ສົກ­ຮຽນ​ໃໝ່ ຄິດ​ໃໝ່ - ໂດຍ : ດັ້ນ​ກີບ​ເມກ

462 03 ຕ.ລ. 2017 ນານາສາລະ

ໄລ­ຍະ​ເປີດ​ສົກ­ຮຽນ​ໃໝ່ ເປັນ​ໄລ­ຍະ​ທີ່​ເຮັດ​ໃຫ້​ພໍ່ແມ່​ຂອງ​ນັກ­ຮຽນ​ຕ້ອງ​ໄດ້​ຈ່າຍ​ເງິນ​ເພີ່ມ​ອີກ​ໃນການ​ຊື້​ເຄື່ອງ­ນຸ່ງ ຊຸດ​ນັກ­ຮຽນ​ໃຫ້​ແກ່​ລູກ​ຫຼານ ຜູ້ຂຽນ​ຈຶ່ງ​ຂໍ​ຝາກ​ຄຳ​ເຫັນ​ໄວ້​ບ່ອນ​ນີ້​ວ່າ ການ​ລ້ຽງ​ດູ ຫຼື ປົກ­ຄອງ​ລູກ​ຫຼານ​ນັ້ນ​ເຮົາ​ຕ້ອງ​ໄດ້​ເອົາ­ໃຈ­ໃສ່ຫຼາຍ​ຂຶ້ນ ເພື່ອ​ປະ­ຄອງ​ໃຫ້​ພວກ​ເຂົາ​ເດີນ​ຖືກ​ທາງ ຈົນ​ກວ່າ​ຈະ​ບັນ­ລຸ​ພາ­ວະ​ຂອງ​ຄວາມ​ເປັນ​ໄວ​ລຸ້ນ ເວົ້າ​ສະ­ເພາະ​ກໍ່​ແມ່ນວິ­ທີ​ການ​ອົບ­ຮົມລ້ຽງ​ດູ ເຊິ່ງບໍ່​ໝາຍ​ຄວາມ​ວ່າ ມີ​ລົດ​ຄັນ​ງາມ​ໃຫ້​ຂີ່ ມີ​ເງິນ​ໃສ່ກະ​ເປົ໋າ ຫຼື ໃສ່​ຊຸດ​ງາມໆ​ກະ​ແລ້ວ​ໂລດ ເພາະນັ້ນມັນ​ເປັນ​ພຽງ​ແຕ່​ການ​ລ້ຽງ​ທາງ​ຮ່າງ­ກາຍ ເຊິ່ງ​ຍັງຕ້ອງ​ເວົ້າ​ເຖິງ​ແນວ​ຄິດ​ຈິດ­ໃຈ​ທີ່​ເຮົາ​ຕ້ອງ​ໄດ້​ອົບ­ຮົມບົ່ມ​ສອນ​ໃຫ້​ເຂົາ­ເຈົ້າ​ຮູ້­ຈັກ​ຄິດ ຮູ້­ຈັກ​ຊັ່ງ­ຊາ​ອັນ​ຖືກອັນ​ຜິດ ແລະ ອັນ​ໃດ​ທີ່​ມັນ​ເໝາະ​ສົມ​ກັບ​ໄວ​ອາ­ຍຸຂອງ​ເຂົາ.

