ລັດ­ຖະ­ມົນ­ຕີ​ປ້ອງ​ກັນ​ປະ­ເທດ ສ ອາ​ເມ​ຣິ​ກາ ແລະ ເລ­ຂາ­ທິ­ການ​ໃຫຍ່ NATO ໄປ​ຢ້ຽມ­ຢາມ​ອາ​ຟະ​ກາ​ນິດ​ສະ­ຖານ

452 29 ກ.ຍ. 2017 ຂ່າວຕ່າງປະເທດ
ລັດ­ຖະ­ມົນ­ຕີ​ປ້ອງ​ກັນ​ປະ­ເທດ ສ ອາ​ເມ​ຣິ​ກາ ແລະ ເລ­ຂາ­ທິ­ການ​ໃຫຍ່ NATO ໄປ​ຢ້ຽມ­ຢາມ​ອາ​ຟະ​ກາ​ນິດ​ສະ­ຖານ

ຂ່າວ­ສານ AFP ລາຍ​ງານ​ວ່າ ລັດ­ຖະ­ມົນ­ຕີ​ປ້ອງ​ກັນ​ປະ­ເທດ ສ ອາ​ເມ​ຣິ​ກາ ເຈມ ມາດ​ຕິ​ສ ພ້ອມ​ດ້ວຍ​ທ່ານ ເຈນ ສະ​ໂຕ​ເຕນ​ເບີກ ເລ­ຂາ­ທິ­ການ​ໃຫຍ່​ອົງ­ການ​ສົນ­ທິ­ສັນ­ຍາ​ປ້ອງ​ກັນ​ອັດ​ລັງ​ຕິກ​ເໜືອ (NATO) ຕ່າງ​ກໍ​ໄດ້​ເດີນ­ທາງ​ໄປ​ຍັງ​ອາ​ຟະ​ກາ​ນິດ​ສະ­ຖານ ໃນ​ວັນ​ທີ 27 ກັນ­ຍາ​ນີ້ ການ​ເດີນ­ທາງ​ໄປ​ອາ​ຟະ​ກາ​ນິດ​ສະ­ຖານ​ຂອງ​ບຸກ­ຄົນ​ທັງ​ສອງ ມີ​ຂຶ້ນ​ຫຼາຍ​ອາ­ທິດ ຫຼັງ​ຈາກ​ທີ່​ປະ­ທາ­ນາ­ທິ­ບໍ­ດີ ສ ອາ​ເມ​ຣິ​ກາ ໂດ​ນາ​ລ ທຣັມ ໃຫ້​ສັນ­ຍາ​ເຖິງ​ການ​ສົ່ງ​ທະ­ຫານ​ເພີ່ມ​ເຕີມ​ຈຳ­ນວນ​ຫຼາຍ​ໄປ​ຍັງ​ອາ​ຟະ​ກາ​ນິດ​ສະ­ຖານ.

ຂ່າວ­ສານ​ຊິນ​ຮວາ ໃຫ້​ຮູ້​ວ່າ ທ່ານ ເຈນ ສະ​ໂຕ​ເຕນ​ເບີກ ຢືນ­ຢັນ​ວ່າ​ໃນ​ແຕ່​ລະ​ປີ NATO ຈະ​ສະ­ໜອງ​ເງິນ 1 ຕື້​ໂດ​ລາ​ສະ­ຫະ­ລັດ​ເພື່ອ​ຊ່ວຍ­ເຫຼືອ​ກອງ​ກຳ­ລັງ​ປະ­ກອບ​ອາ­ວຸດ​ຂອງ​ອາ​ຟະ​ກາ​ນິດ​ສະ­ຖານ ໂດຍ​ຈະ​ມີ​ໄປ​ຮອດ​ປີ 2020.

