ຢູ​ໂດ​ລາວ ຫວັງ​ສ້າງ​ຜົນ­ງານ​ເດັ່ນ​ໃນ​ຊີ­ເກມ 2 ປີ​ຂ້າງ​ໜ້າ

613 27 ກ.ຍ. 2017 ວົງຈອນກີລາ
ຢູ​ໂດ​ລາວ ຫວັງ​ສ້າງ​ຜົນ­ງານ​ເດັ່ນ​ໃນ​ຊີ­ເກມ 2 ປີ​ຂ້າງ​ໜ້າ

    ຕາມ​ການ​ໃຫ້​ສຳ­ພາດ​ຂອງ​ທ່ານ ນາງ ມາ​ຍຸ​ລີ ພາ­ນຸ​ວົງ ຮອງ​ເລ­ຂາ­ທິ­ການ​ສະ­ຫະ­ພັນ​ຢູ​ໂດ​ແຫ່ງ​ຊາດ​ລາວ ໃນ​ວັນ​ທີ 21 ກັນ­ຍາ 2017 ຮູ້​ວ່າ: ເນື່ອງ​ຈາກ​ການ​ເຂົ້າ​ຮ່ວມ​ງານ​ມະ­ຫະ​ກຳ​ກີ­ລາ​ຊີ­ເກມ ຄັ້ງ​ທີ 29 ທີ່​ປະ­ເທດ​ມາ​ເລ​ເຊຍ ກີ­ລາ​ຢູ​ໂດ​ທີມ​ຊາດ​ລາວ​ສາ­ມາດ​ເຮັດ​ໄດ້​ພຽງ 1 ຫຼຽນ​ທອງ ສົ່ງ​ຜົນ​ໃຫ້​ບໍ່​ປະ­ສົບ​ຜົນ­ສຳ­ເລັດ​ຕາມ​ເປົ້າ​ໝາຍ​ທີ່​ຕັ້ງ​ໄວ້ ດັ່ງ­ນັ້ນ​ປະ­ທານ​ສະ­ຫະ­ພັນ​ຢູ​ໂດ​ແຫ່ງ​ຊາດ​ລາວ ຈຶ່ງ​ວາງ​ແຜນ​ຍຸດ​ທະ​ສາດ​ການ​ພັດ­ທະ­ນາ​ຄືນ­ໃໝ່ ໂດຍ​ເນັ້ນ​ການ​ຍົກ​ລະ­ດັບ​ນັກ­ກີ­ລາ​ຢູ​ໂດ​ທີມ​ຊາດ​ລາວ​ຊຸດ​ຕິດ​ທີມ​ຊາດ 12 ຄົນ ຍິງ 5 ຄົນ ເປັນ​ກຳ­ລັງ​ສຳ­ຄັນ ໂດຍ​ໄດ້​ກຳ­ນົດ​ໃຫ້​ເຂົ້າ​ສູນ​ເກັບ​ຕົວ​ເຝິກ­ຊ້ອມ​ໃນ​ໄລ­ຍະ​ຍາວ 2 ປີ ກ່ອນ​ຮອດ​ມື້​ແຂ່ງ­ຂັນ​ຕົວ​ຈິງ​ຊີ­ເກມ​ຄັ້ງ​ທີ 30 ທີ່​ປະ­ເທດ​ຟີ​ລິບ​ປິນ​ໃນ​ປີ 2019.

    ວັນ​ທີ 11-12 ພະ­ຈິກ 2017 ສະ­ຫະ­ພັນ​ຢູ​ໂດ​ແຫ່ງ​ຊາດ ຈະ​ຈັດ­ການ​ແຂ່ງ­ຂັນ​ຢູ​ໂດ​ຊີງ​ແຊັມ​ທົ່ວ​ປະ­ເທດ​ປະ­ຈຳ​ປີ 2017 ໂດຍ​ຈະ​ໄດ້​ເປີດ​ກວ້າງ (ໂອ​ເພັນ) ໃຫ້​ນັກ­ກີ­ລາ​ຕ່າງ­ປະ­ເທດ ສາ­ມາດ​ສົ່ງ​ເຂົ້າ​ຮ່ວມ​ແຂ່ງ­ຂັນ​ໄດ້ ຄຽງ​ຄູ່​ກັນ​ນັ້ນ​ປີ 2018 ຈະ​ສົ່ງ​ນັກ­ກີ­ລາ​ຢູ​ໂດ​ທີມ​ຊາດ​ລາວ ເຂົ້າ​ຮ່ວມ​ແຂ່ງ­ຂັນ​ຢູ່​ຕ່າງ­ປະ­ເທດ​ໃນ​ຫຼາຍ​ລາຍ­ການ ໂດຍ​ສະ­ເພາະ​ລາຍ­ການ​ທີ່​ສະ​ສົມ​ຄະ­ແນນ​ຂອງ​ນັກ­ກີ­ລາ​ໃນ​ຮຸ່ນ​ເຍົາ­ວະ​ຊົນ ເພື່ອ​ກຽມ​ສົ່ງ​ເຂົ້າ​ຮ່ວມ​ງານ​ມະ­ຫະ​ກຳ​ກີ­ລາ​ຊາວ​ໜຸ່ມ​ໂອ​ແລມ​ປິກ ຫຼື Youth Olympic ຈັດ​ຂຶ້ນ​ທີ່​ປະ­ເທດ​ອາກ​ຊັງ​ຕິນ ພ້ອມ​ທັງ​ສົ່ງ​ນັກ­ກີ­ລາ​ທີມ​ຊາດ​ຊຸດ​ໃຫຍ່​ຮ່ວມ​ແຂ່ງ­ຂັນ​ເກັບ​ຄະ­ແນນ​ສູ້​ຊົນ​ໃຫ້​ໄດ້​ຜ່ານ​ເຂົ້າ​ໄປ​ຮ່ວມ​ແຂ່ງ­ຂັນ​ໂອ​ແລມ​ປິກ​ເກມ​ປີ 2020 ທີ່​ປະ­ເທດ​ຍີ່­ປຸ່ນ​ເປັນ​ເຈົ້າ­ພາບ.

    ປັດ­ຈຸ­ບັນ​ກີ­ລາ​ຢູ​ໂດ​ໃນ​ທົ່ວ​ປະ­ເທດ ມີ​ທັງ​ໝົດ 5 ສະ­ໂມ­ສອນ ປະ­ກອບ​ມີ​ສະ­ໂມ­ສອນ​ສະ­ຫວັນ​ນະ​ເຂດ ຢູ​ໂດ​ວຽງ​ຈັນ ສີ​ໄຄ ສູນ​ກາງ​ຊາວ​ໜຸ່ມ ແລະ ໂຮງ­ຮຽນ​ພອນ​ສະ­ຫວັນ​ກີ­ລາ-ກາ​ຍະ​ກຳ ທັງ 5 ສະ­ໂມ­ສອນ​ສາ­ມາດ​ສ້າງ​ນັກ­ກີ­ລາ​ສະ­ໜອງ​ໃຫ້​ທີມ​ຊາດ​ໄດ້​ຢ່າງ​ຫຼວງ­ຫຼາຍ ສ່ວນ​ນັກ­ກີ­ລາ​ທີ່​ຕິດ​ທີມ​ຊາດ ມີ​ທັງ​ໝົດ 12 ຄົນ ຍິງ 5 ຄົນ ແລະ ນັກ­ກີ­ລາ​ຮຸ່ນ​ສືບ​ທອດ​ຂອງ​ທີມ​ຊາດ​ມີ 25 ຄົນ.

ຂ່າວທີ່ກ່ຽວຂ້ອງ