ຜູ້​ຂຽນ​ຢາກ​ເວົ້າ​ເນັ້ນ​ເລື່ອງ​ການ​ເຝິກ­ອົບ­ຮົມ​ບົ່ມນິ­ໄສ​ລູກ​ຫຼານ ເຊິ່ງ​ເປັນ​ເລື່ອງ​ຂອງ​ແນວ​ຄິດ​ຈິດ­ໃຈທີ່​ມັນ​ກ່ຽວ­ຂ້ອງ​ໂດຍກົງ​ເຖິງ​ວັດ­ທະ­ນະ­ທຳ ມາ​ລະຍາດ​ຂອງ​ສັງ­ຄົມ ໂດຍ​ສະ­ເພາະການ​ໄປ​ມາ ຂັບຂີ່​ລົດ­ຍົນ ຫຼື ການ​ປາກ​ເວົ້າສິ່ງ​ຕ່າງໆ​ເຫຼົ່າ​ນີ້​ຄື ເລື່ອງ​ວັດ­ທະ­ນະ­ທຳ​ທີ່​ບໍ່​ຄວນ​ເບິ່ງ​ຂ້າມ ເພາະ​ມັນເປັນ​ສິ່ງ​ສະ­ແດງ​ອອກ​ວ່າແນວ​ຄິດ​ຈິດ­ໃຈ​ຂອງ​ຄົນໃນ​ສັງ­ຄົມ​ນັ້ນໆເປັນ​ແບບ​ໃດ! ໝາຍ​ຄວາມ​ວ່າ ຖ້າ​ເສດ­ຖະ­ກິດ​ຄອບ­ຄົວ​ດີ​ ພັດ​ຫຼົງ​ຄິດ​ວ່າ ວັດ­ທະ­ນະທຳ​ບໍ່​ສຳ­ຄັນ ແຕ່​ຄວາມ​ຈິງ​ແມ່ນ​ສິ່ງຈຳ­ເປັນ​ສຳລັບ​ການ​ຢູ່​ຮ່ວມ​ກັນ.

ຖ້າ​ເຮົາ​ຫວນ​ຄິດ​ເຖິງ​ບາງ​ປະ­ເທດ​ໃນ​ພາກ​ຕາເວັນ​ຕົກ​ທີ່​ເຂົາ​ເນັ້ນ​ນະ­ໂຍ­ບາຍ​ການ​ສຶກ​ສາ ແລະ ວັດ­ທະ­ນະ­ທຳ​ໄປ​ພ້ອມກັນ​ນັ້ນ ແມ່ນ​ເຂົາ​ຢາກ​ສ້າງຄົນ​ທັງ​ເກ່ງ ແລະ ດີ ມີ​ມາ­ລະ­ຍາດ ມັນ​ຈຶ່ງ​ບົ່ງບອກ​ເຖິງ​ຄວາມ​ຈະ­ເລີນ​ຂອງ​ມະ­ນຸດ ແຕ່​ຖ້າ­ວ່າຄົນ​ໃດ​ໜຶ່ງ​ມີ​ການ​ສຶກ​ສາ​ສູງ ແຕ່​ຂາດ​ຄຸ​ນະ​ທຳ ຂາດ​ມາ­ລະ­ຍາດ ເຫັນ​ແຕ່​ປະ­ໂຫຍດ​ຕົນ ຄຸນ​ສົມບັດ​ແບບ​ນັ້ນ​ຄິດ​ວ່າ​ສັງ­ຄົມ​ກະ​ບໍ່​ຕ້ອງ­ການ.

ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ຈຶ່ງໄດ້​ເວົ້າ​ເນັ້ນ​ໃນ​ໂອ­ກາດ​ເປີດ​ສົກ­ຮຽນ​ໃໝ່​ວ່າ: ລັດຖະ​ບານ​ຖື​ສຳ­ຄັນ​ວຽກງານ​ສ້າງ​ໂອ­ກາດ​ໃຫ້​ທຸກຄົນ​ໄດ້​ມີ​ໂອ­ກາດ​ເຂົ້າ​ເຖິງ​ການ​ສຶກ​ສາ ແລະ ປັບປຸງ​ຄຸ­ນະ­ພາບ​ການ​ຮຽນ-ການ​ສອນ ພັດ­ທະ­ນາ  ຊັບ­ພະ­ຍາ­ກອນ​ມະ­ນຸດ​ຂອງ​ຊາດ​ໃຫ້​ມີ​ຄຸ­ນະ­ພາບ ເພື່ອ​ຕອບ​ສະ­ໜອງ​ຄວາມ​ຕ້ອງ­ການ​ໃນ​ການ​ພັດທະ​ນາ​ໃຫ້​ປະ­ເທດ​ຫຼຸດ​ພົ້ນ​ຈາກ​ຄວາມ​ດ້ອຍ​ພັດ​ທະນາ (ໜັງ­ສື­ພິມ​ວຽງ​ຈັນ​ໃໝ່ ວັນ​ທີ 1 ກັນ­ຍາ 2017) ຜູ້​ຂຽນ​ພຽງ​ແຕ່​ຍົກ​ເອົາ​ປະ­ເດັນ​ສັ້ນໆ ເພື່ອຝາກ​ສັງ­ຄົມ​ຊ່ວຍ​ກັນ​ຄິດ​ວ່າ ການ​ສ້າງ​ຊັບ​ພະ­ຍາກອນ​ມະ­ນຸດ ແລະ ການ​ຮຽນ-ການ​ສອນ ໃຫ້​ໄດ້ຄຸ­ນະ­ພາບ​ນັ້ນ ຄື​ໝາກຫົວ­ໃຈ​ສຳ­ຄັນ​ຂອງ​ຂະບວນ​ການ​ສຶກ​ສາ ທີ່​ສຳ­ຄັນ​ຜູ້​ບໍ­ລິ­ຫານ​ການ​ສຶກ​ສາ ຜູ້­ອຳ­ນວຍ­ການ ແລະ ຝ່າຍ​ວິ­ຊາ​ການ​ຂອງ​ສະຖາບັນ​ການ​ສຶກ​ສາ ​ຈະ​ເອົາ­ໃຈ­ໃສ່​ພຽງ​ໃດ​ນັ້ນ ຍັງ​ເປັນສິ່ງ​ທີ່​ໜ້າ​ຄິດ​ຢູ່ ເພາະ­ວ່າ​ຖ້າ​ຜູ້​ບໍ­ລິ­ຫານ​ເມີນ­ເສີຍ ເຖິງ​ແມ່ນ​ວ່າຈະ​ມີງົບ­ປະ­ມານ​ກະ­ຊວງ​ໃຫ້​ທຸກ​ປີ ແຕ່​ບໍ່​ໄດ້​ລົງ­ມື​ເຮັດ ບໍ່​ໄດ້​ລົງ­ມື​ພັດ­ທະ­ນາ​ຄູ ຍົກ​ລະດັບ​ວຸດ​ທິ​ວິ­ຊາ​ການ ແລະ ຂາດ​ການ​ເຝິກ­ອົບ­ຮົມນັ້ນ ຈະ​ເຮັດ​ໃຫ້­ການ​ຮຽນ ແລະ ການ​ສອນ​ມີ​ຄຸ​ນະພາບ​ໄດ້​ແນວ­ໃດ?.

ສົກ­ຮຽນ​ໃໝ່ ຖ້າ­ວ່າ​ຜູ້​ບໍ­ລິ­ຫານ​ການ​ສຶກ​ສາ​ຄິດໃໝ່ ຄື: ຄິດ​ເອົາ­ໃຈ­ໃສ່​ສ້າງ​ຄຸ­ນະ­ພາບ​ໃຫ້​ເກີດ​ຂຶ້ນໃນ​ການ​ສຶກ​ສາ ນຳ​ໃຊ້ງົບ­ປະ­ມານ​ໃຫ້​ຖືກ​ລະ­ບຽບການ​ເງິນ ບໍ­ລິ­ຫານ​ໂປ່ງ​ໃສຍຸ­ຕິ​ທຳແລ້ວ ​ຄິດ​ວ່າການ​ພັດ­ທະ­ນາ​ການ​ສຶກ​ສາ​ຄົງ​ເປັນ​ໄປ​ຕາມ​ແຜນຂອງ​ລັດ­ຖະ­ບານ ເພາະ​ສິ່ງ​ເຫຼົ່າ​ນີ້​ມັນ​ຄື​ໝາກ​ຫົວໃຈ​ສຳ­ຄັນ​ໃນ​ການ​ສ້າງ​ຊາດ​ໄປ​ພ້ອມ​ກັນ.

ຂ່າວທີ່ກ່ຽວຂ້ອງ