ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ຍີ່­ປຸ່ນ ອິນເດຍ ກຳ­ປູ­ເຈຍ

364 20 ກ.ຍ. 2017 ຫົວຂໍ້ຂ່າວອື່ນໆ

ພົບ​ກັນ​ຕາມ​ເຄີຍກັບ​ຄໍ​ລຳ​ກັ່ນ​ຕອງ​ບົດ­ຮຽນ​ຈາກຕ່າງ­ປະ­ເທດ ສຳ­ລັບ​ມື້­ນີ້​ມີ​ເລື່ອງ​ນະ­ໂຍ­ບາຍ​ດີໆຂອງ​ຍີ່­ປຸ່ນ ສຳ­ລັບ​ຜູ້​ເປັນ​ພໍ່​-ແມ່​ທີ່​ມີ​ພັນ­ທະ​ລ້ຽງ​ລູກພຽງ​ຝ່າຍ​ດຽວ ເລື່ອງອິນເດຍ ໃຫ້ຄວາມ​ປອດ​ໄພ​ສຳ­ລັບ​ກຳ­ມະ­ກອນ​ຂຸດ​ຄົ້ນ​ບໍ່​ແຮ່ທາດ ແລະ ເລື່ອງ​ນະ­ໂຍ­ບາຍ​ຄ່າ​ແຮງງານ​ໃນ​ກຳ­ປູ­ເຈຍ.

