ກຽມ​ຈັດ­ການ​ແຂ່ງ­ຂັນ​ເຕະ­ບານ 7 ຄົນ ຊິງ​ເງິນ​ລາ­ງວັນ 16 ລ້ານ​ກີບ

134 29 ກ.ຍ. 2017 ວົງຈອນກີລາ
ກຽມ​ຈັດ­ການ​ແຂ່ງ­ຂັນ​ເຕະ­ບານ 7 ຄົນ ຊິງ​ເງິນ​ລາ­ງວັນ 16 ລ້ານ​ກີບ

    ບໍ­ລິ­ສັດ ຕັນ​ຈົງ ມໍ​ເຕີ (ລາວ) ຈຳ­ກັດ​ຜູ້​ດຽວ ສະ­ໜັບ­ສະ­ໜູນ​ການ​ແຂ່ງ­ຂັນ​ກີ­ລາ​ເຕະ­ບານ​ສະ­ໂມ­ສອນ ຕັນ​ຈອງ-ນິດ​ສັນ ຄັບ (7 ຄົນ) ປະ­ຈຳ​ປີ 2017 ທີ່​ຈັດ​ໂດຍ​ລ້ານ​ຊ້າງ​ອິນ​ທຣາ ແລະ ບໍ­ລິ­ສັດ L2MO ເຊິ່ງ​ການ​ແຂ່ງ​ຄັ້ງ​ນີ້ ຊີງ​ເງິນ​ລາ­ງວັນ​ເຖິງ 16 ລ້ານ​ກີບ ພ້ອມ​ຂັນ​ລາ­ງວັນ.

    ການ​ແຂ່ງ­ຂັນ​ຄັ້ງ​ນີ້ ແມ່ນ​ຈະ​ມີ​ທີມ​ນັກ­ກີ­ລາ​ເຂົ້າ​ຮ່ວມ​ທັງ​ໝົດ 8 ທີມ ຮຸ່ນ​ອາ­ຍຸ 25 ປີ​ຂຶ້ນ​ໄປ ເຊິ່ງ​ໃນ​ຈຳ­ນວນ​ນັກ­ກີ­ລາ​ແຕ່​ລະ​ທີມ​ທີ່​ຈະ​ເຂົ້າ​ຮ່ວມ​ນັ້ນ ແມ່ນ​ອະ­ນຸ­ຍາດ​ໃຫ້​ມີ​ນັກ­ກີ­ລາ​ເຕະ­ບານ ສາຍ ກ ແລະ ອະ­ດີດ​ທີມ​ຊາດ ບໍ່​ເກີນ 2 ຄົນ ແລະ ສາ­ມາດ​ລົງ​ໄດ້​ເທື່ອ​ລະ​ຄົນ​ເທົ່າ​ນັ້ນ ການ​ແຂ່ງ­ຂັນ​ຈະ​ແບ່ງ​ອອກ​ເປັນ 2 ກຸ່ມ​ເຊິ່ງ​ຈະ​ເລີ່ມ​ແຂ່ງ­ຂັນ​ແຕ່​ວັນ​ທີ 9-24 ຕຸ­ລາ ໂດຍ​ການ​ແຂ່ງ­ຂັນ​ຮອບ​ຄັດ​ເລືອກ​ແມ່ນ​ຈະ​ແຂ່ງ​ຢູ່​ເດີນ​ເຕະ­ບານ ນິວ​ອາ­ລີ​ນາ ແລະ ກູດ​ໄລຟ໌ ສ່ວນ​ການ​ແຂ່ງ­ຂັນ​ນັດ​ຊິງ​ຊະ­ນະ​ເລີດ​ຈະ​ມີ​ການ​ແຂ່ງ­ຂັນທີ່​ເດີ່ນ​ເຕະ­ບານ​ຂອງ​ລ້ານ​ຊ້າງ​ອິນ​ທຣາ ໃນ​ວັນ​ທີ 28 ຕຸ­ລາ.

