ລົມ​ເລື່ອງ​ຫວຍ - ໂດຍ : ດັ້ນ​ກີບ​ເມກ

482 25 ກ.ຍ. 2017 ນານາສາລະ

   ຜູ້​ຂຽນ​ອ່ານ​ແຈ້ງ​ການເລກ​ທີ 1244/ຫສນຍ ລົງ​ວັນ​ທີ 17/08/2017 ກ່ຽວ​ກັບ​ການ­ເຄື່ອນ­ໄຫວຂອງ​ບໍ­ລິ­ສັດ​ຫວຍ​ພັດ­ທະ­ນາ ເພາະ​ຖື​ເປັນ​ນະ​ໂຍບາຍ​ທີ່​ສັງ­ຄົມ​ພາ­ກັນ​ສະ­ໜັບ­ສະ­ໜູນ ບໍ່​ທໍ່​ນັ້ນ ດຳລັດ​ເລກ​ທີ 15 ກ່ຽວ​ກັບ​ໄມ້ ແລະ ລວມ​ເຖິງນະ​ໂຍບາຍ​ການ​ປະ­ມູນ​ຂາຍ​ລົດ​ລາ­ຄາ​ແພງ​ຂອງ​ລັດ ລວມ​ທັງ​ນະ­ໂຍ­ບາຍ​ການ​ປະ­ຢັດ ເຊິ່ງ​ຖື​ວ່າ​ໄດ້​ເປັນຜົນ­ງານ​ໂດດເດັ່ນ​ຂອງ​ລັດ­ຖະ­ບານ ເພາະ­ວ່າ​ສັງຄົມ​ຕ່າງ​ກໍ່​ພາ­ກັນ​ຍິນ​ດີ​ຊື່ນ​ຊົມ ເຮັດ​ໃຫ້​ປະ­ເທດ​ມີຄວາມ​ແຂງ­ແຮງ​ຂຶ້ນ​ຫຼາຍ​ດ້ານ ເວົ້າຍັງ​ບໍ່​ໝົດ ເກືອບ​ລືມ​ເລື່ອງ​ທີ່​ລັດ­ຖະ­ບານ​ຮີບ​ດ່ວນ​ຟ້າວ​ແກ້​ໄຂບັນ­ຫາ​ເລື່ອງ​ລົດ​ນຳ​ເຂົ້າ​ບໍ່​ຖືກ­ຕ້ອງ ເຊິ່ງ​ເມື່ອ​ໄດ້ອ່ານ​ເບິ່ງຂອດ​ບ່ອນ​ແກ້​ໄຂ​ບາງ​ລາຍ­ການ​ແລ້ວກໍ່​ເຫັນ​ວ່າ ​ລັດ​ໄດ້​ເງິນ​ຫຼາຍ​ຕື້​ເຂົ້າ​ງົບ­ປະ­ມານ​ຂອງຊາດ.

