ແຈ້ງການ ເລກທີ 675/ຫກ ນະຄອນຫຼວງວຽງຈັນ ວັນທີ 28 ກັນຍາ 2017

167 13 ຕ.ລ. 2017 ຂ່າວໜ້າ​ໜຶ່ງ

ເຖິງ: ພໍ່​ແມ່​ປະຊາຊົນ ຊາວ​ຄ້າຂາຍ ພະນັກງານ ທະຫານ ຕຳຫຼວດ ນັກ​ລົງທຶນ​ພາຍ​ໃນ ແລະ ຕ່າງປະເທດ.

ເລື່ອງ: ບໍ່​ໃຫ້​ຫຼົງ​ເຊື່ອ​ຕໍ່​ການ​ໂຄສະນາ ແລະ ສວຍ​ໃຊ້​ຊື່​ທະນາຄານ ທີ່​ບໍ່​ໄດ້​ຮັບ​ອະນຸຍາດ​ສ້າງຕັ້ງ​ຈາກ​ທະນາຄານ ແຫ່ງ ​ສປປ ລາວ.

- ອີງ​ຕາມ​ກົດໝາຍ​ວ່າ​ດ້ວຍ​ທະນາຄານ ແຫ່ງ ສປປ ລາວ ສະບັບເລກ​ທີ 05/​ສພຊ ລົງ​ວັນ​ທີ 14 ຕຸລາ 1995 ແລະ ກົດໝາຍ​ວ່າ​ດ້ວຍການ​ດັດແກ້ກົດໝາຍ​ສະບັບ​ເລກ​ທີ 05/​ສພຊ ລົງ​ວັນ​ທີ 14 ຕຸລາ 1999.

- ອີງ​ຕາມ​ກົດໝາຍ​ວ່າ​ດ້ວຍ​ທະນາຄານ​ທຸລະ​ກິດ ສະບັບ​ເລກ​ທີ 03/​ສພຊ ລົງ​ວັນ​ທີ 26 ທັນວາ 2006 ແລະ ດຳລັດ​ຈັດ​ຕັ້ງ​ປະຕິບັດ​ກົດໝາຍວ່າ​ດ້ວຍ​ທະນາຄານ​ທຸລະ​ກິດ ສະບັບ​ເລກ​ທີ 275/​ນຍ ລົງວັນ​ທີ 25 ກັນຍາ 2006.

ຫ້ອງການ​ທະນາຄານ ແຫ່ງ ​ສປປ ລາວ ຂໍ​ຖື​ເປັນ​ກຽດ​ແຈ້ງ​ມາຍັງ​ພໍ່​ແມ່​ປະຊາຊົນຊາວ​ຄ້າຂາຍ ພະນັກງານ ທະຫານ ຕຳຫຼວດ ນັກ​ລົງທຶນ​ພາຍ​ໃນ ແລະ ຕ່າງ​ປະເທດ​ຊາບ​ວ່າ ປັດຈຸບັນ​ມີ​ບຸກຄົນ ແລະ ນິຕິບຸກຄົນ​ຈຳນວນ​ໜຶ່ງ ເຄື່ອນ​ໄຫວ​ໂດຍ​ສວຍ​ໃຊ້​ຊື່​ທະ​ນາຄານ ເປັນຕົ້ນ​ແມ່ນ ທະນາຄານລາວ​ພັດທະນາ​ການ​ກະເສດ ຈຳກັດ ທະນາຄານ​ເພື່ອ​ການ​ນຳ​ເຂົ້າ ແລະ ສົ່ງ​ອອກ​ລາວ ທະນາຄານເຊັນ​ຊາ ຈຳກັດ ຫຼື ອື່ນໆ ຊຶ່ງ​ທະນາ​ຄານ​ທີ່​ກ່າວ​ມາ​ນີ້ ບໍ່​ໄດ້​ຮັບ​ອະນຸ​ຍາດ​ສ້າງຕັ້ງ​ຈາກ​ທະນາຄານ ແຫ່ງ ​ສປປ ລາວ ແລະ ບໍ່​ມີ​ຕົວ​ຕົນຢູ່ ​ສປປ ລາວ ສະນັ້ນ ເພື່ອ​ຫຼີກລ່ຽງ​ບັນຫາ​ທີ່​ຈະ​ສ້າງ​ຄວາມ​ບໍ່ສະຫງົບ ແລະ ເພື່ອ​ປ້ອງ​ກັນຄວາມ​ເສຍ​ຫາຍ​ອາດ​ເກີດ​ຂຶ້ນ​ໃນສັງຄົມ ທະນາຄານ ແຫ່ງ ​ສປປ ລາວ ຈຶ່ງ​ອອກ​ແຈ້ງ​ການ​ມາ​ຍັງພາກສ່ວນ​ຕ່າງໆ​ດັ່ງນີ້:

