ຂ່າວຫຼ້າສຸດ

ນະ­ຄອນ­ຫຼວງ ກຽມ​ຈັດ­ການ​ແຂ່ງ­ຂັນ​ເຕະ­ບານ​ປະ­ຈຳ​ປີ

564 26 ກ.ຍ. 2017 ວົງຈອນກີລາ
ນະ­ຄອນ­ຫຼວງ ກຽມ​ຈັດ­ການ​ແຂ່ງ­ຂັນ​ເຕະ­ບານ​ປະ­ຈຳ​ປີ

    ສະ­ຫະ­ພັນ​ບານ­ເຕະ​ນະ­ຄອນ­ຫຼວງ​ວຽງ​ຈັນ​ກຽມ​ຈັດ­ການ​ແຂ່ງ­ຂັນ​ເຕະ­ບານ​ປະ­ຈຳ​ປີ 2017 ເຊິ່ງ​ຈະ​ຈັດ​ຂຶ້ນ​ໃນ​ຕົ້ນ​ເດືອນ​ພະ­ຈິກ 2017 ເພື່ອ​ເຝີກ​ຊ້ອມ ແລະ ຄັດ​ເລືອກ​ເອົາ​ນັກ­ກີ­ລາ​ເປັນ​ຕົວ​ແທນ​ຂອງ​ນະ­ຄອນ­ຫຼວງ​ວຽງ​ຈັນ ເຂົ້າ​ຮ່ວມ​ການ​ແຂ່ງ­ຂັນ​ກີ­ລາ​ແຫ່ງ​ຊາດ​ລາວ ທີ່​ແຂວງ​ຊຽງ​ຂວາງ ​ເປັນ​ເຈົ້າ­ພາບ​ ໃນ​ປີ 2018 ນີ້.

    ທ່ານ ວຽງ​ສະ­ຫວັນ ແສງ​ຈັນ ປະ­ທານ​ສະ­ຫະ­ພັນ​ກີ­ລາ​ບານ­ເຕະ​ນະ­ຄອນ­ຫຼວງ​ວຽງ​ຈັນ ໃຫ້​ສຳ­ພາດ​ວ່າ: ເພື່ອ​ເປັນ​ການ­ຈັດ­ຕັ້ງ​ປະ­ຕິ­ບັດ​ຕາມ​ແຜນ​ພັດ­ທະ­ນາ​ວົງ​ການ​ກີ­ລາ​ບານ­ເຕະ​ລາວ​ກໍ່​ຄື ສະ­ຫະ­ພັນ​ບານ­ເຕະ​ນະ­ຄອນ­ຫຼວງ​ວຽງ​ຈັນ ດັ່ງ­ນັ້ນ ທາງ​ສະ­ຫະ­ພັນ​ຂອງ​ພວກ​ເຮົາ​ຈຶ່ງ​ຈະ​ຈັດ­ການ​ແຂ່ງ­ຂັນ​ສະ­ເພາະ​ນະ­ຄອນ­ຫຼວງ​ວຽງ​ຈັນ ເຊິ່ງ​ຈຸດ­ປະ­ສົງ​ຫຼັກ​ເພື່ອ​ເຝີກ​ຊ້ອມ​ນັກ­ກີ­ລາ​ພາຍ​ໃນ​ນະ­ຄອນ­ຫຼວງ​ວຽງ​ຈັນ ແລະ ຄັດ​ເລືອກ​ເປັນ​ຕົວ​ແທນ​ຂອງ​ນະ­ຄອນ­ຫຼວງ​ເຂົ້າ​ຮ່ວມ​ການ​ແຂ່ງ­ຂັນ​ງານ​ກີ­ລາ​ແຫ່ງ​ຊາດ​ທີ່​ຈະ​ຈັດ​ຂຶ້ນ​ຢູ່​ແຂວງ​ຊຽງ​ຂວາງ​ປີ 2018 ສຳ­ລັບ​ການ​ແຂ່ງ­ຂັນ​ຄັ້ງ​ນີ້​ພວກ​ເຮົາ​ຈະ​ຮັບ​ສະ­ໂມ­ສອນ​ເຂົ້າ​ແຂ່ງ­ຂັນ​ທັງ​ໝົດ​ບໍ່​ໃຫ້​ກາຍ 10 ສະ­ໂມ­ສອນ ໃນ​ນັ້ນ​ຕ້ອງ​ເປັນ​ສະ­ເພາະ​ສະ­ໂມ­ສອນ​ໃນ​ນະ­ຄອນ­ຫຼວງ​ວຽງ​ຈັນ​ເທົ່າ​ນັ້ນ ປັດ­ຈຸ­ບັນ​ໄດ້​ເປີດ​ສະ­ໝັກ​ໃຫ້​ແຕ່​ລະ​ສະ­ໂມ­ສອນ​ມາ​ແຈ້ງ​ເຈດ​ຈຳ­ນົງ​ເຂົ້າ​ເລີ່ມ​ແຕ່​ຕົ້ນ​ເດືອນ​ກັນ­ຍາ​ຜ່ານ​ມາ​ນີ້ ແລະ ຈະ​ປິດ​ຮັບ​ສະ­ໝັກ​ທ້າຍ​ເດືອນ​ຕຸ­ລາ​ນີ້ ການ​ແຂ່ງ­ຂັນ​ຈະ​ເລີ່ມ​ຂຶ້ນ​ໃນ​ຕົ້ນ​ເດືອນ​ພະ­ຈິກ 2017 ທຸກໆ​ວັນ​ເສົາ ແລະ ວັນ​ອາ­ທິດ ຈະ​ໄດ້​ດຳ­ເນີນ​ເປັນ​ເວ­ລາ 4 ເດືອນ​ກວ່າ ທັງ​ນີ້​ເພື່ອ​ເປີດ​ໂອ­ກາດ​ໃຫ້​ກັບ​ນ້ອງ​ນັກ­ຮຽນ​ທີ່​ມີ​ຄວາມ​ຮັກ​ມັກ​ໃນ​ດ້ານ​ກີ­ລາ​ບານ­ເຕະ​ສາ­ມາດ​ພັດ­ທະ­ນາ​ຕົນ​ເອງ​ກ້າວ​ເປັນ​ນັກ​ກິ­ລາ​ທີມ​ຊາດ.

    ປັດ­ຈຸ­ບັນ​ມີ​ສະ­ໂມ­ສອນ​ທີ່​ເຂົ້າ​ມາ​ແຈ້ງ​ເຈດ​ຈຳ­ນົງ​ເຂົ້າ​ຮ່ວມ​ການ​ແຂ່ງ­ຂັນ​ມີ 5 ສະ­ໂມ­ສອນ​ຄື: ສະ­ໂມ­ສອນ ປກສ ເອ​ັຟ​ຊີ ເອ​ັ​ສະ​ຣາ ເອ​ັຟ​ຊີ ກອງ­ທັບ 2 ເອ​ັຟ​ຊີ ວຽງ​ຈັນ ຢູ​ໄນ​ເຕັດ ແລະ ຈັນ­ທະ​ບູ​ລີ ເອ​ັຟ​ຊີ ການ​ແຂ່ງ­ຂັນ​ຄັ້ງ​ນີ້​ທາງ​ສະ­ຫະ­ພັນ​ບານ­ເຕະ​ນະ­ຄອນ­ຫຼວງ​ວຽງ​ຈັນ​ເປັນ​ຝ່າຍ​ຈັດ­ການ​ແຂ່ງ­ຂັນ​ທັງ​ໝົດ.

ຂ່າວທີ່ກ່ຽວຂ້ອງ