ມອບທຶນການສຶກສາໃຫ້ນັກຮຽນ ແລະ ຄູ-ອາຈານດີເດັ່ນ

261 13 ຕ.ລ. 2017 ຂ່າວໜ້າ​ໜຶ່ງ
ມອບທຶນການສຶກສາໃຫ້ນັກຮຽນ ແລະ ຄູ-ອາຈານດີເດັ່ນ

ຕະຫຼອດ​ໄລຍະ 20 ປີ ທີ່​ມູນນິທິ​ສົ່ງເສີມ​ການ​ສຶກ​ສາ ​ມສສ ໄດ້​ເຄື່ອນ​ໄຫວ​ປະຕິບັດ​ພາລະ​ບົດບາດ ຕາມ​ຈຸດປະສົງ​ຫຼັກ​ໃນ​ການສົ່ງເສີມ​ນັກຮຽນ​ເກ່ງ ດ້ວຍ​ວິທີໃຫ້​ທຶນ​ການ​ສຶກ​ສາ ໃຫ້​ລາງວັນ ແລະ ອັດຕາ​ກິນ​ຂອງ​ນັກຮຽນເກ່ງ​ຈາກ​ຕ່າງ​ແຂວງ​ທີ່ຢູ່​ຫໍ​ພັກ ມອບ​ທຶນ​ການ​ສຶກ​ສາ​ໃຫ້​ນັກຮຽນຜູ້​ດ້ອຍ​ໂອກາດ ໃນ​ລະດັບ​ມະຫາວິທະຍາໄລ ຊ່ວຍ​ອຸປະກອນ​ການຮຽນ ເຄື່ອງນຸ່ງ ໃນ​ຊັ້ນ​ປະຖົມ​ສຶກສາ ຍ້ອງຍໍ​ຄູ-ອາຈານ​ຜູ້​ດີເດັ່ນ ພ້ອມ​ທັງ​ສ້າງ​ອາຄານ​ຮຽນ 2 ຫຼັງ ແລະ ສົມທົບ​ທຶນ​ສ້າງ​ອາຄານຮຽນ​ຫຼາຍ 10 ຫຼັງ ແລະ ຈັດ​ກິດຈະ​ກຳ​ນັກຮຽນ​ດ້ວຍ​ວິທີ​ເຝິກ​ວາທະ​ສິນ ສິລະ​ປະ ລວມ​ທັງ​ໃຫ້ການ​ຊຸກຍູ້​ອຸປະກອນ​ການ​ຮຽນ-ການ​ສອນ ແລະ ກິດຈະກຳຕ່າງໆ ເພື່ອ​ພັດທະນາ​ວຽກ​ງານຂະແໜງການ​ສຶກ​ສາ.

ທ່ານ ສົມ​ພຽນ ໄຊ​ຍະ​ເດດ ປະທານ ​ມສສ ກ່າວ​ວ່າ: ສຳລັບສົກຮຽນ​ນີ້ ທາງ ​ມສສ ໄດ້​ມອບທຶນ​ການ​ສຶກ​ສາ​ໃຫ້​ກັບ​ນັກຮຽນເກ່ງ​ທົ່ວ​ນະຄອນຫຼວງ ຈຳນວນ 20 ຄົນ ຍິງ 14 ຄົນ ແລະ ມອບທຶນ​ການ​ສຶກ​ສາ​ໃຫ້​ກັບ​ນັກຮຽນ​ຜູ້ດ້ອຍ​ໂອກາດ​ໃນ​ຊັ້ນ​ປະຖົມ​ສຶກ​ສາຢູ່ 4 ເມືອງ​ໃນ ຄື: ເມືອງ​ຈັນທະບູ​ລີ ສີ​ສັດຕະ​ນາກ ໄຊ​ເຊດ​ຖາ ແລະ ສີ​ໂຄດ​ຕະບອງ ເມືອງ​ລະ 20 ຄົນ ລວມ 80 ຄົນ ຍິງ 42 ຄົນ ແລະ ຍ້ອງຍໍ​ຄູ-ອາຈານສອນ​ຜູ້​ດີເດັ່ນ ຈຳນວນ 20 ຄົນ ຍິງ 12 ຄົນ ພ້ອມ​ນີ້ຍັງ​ໄດ້​ຍ້ອງຍໍ​ບັນດາ​ຜູ້​ໃຫ້ການ​ປະກອບສ່ວນຊຸກຍູ້​ວຽກ​ງານ ແລະ ໃຫ້​ທຶນ​ສະໜັບ​ສະ​ໜູນ​ແກ່ ​ມສສ ໃນ​ການປະຕິບັດ​ໜ້າທີ່​ພາລະ​ບົດບາດຂອງ​ຕົນ.

ພິທີ​ມອບ​ທຶນ​ການ​ສຶກ​ສາ​ຄັ້ງ​ນີ້ ຈັດ​ຂຶ້ນ​ວັນ​ທີ 11 ຕຸລາ 2017 ທີ່ໂຮງຮຽນ ​ມສ ວຽງ​ຈັນ ໂດຍ​ມີທ່ານ ພູ​ທອງ ແສງ​ອາຄົມ ອະດີດລັດຖະມົນຕີ​ວ່າການ​ປະຈຳ​ສຳນັກງານ​ນາຍົກລັດຖະມົນຕີ ທ່ານ ຊົມ​ພູ ແກ້ວ​ປັນຍາ ຫົວໜ້າ ພະແນກ​ສຶກ​ສາ​ທິ​ການ ແລະ ກີລາ ນວ ພ້ອມ​ດ້ວຍ​ທ່ານ​ປະທານ​ມູນນິທິ​ສົ່ງເສີມ​ການ​ສຶກ​ສາ ບັນດາທ່ານ​ໃນ​ຄະນະ ​ມສສ ແຂກ​ຖືກເຊີນ ແລະ ພາກສ່ວນ​ກ່ຽວຂ້ອງ ເຂົ້າ​ຮ່ວມ.

ຂ່າວທີ່ກ່ຽວຂ້ອງ