ລາວ-ຫວຽດນາມ ປະເມີນການຮ່ວມມືວຽກງານປ່າໄມ້

460 12 ຕ.ລ. 2017 ຂ່າວໜ້າ​ໜຶ່ງ
ລາວ-ຫວຽດນາມ ປະເມີນການຮ່ວມມືວຽກງານປ່າໄມ້

ກອງ​ປະຊຸມ​ທົບ​ທວນຄືນ ​ຜົນການຈັດຕັ້ງ​ປະຕິບັດບົດ​ບັນທຶກຄວາມ​ເຂົ້າໃຈ (MOU) ກ່ຽວກັບ​ການ​ຮ່ວມ​ມື​ທາງ​ດ້ານ​ການບັງຄັບ​ໃຊ້​ກົດໝາຍ​ວ່າ​ດ້ວຍ​ປ່າໄມ້ ກົດໝາຍ​ວ່າ​ດ້ວຍ​ສັດ​ນ້ຳ ແລະ ສັດປ່າ ເພື່ອ​ກວດກາ ແລະ ສະກັດ​ກັ້ນ​ການ​ຄ້າຂາຍ ການເຄື່ອນ​ຍ້າຍ​ເຄື່ອງ​ປ່າ​ຂອງ​ດົງ ສັດ​ນ້ຳ ແລະ ສັດປ່າ ໄລຍະ 2012 ຫາ 2017 ແລະ ສືບຕໍ່​ປຶກສາ​ຫາລື​ການ​ສ້າງ MOU ໄລຍະ 2018-2020 ລະຫວ່າງກົມປ່າໄມ້ ກະຊວງ​ກະສິກຳ ແລະ ປ່າໄມ້ ​ສປປ ລາວ ແລະ ກົມປ້ອງ​ກັນ​ປ່າໄມ້ ​ສສ ຫວຽດນາມ ຈັດ​ຂຶ້ນ​ໃນ​ວັນ​ທີ 10 ຕຸລາ 2017 ທີ່​ໂຮງແຮມຄຣາວ​ພລາ​ຊາ ຝ່າຍລາວ​ນຳ​ໂດຍ​ທ່ານ ຄຳ​ພຸດ ພັນດາ​ນຸ​ວົງ ຫົວໜ້າ​ກົມ​ກວດກາ​ປ່າໄມ້ ກະຊວງ​ກະສິກຳ ແລະ ປ່າໄມ້ ຝ່າຍ ​ສສ ຫວຽດນາມ ນຳ​ໂດຍທ່ານ ຫງຽນ ກວັກ ຈິ ຮອງ​ຫົວໜ້າ​ກົມ​ໃຫຍ່​ປ່າໄມ້ ຫົວໜ້າ​ກົມປ້ອງ​ກັນ​ປ່າໄມ້ ກະຊວງ​ກະສິກຳ ແລະ ພັດທະນາ​ຊົນນະບົດ ​ສສ ຫວຽດນາມ ພ້ອມ​ດ້ວຍ​ເຈົ້າ​ໜ້າທີ່​ທີ່​ກ່ຽວຂ້ອງ​ທັງ​ສອງ​ຝ່າຍ​ເຂົ້າຮ່ວມ.

ກອງ​ປະຊຸມ​ຄັ້ງ​ນີ້ ທັງ​ສອງ​ຝ່າຍໄດ້​ຜັດປ່ຽນ​ກັນ​ຂຶ້ນ​ລາຍ​ງານ​ສະພາບ​ການຈັດຕັ້ງ​ປະຕິບັດ​ວຽກງານ​ໄລຍະ​ຜ່ານ​ມາ ເຊິ່ງ​ທັງ​ສອງກົມ​ໄດ້​ແລກປ່ຽນ​ຂໍ້​ມູນ​ຂ່າວສານດ້ານ​ກົດໝາຍ ແລະ ບັນດາ​ນິຕິກຳ​ຂອງລາວ-ຫວຽດນາມ ກ່ຽວກັບ​ການ​ຄຸ້ມ​ຄອງ ການ​ກວດກາ ການ​ນຳ​ເຂົ້າ-ການ​ສົ່ງ​ອອກ​ໄມ້ ເຄື່ອງ​ປ່າ​ຂອງ​ດົງ ສັດ​ນ້ຳ-ສັດປ່າຂອງ​ສອງ​ປະເທດ ໂດຍ​ຜ່ານ​ກອງປະຊຸມ​ປະຈຳ​ປີ ເຊິ່ງ​ກົມ​ກວດກາປ່າໄມ້ ໄດ້​ຊຸກຍູ້​ໃຫ້​ບັນດາ​ແຂວງຂອງ​ລາວ ແລະ ຫວຽດນາມ ເຊິ່ງ​ໄດ້​ກຳນົດ​ເອົາ​ໄວ້​ໃນ​ແຜນ​ປະຈຳປີ ມາ​ຮອດ​ປັດຈຸບັນ ມີ​ແຂວງທີ່​ມີ​ບົດ​ບັນທຶກ​ຮ່ວມ​ກັນ ປະກອບມີ: ແຂວງ​ຫົວພັນກັບ​ແຂວງແທ້ງ​ຫົວ ແລະ ເຊີນ​ລາ ແຂວງບໍ​ລິ​ຄຳ​ໄຊ-ຄຳ​ມ່ວນກັບແຂວງຮ່າ​ຕິ້ງ ແລະ ກວາງ​ບິ່ງ ແຂວງເຊ​ກອງກັບແຂວງ​ເທື່ອ​ທຽນເຫວ້ ແລະ ແຂວງ​ກວາງ​ນາມ ແຂວງ​ອັດ​ຕະ​ປື ແລະ ແຂວງກອນ​ຕຸມ ແຂວງ​ສາລະ​ວັນກັບແຂວງ​ເທື້ອ​ທຽນ​ເຫວ້.

