ສະພາແຫ່ງຊາດ ຈະພິຈາລະນາຮັບຮອງເອົາບັນຫາສຳຄັນ

434 12 ຕ.ລ. 2017 ຂ່າວໜ້າ​ໜຶ່ງ
ສະພາແຫ່ງຊາດ ຈະພິຈາລະນາຮັບຮອງເອົາບັນຫາສຳຄັນ

ທ່ານ​ນາງ ສວນ​ສະຫວັນ ວິ​ຍະເກດ ຄະນະ​ປະຈຳ​ສະພາ​ແຫ່ງຊາດ ເລຂາທິການ​ສະພາ​ແຫ່ງຊາດ​ ໄດ້​ຖະແຫຼງ​ຂ່າວ​ກ່ຽວ​ກັບການ​ດຳເນີນ​ກອງ​ປະຊຸມ​ສະໄໝສາມັນ​ເທື່ອ​ທີ 4 ຂອງ​ສະພາແຫ່ງ​ຊາດ ຊຸດ​ທີ VIII ຂຶ້ນ​ວັນ​ທີ 11 ຕຸລາ 2017 ທີ່​ສະພາ​ແຫ່ງຊາດ ວ່າ: ກອງ​ປະຊຸມ​ສະໄໝ​ສາມັນ​ເທື່ອ​ທີ 4 ຂອງ​ສະພາ​ແຫ່ງຊາດ ຊຸດ​ທີ VIII ຈະ​ໄດ້​ໄຂ​ຂຶ້ນໃນ​ລະຫວ່າງ​ວັນ​ທີ 16 ຕຸລາ​ຫາ 17 ພະຈິກ 2017 ທີ່​ຫ້ອງ​ປະຊຸມສະພາ​ແຫ່ງ​ຊາດ (ຫຼັກ 6) ນວ ເຊິ່ງ​ກອງ​ປະຊຸມ​ຄັ້ງ​ນີ້​ ຈະ​ໄດ້​ຮັບຟັງ​ການ​ລາຍ​ງານ​ພິຈາລະນາ ແລະ ຕົກລົງ​ບັນຫາ​ສຳຄັນ​ຕ່າງໆ ຄື: ບົດ​ລາຍ​ງານ​ໂດຍ​ສັງເຂບຂອງ​ທ່ານ​ນາຍົກລັດຖະມົນຕີ ກ່ຽວ​ກັບ​ການຈັດຕັ້ງ​ປະຕິບັດແຜນ​ພັດທະນາ​ເສດຖະກິດ-ສັງຄົມ ແຜນ​ງົບປະມານ​ແຫ່ງ​ລັດ ແລະ ແຜນ​ເງິນຕາ ປະຈຳ​ປີ 2017 ແຜນການ​ປະຈຳ​ປີ 2018 ບົດ​ລາຍ​ງານ​ຂອງ​ລັດຖະບານກ່ຽວ​ກັບ​ການຈັດຕັ້ງ​ປະຕິບັດ ແຜນ​ພັດທະນາ​ເສດຖະກິດ-ສັງຄົມ ປະຈຳ​ປີ 2017 ແລະ ທິດທາງ​ແຜນການ ປະຈຳ​ປີ 2018 ບົດ​ລາຍ​ງານ​ຂອງ​ລັດຖະບານ ກ່ຽວ​ກັບ​ການຈັດຕັ້ງ​ປະຕິບັດແຜນ​ງົບປະມານ​ແຫ່ງ​ລັດ ປະຈຳປີ 2017 ແລະ ທິດ​ທາງ​ແຜນການ​ປະຈຳ​ປີ 2018 ບົດ​ລາຍງານ​ຂອງ​ລັດຖະບານ ກ່ຽວ​ກັບການຈັດຕັ້ງ​ປະຕິບັດ​ແຜນ​ເງິນຕາ ປະຈຳ​ປີ 2017 ແລະ ທິດ​ທາງແຜນການ ປະຈຳ​ປີ 2018 ຮັບຟັງ​ລາຍ​ງານ​ກ່ຽວ​ກັບ​ການຈັດຕັ້ງປະຕິບັດ​ວຽກ​ງານ​ທ່ອງ​ທ່ຽວ​ໃນຊຸມ​ປີຜ່ານມາ ແລະ ທິດ​ທາງແຜນການ​ໃນ​ປີ 2018 ບົດ​ລາຍງານ​ກ່ຽວ​ກັບ​ການຈັດຕັ້ງ​ປະຕິບັດແຜນການ ປະຈຳ​ປີ 2017 ແລະ ທິດ​ທາງ​ແຜນການ ປະຈຳ​ປີ 2018 ຂອງ​ສະພາ​ແຫ່ງ​ຊາດ ບົດປະກອບ​ຄຳ​ເຫັນ​ຂອງ​ສູນ​ກາງແນວ​ລາວ​ສ້າງ​ຊາດ ແລະ ຕາງໜ້າ​ອົງ​ການຈັດຕັ້ງ​ມະຫາຊົນ​ຂັ້ນສູນ​ກາງ ​ຕໍ່​ບົດ​ລາຍ​ງານ​ການ​ຈັດຕັ້ງ​ປະຕິບັດ​ວຽກ​ງານ ປະຈຳ​ປີ 2017 ແລະ ແຜນການ​ປະຈຳ​ປີ 2018 ຂອງ​ສະພາ​ແຫ່ງ​ຊາດ ບົດລາຍ​ງານ​ກ່ຽວ​ກັບ​ການຈັດຕັ້ງ​ປະຕິ​ບັດ​ແຜນການເຄື່ອນໄຫວ​ວຽກງານ ປະຈຳ​ປີ 2017 ແລະ ທິດທາງ​ແຜນການເຄື່ອນໄຫວ​ວຽກງານ ປະຈຳ​ປີ 2018 ຂອງ​ອົງການ​ກວດ​ສອບ​ແຫ່ງ​ລັດ ບົດລາຍ​ງານ​ກ່ຽວ​ກັບ​ຜົນ​ການ​ກວດ ສອບບົດ​ສະຫຼຸບ​ຂາດ​ຕົວ ການຈັດ​ຕັ້ງ​ປະຕິບັດ​ແຜນ​ງົບປະມານແຫ່ງ​ລັດ ສົກ​ປີ 2015-2016 ບົດລາຍ​ງານ​ຂອງ​ອົງການ​ກວດກາລັດຖະບານ ​ກ່ຽວ​ກັບ​ຜົນ​ການກວດກາ​ຕາມ​ຜົນ​ການ​ກວດ​ສອບ ການຈັດຕັ້ງ​ປະຕິບັດ​ແຜນ​ງົບ​ປະມານ​ແຫ່ງ​ລັດ ສົກ​ປີ 2013-2014 ແລະ ສົກ​ປີ 2014-2015 ແລະ ຮັບ​ຟັງ​ບົດ​ລາຍ​ງານ​ກ່ຽວກັບ​ການຈັດຕັ້ງ​ປະຕິບັດ​ແຜນການເຄື່ອນໄຫວ​ວຽກ​ງານ ປະຈຳປີ 2017 ແລະ ທິດ​ທາງ​ແຜນການເຄື່ອນໄຫວ​ວຽກ​ງານ ປະຈຳປີ 2018 ຂອງ​ອົງການ​ໄອ​ຍະການ​ປະຊາຊົນ​ສູງ​ສຸດ ແລະ ສານ​ປະຊາຊົນ​ສູງ​ສຸດ ບົດ​ລາຍງານ​ຂອງ​ກະຊວງ​ຍຸຕິ​ທຳ​ກ່ຽວ​ກັບການຈັດຕັ້ງ​ປະຕິບັດ​ຄຳ​ຕັດສິນຂອງ​ສານ ​ທີ່​ໃຊ້​ໄດ້​ຢ່າງ​ເດັດຂາດໃນ​ໄລຍະ​ຜ່ານ​ມາ ແລະ ທິດ​ທາງແກ້​ໄຂ​ໃນຕໍ່ໜ້າ ແລະ ພິ​ຈາລະນາ​ຮັບຮອງ​ເອົາ​ຮ່າງ​ກົດໝາຍສ້າງ​ໃໝ່ ແລະ ຮ່າງ​ກົດໝາຍ​ປັບປຸງ​ ລວມ​ທັງ​ໝົດ 16 ສະບັບ.

ຂ່າວທີ່ກ່ຽວຂ້ອງ