   ຜູ້​ຂຽນ​ສາ​ທະ​ຍາຍຊື່ນ​ຊົມ​ນຳ​ຜົນ­ງານ​ຂອງ​ລັດຖະ​ບານ ​ເກືອບ​ລືມ​ວ່າ​ບົດ​ນີ້​ຢາກ​ເວົ້າ​ເລື່ອງ​ຫວຍຕື່ມ ເພາະ​ຜົນ​ປາ­ກົດ​ວ່າ ​ງວດ​ອອກ​ມາ​ວັນ​ທີ 30 ສິງ­ຫາ 2017 ຜັດ​ຍັງ​ມີ​ຫວຍ SMS ແບບ​ທັນ​ສະໄໝ​ອອກ​ມາ​ນຳ​ອີກ ເພາະ​ເຂົ້າ­ໃຈ​ຕາມ​ແຈ້ງ​ການດັ່ງ­ກ່າວ​ວ່າ: (2) ໃຫ້​ຢຸດ​ເຊົາ​ການ­ເຄື່ອນ­ໄຫວຫວຍ ທວຍ​ຜົນ​ເຕະ­ບານ ແລະ ດຳ­ເນີນ​ທຸ­ລະ​ກິດຫວຍ SMS ສຳ­ລັບຜະ­ລິດ​ຕະ​ພັນ​ທີ່​ໄດ້​ຮັບ​ອະ­ນຸຍາດ​ແລ້ວ ແຕ່​ບໍ່​ທັນ​ໄດ້​ເຄື່ອນ​ໄຫວ ຄື: ຫວຍ​ບິງໂກ້ ຫວຍ​ໂລ​ໂຕ ແມ່ນ​ໃຫ້​ຍົກ­ເລີກ... ຂ່າວ​ທີ່ຜູ້ຂຽນ​ຍົກ​ມາ​ນີ້​ ຈິງ​ບໍ່​ຈິງ​ພຽງ​ໃດ ຝ່າຍ​ຈັດ​ຕັ້ງ​ກ່ຽວຂ້ອງ​ລອງ​ກວດ­ກາ​ຄືນ​ເບິ່ງ ທັງ​ນີ້ເວົ້າ​ເນັ້ນ​ຢ້ຳ​ຄືນ ກໍ່​ເພື່ອ​ເຂົ້າ­ໃຈ​ເປັນ​ອັນ​ດຽວ​ກັນ ແລະ ໃຫ້​ສັງ­ຄົມປະ­ຕິ­ບັດ​ນະ­ໂຍ­ບາຍ​ໄປ​ໃນ​ແລວ​ດຽວ​ກັນ ເວົ້າ​ແລ້ວກໍ່​ຄິດ​ເຫັນ​ມະ­ຕິ​ຕົກ­ລົງ​ຂອງ​ສະ­ພາ​ລັດ­ຖະ­ມົນ­ຕີ ເລກ​ທີ 347/ປ​ສວ ລົງ​ວັນ​ທີ 14/12/1982 ອອກໂດຍ​ປະ­ທານ​ສະ­ພາ​ລັດ­ຖະ­ມົນ­ຕີ ເຊິ່ງ​ມີ​ຂີດ​ໜ້າ​ໜຶ່ງ​ທີ່​ມະ­ຕິ​ດັ່ງ­ກ່າວ​ໄດ້​ບອກ​ວ່າ: ຈັດ​ຕັ້ງ​ຄຸ້ມ​ຄອງໃບ​ຫວຍ​ພັດ­ທະ­ນາ ​ຕາມ​ລະ­ບອບ​ຄິດ­ໄລ່​ເສດ​ຖະກິດ ແລະ ມອບ​ເຂົ້າ​ງົບ­ປະ­ມານ​ຂອງ​ລັດ ແຕ່ 40-60% ຂອງ​ຕົວ​ເລກ​ຂາຍ​ໃບ​ຫວຍ ສ່ວນ​ອັດຕາ​ສ່ວນ​ຕົວ​ຈິງ​ນັ້ນ​ແມ່ນ​ລັດ­ຖະ­ມົນ­ຕີ​ກະ­ຊວງການ​ເງິນ​ເປັນ​ຜູ້ກຳ­ນົດ​ໃນ​ແຕ່​ລະ​ໄລ­ຍະ ໃນ​ຈຳນວນ​ລາຍ​ຮັບ​ດັ່ງ­ກ່າວ​ນີ້ ຕ້ອງ​ແບ່ງ 50% ໃຫ້​ງົບປະ­ມານ​ແຂວງ ຫຼື ກຳ­ແພງ​ນະ­ຄອນ ແລະ ອີກ 50% ແມ່ນ​ມອບ​ເຂົ້າ​ງົບ­ປະ­ມານ​ສູນ​ກາງ ເຫັນວ່າ​ເລື່ອງ​ຫວຍ​ກໍ່​ແມ່ນ​ລາຍ​ໄດ້​ໜຶ່ງ​ທີ່​ສຳ­ຄັນ​ຂອງລັດ­ຖະ­ບານ ສຳ­ລັບຫວຍ​ນີ້​ນອກ­ຈາກ​ເຄັ່ງ​ຄັດເລື່ອງ​ລາ­ງວັນ​ແລ້ວ ຍັງ​ຈະ​ຕ້ອງ​ເບິ່ງ​ຄືນ​ຕົວ​ແທນຈຳ­ໜ່າຍ​ວ່າ​ເໝາະ​ສົມ​ແລ້ວ ຫຼື ບໍ່? ຕາມ​ຮູ້​ຢູ່ບາງ​ປະ­ເທດ​ຕົວ​ແທນ​ຈຳ­ໜ່າຍ​ຕ້ອງ​ແມ່ນ​ສະ​ມາຄົມ​ນັກ­ຮົບ​ເກົ່າ ສະ­ມາ­ຄົມ​ຜູ້​ເສຍ​ອົງ­ຄະ ແລະ ພິການ... ໃຜ​ຢາກ​ຂາຍຕ້ອງ​ຜ່ານ​ພວກ​ນີ້ ແລ້ວ​ມາເບິ່ງ​ບ້ານ​ເຮົາ ​ຕົວ​ແທນ​ຈຳ­ໜ່າຍ​ເປັນ​ແນວ­ໃດ? ຕັ້ງ​ບັນ­ຫາ​ຕົວ​ແທນ​ຈຳ­ໜ່າຍເພາະ­ວ່າ ຈຸດ­ປະ­ສົງເບື້ອງ​ຕົ້ນ​ກ່ຽວ​ກັບ​ການ​ອອກ​ໃບ​ຫວຍ ແລະ ການດຳ­ເນີນ​ທຸ­ລະ​ກິດ​ຫວຍ​ໃນ​ປັດ­ຈຸ­ບັນ​ມັນ​ຕ່າງ​ກັນ ຍ້ອນ​ສະ­ພາບ​ແວດລ້ອມ​ຫຼາຍ​ຢ່າງ ແຕ່​ເຖິງ​ຢ່າງໃດ​ກໍ່​ຢາກ​ໃຫ້​ລາຍ​ຮັບ​ຈາກ​ການ​ດຳ­ເນີນ​ທຸ­ລະ​ກິດນີ້​ເຂົ້າ​ສູ່​ສ່ວນ​ລວມ​ໃຫ້​ຫຼາຍ​ທີ່​ສຸດ ແທນ​ທີ່ຈະ​ເຂົ້າບຸກ­ຄົນ ຫຼື ກຸ່ມ​ຄົນ.

   ຂໍ​ສະ­ເໜີ​ເປັນ​ການ​ແລກ­ປ່ຽນ

ຂ່າວທີ່ກ່ຽວຂ້ອງ