ທີ່ ຍີ່­ປຸ່ນ: ໃນ​ທີ່​ສຸດ​ລັດ­ຖະ­ບານ​ຍີ່­ປຸ່ນ ກໍ່​ໄດ້​ອອກ​ນະ­ໂຍ­ບາຍ​ດີໆ​ສຳ­ລັບ​ຜູ້​ເປັນ​ພໍ່ ແລະ ຜູ້​ເປັນ​ແມ່​ ທີ່ລ້ຽງ​ລູກ​ດ້ວຍ​ຕົນ​ເອງພຽງ​ຄົນ​ດຽວ ໝາຍ​ຄວາມ​ວ່າ ພໍ່​ໂທນ ບໍ່​ມີ​ເມຍ ຫຼື ແມ່​ໂທນ ບໍ່​ມີ​ຜົວ​ ທີ່ລ້ຽງ​ລູກຊ່ວຍ ໃນ​ເມື່ອ​ກ່ອນ​ລັດ­ຖະ­ບານ​ຍີ່­ປຸ່ນ ​ມີ​ນະ­ໂຍ­ບາຍສະ­ຫວັດ­ດີ​ການ​ເພື່ອ​ຊ່ວຍ​ລ້ຽງ​ລູກ​ສຳ­ລັບ​ຜູ້​ເປັນແມ່​ຂອງ​ເດັກ​ທີ່​ຜົວ​ຕາຍ ຫຼື ປະ​ຍ້ອນ​ການ​ຢ່າ​ຮ້າງ ແລະ ຊ່ວຍ​ຜູ້​ເປັນ​ພໍ່​ທີ່​ປະ​ກັບ​ເມຍ ຫຼື ເມຍ​ເສຍ​ຊີ­ວິດ ສ່ວນ​ຜູ້​ຊາຍ ຫຼື ແມ່­ຍິງ​ທີ່​ມີ​ລູກ​ໂດຍ​ບໍ່​ມີ​ການ​ແຕ່ງດອງ​ນັ້ນ ​ແມ່ນ​ບໍ່​ໄດ້​ຮັບ​ນະ­ໂຍ­ບາຍດັ່ງ­ກ່າວ ມາ​ບັດນີ້​ໜັງ­ສື­ພິມ Vientiane Times (23/08/2017) ລັດ­ຖະ­ບານ​ຍີ່­ປຸ່ນ ໄດ້​ກຳ­ນົດ​ນະ­ໂຍ­ບາຍ​ຊ່ວຍ­ເຫຼືອ​ຊາຍ-ຍິງ​ທີ່​ມີ​ລູກ​ນອກ​ການ​ແຕ່ງ­ດອງ ທີ່​ມີ​ພັນ­ທະ​ລ້ຽງ​ລູກ​ຝ່າຍ​ດຽວ ຄື​ໄດ້​ມີ​ສິດ​ໄດ້​ຮັບ​ສ່ວນ​ຫຼຸດ​ພາ­ສີ​ໃນ​ການ​ຊື້​ເຄື່ອງຂອງ​ອັນ​ຈຳ­ເປັນ​ສຳ­ລັບ​ລ້ຽງ​ລູກ ແລະ ການ​ນຳ​ໃຊ້​ສິ່ງ​ອຳ­ນວຍ​ຄວາມ​ສະ­ດວກ​ສຳ­ລັບ​ລູກ ຄື​ດຽວ​ກັບ​ພໍ່​ໍ​ແມ່​ຂອງ​ເດັກ​ທົ່ວໆ  ໄປ ​ເມື່ອ​ກ່ອນ​ລັດຖະ​ບານ​ມີ​ນະ­ໂຍ­ບາຍ​ສະ­ເພາະແຕ່​ຜູ້​ທີ່​ເປັນ​ຮ້າງ-ເປັນ​ໝ້າຍ​ໃນ​ການ​ລ້ຽງ​ລູກ ແຕ່​ກ່ອນ​ຈະ​ກ້າວ​ໄປເຖິງບ່ອນ​ປະ­ຕິ­ບັດ​ນະ­ໂຍ­ບາຍ​ດີໆ​ນີ້ ທາງ​ການ​ຍີ່­ປຸ່ນ ກໍ່​ຕ້ອງ​ໄດ້​ດັດ­ແກ້​ປະ­ມວນ​ນິ­ຕິ​ກຳ​ທີ່​ກ່ຽວ­ຂ້ອງ ແລະ ຄາດ​ວ່າ​ຈະ​ສາ­ມາດ​ປະ­ຕິ­ບັດ​ໄດ້​ນັບ​ແຕ່​ເດືອນ​ເມສາ ປີ 2018 ເປັນ­ຕົ້ນ​ໄປ ນະ­ໂຍ­ບາຍ​ສຳ­ຄັນ​ຕົ້ນ­ຕໍແມ່ນ​ການ​ຫຼຸດ​ພາ­ສີ​ເຄື່ອງ​ອຸ­ປະ­ໂພກ​ບໍ­ລິ­ໂພກ​ທີ່​ຈຳເປັນ ​ສຳ­ລັບ​ເດັກການ​ນຳ​ໃຊ້​ສະ­ຖານ­ທີ່​ພັດ­ທະ­ນາ ແລະ ເບິ່ງ­ແຍງ​ສຸ­ຂະ­ພາບ​ຂອງ​ເດັກ​ໄປ ພ້ອມໆ​ກັບນະ­ໂຍ­ບາຍ​ສຳ­ລັບ​ພໍ່-ແມ່​ທີ່​ມີ​ພັນ­ທະ​ລ້ຽງ​ລູກ​ນອກການ​ແຕ່ງ­ດອງ​ແລ້ວ ກະ­ຊວງ​ສາ­ທາ­ລະ­ນະ​ສຸກ ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ​ຍີ່­ປຸ່ນ ຍັງ​ຈະ​ພິ­ຈາ­ລະ­ນາ​ນະ­ໂຍ­ບາຍ​ແບບ​ດຽວ​ກັນ​ນີ້ ​ສຳ­ລັບ​ເດັກ​ທີ່​ມີ​ພະ­ຍາດ​ຊະ­ນິດ​ປິ່ນ­ປົວ​ໃຫ້​ຫາຍ​ຍາກ ແລະ ເດັກ​ພິ­ການ ທາງ​ກະ­ຊວງ​ຄາດ​ວ່າ ບັນ­ດາ​ພໍ່ໂທນ​ແມ່​ໂທນ​ທີ່​ລ້ຽງ​ລູກ​ນອກ​ສົມ­ລົດ​ພຽງ​ຝ່າຍດຽວ ​ຈຳ­ນວນ 2.700 ຄົນ ຈະ​ໄດ້​ຮັບ​ນະ­ໂຍ­ບາຍ ເຊິ່ງ​ລວມ​ຢູ່​ໃນ​ງົບ­ປະ­ມານ​ປະ­ຈຳ​ປີ 2018 ຕາມ​ສະຖິ​ຕິ​ຂອງ​ກະ­ຊວງ​ສາ­ທາ­ລະ­ນະ​ສຸກ ແຮງ​ງານ ແລະ ສະ­ຫວັດ­ດີ​ການສັງ­ຄົມ​ຍີ່­ປຸ່ນ​ນັ້ນ ເດັກ​ທີ່­ຢູ່​ໃນ​ຄອບຄົວ​ຫຼຸດ​ມາດ­ຕະ­ຖານ​ລາຍ​ໄດ້​ສຳ­ລັບ​ຄອບ­ຄົວ​ປະ­ມານ​ນ້ອຍ​ກວ່າ​ເຄິ່ງ​ໜຶ່ງ​ນັ້ນ ​ມີ​ເຖິງ 13,9% ຂອງເດັກ​ອາ­ຍຸ 18 ປີ​ໃນ​ທົ່ວ​ປະ­ເທດ.

