ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສປ ຈີນ ອິນ​ໂດ​ເນ​ເຊຍ ພູ​ຖານ ນິວ​ຊີ​ແລນ

388 21 ກ.ຍ. 2017 ຫົວຂໍ້ຂ່າວອື່ນໆ

ພົບ​ກັນ​ປະ­ຈຳ​ວັນ​ນີ້ ມີ​ຂ່າວ​ຍ່ອຍໆ​ຫຼາຍ​ເລື່ອງ​ຈາກ​ຕ່າງ­ປະ­ເທດ ເຊິ່ງ​ສ່ວນ​ໃຫຍ່​ກ່ຽວ​ກັບ​ອາ​ຊະ​ຍາ​ກຳ ເຊັ່ນ: ທາງ​ການ ສປ ຈີນ ໃຊ້​ມາດ​ຕະ­ການ​ຕໍ່​ບໍ­ລິ­ສັດ​ໂກງ​ກຳ­ໄລ ເລື່ອງອິນ​ໂດ​ເນ​ເຊຍ ປາບ​ປາມ​ພວກ​ຄ້າ​ມະ­ນຸດ ຕໍ່​ໃສ່​ການ​ປາບ​ປາມ​ການ​ນຳ​ເຂົ້າ​ຄຳ​ຜິດ​ກົດ­ໝາຍ​ທີ່​ປະ­ເທດພູ​ຖານ ສຸດ​ທ້າຍ​ແມ່ນ​ຂ່າວ​ການ​ລົງ­ໂທດ​ກັບ­ຕັນ​ຂີ້​ເມົາ​ຢູ່ນິວ​ຊີ​ແລນ.

ທີ່ ສປ ຈີນ: ໜັງ­ສື­ພິມ ວຽງ​ຈັນ ທາມ ສະ­ບັບ​ວັນ​ທີ 20 ກັນ­ຍາ​ນີ້ ໄດ້​ສະ­ເໜີ​ຂ່າວ​ກ່ຽວ​ກັບ​ເຈົ້າ​ໜ້າ­ທີ່​ຕຳ­ຫຼວດ​ແຂວງ​ເຫີ​ໜານ (Henan Province) ບຸກ​ຈັບ​ກຸມ​ຄຸມ​ຂັງ​ພະ­ນັກ­ງານ​ບໍ­ລິ­ສັດ​ສາ­ຂາ​ເຊີນ​ເຈີ້ນ ທີ່​ເມືອງ​ຊານ​ຊິນ​ຮຸຍ ແຂວງ​ເຫີ​ໜານ ຈຳ­ນວນ 172 ຄົນ ທີ່​ມີ​ສ່ວນ​ຮ່ວມ​ໃນ​ການ​ສວຍ­ໂອ­ກາດ​ເກງ​ກຳ­ໄລ​ຢ່າງ​ມະ­ຫາ­ສານ ຂ່າວ​ບໍ່​ໄດ້​ບອກ​ລະ­ອຽດ​ກ່ຽວ​ກັບ​ຮູບ​ການ​ເກັງ​ກຳ­ໄລ ແຕ່​ເນັ້ນ​ວ່າ ທັງ​ໝົດ​ຈະ​ຖືກ​ດຳ­ເນີນ​ຄະ­ດີ​ທາງ​ອາ­ຍາ ສ່ວນ​ຜູ້​ທີ່​ຍອມ​ມອບ​ໂຕ​ໂດຍ​ດີ ພາຍ​ໃນ​ວັນ​ທີ 30 ກັນ­ຍາ​ນີ້ ຈະ​ໄດ້​ຮັບ​ການ​ຜ່ອນ­ຜັນ​ໂທດ​ການ​ດຳ­ເນີນ​ທຸ­ລະ​ກິດ ກໍ່​ຄື​ການ​ລົງ­ທຶນ​ແບບ​ແຕກ​ປອກ​ນອກ​ກົດ­ໝາຍ​ນີ້ ເປັນ​ບັນ­ຫາ​ທີ່​ຫຼາຍ​ປະ­ເທດ​ຕ້ອງ​ໄດ້​ອອກ­ແຮງ​ແກ້​ໄຂ​ຢ່າງ​ເດັດ­ຂາດ  ຈະ​ເຜີ​ບໍ່​ໄດ້ ເພາະ​ພວກ​ຕ້ອງ­ການ​ຮັ່ງ­ມີ​ທາງ​ລັດ​ນັ້ນ​ຍັງ​ມີ​ຢູ່​ທົ່ວ​ໄປ.

ທີ່ ອິນ​ໂດ​ເນ​ເຊຍ: ຂ່າວ​ຕ່າງ­ປະ­ເທດ​ສົດໆ​ຮ້ອນໆ​ຈາກ​ອິນ​ໂດ​ເນ​ເຊຍ ໃຫ້​ຮູ້​ວ່າ ກອງ​ບັນ­ຊາ​ການ​ຕຳ­ຫຼວດ​ສອບ​ສວນ​ກ່ຽວ​ກັບ​ອາ​ຊະ​ຍາ​ກຳ ​ປະ­ຈຳ­ເມືອງ​ຈຳ​ບີ ໄດ້​ຈັບ​ກຸມ​ຫົວ​ໂປ່​ໂຕ​ການ​ຄ້າ​ມະ­ນຸດ​ຊື່ ເອ (EH) ອາ­ຍຸ 31 ປີ ໄດ້​ຄາ​ໜັງ​ຄາ​ເຂົາ​ທີ່​ໂຮງ­ແຮມແຫ່ງ​ໜຶ່ງ​ ໃນ​ວັນ​ທີ 19 ກັນ­ຍາ​ນີ້ ແລະ ໄດ້​ຫຼັກ​ຖານວ່າ​ ຜູ້​ຊື່​ເອ​ຄົນ​ນີ້​ ເປັນ​ນັກ​ຄ້າ​ນ້ຳ­ກາມ ​ດ້ວຍ​ການ​ບັງ­ຄັບ​ແມ່­ຍິງ ອາ­ຍຸ​ລະ­ຫວ່າງ 18-24 ປີ ຄ້າ​ປະ­ເວ­ນີ ແມ່­ຍິງ​ທີ່​ຕົກ​ເປັນ​ເຫຍື່ອ​ນີ້​ມາ​ຈາກ​ຫຼາຍ​ພາກ­ສ່ວນ​ທີ່​ມີ​ເບື້ອງ​ຫຼັງ​ແຕກ​ຕ່າງ​ກັນ ຜ່ານ​ການ​ສອບ​ສວນ ເຈົ້າ​ໜ້າ­ທີ່​ຕຳ­ຫຼວດ​ພົບ​ວ່າ ຜູ້​ທີ່​ຕົກ​ເປັນ​ເຫຍື່ອ​ການຄ້າ​ໂສ­ເພ­ນີ​ລາຍ​ນີ້​ມີ​ນັກ​ສຶກ​ສາ ແລະ ພະ­ນັກ­ງານຈາກ​ພາກ­ສ່ວນ​ເອ­ກະ​ຊົນ​ຈຳ­ນວນ 8 ຄົນ.

ທີ່ ພູ​ຖານ: ຂ່າວ​ຕ່າງ­ປະ­ເທດ​ໃນ​ກາງ​ເດືອນນີ້​ ໄດ້​ເປີດ­ເຜີຍ​ກ່ຽວ​ກັບ​ການ​ປະ­ຕິ­ບັດ​ງານ​ຂອງ​ເຈົ້າ​ໜ້າ­ທີ່​ຕຳ­ຫຼວດ​ປະ­ເທດ​ພູ​ຖານ ທີ່​ສາ­ມາດ​ຈັບ​ກຸມ​ຜູ້ນຳ​ເຂົ້າ​ຄຳ​ຜິດ​ກົດ­ໝາຍ ​ຈຳ­ນວນ 11.045 ກິ​ໂລ ຂ່າວ​ບອກ​ວ່າ ເຈົ້າ​ໜ້າ­ທີ່​ໄດ້​ຈັບ​ກຸມ​ຜູ້​ກະ­ທຳ​ຜິດສອງ​ຄົນ​ຈາກ​ເມືອງ​ທິມ​ຟູ ໃນ​ວັນ​ທີ 7 ແລະ ອີກ 1 ຄົນ​ຈາກ​ເມືອງ​ປາ​ໂຣ ໃນ​ວັນ​ທີ 6 ເດືອນ​ນີ້​ເຊັ່ນ​ກັນ ນອກ​ນັ້ນຍັງ​ໄດ້​ຈັບ​ກຸມ​ຕື່ມ​ອີກ 5 ຄົນ​ທີ່​ມີ​ສ່ວນ​ຮ່ວມໃນ​ຂະ​ບວນ​ນຳ​ເຂົ້າ​ຄຳ​ຜິດ​ກົດ­ໝາຍ​ຄັ້ງ​ນີ້ ຄະ­ດີ​ດັ່ງກ່າວ​ເປັນ​ຂະ​ບວນ​ເກາະ​ກ່ອງ​ມາ​ແຕ່​ເຫດ­ການ​ຈັບກຸມ​ຜູ້​ຕ້ອງ​ສົງ­ໄສ​ສອງ​ຄົນ​ທີ່​ສະ­ໜາມ​ບິນ​ສາ­ກົນ ເມືອງ​ປາ​ໂຣ ໃນ​ວັນ​ທີ 27 ສິງ­ຫາ​ຜ່ານ​ມາ ທີ່​ບິນ​ໄປຈາກ​ບາງ­ກອກ​ປະ­ເທດ​ໄທ

