​ໄດ້ສົ່ງເສີມ​ການ​ພັດທະນາ​ວິ​ສະ​ວະກອນ ແລະ ນັກວິທະຍາສາດ​ຢູ່ປະເທດ​ຍີ່ປຸ່ນ ເນື່ອງ​ຈາກ​ປະສົບຜົນສຳເລັດ​ດີເດັ່ນ​ຕະຫຼອດ​ມາ ແລະ ມາ​ຮອດ​ປີ 2006 ເຊິ່ງ​ເປັນວັນ​ຄ້າຍ​ວັນ​ເກີດ​ຂອງ​ທ່ານ ໂຊ​ອິຈິໂຣະ ຮອນ​ດ້າ ຄົບຮອບ 100 ປີ ແລະ ວັນ​ສ້າງຕັ້ງ​ມູນ​ນິທິ ຄົບຮອບ 30 ປີ ຄະນະ​ບໍລິຫານ​ມູນ​ນິທິ​ຮອນ​ດ້າ​ຈຶ່ງ​ຂະຫຍາຍ​ມາ​ຂົງເຂດ​ອາຊີ ດ້ວຍ​ການ​ລິ​ເລີ່ມ​ໂຄງການ Honda Y-E-S Award ຢູ່​ປະເທດ​ຫວຽດນາມ ແລະ ຂະຫຍາຍ​ໄປ​ອິນ​ເດຍ ປີ 2007 ​ສປປ ລາວ ແລະ ກຳປູເຈຍ ປີ 2008 ແລະ ມຽນ​ມາ ປີ 2014 ໃນ​ນີ້ 10 ປີຜ່ານມາ ມີ​ນັກ​ສຶກ​ສາ​ລາວ​ເຂົ້າຮ່ວມ​ແຂ່ງຂັນ​ເອົາ​ລາງວັນ 1.246 ຄົນ ໄດ້​ຮັບ​ລາງວັນ 20 ຄົນ ໃນ​ນີ້ມີ​ຜູ້​ໄດ້​ຮັບ​ລາງວັນ Honda Y-E-S Award Plus 9 ຄົນ ມີ​ຜູ້​ສຳເລັດ​ການ​ສຶກ​ສາລະດັບ​ປະລິນຍາ​ເອກ​ຈາກ​ປະເທດ​ຍີ່ປຸ່ນ 1 ຄົນ ປະລິນຍາ​ໂທ 3 ຄົນ ປະລິນຍາ​ໂທ​ຈາກ​ປະເທດ​ອື່ນ 4 ຄົນ ແລະ ມີ​ຜູ້​ໄດ້​ຮັບ​ລາງວັນ​ຮອນດ້າ​ກຳລັງ​ສຶກ​ສາ​ຕໍ່​ໃນ​ປັດຈຸບັນ 3 ຄົນ ສຳລັບ​ນັກ​ສຶກ​ສາ​ທີ່​ໄດ້​ຮັບລາງວັນ​ປີ 2017 ແມ່ນ​ທ້າວ ສາຍຟ້າ ຣາ​ຊະ​ຈັກ ຈາກ​ພາກ​ວິຊາ​ວິສະວະກຳ​ໄຟຟ້າ ແລະ ທ້າວ ລັດຕະນະ ສີ​ລິ​ສົມ​ຈັນ ພາກ​ວິຊາວິສະວະກຳ​ໂຍທາ.

ທ່ານ ກອງ​ສີ ແສງ​ມະນີ ກ່າວວ່າ: ກະຊວງ ​ສສກ ກຳລັງ​ເລັ່ງປັບປຸງ​ຄຸນະພາບ​ການ​ສຶກ​ສາ ຮັບປະກັນ​ການ​ສ້າງ​ຊັບພະຍາກອນມະນຸດ​ ໃຫ້​ສອດຄ່ອງ​ກັບ​ຄວາມຕ້ອງການ​ຂອງ​ຕະຫຼາດ​ແຮງ​ງານ ເຮັດ​ໃຫ້​ຜູ້​ສຳເລັດ​ການ​ສຶກ​ສາມີທັກ​ສະ​ໃນ​ການ​ວິເຄາະ​ບັນຫາ ຕາມ​ຫຼັກ​ວິທະຍາສາດ ມີ​ການຊອກ​ຮູ້​ຮ່ຳຮຽນ ແລະ ນຳ​ໃຊ້​ບົດຮຽນ​ທີ່​ຍອດ​ຍິ່ງ​ຈາກ​ພາຍ​ໃນ ແລະ ຕ່າງປະເທດ ​ເຂົ້າ​ໃນ​ການພັດທະນາ​ປະເທດ​ຊາດ ໂດຍຜ່ານ​ໜ້າທີ່​ຮັບຜິດຊອບ​ຂອງ​ໃຜລາວ ພ້ອມ​ນີ້ ກະຊວງ ​ສສກ ຍັງໄດ້​ເອົາໃຈໃສ່​ປັບປຸງ​ການ​ຄຸ້ມ​ຄອງ-ບໍລິຫານ​ຂອງ​ບັນດາ​ສະ​ຖາ​ບັນຊັ້ນ​ສູງ ເຊິ່ງ​ລາງວັນ Honda Y-E-S Award ທີ່​ມູນ​ນິທິ​ຮອນດ້າ ໄດ້​ນຳ​ມາ​ຈັດ​ຮ່ວມ​ກັບ ​ມຊ ໃນ 10 ປີຜ່ານມາ ເປັນ​ການ​ປະກອບ​ສ່ວນ​ຢ່າງ​ໃຫຍ່​ຫຼວງ​ ເຂົ້າ​ໃນການ​ພັດທະນາ​ຄຸນະພາບ​ການສຶກ​ສາ ແລະ ການ​ຄຸ້ມ​ຄອງ-ບໍ​ລິຫານຂອງ ​ມຊ ໂດຍ​ສະເພາະຢູ່ ຄວສ ແລະ ສະ​ຖາ​ບັນ​ພັດທະນາຊັບພະຍາກອນ​ມະນຸດ ລາວ-ຍີ່ປຸ່ນ ໃນ​ນາມ​ເປັນ​ຫ້ອງການ​ບໍ​ລິຫານ​ໂຄງການ​ດັ່ງກ່າວ.

ຂ່າວທີ່ກ່ຽວຂ້ອງ