20 ປີແຫ່ງການສ້າງຕັ້ງ ໜັງສືພິມຄວາມສະຫງົບ

151 13 ຕ.ລ. 2017 ຂ່າວໜ້າ​ໜຶ່ງ

ພິທີ​ສະເຫຼີມສະຫຼອງ​ວັນ​ສ້າງ ຕັ້ງ​ໜັງສືພິມ​ຄວາມ​ສະຫງົບ ຄົບຮອບ 20 ປີ (12/10/1997-12/10/2017) ແລະ ເປີດ​ນຳ​ໃຊ້​ເວບໄຊ​ໜັງສືພິມ​ຄວາມ​ສະຫງົບ ຈັດຂຶ້ນ​ວັນ​ທີ 12 ຕຸລາ 2017 ທີ່​ກົມໂຄສະນາ-ບັນນາທິການ​ກະຊວງ ​ປກສ (ສະໜາມ​ມ້າ) ໃຫ້​ກຽດເຂົ້າ​ຮ່ວມ​ຂອງ​ທ່ານ ພົນ​ຈັດ​ຕະວາ ອາ​ລູ ວາລີ​ຊື ຫົວໜ້າ​ກົມໃຫຍ່​ການເມືອງ ກະຊວງ ​ປກສ ພ້ອມ​ດ້ວຍ​ຄະນະ​ພັກ ຄະນະ​ບັນຊາ​ຫ້ອງ​ວ່າການ​ກະຊວງ ກົມໃຫຍ່​ກອງ​ບັນຊາ​ທີ່​ຂຶ້ນ​ກັບ​ກະຊວງ ​ປກສ ຄະນະ​ບັນນາທິການ ພະນັກງານ-ລັດຖະກອນ​ໜັງສືພິມ ​ປກສ ແລະ ແຂກ​ທີ່​ຖືກ​ເຊີນ ເຂົ້າ​ຮ່ວມ.

ທ່ານ ພັນ​ໂທ ພອນ​ສະຫວັນ ອຸດົມ​ເພັດ ຮອງ​ຫົວໜ້າ​ຄະນະ​ບັນນາ​ທິ​ການ​ຂ່າວສານ​ກົມ​ໃຫຍ່ການເມືອງ ກະຊວງ ​ປກສ ຜູ້​ຊີ້​ນຳກອງ​ບັນນາທິການ​ໜັງສືພິມຄວາມ​ສະຫງົບ ລາຍ​ງານ​ຄວາມເປັນ​ມາ ແລະ ທິດ​ທາງ​ການ​ພັດທະ​ນາ​ໜັງສືພິມ​ຄວາມ​ສະຫງົບວ່າ: ການ​ສ້າງຕັ້ງ​ໜັງສືພິມຄວາມ​ສະຫງົບ ​ເລີ່ມ​ຕົ້ນ​ໃນ​ພາວະຄວາມ​ຫຍຸ້ງຍາກ​ທາງ​ດ້ານ​ເສດຖະ​ກິດ ເຊິ່ງ​ນັບ​ແຕ່​ມື້​ສ້າງຕັ້ງເປັນຕົ້ນ​ມາ ໜັງສືພິມ​ຄວາມ​ສະຫງົບ ​ໄດ້​ມີ​ຄວາມ​ພະຍາຍາມ​ໃນການ​ເຮັດ​ໜ້າທີ່​ຕາມ​ພາລະ​ບົດບາດ​ຂອງ​ຕົນ ​ກາຍເປັນ​ກະບອກສຽງ​ກຳລັງ​ປ້ອງ​ກັນ​ຄວາມ​ສະຫງົບ​ໃນ​ວຽກ​ງານ​ໂຄສະນາ-ຖະແຫຼງ​ຂ່າວ ແລະ ສືບຕໍ່​ພັດທະນາຕົນ​ເອງ​ໃນ​ແຕ່​ລະ​ໄລຍະ ເພື່ອສ້າງ​ເງື່ອນໄຂ​ອັນ​ດີ​ໃຫ້​ແກ່​ໜັງສືພິມ​ຄວາມ​ສະຫງົບ ໄດ້​ຮັບ​ການປັບປຸງ​ຕົນ​ເອງ​ໃຫ້​ມີ​ຄວາມ​ທັນ​ສະໄໝ​ຂຶ້ນ​ເທື່ອ​ລະ​ກ້າວ ຕາມ​ທິດ​ຊີ້ນຳ​ຂອງ​ພັກ ເປັນຕົ້ນແມ່ນ​ສ່ອງແສງ​ຄວາມ​ຈິງ​ຖືກຕ້ອງ ພາວະ​ວິໄສ ຊັດ​ເຈນ ວ່ອງໄວ ທັນ​ການສອດຄ່ອງ​ກັບ​ຜົນ​ປະໂຫຍດ​ຂອງຊາດ ແລະ ປະຊາຊົນ ເຮັດ​ໜ້າທີ່ໃນ​ການ​ສຶກ​ສາ​ອົບຮົມ​ໂຄສະນາ ເຜີຍແຜ່​ແນວທາງ​ນະໂຍບາຍຂອງ​ພັກ ລະບຽບ​ກົດໝາຍ​ຂອງລັດ ຄວາມ​ຮູ້​ດ້ານ​ຕ່າງໆ ສົ່ງເສີມວຽກ​ດີ​ຄົນ​ເດັ່ນ ປຸກລະດົມ​ນ້ຳໃຈຮັກ​ຊາດ ແລະ ເຕົ້າໂຮມ​ຄວາມສາມັກຄີ​ເປັນ​ປຶກ​ແຜ່ນ ພ້ອມ​ນັ້ນຍັງ​ເຮັດ​ໜ້າທີ່​ໃນ​ການ​ປົກ​ປ້ອງຄວາມ​ຖືກຕ້ອງ ແນວທາງ​ນະ​ໂຍບາຍ​ຂອງ​ພັກ ຕຳ​ນິ​ວິຈານ​ປາກົດ​ການ​ທີ່​ລະເມີດ​ລະບຽບ​ກົດໝາຍ ສິ່ງ​ຫຍໍ້ທໍ້​ໃນ​ສັງຄົມ ຕອບຕ້ານ​ຖ້ອຍ​ທຳນອງ​ບິດ​ເບືອນ ໃສ່ຮ້າຍ​ປ້າຍ​ສີ​ທີ່​ສ້າງ​ຄວາມ​ເສື່ອມເສຍ​ຕໍ່​ກຽດ​ສັກ​ສີ​ຜົນ​ປະໂຫຍດຂອງ​ຊາດ ແລະ ປະຊາຊົນ.

ຂ່າວທີ່ກ່ຽວຂ້ອງ