ໃນ​ຂະ­ນະ​ດຽວ​ກັນ ທ່ານ ມາດ​ຕິ​ສ ກ່າວ​ຢູ່​ໃນ​ກອງ​ປະ­ຊຸມ​ຂ່າວ​ຮ່ວມ​ກັບ​ປະ­ທາ­ນາ­ທິ­ບໍ­ດີ​ອາ​ຟະ​ກາ​ນິດ​ສະ­ຖານ ອາ​ສຣາ​ຟ ກາ​ນີ ແລະ ທ່ານ ເຈນ ສະ​ໂຕ​ເຕນ​ເບີກ ວ່າ ປັດ­ຈຸ­ບັນ​ນີ້ ຍັງ​ບໍ່​ເປັນ​ທີ່​ຈະ­ແຈ້ງ​ເຖິງ​ຕົວ​ເລກ​ທີ່​ຊັດ​ເຈນ​ກ່ຽວ​ກັບ​ຈຳ­ນວນ​ພົນ­ທະ­ຫານ​ຂອງ ສ ອາ​ເມ​ຣິ​ກາ ທີ່​ຈະ​ໄປ​ເພີ່ມ​ເຕີມ​ຢູ່​ໃນ​ອາ​ຟະ​ກາ​ນິດ​ສະ­ຖານ ແຕ່​ວ່າ​ກ່ອນ​ໜ້າ​ນັ້ນ ທ່ານ ມາດ​ຕິ​ສ ແຈ້ງ​ໃຫ້​ຮູ້­ເມື່ອ​ວັນ​ທີ 18 ກັນ­ຍາ​ທີ່​ຜ່ານ​ມາ​ວ່າ ສ ອາ​ເມ​ຣິ​ກາ ຈະ​ສົ່ງ​ທະ­ຫານ 3.000 ກວ່າ​ຄົນ ໄປ​ຍັງ​ອາ​ຟະ​ກາ​ນິດ​ສະ­ຖານ ແລະ ວ່າ​ສ່ວນ​ໃຫຍ່​ຂອງ​ທະ­ຫານ​ຈຳ­ນວນ​ນັ້ນ ພວມ​ເດີນ­ທາງ​ມຸ່ງ​ໜ້າ​ໄປ​ຍັງ​ອາ​ຟະ​ກາ​ນິດ​ສະ­ຖານ ຫຼື ບໍ່​ກໍ​ໄດ້​ຮັບ​ຄຳ​ສັ່ງ​ລະ­ດົມ​ການ​ເຄື່ອນ​ຍ້າຍ.

ທາງ​ດ້ານ​ຂ່າວ­ສານ Reuters ລາຍ​ງານ​ອ້າງ​ຕາມ​ແຫຼ່ງ​ຂ່າວ AMAQ ຂອງ​ກຸ່ມ​ລັດ​ອິ​ສລາມ (IS) ໃຫ້​ຮູ້​ວ່າ IS ໄດ້​ຍອມ­ຮັບ​ໃນ​ວັນ​ທີ 27 ກັນ­ຍາ​ນີ້ ວ່າ​ເປັນ​ຜູ້​ເຮັດ​ໃຫ້​ເກີດ​ເຫດ​ລະ­ເບີດ​ຂຶ້ນ​ຫຼາຍ​ເທື່ອ​ຢູ່​ທາງ​ດ້ານ​ໃນ ແລະ ອ້ອມ­ແອ້ມ​ສະ­ໜາມ​ບິນ​ກາ​ບູນ​ຂອງ​ອາ​ຟະ​ກາ​ນິດ​ສະ­ຖານ ຊຶ່ງ​ເກີດ​ຂຶ້ນ​ບໍ່​ພໍ​ເທົ່າ­ໃດ​ຊົ່ວ­ໂມງ​ຫຼັງ​ຈາກ​ທີ່​ທ່ານ ມາດ​ຕິ​ສ ເດີນ­ທາງ​ໄປ​ຮອດ​ກາ​ບູນ ແຕ່​ແຫຼ່ງ​ບໍ່​ໄດ້​ໃຫ້​ຮູ້​ເຖິງ​ຄວາມ​ເສຍ​ຫາຍ​ທີ່​ເກີດ​ຂຶ້ນ​ຈາກ​ການ​ໂຈມ​ຕີ​ນັ້ນ.

ຂ່າວທີ່ກ່ຽວຂ້ອງ