ໃນ​ການຈັດຕັ້ງ​ປະຕິບັດ​ແຜນການເຄື່ອນໄຫວ ປະຈຳ​ປີ 2016-2017 ພາຍຫຼັງ​ທີ່​ໄດ້​ວາງ​ແຜນການເຄື່ອນໄຫວ​ຮ່ວມ​ມື​ກັນ ໃນກອງ​ປະຊຸມ​ປະຈຳ​ປິ 2015-2016 ທີ່​ແຂວງ​ດາ​ນັງ ໄດ້​ມີ​ການ​ແລກປ່ຽນ​ຂໍ້​ມູນ​ຂ່າວສານ ກ່ຽວ​ກັບການ​ອອກ​ລະບຽບ​ການ ນະ​ໂຍບາຍ​ໃໝ່ ກ່ຽວ​ກັບ​ການ​ປົກ​ປັກ​ຮັກສາ​ການ​ຄຸ້ມ​ຄອງ​ປ່າໄມ້ ການ​ຄ້າຂາຍ​ໄມ້ ສັດ​ນ້ຳ ແລະ ສັດປ່າ ພ້ອມ​ທັງ​ໄດ້​ຈັດ​ກອງ​ປະຊຸມ​ສະຫຼຸບ​ປະຈຳ​ປີ ລະຫວ່າງສອງ​ພະ​ແນກກະສິກຳ ແລະ ພັດທະນາ​ຊົນ​ນະບົດ ແຂວງ​ຮ່າ​ຕິ້ງ ກັບ​ພະ​ແນກ​ກະສິ​ກຳ ແລະ ປ່າໄມ້ ແຂວງ​ຄຳມ່ວນ ແລະ ບໍ​ລິ​ຄຳ​ໄຊ ໃນ​ລະຫວ່າງວັນ​ທີ 8-9 ຕຸລາ 2017 ຜ່ານ​ມາ ພ້ອມ​ທັງ​ຊຸກຍູ້​ໃຫ້​ບັນດາກອງ​ກວດກາ​ປ່າໄມ້ ​ສປປ ລາວ ແລະ ກອງ​ປ້ອງ​ກັນ​ປ່າໄມ້ ໃຫ້​ມີການ​ເຊັນ​ບົດ​ບັນທຶກກ່ຽວ​ກັບການຈັດຕັ້ງ​ປະຕິບັດ​ກົດໝາຍ​ປ່າໄມ້ ແລະ ການ​ຄ້າຂາຍ​ສັດ​ນ້ຳ ແລະ ສັດປ່າ ຢູ່​ລະດັບ​ແຂວງຮ່ວມ​ກັນ ເຊັ່ນ: ແຂວງ​ອັດ​ຕະ​ປຶ ແລະ ແຂວງ​ກອນ​ຕຸມ ແຂວງ​ຜົ້ງສາລີ ແລະ ດຽນ​ບຽນ ແຂວງ​ເຊກອງກັບແຂວງ​ກວາງ​ນາມ ແຂວງ​ຄຳ​ມ່ວນກັບແຂວງກວາງ​ບິ່ນ ແຂວງ​ສາລະ​ວັນກັບແຂວງ​ເທື້ອ​ທຽນ​ເຫວ້ ແລະ ໃນວັນ​ທີ 19 ຕຸລາ 2017 ທີ່​ຈະ​ມາເຖິງ ພະ​ແນກ​ກະສິກຳ ແລະ ປ່າໄມ້ ແຂວງ​ອັດ​ຕະ​ປື ແລະ ພະແນກ​ກະສິກຳ ແລະ ພັດທະນາຊົນນະບົດ ແຂວງ​ກອນ​ຕຸມ ຈະ​ໄດ້ເຊັນ​ບົດ​ບັນທຶກ​ຮ່ວມ​ກັນ ກ່ຽວ​ກັບກົນ​ໄກ​ການ​ຮ່ວມ​ມື​ເຂດ​ຊາຍ​ແດນ ລາວ-ຫວຽດນາມ ໃນ​ການ​ກວດກາ​ລາດຕະເວນ ສະພາບ​ການຂຸດ​ຄົ້ນ​ໄມ້ ການ​ຕັດ​ໄມ້​ທຳລາຍປ່າ ເຄື່ອງ​ປ່າ​ຂອງ​ດົງ ສັດ​ນ້ຳ ແລະ ສັດປ່າທີ່​ຜິດ​ກົດໝາຍ ປະຈຳປີ 2017 ແລະ ບັນຫາ​ອື່ນໆ​ທີ່ຕິດ​ກັບ​ວຽກ​ງານ​ກົດໝາຍ ແລະ ນິຕິ​ກຳ​ຕ່າງໆ​ທີ່​ກ່ຽວຂ້ອງ​ກ່ຽວ​ກັບວຽກ​ງານ​ປ່າໄມ້​ຂອງ​ສອງ​ປະເທດ.

ຂ່າວທີ່ກ່ຽວຂ້ອງ