ເພີ່ມ​ບົດ​ລົງ­ໂທດ ຕໍ່​ພວກ​ຂັບ​ລົດ​ບໍ່​ຫ່ວງ​ໂລກ - ໂດຍ : ແນວ​ລາວ

526 20 ກ.ຍ. 2017 ນານາສາລະ

ພໍ​ແຕ່​ເລີ່ມ​ເຂົ້າ​ສູ່​ສົກ­ຮຽນ​ໃໝ່ ການ​ສັນ­ຈອນ​ຢູ່ນະ­ຄອນ­ຫຼວງ​ວຽງ​ຈັນ ​ກໍ່​ເລີ່ມ​ມີ​ບັນ­ຫາ​ແລ້ວ ໂດຍສະ­ເພາະໃນ​ຊົ່ວ­ໂມງ​ຮີບຮ້ອນ ລົດ​ແອ​ອັດ​ເປັນ​ຊຳເຮື້ອ ໃນ​ຈຸດ​ທີ່​ມີ​ໂຮງ­ຮຽນ​ຕັ້ງ​ຢູ່.

ຫຼາຍ​ປີ​ມາ​ນີ້​ມີ​ຄຳ​ເຫັນ​ວ່າ ຄວນ​ກຳ­ນົດ​ເວ­ລາເຂົ້າ​ຮຽນເຊົ້າ​ຂຶ້ນ ແລະ ເລີກ​ໄວ ກໍ່​ພໍ​ທຸ​ເລົາ​ລົງ​ໄດ້ໃນ​ບາງ​ຈຸດ ແຕ່​ບໍ່​ເຂົ້າ​ເຖິງບັນ­ຫາ ເພາະທີ່​ຕັ້ງ​ໂຮງຮຽນບາງ​ແຫ່ງ​ແປະ​ທາງ​ໂພດ ບາງ​ແຫ່ງ​ຮ່ອມດຽວ​ມີ​ໂຮງ­ຮຽນ​ຫຼາຍ​ຫຼັງ ແລະ ສຸດ​ທ້າຍ​ກໍ່​ແມ່ນຄວາມ​ມັກ­ງ່າຍ​ຂອງ​ຜູ້​ປົກ­ຄອງ​ຂັບ​ລົດ​ໃຫຍ່​ຈຳ​ປະຕູ​ໂຮງ­ຮຽນ ​ໃນ​ເວ­ລາ​ສົ່ງ ຫຼື ຮັບ​ນັກ­ຮຽນ (ເສດ­ຖີໃໝ່).

ມີ​ຫາງ​ສຽງ​ເວົ້າ​ເຖິງ​ການ​ແກ້​ໄຂ​ສະ­ເພາະ​ໜ້າວ່າ: ຄວນ​ກວດ­ກາ​ຄືນ​ທີ່​ຕັ້ງ​ຂອງ​ໂຮງ­ຮຽນ​ທົ່ວ​ນະຄອນ​ຫຼວງ ເປັນ­ຕົ້ນແມ່ນໂຮງ­ຮຽນ​ແຄມ​ທາງ ໂຮງ­ຮຽນ​ບໍ່​ມີ​ເດີ່ນ ເອົາ​ເຮືອນ​ຫ້ອງ​ແຖວ​ເປັນ​ທີ່​ຕັ້ງໂຮງ­ຮຽນ ​ຕັ້ງ​ຢູ່​ຮ່ອມ​ດຽວ ​ຕັ້ງ​ສອງ-ສາມ​ຫຼັງ ໂຮງ ຮຽນ​ພວກ​ນີ້​ເບື້ອງ​ຕົ້ນ​ຕ້ອງ​ບັງ­ຄັບ​ໃຫ້​ຫຼຸດ​ຫ້ອງ​ຮຽນ ຊັ້ນ​ໜຶ່ງ​ຫຼາຍ​ສຸດ​ກໍ່​ໃຫ້​ມີ​ສອງ​ຫ້ອງ​ພໍ ແລະ ແຍກອະ­ນຸ­ບານ-ປະ­ຖົມອອກ​ຕ່າງ­ຫາກ ມັດ­ທະ­ຍົມ​ຕົ້ນ ແລະ ປາຍ​ຕ່າງ­ຫາກ ເພາະ​ຫາກ​ລວມ​ແຕ່​ອະ­ນຸບານ​ຈົນ​ເຖິງ​ມັດ­ທະ­ຍົມ​ຕອນ​ປາຍ​ມັນຫຼາຍ​ຊັ້ນໂພດ​ຢູ່​ໂຮງ­ຮຽນ​ຫຼັງ​ດຽວ ມັນ​ສັບ­ສົນ ເພາະ​ລຸ້ນ​ອາຍຸ​ເລີ່ມ​ຫ່າງ​ກັນ​ແລ້ວ ຫາກ​ເບິ່ງ​ໃນ​ແງ່​ການ​ລົງ­ທຶນແລ້ວ​ພາກເອ­ກະ​ຊົນ​ລົງ­ທຶນ​ບໍ່​ສົນ​ຄູ່​ປານ­ໃດ?.

