ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ມາ​ເລ​ເຊຍ ຟິ​ລິບ​ປິນ

138 27 ກ.ຍ. 2017 ຫົວຂໍ້ຂ່າວອື່ນໆ

ທີ່ ມາ​ເລ​ເຊຍ: ໃນ​ຂະ­ນະ​ທີ່​ຫຼາຍໆ​ປະ­ເທດ​ຜ່ອນຜັນ​ເລື່ອງ​ວີ​ຊາເຂົ້າ-ອອກ​ປະ­ເທດ​ສຳ­ລັບ​ນັກ​ທ່ອງທ່ຽວ​ຕ່າງ­ປະ­ເທດ ທາງການ​ມາ​ເລ​ເຊຍ ໄດ້​ອອກມາ​ປະ­ກາດ​ກ່ຽວ​ກັບ​ແຜນ​ເກັບ​ພາ­ສີ​ຈາກ​ນັກ​ທ່ອງທ່ຽວ​ຕ່າງ­ປະ­ເທດ ດ້ວຍ​ເຫດ­ຜົນ​ສະ­ເພາະ​ໃດໜຶ່ງຢ່າງ​ແນ່­ນອນ ເຊິ່ງ​ໄດ້​ປະ­ຕິ­ບັດ​ມາ​ແຕ່​ວັນ​ທີ 1 ເດືອນກັນ­ຍາ​ປີ​ນີ້​ແລ້ວ ມູນ​ຄ່າ​ພາ­ສີ​ທີ່​ເກັບ​ນັ້ນ​ແມ່ນ 10 ຣິງ​ກິດ​ຕໍ່​ວັນ (ປະ­ມານ​ກວ່າ 20 ພັນ​ກີບ) ບໍ່​ວ່າ​ນັກທ່ອງ​ທ່ຽວ​ຈະ​ພັກ​ຢູ່​ໂຮງ­ແຮມ​ໃດ​ກໍ່​ຕາມ ແຕ່​ກໍ່​ມີ​ຂໍ້​ຍົກ­ເວັ້ນ​ທີ່​ຄວນ​ເບິ່ງ​ໄວ້​ເປັນ​ບົດ­ຮຽນ​ ເພາະ​ມັນ​ເປັນ​ຫຼັກ​ຖານ​ຢັ້ງ­ຢືນ​ວ່າ ທາງ​ການ​ຂອງ​ມາ​ເລ​ເຊຍ ຕ້ອງ­ການ​ໃຫ້​ປະ­ຊາ­ຊົນ​ມີ​ສ່ວນ​ຮ່ວມ​ໃນ​ອຸດສາ​ຫະກຳທ່ອງ​ທ່ຽວ ລວມ​ທັງ​ລາຍ​ໄດ້​ນຳ ຄື ຖ້າ​ນັກ​ທ່ອງທ່ຽວ​ຄົນ​ໃດ​ເລືອກ​ພັກ­ຜ່ອນຢູ່​ນຳເຮືອນ​ປະ­ຊາ­ຊົນ ເອີ້ນ​ວ່າ: ໂຮມ​ສະ​ເຕ (Homestay) ໂດຍ​ໄດ້​ລົງ​ທະບຽນ​ນຳ​ກະ­ຊວງ​ວັດ­ທະ­ນະ­ທຳ ແລະ ທ່ອງ​ທ່ຽວແລ້ວ ​ກໍ່​ຈະ​ໄດ້​ຮັບ​ການຍົກ­ເວັ້ນ​ພາ­ສີ ສ່ວນປະ­ຊາຊົນ​ມາ​ເລ​ເຊຍ​ເອງ ກໍ່​ຄືຊາວ​ຕ່າງ­ປະ­ເທດ​ທີ່​ອາ­ໄສ​ຢູ່​ມາ​ເລ​ເຊຍ​ຢ່າງ​ຖາວອນ​ນັ້ນ ບໍ່​ໄດ້​ເສຍ​ພາ­ສີ​ເວ­ລາ​ທ່ອງ​ທ່ຽວພັກ­ຜ່ອນ ຄາດ​ວ່າ​ຈຳ­ນວນ​ລາຍ​ໄດ້​ຈາກ​ການ​ເກັບ​ພາ­ສີ​ນັກ​ທ່ອງ​ທ່ຽວ​ຕ່າງ­ປະ­ເທດ​ຈະ​ບັນ­ລຸເຖິງ 210 ລ້ານ​ຣິງ​ກິດ​ຕໍ່​ປີ.