    ທ່ານ ລິມ ຈີ ຄຽງ ຜູ້​ບໍ­ລິ­ຫານ ບໍ­ລິ­ສັດ ຕັນ​ຈົງ ມໍ​ເຕີ້ (ລາວ) ຈຳ­ກັດ​ຜູ້​ດຽວ ກ່າວ​ວ່າ: ບານ­ເຕະ ເປັນ​ກີ­ລາ​ທີ່​ມີ​ນັກ­ກີ­ລາ​ຮ່ວມ​ທີມ​ຫຼາຍ​ຄົນ ແລະ ບໍ­ລິ­ສັດ​ຂອງ​ພວກ​ເຮົາ​ມີ​ຄວາມ​ພາກ­ພູມ​ໃຈໃນ​ການ​ສະ­ໜັບ­ສະ­ໜູນ​ໃຫ້ກັບ​ຄົນ​ຮຸ່ນ​ໜຸ່ມ​ຂອງ​ລາວ ຫັນ​ມາ​ສົນ­ໃຈ ແລະ ຫຼິ້ນ​ກີ­ລາ​ປະ­ເພດ​ນີ້​ຫຼາຍ​ຂຶ້ນ.

    ທ່ານ ຄຳ​ສະ­ຫວັນ ໂຄດ​ໄຊ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ-ກີ­ລາ ນະ­ຄອນ­ຫຼວງ​ວຽງ​ຈັນ ກ່າວ​ວ່າ: ການ​ແຂ່ງ­ຂັນ​ຄັ້ງ​ນີ້ ເປັນ​ເຫດ­ການ​ໃໝ່ທີ່​ບໍ່​ທັນ​ໄດ້​ຈັດ​ຮຸ່ນ​ອາ­ຍຸ 25 ປີ​ຂຶ້ນ​ໄປ​ມາ​ກ່ອນ ທັງ​ເປັນ​ການ​ສ້າງ​ຂະ​ບວນ​ການ​ຫັນ​ໃຫ້​ທຸກ​ຄົນ​ມາ​ຫຼິ້ນ​ກີ­ລາ ເພື່ອ​ປະ­ກອບ­ສ່ວນ​ໃນ​ການ­ຈັດ­ຕັ້ງ​ປະ­ຕິ­ບັດ 6 ສ ຂອງ​ນະ­ຄອນ­ຫຼວງ​ວຽງ​ຈັນ ກໍ່​ຄືສ້າງ​ນະ­ຄອນ­ຫຼວງ​ວຽງ​ຈັນ ໃຫ້​ເປັນ​ນະ­ຄອນ­ຫຼວງ​ທີ່​ມີ​ສະ​ເໜ່ ກ່ອນ​ຈະ​ໄດ້​ຄື​ແນວນ​ນັ້ນ ປະ­ຊາ­ຊົນ​ຊາວ​ນະ­ຄອນ­ຫຼວງ​ວຽງ​ຈັນ ​ກໍ່​ຕ້ອງ​ມີ​ສຸ­ຂະ­ພາບ​ທີ່​ດີ.

    ພະ​ທີ​ຖະ­ແຫຼງ​ຂ່າວການ​ແຂ່ງ­ຂັນ​ຄັ້ງ​ນີ້ ຈັດ​ຂຶ້ນໃນ​ວັນ​ທີ 27 ກັນ­ຍາ 2017 ທີ່​ເດີ່ນ​ກີ­ລາ​ໃນ​ຫົ່ມ​ລ້ານ​ຊ້າງອິນ​ທຣາ ໂດຍມີທ່ານ ແຮັບ​ປີ ສີ​ສົມ​ພອນ ຜູ້​ບໍ­ລິ­ຫານບໍ­ລິ­ສັດ L2MO ທ່ານ ວຽງ​ສະ­ຫວັນ ແສງ​ຈັນ ປະ­ທານ​ສະ­ຫະ­ພັນ​ກີ­ລາ​ບານ­ເຕະ ນະ­ຄອນ­ຫຼວງ ພ້ອມ​ຜູ້​ສະ­ໜັບ­ສະ­ໜູນ ແລະ ນັກ­ກີ­ລາ​ເຂົ້າ​ຮ່ວມ ສ່ວນ​ຜູ້​ທີ່​ສົນ­ໃຈ​ລາຍ​ລະ­ອຽດ​ຂອງ​ການ​ແຂ່ງ­ຂັນ​ລາຍ­ການ​ດັ່ງ­ກ່າວ ສາ­ມາດ​ເຂົ້າ​ໄປ​ເບິ່ງ ແລະ ຕິດ­ຕາມ​ໄດ້ໃນ FAN PAGE ຂອງນິດ​ສັນ​ໄດ້ ພຽງ​ແຕ່​ພິມ nissanlaos.

ຂ່າວທີ່ກ່ຽວຂ້ອງ