ການ​ແກ້​ບັນ­ຫາ​ຍາວ​ນານ​ແມ່ນ ​ເລີ່ມຫຍັບຍ້າຍ​ໂຮງ­ຮຽນ​ອອກ​ສູ່​ຊານ­ເມືອງ ຄື​ກັນ​ກັບ​ການຍົກ­ຍ້າຍ​ສຳ­ນັກ­ງານ ຫ້ອງ­ການ​ຂອງ​ລັດ ບໍ່​ຊັ້ນແກ້​ບໍ່​ຕົກ.

ມາດ​ຕະ­ການ​ສຸດ​ທ້າຍ​ແມ່ນ ເພີ່ມ​ກຳ­ລັງ​ເຈົ້າໜ້າ­ທີ່​ຈະ­ລາ­ຈອນ​ໃຫ້​ຫຼາຍ​ຂຶ້ນ ມີ​ລົດ​ແລ່ນ​ເຄື່ອນທີ່​ປະ­ຈຳ​ເສັ້ນ­ທາງ​ຕ່າງໆ​ທົ່ວ​ສີ່​ຕົວ​ເມືອງ​ໃນ ການເຄື່ອນ​ທີ່​ນີ້​ແມ່ນ​ແນ­ໃສ່​ປາບ​ພວກ​ຈອດ​ລົດ​ຊະ­ຊາຍ ພວກ​ມັກ­ງ່າຍ ພວກ​ຂັບ​ລົດ​ເອົາ­ໃຈ​ຕົນ​ເອງ ເຫຼົ່ານີ້ເປັນ­ຕົ້ນ.

ການ​ແກ້​ໄຂ​ການ​ສັນ­ຈອນ​ແອ​ອັດ​ນີ້​ມີ​ຢູ່​ທຸກ​ປະເທດ​ໃນ​ໂລກ ໂດຍ​ສະ­ເພາະແມ່ນ​ຢູ່​ນະ­ຄອນ­ຫຼວງ ຫຼື ຕົວ​ເມືອງ​ໃຫຍ່ ສະ­ນັ້ນ ຄວນ​ຖອດ​ຖອນ​ບົດຮຽນ​ຈາກ​ປະ­ເທດ​ເພິ່ນເມືອງ​ທ່ານ​ແດ່​ກໍ່​ດີ ໃນ​ນີ້ ຕ້ອງ​ສ້າງ​ໃຫ້​ພວກ​ຂັບ​ລົດ​ມີ​ຄວາມ​ຕື່ນ​ຕົວ ແລະ ເພີ່ມ​ບົດ​ລົງ­ໂທດ​ຢ່າງ​ໜັກ​ຕໍ່​ຜູ້​ກະ­ທຳ​ຜິດ ບໍ່​ຊັ້ນ ພວກ​ທີ່​ຂັບ​ລົດ​ແບບ​ບໍ່​ຫ່ວງ​ໂລກ​ຊິ​ບໍ່​ຢ້ານ ບໍ່​ກົວ ບໍ່ຫຼາບ ບໍ່​ຈື່ ແທ້​ໃດ໋!.

ຂ່າວທີ່ກ່ຽວຂ້ອງ