ທີ່ ຟິ​ລິບ​ປິນ: ຂ່າວ​ຕ່າງ­ປະ­ເທດ​ໃນ​ຕົ້ນ​ເດືອນ​ກັນຍາ​ໃຫ້​ຮູ້​ວ່າ ກົດ­ໝາຍ​ອາ­ຍາ​ສະ­ບັບ​ປັງ​ປຸງ​ທີ່​ໄດ້​ຮັບການ​ລົງ​ລາຍ​ເຊັນຈາກ​ປະ­ທາ­ນາ­ທິ­ບໍ­ດີ ໂຣ​ດຼິ​ໂກ ດູເຕັກ​ເຕ ນັ້ນ ໄດ້​ເຂັ້ມ​ໂທດ​ຕໍ່​ຜູ້​ເຜີຍ­ແຜ່​ຂ່າວ​ລືຂ່າວບິດ​ເບືອນ​ທີ່​ບໍ່​ມີ​ມູນ​ຄວາມ​ຈິງ ໂດຍ​ຈະໄດ້​ຮັບ​ໂທດຖານ​ມີ​ຄວາມ​ຜິດ​ກໍ່​ອາ​ຊະ​ຍາ​ກຳ ການ​ລົງ­ໂທດຄວາມ​ຜິດ​ດັ່ງ­ກ່າວກໍ່​ຄືການ​ຕັດ​ອິດ­ສະ­ຫຼະ­ພາບສູງ​ສຸດ 6 ເດືອນ ແລະ ປັບ​ໃໝ​ສູງ​ສຸດ​ເປັນ​ເງິນ​ສອງແສນ​ເປ​ໂຊ (ເທົ່າ​ກັບ 3.909 ໂດ​ລາ​ສະ­ຫະ­ລັດ) ໂທດ​ການ​ເຜີຍ­ແຜ່​ຂ່າວ​ທີ່​ບໍ່​ມີມູນ​ຄວາມ​ຈິງ​ນີ້ ມີ​ຄວາມ​ໜັກ​ເບົາ​ຫຼຸດ​ລັ່ນ​ກັນ​ຕາມ​ແຕ່​ລະ​ຮູບ​ການ ເຊັ່ນ: ຖ້າ​ເປັນ​ການ​ພິມ​ເຜີຍ­ແຜ່​ຂ່າວ​ເທັດ​ທີ່​ອາດເປັນອັນ­ຕະ­ລາຍ​ຕໍ່​ຄວາມ​ເປັນ​ລະ­ບຽບ​ຮຽບ​ຮ້ອຍຂອງ​ສັງ­ຄົມ ຫຼື ກໍ່​ຄວາມ​ເສຍ​ຫາຍ​ຕໍ່​ຜົນ​ປະ­ໂຫຍດຂອງ​ລັດ ​ກໍ່​ຈະ​ໄດ້​ຮັບ​ໂທດຈຳ​ຄຸກ​ແຕ່ 1 ເດືອນ ກັບ 1 ວັນ ເຖິງ​ຈຳ​ຄຸກ​ສູງ​ສຸດ 6 ເດືອນ ແລະ ຖືກ​ປັບໃໝ​ແຕ່ 40.000-200.000 ເປ​ໂຊ (ແຕ່ 782-3.909 ໂດ​ລາ​ສະ­ຫະ­ລັດ) ກົດ­ໝາຍ​ໄດ້​ກຳ­ນົດໂທດ​ຕໍ່​ບຸກ­ຄົນ​ທີ່​ປ່ອຍ​ຂ່າວ​ບໍ່​ມີ​ມູນ​ຄວາມ​ຈິງ ດ້ວຍຮູບ​ການ​ພິມ​ເຜີຍ­ແຜ່ ດ້ວຍ​ວາ­ຈາ ດ້ວຍ​ການ​ອອກຄຳ​ເຫັນ​ຕໍ່​ທີ່​ຊຸມ­ນຸມ​ຊົນ ເຊິ່ງ​ມີ​ເນື້ອ​ໃນ​ຊຸກ­ຍູ້​ໃຫ້​ຄົນລະ­ເມີດ​ກົດ­ໝາຍ ບໍ່​ເຊື່ອ​ຟັງ​ອຳ­ນາດ​ການປົກ­ຄອງ ແລະ ອື່ນໆ ກໍ່​ລ້ວນ​ແຕ່​ຈະ​ຕ້ອງ​ໄດ້​ຮັບ​ໂທດ​ຕາມກົດ­ໝາຍ ອີກ​ຂ່າວ​ໜຶ່ງ​ທີ່​ອ່າວ​ແປກ​ກ່ຽວ​ກັບ​ຟິ​ລິບປິນ​ເຊັ່ນ​ກັນຄື ໃນ​ໄລ­ຍະ​ດຳ­ເນີນ​ກອງ​ປະ­ຊຸມ​ສຸດຍອດ​ອາ​ຊຽນ ​ທີ່​ຟິ​ລິບ​ປິນ ໃນ​ເດືອນ​ກັນ­ຍາ​ນີ້​ນັ້ນ ເຈົ້າ​ໜ້າ­ທີ່​ຮັກ­ສາ​ຄວາມ​ປອດ​ໄພ​ຂອງກອງ​ປະ­ຊຸມທຸກ​ຄົນ​ຖືກ​ສັ່ງ​ຫ້າມ​ພົກ​ພາ ແລະ ນຳ​ໃຊ້​ໂທລະ­ສັບມື​ຖື​ຢ່າງ​ເດັດ­ຂາດ ໂດຍ​ໃຫ້​ເຫດ­ຜົນ​ວ່າ ການ​ໃຊ້​ໂທລະ­ສັບມື​ຖື​ ຈະ​ສົ່ງ​ຜົນ​ກະ­ທົບ​ຕໍ່​ແຜນ​ປ້ອງ​ກັນຄວາມ​ປອດ​ໄພສຳ­ລັບ​ຜູ້­ນຳ​ຈາກ​ອາ​ຊຽນ 10 ປະ­ເທດ​ຄູ່​ເຈລະ­ຈາ ທາງ​ການ​ຟິ​ລິບປິນ​ເຊື່ອ​ວ່າ ການ​ຫ້າມ​ໃຊ້​ໂທລະ­ສັບ​ມື​ຖື​ ຈະ​ຊ່ວຍ​ໃຫ້​ເຈົ້າ​ໜ້າ­ທີ່​ຮັກ­ສາ​ຄວາມ​ປອດ​ໄພສຸມ​ຈິດ​ສຸມ​ໃຈ​ໃສ່​ຄວາມປອດ​ໄພຂອງ​ບັນ­ດາ​ຜູ້​ແທນ​ໄດ້​ຢ່າງ​ມີ​ປະ­ສິດ­ທິ­ພາບສູງ (ເພາະ​ບໍ່​ມີ​ໂອ­ກາດ​ເພີນ​ກັບ​ໜ້າ​ຈໍ) ຂ່າວ​ບອກວ່າ ຖ້າ​ໃຜ​ລະ­ເມີດ​ຄຳ​ສັ່ງຫ້າມ​ ກໍ່​ຕ້ອງ​ໄດ້​ສະ­ແດງຄວາມ​ຮັບ­ຜິດ­ຊອບ​ເອົາ​ເອງ.

ຂ່າວທີ່ກ່ຽວຂ້ອງ