1. ໃຫ້​ມີ​ສະຕິ ແລະ ບໍ່​ໃຫ້​ຫຼົງເຊື່ອ​ຕໍ່​ການ​ໂຄສະນາ ໃຫ້​ເຂົ້າຮ່ວມ​ທຶນ ຫຼື ເຮັດ​ທຸລະ​ກຳກັບ​ບຸກຄົນ​ທີ່​ອ້າງ​ຊື່ ຊື່​ທະນາຄານ​ລາວ ພັດທະນາ​ການ​ກະເສດ ຈຳກັດ ທະນາຄານເຊັນ​ຊາ ຈຳກັດ ທະນາ​ຄານ​ເພື່ອ​ການ​ນຳ​ເຂົ້າ ແລະ ສົ່ງ​ອອກ​ລາວ ເນື່ອງ​ຈາ​ກວ່າ​ທັງ 3 ທະນາຄານ​ທີ່​ກ່າວ​ມາ​ນີ້ ບໍ່​ໄດ້ຮັບ​ອະນຸຍາດ​ສ້າງຕັ້ງ​ຈາກ​ທະ​ນາຄານ ແຫ່ງ ສປປ ລາວ.

2. ຖ້າ​ບຸກຄົນ ຫຼື ນິຕິບຸກຄົນ ນັກ​ລົງທຶນ​ພາຍ​ໃນ ແລະ ຕ່າງ​ປະເທດ ສົນໃຈ​ເຮັດ​ທຸລະ​ກຳ​ນຳ​ທະນາ​ຄານ​ທຸລະ​ກິດ​ຢູ່ ສປປ ລາວ ແມ່ນ​ສາມາດ​ເຂົ້າ​ມາ​ພົວພັນ​ກັບກົມ​ຄຸ້ມ​ຄອງ​ທະນາຄານ​ທຸລະ​ກິດ ທະນາຄານ ແຫ່ງ ສປປ ລາວ ຫຼື ທ່ານ​ສາມາດ​ໂທ​ເຂົ້າ​ມາ​ສອບຖາມ​ຂໍ້​ມູນ​ໄດ້ ເບີ​ໂທ: 021 223362 (ພະແນກການ​ຂໍ​ສ້າງຕັ້ງ) ສຳລັບ​ລາຍ​ຊື່​ບັນດາ​ທະ​ນາຄານ​ທຸລະ​ກິດ​ທີ່​ໄດ້​ຮັບ​ອະນຸຍາດສ້າງຕັ້ງ​ຢູ່ ສປປ ລາວ ທ່ານ​ສາມາດ​ເຂົ້າ​ໄປ​ກວດເບິ່ງ​ຢູ່​ໃນ​ເວັບໄຊ​ຂອງ ທຫລ (www.bol.gov.la).

ດັ່ງນັ້ນ ຈຶ່ງ​ແຈ້ງ​ມາ​ຍັງ​ພໍ່​ແມ່​ປະຊາ​ຊົນ ຊາວ​ຄ້າຂາຍ ພະນັກງານ ທະຫານ ຕຳຫຼວດ ນັກ​ລົງທຶນ​ທັງພາຍ​ໃນ ແລະ ຕ່າງປະເທດ ເພື່ອຊາບ ແລະ ຈົ່ງ​ມີ​ສະຕິ​ບໍ່​ໃຫ້​ຫຼົງເຊື່ອ​ຕໍ່​ການ​ໂຄສະນາ ແລະ ການສວຍ​ໃຊ້​ຊື່​ທະນາຄານ​ທີ່​ບໍ່​ໄດ້​ຮັບອະນຸຍາດ​ສ້າງຕັ້ງ​ຈາກ​ທະ​ນາຄານ ແຫ່ງ ​ສປປ ລາວ.

ຫົວໜ້າ​ຫ້ອງການ

ເພັດ​ສະຖາພອນ ແກ້ວ​ວົງ​ວິຈິດ

ຂ່າວທີ່ກ່ຽວຂ້ອງ