ແຂ່ງ​ຂັນ​ກ໊ອຟ ສົມ­ທົບ​ທຶນ​ພັດ­ທະ­ນາ​ຄົນ​ພິ­ການ-ຜູ້​ອາ­ຍຸ​ສູງ

657 26 ກ.ຍ. 2017 ວົງຈອນກີລາ
ແຂ່ງ​ຂັນ​ກ໊ອຟ ສົມ­ທົບ​ທຶນ​ພັດ­ທະ­ນາ​ຄົນ​ພິ­ການ-ຜູ້​ອາ­ຍຸ​ສູງ

    ກອງ​ເລ­ຂາ​ຄະ­ນະ​ກຳ­ມະ­ການ​ແຫ່ງ​ຊາດ ເພື່ອ​ຄົນ​ພິ­ການ ແລະ ຜູ້​ອາ­ຍຸ​ສູງ ຈັດ­ການ​ແຂ່ງ­ຂັນກ໊ອຟ​ເພື່ອ​ການ​ກຸ­ສົນ ​ຫາ​ລາຍ​ໄດ້​ສົມ­ທົບ​ທຶນ​ສ້າງ​ກອງ​ທຶນ​ພັດ­ທະ­ນາ​ຄົນ​ພິ­ການ ແລະ ຜູ້​ອາ­ຍຸ​ສູງ ທັງ​ເປັນ​ການ​ສະ­ເຫຼີມ­ສະ­ຫຼອງ​ວັນ​ຄົນ​ພິ­ການ​ແຫ່ງ​ຊາດ (27 ກັນ­ຍາ) ແລະ ວັນ​ສາ­ກົນ​ຜູ້​ອາ­ຍຸ​ສູງ (1 ຕຸ­ລາ) ປະ­ຈຳ​ປີ 2017 ທີ່​ຈະ​ໝູ­ນວຽນ​ມາ​ອີກ​ວາ­ລະ​ໜຶ່ງ ໃຫ້​ມີ​ບັນ­ຍາ­ກາດ​ຟົດ­ຟື້ນ​ມ່ວນ­ຊື່ນ ແລະ ມີ​ຄວາມ​ໝາຍ​ຍິ່ງ ຂຶ້ນ​ວັນ​ທີ 23 ກັນ­ຍາ 2017 ທີ່​ສະ​ໜາມ​ກ໊ອ​ຟລາວ​ຄັນ​ທຣີ​ຄັບ ໂດຍ​ເປັນ​ປະ­ທານ​ຂອງ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ມີ​ນັກ​ກີ​ລາກ​໊ອຟ​ສະ​ໜັກ​ຫຼິ້ນ​ເຂົ້າ​ຮ່ວມ.

    ທ່ານ ຄຳ​ແພງ ໄຊ​ສົມ​ແພງ ກ່າວ​ວ່າ: ການ​ຈັດ​ແຂ່ງ​ຂັນ​ກ໊ອຟ​ຄັ້ງ​ນີ້ ສະ­ແດງ​ໃຫ້​ເຫັນ​ເຖິງ​ຄວາມ​ເອົາ­ໃຈ­ໃສ່​ຄວາມ​ເປັນ​ຫ່ວງ​ເປັນ​ໄຍ​ຂອງ​ພັກ-ລັດ­ຖະ­ບານ​ຕໍ່​ຄົນ​ພິ­ການ ທັງ​ເປັນ​ການ­ສະ­ແດງ​ເຖິງ​ຄວາມ​ເຄົາ­ລົບ ແລະ ຮູ້​ບຸນ­ຄຸນ​ເຖິງ​ຜູ້​ອາ­ຍຸ​ສູງ​ທີ່​ມີ​ຄຸນ­ງາມ­ຄວາມ­ດີ​ຕໍ່​ປະ­ເທດ​ຊາດ ມີ​ພະ​ຄຸນ​ຕໍ່​ຄົນ​ຮຸ່ນ​ຫຼັງ ນອກ​ນີ້​ຍັງ​ເປັນ​ການ​ໂຄ­ສະ­ນາ​ເຜີຍ­ແຜ່ ເພື່ອ​ປູກ​ຈິດ​ສຳ­ນຶກ​ໃຫ້​ທົ່ວ​ສັງ­ຄົມ​ໄດ້​ຮັບ​ຮູ້​ເຂົ້າ­ໃຈ​ເຖິງ​ສິດ­ທິ​ຄົນ​ພິ­ການ ແລະ ຜູ້​ອາ­ຍຸ​ສູງ ພ້ອມ​ກັນ​ນັ້ນ​ກໍ່​ປຸກ­ລະ­ດົມ​ໃຫ້​ທຸກ​ພາກ­ສ່ວນ​ທົ່ວ​ສັງ­ຄົມ​ມີ​ສ່ວນ​ຮ່ວມ​ເຂົ້າ​ໃນ​ວຽກ​ງານ​ພັດ­ທະ­ນາ​ຄົນ​ພິ­ການ ແລະ ຜູ້​ອາ­ຍຸ​ສູງ​ນັບ​ມື້​ກວ້າງ­ຂວາງ ແນ­ໃສ່​ເຮັດ​ໃຫ້​ເຂົາ­ເຈົ້າ​ມີ​ຊີ­ວິດ​ການ​ເປັນ​ຢູ່​ນັບ​ມື້​ດີ​ຂຶ້ນ.

    ສຳ­ລັບ​ການ​ແຂ່ງ­ຂັນ​ມີ​ນັກ­ກີ­ລາ​ສະ­ໝັກ​ຫຼິ້ນ​ເຂົ້າ​ຮ່ວມ 100 ກວ່າ​ທ່ານ ແບ່ງ​ອອກ​ເປັນ 4 ສາຍ ຄື:ສາຍ VIP ສາຍ A ສາຍ B ສາຍ C ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ:ສາຍ VIP ຊະ­ນະ​ເລີດ ທ່ານ ສອນ​ໄຊ ສີ​ພັນ​ດອນ ຮອງ​ຊະ­ນະ​ເລີດ ທ່ານ ສີ​ສຸ­ວັນ ວົງ​ຈອມ​ສີ ແລະ ອັນ​ດັບ 3 ທ່ານ ສິນ​ລະ​ວົງ ຄຸດ​ໄພ­ທູນ  ສາຍ A ຊະ­ນະ​ເລີດ ທ່ານ ກິດ​ສະ​ນຸ ຮອງ​ຊະ­ນະ​ເລີດ ທ່ານ ວິ­ໄລ ສາຍ B ຊະ­ນະ​ເລີດ ທ່ານ ເພັດ​ທະ­ນູ­ສອນ ພົມ​ມະ​ລາດ ຮອງ​ຊະ­ນະ​ເລີດ ທ່ານ ທວນ​ທາ­ລາ ກອງ​ວົງ​ສີ ແລະ  ສາຍ C ຊະ­ນະ​ເລີດ ທ່ານ ຄຳ​ມະ­ໂນ​ລົມ ຮອງ​ຊະ­ນະ​ເລີດ ທ່ານ ເຂັມ​ທອງ ຊາ­ນຸ​ບານ.

ຂ່າວທີ່ກ່ຽວຂ້ອງ