ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສິງ­ກະ­ໂປ ຍີ່­ປຸ່ນ

295 19 ກ.ຍ. 2017 ຫົວຂໍ້ຂ່າວອື່ນໆ

ມື້­ນີ້​ຂໍ​ເລີ່ມ​ກັບ​ເລື່ອງ​ແຜນ​ສ້າງ​ສິງ­ກະ­ໂປ ໃຫ້​ເປັນ​ປະ­ເທດ​ອັດ​ສະ​ລິ​ຍະ ແລະ ນະ­ໂຍ­ບາຍ​ສົ່ງ­ເສີມ​ໃຫ້ເດັກ​ຍ່າງ​ໄປ​ໂຮງ­ຮຽນ​ເອົາ​ເອງ​ຢູ່​ຍີ່­ປຸ່ນ.

ທີ່ ສິງ­ກະ­ໂປ: ໃນ​ວັນ​ທີ 9 ສິງ­ຫາ​ຜ່ານ​ມາ ທ່ານ​ນາ­ຍົກ ລີ ຊຽນ​ລຸງ ແຫ່ງ​ສິງ­ກະ­ໂປ ໄດ້​ອອກ​ມາ​ເປີດເຜີຍ​ໃຫ້​ຮູ້​ກ່ຽວ​ກັບ​ເປົ້າໝາຍ​ເດັດໆ​ເພື່ອ​ພັດ​ທະນາ​ປະ­ເທດ​ໃຫ້​ໄປ​ສົມ​ຄູ່​ກັນ​ທັງ​ສາມ​ດ້ານ ແນ­ໃສ່ເຮັດ​ໃຫ້​ສິງ­ກະ­ໂປ ກາຍ­ເປັນ​ປະ­ເທດ​ອັດ​ສະ​ລິຍະ ຫຼື ເອີ້ນ​ເປັນ​ພາ­ສາ​ອັງ­ກິດ ​ວ່າ Smart country (ສະ­ມາດ​ຄັນ​ທີ) ສາມ​ດ້ານ​ທີ່​ວ່າ​ນັ້ນ​ຄື ຂົງ­ເຂດ​ການ​ສຶກສາ​ຂັ້ນ​ປະ­ຖົມ​ທີ່​ຈະ​ເນັ້ນ​ຄຸ­ນະ­ພາບ​ຂອງ​ສະ­ຖານ­ທີ່ຮ່ຳ­ຮຽນ ແລະ ກະ​ໂຕ​ຄູ​ສອນ​ພ້ອມໆ​ກັບ​ການ​ເພີ່ມຈຳ­ນວນ​ໂຮງ­ຮຽນ​ ທີ່​ຕ້ອງ​ເນັ້ນການ​ຮຽນ​ລະ­ດັບ​ໂຮງຮຽນ​ປະ­ຖົມ​ກໍ່​ເພາະ­ວ່າ​ ມັນ​ເປັນ​ກົກ​ເຄົ້າ​ເຫງົ້າ​ຮາກ​ຂອງ​ການ​ຮຽນ​ຂັ້ນ​ສູງ​ກວ່າ​ນັ້ນ ຖ້າ​ການ​ຮຽນ​ການສອນ​ໃນ​ຂັ້ນ​ປະ­ຖົມ​ເຮັດ​ໄດ້​ດີ​ ມັນ​ກໍ່​ຈະ​ກາຍ­ເປັນ​ເສົາຄ້ຳ​ອັນ​ແໜ້ນ​ແກ່ນ ​ສຳ­ລັບ​ພັດ­ທະ­ນາ​ການ​ສຶກ​ສາລະ­ດັບ​ສູງ​ຂຶ້ນ ການພັດ­ທະ­ນາ​ການ​ຮຽນ​ລະ­ດັບ​ປະຖົມ​ນັ້ນ ນອນ​ຢູ່​ໃນ​ເປົ້າ​ໝາຍ​ລວມ​ຂອງ​ສິງ­ກະ­ໂປ ​ໃນການ​ຊ່ວຍ­ເຫຼືອ​ຄົນ​ຮຸ່ນ​ສືບ​ທອດ​ໃຫ້ກຽມ​ຄວາມພ້ອມ​ສ້າງ​ອະ­ນາ­ຄົດ​ອັນ​ດີ ແລະ ສົດ​ໄສ ສຳ­ຄັນດ້ານ​ສຸ­ຂະ­ພາບ ສິງ­ກະ­ໂປ ຈະ​ມີ​ວິ­ທີ​ຍືດ​ອາ­ຍຸ​ພົນ​ລະເມືອງຂອງ​ຕົນ​ໃຫ້​ຍືນ​ຍາວ​ຕື່ມ ໄປ​ພ້ອມໆ​ກັບ​ມີ​ສຸ​ຂະພາບ​ດີ ບັນ­ຫາ​ສຸ­ຂະ­ພາບ​ທີ່​ຕ້ອງ​ໄດ້​ເອົາ­ໃຈ­ໃສ່​ແກ້ໄຂ​ດ່ວນ​ທີ່​ສຸດກໍ່​ຄື ບັນ­ຫາ​ທີ່​ຜູ້​ມີ​ອາ­ຍຸ​ສູງ​ພົບ​ໃນ​ໄລຍະ 8 ປີ ບັ້ນ​ທ້າຍ​ຂອງ​ຊີ­ວິດນັ້ນ​ຄື ພະ­ຍາດ​ເບົາຫວານ ຢາກ​ແກ້​ບັນ­ຫາ​ນີ້​ໄດ້ ຄົນ​ສິງ­ກະ­ໂປ​ຕ້ອງ​ມີແຜນ​ສຸ­ຂະ­ພາບແຕ່​ເຍີ້ນໆ​ໄວ້ ຄືເອົາ­ໃຈ­ໃສ່​ເລື່ອງອາ­ຫານ​ການ​ກິນ ການ​ອອກ­ກຳ­ລັງ​ກາຍ​ຢ່າງ​ສະໝ່ຳ​ສະ­ເໝີ ແລະ ຢ່າ​ລືມ​ດື່ມ­ນ້ຳ​ໃຫ້​ຫຼາຍໆ ແລະ ດ້ານ​ທີ​ສາມກໍ່​ຄື ຕ້ອງ​ສ້າງ​ສິງ­ກະ­ໂປ​ ໃຫ້​ກາຍ­ເປັນປະ­ເທດ​ອັດ​ສະ​ລິ​ຍະ​ທີ່​ມີ​ຄວາມ​ອັດ­ສະ­ຈັນ ຫຼື ເອີ້ນກັນ​ວ່າ ສະ­ມາດ​ຄັນ​ທີ ບາດ­ກ້າວ​ສູ່​ເປົ້າ​ໝາຍ​ດັ່ງກ່າວ​ຕ້ອງ​ເລີ່ມ​ຈາກ​ການ​ສຶກ​ສາບົດ­ຮຽນ​ຂອງ​ປະເທດ​ອື່ນໆ ຈາກ​ນັ້ນກໍ່​ກະ­ໂດດ​ໄລ່​ຕາມ​ໃຫ້​ທັນ ແລ້ວແຊງ​ໜ້າ​ໃຫ້​ໄດ້ ໂດຍ​ສະ­ເພາະແມ່ນ​ທາງ​ດ້ານລະ­ບົບ​ການ​ໃຊ້​ຈ່າຍ​ຜ່ານ​ເອ​ເລັກ​ໂຕຣ​ນິກ ເພື່ອ​ກ້າວສູ່​ສັງ­ຄົມ​ທີ່​ໄຮ້​ເງິນ­ສົດ ພັດ­ທະ­ນາ ແລະ ນຳ​ໃຊ້​ລະບົບ​ເຊັນ​ເຊີ (ລະ­ບົບ​ຈັບ​ສັນ­ຍານ) ເພື່ອ​ຮັບ­ປະ­ກັນ ຄວາມ​ປອດ​ໄພ​ສາ­ທາ­ລະ­ນະ ແລະ ພັດ­ທະ­ນາ​ລະບົບ​ວິ­ເຄາະ​ຂໍ້​ມູນ​ຂະ­ໜາດ​ໃຫຍ່ ເພື່ອ​ພັດ­ທະ­ນາ​ກົນ​ໄກ​ບໍ­ລິ­ການ​ສາ­ທາ­ລະ­ນະ.