ທີ່ ນິວ​ຊີ​ແລນ: ຂ່າວ​ນີ້​ອ່າວ​ເກົ່າ​ ຈາກ​ໜັງ­ສື­ພິມ ເດິ​ ເນ​ຊັ້ນ ສະ­ບັບ​ວັນ​ທີ 8 ສິງ­ຫາ​ຜ່ານ​ມາ ເປັນ​ອຸ​ທາຫອນ​ສອນ​ໃຈ​ກ່ຽວກັບ​ໂທດ​ຂອງ​ຄວາມ​ມຶນ­ເມົາຍ້ອນ​ລິດ​ເຫຼົ້າ ເລື່ອງ​ມີ​ຢູ່​ວ່າ ທ້າວ ແອນ​ໂທ​ນີ ໄມ​ເກິນ ເບ​ເກີ ອາ­ຍຸ 53 ປີ ມີ​ອາ­ຊີບ​ເປັນ​ກັບ­ຕັນ​ບັນ­ຊາ​ກຳປັ່ນ​ບັນ­ທຸກ​ສິນ­ຄ້າ​ນ້ຳ­ໜັກ 40.000 ໂຕນ ເຂົາ​ຖືກເຈົ້າ​ໜ້າ­ທີ່​ຈັບ​ໄດ້​ວ່າ​ດື່ມ​ເຫຼົ້າ​ເມົາ​ຈົນ​ຄວບ​ຄຸມ​ຕົນເອງ​ບໍ່​ຢູ່​ໃນ​ຂະ­ນະ​ບັນ­ຊາ​ກຳ­ປັ່ນ​ເຂົ້າ​ຈອດ ຜູ້​ຊ່ວຍກັບ­ຕັນ​ສັງ­ເກດ​ເຫັນ​ຄວາມ​ຜິດ​ປົກ­ກະ­ຕິ ເວ­ລາ​ກັບຕັນ​ຂີ້​ເມົາ​ບັນ­ຊາ​ກຳ­ປັ່ນ​ທຽບ​ທ່າ ຂ່າວ​ບອກ​ວ່າ ພາຍ­ຫຼັງ​ຈອດ​ກຳ­ປັ່ນ​ດ້ວຍ​ຄວາມ​ສ່ຽງ​ເປັນ​ທີ່​ຮຽບຮ້ອຍ ຜູ້­ກ່ຽວ (ກັບ­ຕັນ) ໄດ້​ສືບ­ຕໍ່​ກ໋ອກ​ຕື່ມ ຈາກ​ຜົນ ການ​ພິ­ສູດ​ທາດ​ເຫຼົ້າ​ໃຫ້​ຮູ້​ວ່າ ທ່ານ ແອນ​ໂທ​ນີ້ ໄດ້ດື່ມ­ນ້ຳ​ຕາ​ຜີ​ເຜດ​ສູງ​ກວ່າ​ມາດ­ຕະ­ຖານ​ຕາມ​ກົດໝາຍ​ກຳ­ນົດ 5 ເທື່ອ ສຸດ​ທ້າຍ​ກັບ­ຕັນ​ຄໍ​ທອງ­ແດງ​ຄົນ​ນີ້ ​ກໍ່​ຖືກ​ໄລ່​ອອກ​ການ ແລະ ໝົດ​ຫວັງ​ທີ່​ຈະ​ໄດ້ປະ­ກອບ​ອາ­ຊີບ​ນີ້​ອີກ​ຕະ­ຫຼອດ​ຊີ­ວິດ.

ຂ່າວທີ່ກ່ຽວຂ້ອງ