ທີ່ ອິນ​ເດຍ: ມີ​ຂ່າວ​ສັ້ນ​ຈາກ​ອິນ​ເດຍ​ໃນ​ກາງ​ເດືອນ​ກັນ­ຍາ​ນີ້​ທີ່​ໃຫ້​ຮູ້​ວ່າ ທ່ານ​ປະ­ທາ­ນາ­ທິ­ບໍ­ດີ ຣາມ​ນາດ ໂກ​ວິນ (Ram Nath Koving) ຂອງ​ອິນ​ເດຍ ​ທີ່​ຫາ­ກໍ່ກຳ​ອຳ­ນາດ​ໃໝ່ໆ​ໝາດໆ ໄດ້​ປະ­ກາດ​ອອກ​ມາ​ວ່າ ຄວາມ​ປອດ​ໄພ​ສຳ­ລັບ​ກຳ­ມະ­ກອນ​ຂຸດ​ຄົ້ນ​ບໍ່​ແຮ່ທາດ​ນັ້ນ ບໍ່​ແມ່ນ​ບັນ­ຫາ​ທີ່​ຈະ​ຕໍ່​ລອງ​ກັນ​ໄດ້ ແຕ່​ເປັນບັນ­ຫາ​ທີ່​ມີ​ຄວາມ​ສຳ­ຄັນ​ຢ່າງ​ຍວດ​ຍິ່ງ ໂດຍ​ທ່ານໄດ້​ຮຽກ­ຮ້ອງ​ໃຫ້​ມີ​ການ​ປັບ­ປຸງ​ລະ­ບົບ​ຄວາມ​ປອດ​ໄພ ແລະ ມາດ­ຕະ­ຖານ​ທາງ​ອາ­ຊີບ​ໃຫ້​ມີ​ຄຸ­ນະ­ພາບສູງ​ຂຶ້ນ ທ່ານ​ປະ­ທາ­ນາ­ທິ­ບໍ­ດີ ມີ​ຄຳ​ເຫັນ​ກ່ຽວ​ກັບ​ບັນຫາ​ນີ້​ໃນ​ພິ­ທີ​ມອບ​ລາ­ງວັນ​ຄວາມ​ປອດ​ໄພ​ແຫ່ງ​ຊາດ (ຂະ­ແໜງ​ບໍ່​ແຮ່).

ທີ່ ກຳ­ປູ­ເຈຍ: ມີ​ຂ່າວ​ອອກ​ມາ​ຈາກ​ກຳ­ປູ­ເຈຍ ​ທີ່​ບອກວ່າ ກົດ­ໝາຍ​ກຳ­ນົດ​ຄ່າ​ແຮງ​ງານ​ຂັ້ນ​ຕ່ຳ​ຈະ​ຖືກ​ຮັບ​ຜ່ານ ແລະ ປະ­ກາດ​ໃຊ້​ພາຍ​ໃນ​ປີ​ນີ້ ເພື່ອ​ແກ້​ໄຂ​ບັນຫາ​ກຳ­ມະ­ກອນ​ຂະ­ແໜງ​ອຸດ­ສາ­ຫະ­ກຳ​ຕັດ­ຫຍິບເດີນ​ປະ​ທ້ວງ​ທວງ​ໃຫ້​ຂຶ້ນ​ຄ່າ​ແຮງ​ງານ ​ທີ່​ມີ​ຂຶ້ນ​ເປັນ​ປະ­ຈຳ ແລະ ຮ້າຍ​ແຮງ​ທີ່​ສຸດ​ແມ່ນ​ໃນ​ປີ 2013 ຮ່າງ​ກົດ­ໝາຍ​ກຳ­ນົດ​ຄ່າ​ແຮງ​ງານ​ຂັ້ນ​ຕ່ຳ​ນີ້ ໄດ້​ຮັບສຽງວິ­ພາກ​ວິ­ຈານ​ຈາກ​ອົງ­ການ​ແຮງ​ງານ​ອິດ​ສະຫຼະ​ວ່າ ຍັງ​ຂາດ​ການ​ທາບ​ທາມ​ຢ່າງ​ກວ້າງ­ຂວາງ ແຕ່​ລັດ­ຖະ­ບານ​ຈະ​ເດີນ​ໜ້າຮັບ­ຮອງ​ເອົາ​ກົດ­ໝາຍສະ­ບັບ​ນີ້​ຕາມ​ກຳ­ນົດ ອຸດ­ສາ­ຫະ­ກຳ​ຜະ­ລິດ​ເຄື່ອງ­ນຸ່ງ​ຫົ່ມ​ເພື່ອ​ສົ່ງ​ອອກ​ຂອງ​ກຳ­ປູ­ເຈຍ ມີ​ຂະ­ໜາດໃຫຍ່ເປັນ​ທີ 3 ຂອງ​ໂລກ ຮອງ​ຈາກ ສປ ຈີນ ແລະ ບັງ​ກະ­ລາ​ເທດ.

ຂ່າວທີ່ກ່ຽວຂ້ອງ