ແຂ່ງຂັນຊ່ວງເຮືອບຶງທາດຫຼວງ ຈະມີຂຶ້ນ 18-22 ຕຸລານີ້

267 13 ຕ.ລ. 2017 ຂ່າວໜ້າ​ໜຶ່ງ
ແຂ່ງຂັນຊ່ວງເຮືອບຶງທາດຫຼວງ ຈະມີຂຶ້ນ 18-22 ຕຸລານີ້

ງານ​ແຂ່ງຂັນ​ຊ່ວງ​ເຮືອ ນະຄອນ​ຫຼວງ​ວຽງ​ຈັນ ປະຈຳ​ປີ 2017 ຢູ່​ບຶງ​ທາດຫຼວງ ເມືອງ​ໄຊເຊດ​ຖາ ນະຄອນຫຼວງ​ວຽງ​ຈັນ​ ຈະຈັດ​ຂຶ້ນ​ວັນ​ທີ 18-22 ຕຸລາ 2017 ປະກອບ​ມີ​ການວາງສະແດງ ແລະ ຂາຍ​ສິນຄ້າ ພ້ອມ​ທັງ​ມີ​ກິດຈະ​ກຳ​ສະແດງ​ສິລະ​ປະ 4 ຈຸດ ການ​ແຂ່ງຂັນຊົກມວຍ ພິເສດ ວັນ​ທີ 21 ຕຸລາ ຈະ​ມີ​ການ​ເປີດ​ພິທີ​ແຂ່ງຂັນ​ເຈດ​ສະ​ກີ ແລະ ຊ່ວງເຮືອ​ເພື່ອ​ຊີງ​ເຂົ້າ​ຮອບ ວັນ​ທີ 22 ຕຸລາ​ຈະ​ໄດ້​ແຂ່ງຂັນ​ເຮືອ​ທີ່​ເຂົ້າຮອບ ແລ້ວ​ແຂ່ງຂັນ​ໄປ​ຈົນ​ຮອບຊີງ​ຊະນະ​ເລີດ​ຂອງ​ແຕ່​ລະ​ປະເພດ​ຈົນ​ສຳເລັດ ເຊິ່ງ​ປະກອບ​ມີເຮືອ​ປະເພນີ​ຍິງ-ຊາຍ 55 ສີພາຍ ເຮືອ​ສູດ​ຊາຍ (ເຮືອ​ດັດແປງ) 55 ສີພາຍ ເຮືອ​ກີລາ 12 ສີພາຍ​ປະເພດ​ຊາຍ ແລະ ເຮືອ​ເຈດ​ສະກີ​ຊາຍ.

ທ່ານ ຖະໜອມ ທຳ​ທອງ ເຈົ້າເມືອງ​ໄຊ​ເຊດ​ຖາ ຖະແຫຼງ​ຂ່າວ​ຕໍ່ສື່​ມວນ​ຊົນ ໃນ​ວັນ​ທີ 11 ຕຸລາ ນີ້ ທີ່​ບຶງ​ທາດຫຼວງ​ວ່າ: ການ​ຈັດ​ງານຄັ້ງ​ນີ້ ເພື່ອ​ເປັນ​ການ​ອະນຸ​ຮັກ​ຮີດຄອງ​ປະເພນີ​ອັນ​ດີງາມ​ຂອງ​ຊາດ ໃຫ້​ຢູ່​ຄູ່​ບ້ານ​ຄູ່​ເມືອງ​ຈົນ​ເຊັ່ນ​ລູກເຊັ່ນ​ຫຼານ​ຕະຫຼອດ​ໄປ ທັງ​ເປັນການ​ໂຄສະນາ​ສົ່ງເສີມ​ວາງ​ສະແດງ-ຂາຍ​ຜະລິດ​ຕະ​ພັນ​ສິນຄ້າຂອງ​ລາວ ແລະ ຂອງ​ຊາວ​ຕ່າງປະເທດ​ທີ່​ເປັນ​ເອກະລັກ ແນໃສ່ສົ່ງເສີມ​ໃຫ້​ນັກ​ລົງທຶນ​ມາ​ລົງທຶນ​ຢູ່ ​ສປປ ລາວ ໂດຍ​ສະເພາະແມ່ນ​ຢູ່ນະຄອນຫຼວງ​ວຽງ​ຈັນ ພິເສດແມ່ນ​ໂຄງການ​ພັດທະນາ​ບຶງທາດຫຼວງຂອງ​ໂຄງການ​ຫວ່ານເຜິງ ຫຼື ເອີ້ນ​ວ່າເມືອງ​ສະຫວັນເທິງ​ດິນ ແລະ ເປັນ​ການ​ກຽມ​ໃຫ້ແກ່​ການ​ເປີດ​ປີ​ທ່ອງ​ທ່ຽວ​ລາວ​ໃນປີ 2018 ນອກ​ນີ້ ເພື່ອ​ສ້າງ​ຄວາມເບີກບານ​ມ່ວນຊື່ນ​ໃຫ້​ແກ່​ຊາວ​ນະຄອນ​ຫຼວງ​ວຽງ​ຈັນ ເວົ້າ​ສະເພາະແມ່ນ​ຊາວ​ລາວ​ທົ່ວ​ປະເທດ ຊາວຕ່າງປະເທດ​ທີ່​ມາ​ດຳລົງ​ຊີວິດ​ຢູ່ລາວ ແລະ ນັກ​ທ່ອງ​ທ່ຽວ​ໃຫ້​ມີບ່ອນ​ທ່ຽວ​ຊົມ​ ໃຫ້​ຮູ້​ເຖິງ​ວັດທະນະທຳ​ອັນ​ດີງາມ​ຂອງ​ຊາດ​ລາວ​ເຮົາ.

ສຳລັບ​ລະດັບ​ຄາດໝາຍ​ແມ່ນຮັກສາ​ໄດ້​ຮີດຄອງ​ປະເພນີ ຮັບ​ປະກັນ​ໃຫ້​ມີ​ຄວາມ​ເບີກບານ​ມ່ວນຊື່ນ ສະຫງົບ ປອດ​ໄພ ມີ​ຄວາມເປັນ​ລະບຽບ​ຮຽບ​ຮ້ອຍ ບໍ່​ໃຫ້​ມີ​ປາກົດ​ການ​ຫຍໍ້ທໍ້​ຕ່າງໆ​ເກີດ​ຂຶ້ນ ເຊັ່ນ: ອຸບັດ​ຕິ​ເຫດ ດຶງ​ກະເປົາ ດື່ມສິ່ງ​ມຶນເມົາ​ແລ້ວ​ອາ​ລະ​ວາດ​ຕີ​ກັນ ການ​ຈະ​ລະ​ຈອນ​ທີ່​ແອ​ອັດ ແລະ ອື່ນໆ ພ້ອມ​ນັ້ນ ເພື່ອ​ຫາ​ລາຍ​ຮັບທີ່​ສາມາດ​ກຸ້ມ​ຕົນ​ເອງ ​ດ້ານ​ລາຍຈ່າຍ​ໃຊ້​ສອຍ​ພາຍ​ໃນ​ງານ ແລະ ມີ​ສ່ວນ​ແຮ​ໄວ້​ເພື່ອ​ເປັນ​ທຶນຮອນ ໃຫ້​ແກ່​ສະຫະພັນ​ຊ່ວງ​ເຮືອ​ຂອງນະຄອນຫຼວງ​ວຽງ​ຈັນ ທີ່​ຈະ​ໄປຮ່ວມ​ແຂ່ງຂັນ​ກີລາ​ແຫ່ງ​ຊາດ ທີ່ແຂວງ​ຊຽງ​ຂວາງ ໃນ​ປີ 2018.

ຂ່າວທີ່ກ່ຽວຂ້ອງ