ທີ່ ຍີ່­ປຸ່ນ: ເລື່ອງ​ຕໍ່​ໄປ​ນີ້​ຟັງ​ແລ້ວ​ຮູ້­ສຶກ​ສີ​ແປກໆ ເພາະ​ຍີ່­ປຸ່ນ​ ເປັນ​ປະ­ເທດ​ຜະ­ລິດ ແລະ ສົ່ງ​ອອກ​ລົດໃນ​ລະ­ດັບ​ຫົວ​ແຖວຂອງ​ໂລກ ແຕ່​ທາງ​ການ​ຂອງປະ­ເທດ​ນີ້​ຜັດ​ສົ່ງ­ເສີມ​ນະ­ໂຍ­ບາຍ​ໃຫ້​ເດັກ​ນັກ­ຮຽນໃຊ້​ຕີນ​ຍ່າງ​ໄປ​ໂຮງ­ຮຽນ ຫ້າມ​ຜູ້​ເປັນ​ພໍ່ເປັນ​ແມ່​ຂັບລົດ​ບຽດ​ກັນ​ໄປ​ສົ່ງ​ລູກໆ​ຄື​ຢູ່​ບ້ານ​ເຮົາ ດຽວ­ນີ້​ເດັກ ຍີ່­ປຸ່ນ ໄດ້​ມີ​ບຸ­ລິ­ມະ­ສິດ​ເລືອກ​ເຂົ້າ​ຮຽນ​ຢູ່​ໂຮງ­ຮຽນໃກ້​ເຮືອນທີ່ສຸດ ຄື: ປະ­ມານ 2-3 ກິ­ໂລ­ແມັດ ແຕ່ມີ​ກົດ​ເຫຼັກ​ຢູ່​ວ່າ ເດັກ​ຕ້ອງ​ຍ່າງ​ໄປ​ຮຽນ​ເອົາ​ເອງ ​ຍ່າງກັນ​ໄປ​ເປັນ​ໝູ່ ບໍ່​ວ່າ​ຈະ​ເປັນເດັກ​ຈາກ​ຄອບ­ຄົວ​ເສດຖີ ຫຼື ທຸກ​ຈົນ​ກໍ່​ຕາມ ທີ່​ຕ້ອງ​ນຳ​ໃຊ້​ນະ­ໂຍ­ບາຍ​ໃຫ້ເດັກ​ຍ່າງ​ໄປ​ໂຮງ­ຮຽນ​ເອົາ​ເອງ ກໍ່​ເພາະ​ທາງ​ການຫຼິງ​ເຫັນ​ຜົນ​ດີ​ຫຼາຍ​ຢ່າງ ເຊັ່ນ: ຈະ​ຊ່ວຍ​ແກ້​ໄຂ​ບັນ­ຫາການ​ຈະ­ລາ­ຈອນ​ຕິດ​ຂັດ ຍ້ອນ​ໃຜ​ກໍ່​ໃຊ້​ລົດ​ຂີ່​ໄປໂຮງ­ຮຽນ​ ຈະ​ຊ່ວຍ​ປົດ​ເປື້ອງ​ພາ­ລະ​ຜູ້​ເປັນ​ພໍ່​ແມ່​ໃນການ​ໄປ​ສົ່ງ​ລູກ ສ້າງ​ສາຍ­ສຳ­ພັນ​ທີ່​ດີ​ລະ­ຫວ່າງເດັກ​ໃນ​ໄວ​ດຽວ ແລະ ຕ່າງ​ໄວ​ ໃນ​ການເບິ່ງ­ແຍງ ແລະ ຊ່ວຍ­ເຫຼືອ​ເຊິ່ງ​ກັນ ແລະ ກັນບົນ​ເສັ້ນ­ທາງ ສອນ​ໃຫ້​ເດັກ​ຮູ້​ຄຸນ­ຄ່າ​ຂອງ​ເວ­ລາ ຮູ້​ເຫັນ­ໃຈ​ຜູ້​ມາລໍ­ຖ້າ​ຢູ່​ໜ້າເຮືອນ​ຖ້າ​ຕົນ​ຊັກ​ຊ້າ ສ່ວນ​ຜູ້​ເປັນ​ຄູ​ນັ້ນກໍ່​ມີ​ວຽກ​ເຮັດ​ຕື່ມ ຄື​ອອກ​ມາ​ຢືນ​ຢູ່​ຕາມ​ຈຸດ​ສຳ­ຄັນບົນ​ເສັ້ນ­ທາງ ເຊັ່ນ: ທາງ​ແຍກ ຫຼື ທາງ​ມ້າ​ລາຍ ເຊິ່ງ​ເປັນ​ການ​ສ້າງ​ສາຍ­ສຳ­ພັນ​ນອກ​ຫ້ອງ​ຮຽນ​ກັບເດັກ ເຮັດ​ໃຫ້​ເດັກ​ຖື​ຄູ​ເປັນ​ຄື​ພໍ່​ແມ່ ຫຼື ຄົນ​ໃນ​ຄອບຄົວ​ພົບໄດ້​ຈາກ​ນະ­ໂຍ­ບາຍ​ສົ່ງ­ເສີມໃຫ້​ເດັກ​ຍ່າງໄປ​ໂຮງ­ຮຽນ​ເອົາ​ເອງ​ນັ້ນ​ມີ​ເປັນ​ກອບ​ເປັນ​ກຳ ຄື​ສ້າງຄວາມ​ສາ­ມັກ­ຄີຮັກ­ແພງລະ­ຫວ່າງ​ພໍ່​ແມ່​ເດັກ​ນັກຮຽນ ແລະ ຄູ ຮູ້​ເຮັດ​ວຽກ​ເປັນ​ທີມ​ງານ ແລະ ຮູ້​ຄຸນ­ຄ່າ​ຫຼັກ­ການ​ຂຶ້ນ​ຕໍ່​ກັນ​ຂອງ​ຄົນ​ໃນ​ສັງ­ຄົມ.

ຂ່າວທີ່ກ່ຽວຂ້ອງ