ຂ່າວຫຼ້າສຸດ

ຈະ​ຈັດ​ແຂ່ງ­ຂັນ ​ໂຕ​ໂຢ​ຕ້າ​ ແມ່​ຂອງ ​ຄັບ ​ແຊມ​ປ້ຽນ​ຊິບ ຄັ້ງ​ທີ 4 ທ້າຍ​ປີ​ນີ້

549 25 ກ.ຍ. 2017 ວົງຈອນກີລາ
ຈະ​ຈັດ​ແຂ່ງ­ຂັນ ​ໂຕ​ໂຢ​ຕ້າ​ ແມ່​ຂອງ ​ຄັບ ​ແຊມ​ປ້ຽນ​ຊິບ ຄັ້ງ​ທີ 4 ທ້າຍ​ປີ​ນີ້

ບໍ­ລິ­ສັດ ​ໂຕ​ໂຢ​ຕ້າ ​ມໍ​ເຕີ້ ​ເອ​ເຊຍ ​ປາ​ຊິ​ຟິກ ແລະ ບໍ­ລິ­ສັດ​ ໂຕ​ໂຢ​ຕ້າ ​ມໍ​ເຕີ້​ ປະ­ເທດ​ໄທ​ ຈຳ­ກັດ ຈະ​ຈັດ​ແຂ່ງ­ຂັນ​ບານ­ເຕະ​ໂຕ​ໂຢ​ຕ້າ ​ແມ່​ຂອງ ​ຄັບ ​ແຊ້ມ​ປ້ຽນ​ຊິບ (TMCC) ຄັ້ງ​ທີ 4 ຂຶ້ນ​ໃນ​ເດືອນ​ທັນ­ວາ 2017-ມັງ­ກອນ 2018 ໂດຍ​ມີ​ຕົວ​ແທນຈາກ​ລາວ ກຳ­ປູ­ເຈຍ ໄທ ແລະ ຫວຽດ­ນາມ ເຂົ້າ​ຮ່ວມ.

ໂຕ​ໂຢ​ຕ້າ​ ເລີ່ມ​ການ​ແຂ່ງ­ຂັນ​ບານ­ເຕະ TMCC ມາ​ແຕ່​ປີ 2014 ​ຈຸດ­ປະ­ສົງ​ເພື່ອ​ສ້າງ​ຄວາມ​ມີ​ຊີ­ວິດ​ຊີ­ວາ​ໃຫ້​ຊຸມ​ຊົນ​ທ້ອງ­ຖິ່ນ​ຂອງ​ປະ­ເທດ​ໃນ​ເຂດ​ແມ່­ນ້ຳ​ຂອງ ​ດ້ວຍ​ກີ­ລາ​ບານ­ເຕະ ໂດຍ​ລາຍ­ການ​ດັ່ງ­ກ່າວ​ຈັດ​ຂຶ້ນ​ຢູ່​ຫວຽດ­ນາມ ແລະ 4 ປະ­ເທດ​ເຂົ້າ​ແຂ່ງ­ຂັນ​ຄື: ລາວ ກຳ­ປູ­ເຈຍ ມຽນ​ມາ ແລະ ຫວຽດ­ນາມ ປີ 2015 ປະ­ເທດ​ໄທ ​ໄດ້​ເຂົ້າ​ຮ່ວມ ແລະ ໄດ້​ໝູ­ນວຽນ​ເປັນເຈົ້າ­ພາບ​ຈັດ­ການ​ແຂ່ງ­ຂັນ​ຢູ່​ທຸກ​ປະ­ເທດ​ທີ່​ເຂົ້າ​ຮ່ວມ ປີ​ທີ່​ຜ່ານ​ມາ​ທີມ ບູ​ລີ​ລຳ ​ຍູ​ໄນ​ເຕັດ ຈາກ​ປະ­ເທດ​ໄທ​ ເປັນ​ຜູ້​ຊະ­ນະເລີດ ຫຼັງ​ການ​ລົງ​ແຂ່ງ­ຂັນ​ຮອບ​ຊີງ​ຊະ­ນະ​ເລີດ​ລວມ 2 ນັດ ຢູ່​ລາວ ແລະ ໄທ ເນື່ອງຈາກໄດ້​ຮັບ​ການ​ຕອບ​ຮັບ​ຢ່າງ​ຫຼວງ­ຫຼາຍ ແລະ ​ປະ­ສົບ​ຜົນ­ສຳ­ເລັດ​ໃນ​ປີ­ຜ່ານ­ມາ​ ໂຕ​ໂຢ​ຕ້າ ຈິ່ງ​ຕັດສິນ​ໃຈ​ແຂ່ງ­ຂັນ​ບານ­ເຕະ TMCC ຂຶ້ນ ເປັນ​ປີ​ທີ 4.

ປັດ­ຈຸ­ບັນ ​ໂຕ​ໂຢ​ຕ້າ ​ຮ່ວມ​ກັບ​ສະ­ໂມ­ສອນ​ບານ­ເຕະ 4 ປະ­ເທດ​ທີ່​ເຂົ້າ​ຮ່ວມ (ຍົກ­ເວັ້ນ​ມຽນ​ມາ ​ບໍ່​ສະ­ດວກ​ເຂົ້າ​ຮ່ວມ) ຂຶ້ນແຜນ​ຈັດ­ການ​ແຂ່ງ­ຂັນ​ ລະ­ຫວ່າງ​ເດືອນ​ທັນ­ວາ 2017-ເດືອນ​ມັງ­ກອນ 2018 ເຊິ່ງ​ຮອບ​ຊະ­ນະ​ເລີດ​ຈະ​ຈັດ​ຢູ່​ລາວ ​ໃນ​ວັນ​ທີ 17 ທັນ­ວາ 2017 ໂດຍ​ທີມ​ລາວ ​ໂຕ​ໂຢ​ຕ້າ ​ເອ​ຟ​ຊີ ແຊັມ​ຈາກ ​ລາວ​ ພີ​ເມຍ ​ລີກ ພົບ​ກັບ​ທີມ​ຜູ້​ຊະ­ນະ​ເລີດ​ຮອບ​ທຳ​ອິດ ສຳ­ລັບ​ລາຍ​ລະ­ອຽດ​ເພີ່ມ​ເຕີ່ມ​ຈະ​ປະ­ກາດ​​ການ​ຖະ­ແຫຼງ​ຂ່າວ​ລະ­ດັບ​ພາກ​ພື້ນ ໃນ​ເດືອນ​ພະ­ຈິກ 2017 ຢູ່ປະ­ເທດ​ໄທ.

ຂ່າວທີ່ກ່ຽວຂ້ອງ