ຮູ້ພາສາລາວ ມື້ລະຄຳ - ໂດຍ: ແສງ​ຈັນ ສຸ​ຂະ​ເສມ : ແມວ​ຫວງ​ກ້າງ

155 03 ຕ.ລ. 2017 ຫົວຂໍ້ຂ່າວອື່ນໆ

ຄຳ​ສຳ­ນວນ​ລາວ ທີ່​ບອກ​ເຖິງ​ການ​ປຽບ­ທຽບ​ນິ­ໄສ​ຂອງ​ຄົນ​ໃສ່​ກັບ​ສັດ ເຊັ່ນ: ແມວ​ທີ່​ມັກ​ກິນ​ກ້າງ­ປາ ຈຶ່ງ​ຖື​ເປັນ​ນິ­ໄສ​ພິ­ເສດ ຫຼື ທຳ​ມະ​ຊາດ​ຂອງ​ແມວ. ຄົນ​ບູ­ຮານ​ຈຶ່ງ​ນຳ​ເອົາ​ຮູບ​ພາບ ຫຼື ພຶດ­ຕິ​ກຳ​ນີ້​ມາ​ປຽບ­ທຽບ​ໃສ່​ຄົນ​ທີ່​ມີ​ນິ­ໄສ​ມັກ​ໂລບ​ໂລ­ພາ ຂີ້​ຖີ່​ຂີ້​ຕັງ ຫຶງ​ຫວງ ເວ­ລາ​ໄດ້​ຍັງ​ຫຍັງ​ກໍ່​ຫວງ​ເອົາ​ໄວ້ ບໍ່​ຢາກ​ແບ່ງ­ປັນ​ໃຫ້​ຄົນ​ອື່ນ​ນຳ. ນີ້​ຖື​ເປັນ​ພຶດ­ຕິ​ກຳ​ທີ່​ຖືກ​ຕິ­ຕຽນ​ຫຼາຍ​ໃນ​ສັງ­ຄົມ ຈຶ່ງ​ມີ​ຄວາມ​ໝາຍ​ໃນ ແງ່​ລົບ.

ຕົວ­ຢ່າງ:

- ແມວ​ໄດ້​ກ້າງ­ປາ​ແລ້ວ​ກໍ​ຫວງ​ຂຶ້ງ​ໜຶ້ງໆ ຢ້ານ​ໂຕ​ອື່ນ​ມາ​ຍາດ

- ອ້າຍ​ນີ້​ຫຼົງ​ມັກ​ສາວ​ຜູ້​ນີ້​ຈົນ​ໃຈ​ຊິ​ຂາດ ໃຜ​ມາ​ເວົ້າ​ມາ​ລົມ​ນຳ​ຜູ້​ສາວ ລາວ​ກໍ​ຫວງ​ກ້າງ​ຂຶ້ງ​ໜຶ້ງໆ

- ຈັ່ງ​ແມ່ນ​ຊາດ​ຫວງ​ກ້າງ​ນໍ ມີ​ລົດ​ຄັນ​ດຽວ​ກະ­ດາຍ ໝູ່​ຢາກ​ຢືມ​ກະ​ບໍ່​ໄດ້

ໃນ​ແງ່​ພາ­ສາ​ສາດ ແມວ​ຫວງ​ກ້າງ ເປັນ​ສຳ­ນວນ​ທີ່​ບອກ​ເຖິງ​ອາ­ລົມ​ທີ່​ມີ​ລັກ­ສະ­ນະ​ເຍາະ​ເຍີ້ຍ ຍ້ອນ​ຜູ້​ຫວງ​ກ້າງ​ມັກ​ສະ­ແດງ​ຄວາມ​ຫຶງ​ຫວງ ແລະ ປົກ​ປ້ອງ​ສິ່ງ​ທີ່​ຕົນ​ມີ​ເອົາ​ໄວ້. ສຳ­ນວນ​ທີ່​ມີ​ຄວາມ​ໝາຍ​ໃກ້​ຄຽງ​ກັນ​ກໍ່​ມີ ເຊັ່ນ: ໝາ​ຫວງ​ກະ­ດູກ...

ຂ່າວທີ່ກ່ຽວຂ້ອງ