ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສປ ຈີນ ຍີ່ປຸ່ນ ອາ​ຟຣິ​ກາ​ໃຕ້

358 14 ກ.ຍ. 2017 ຫົວຂໍ້ຂ່າວອື່ນໆ

    ມື້­ນີ້​ມີ​ເລື່ອງ​ກ່ຽວ​ກັບ​ມາດ​ຕະ­ການ​ຄວບ​ຄຸມ​ອົງການ​ທີ່​ບໍ່​ຂຶ້ນ​ກັບ​ລັດ­ຖະ­ບານ ຢູ່ ສປ ຈີນ ເລື່ອງ ຍີ່ປຸ່ນ ​ປ້ອງ​ກັນ​ບັນ­ຫາການ​ຂ້າ​ຕົວ​ຕາຍ​ໃນ​ໝູ່​ນັກ­ຮຽນ ໃນ​ໄລ­ຍະ​ເປີດ​ສົກ­ຮຽນ​ໃໝ່ ແລະ ສຸດ​ທ້າຍ​ແມ່ນກ່ຽວ​ກັບ​ຄະ­ດີ​ຢູ່​ອາ​ຟຣິ​ກາ​ໃຕ້.

    ທີ່ ສປ ຈີນ: ຂ່າວ​ຕ່າງ­ປະ­ເທດ​ທີ່​ໜ້າ​ສົນ­ໃຈ​ເລື່ອງໜຶ່ງ ກໍ່​ຄືໃນ​ໄລ­ຍະ​ຫຼັງໆ​ມາ​ນີ້ ຫຼາຍ​ປະ­ເທດ​ໄດ້​ເຂັ້ມວຽກ​ຄຸ້ມ​ຄອງ​ອົງການ­ຈັດ­ຕັ້ງ​ທີ່​ບໍ່​ແມ່ນ​ຂອງ​ລັດ​ຖະບານ ຫຼື ອັນ​ທີ່​ເອີ້ນ​ວ່າ ເອັນ​ຈີ​ໂອ (NGO) ເຊິ່ງລວມ​ມີ​ທັງ NGO ພາຍ​ໃນ​ປະ­ເທດ ແລະ ຂອງ​ຕ່າງປະ­ເທດ​ອົງ­ການ NGO ສ່ວນ​ໃຫຍ່​ເຄື່ອນ​ໄຫວ​ເຮັດວຽກ​ຊ່ວຍ­ເຫຼືອ​ສົງ­ເຄາະ​ສັງ­ຄົມຢູ່​ກຳ­ປູ­ເຈຍ ຫວ່າງບໍ່ດົນ​ມາ​ນີ້ ທາງ​ການ​ກໍ່​ໄດ້​ຕິດ­ຕາມ​ກວດ­ກາຢ່າງເຄັ່ງ​ຄັດ​ການ­ເຄື່ອນ­ໄຫວ​ຂອງ​ອົງ­ການ NGO ທີ່ເຄື່ອນ​ໄຫວ​ບໍ່​ສອດ­ຄ່ອງກັບ​ລະ­ບຽບ​ກົດ­ໝາຍ​ບ້ານເມືອງ ເຖິງ​ຂັ້ນ​ມີ​ບາງ​ອົງການ​ຖືກ​ສັ່ງ​ປິດກິດ­ຈະ­ກຳຢູ່​ອິນ​ເດຍ ເມື່ອ​ປີ­ຜ່ານ­ມາ ທາງ​ການ​ກໍ່​ໄດ້ໃຊ້​ໄມ້​ຕາຍ ບັງ­ຄັບ​ໃຫ້​ອົງ­ການ NGO ລາຍ​ງານ​ການ­ເຄື່ອນ­ໄຫວຂອງ​ພວກ​ຕົນ​ເປັນ​ປົກ­ກະ­ຕິໃຫ້​ທາງ​ການ​ຊາບ ໂດຍ​ສະ­ເພາະແມ່ນ​ກ່ຽວ​ກັບ​ແຫຼ່ງ​ທຶນ​ສະ­ໜັບ​ສະໜູນ​ກິດ­ຈະ­ກຳ​ທີ່​ໄດ້​ຈາກ​ຕ່າງ­ປະ­ເທດ ໃນ​ຕົ້ນ​ປີ 2016 ທາງ​ການ​ຈີນ ​ກໍ່​ໄດ້​ພິ­ຈາ­ລະ­ນາ​ກົດ­ໝາຍ​ຄຸ້ມຄອງ​ອົງ­ການ NGO ຂອງ​ຕ່າງ­ປະ­ເທດ​ທີ່​ເຄື່ອນ​ໄຫວ ຢູ່ ສປ ຈີນ ໂດຍ​ກຳ­ນົດ​ໃຫ້​ອົງ­ການ​ເຫຼົ່າ​ນີ້​ລາຍ​ງານ​ທຸກ​ການ­ເຄື່ອນ­ໄຫວ ລວມ​ທັງ​ການ­ເຄື່ອນ­ໄຫວ​ຊົ່ວຄາວ ​ໃຫ້​ອົງ­ການ​ກ່ຽວ­ຂ້ອງ​ຂອງ​ລັດ­ຖະ­ບານ​ຊາບ ຢ່າງ​ຊ້າ 15 ວັນ​ລ່ວງ​ໜ້າ ນອກ­ຈາກ​ນັ້ນ​ເຈົ້າ​ໜ້າ­ທີ່​ຕຳ­ຫຼວດ​ຍັງ​ມີ​ສິດ​ສັ່ງ​ຢຸດ​ການ­ເຄື່ອນ­ໄຫວ​ຂອງ​ອົງການ NGO ທີ່​ເປັນ​ການ​ຂົ່ມ­ຂູ່ຕໍ່​ຄວາມ​ໝັ້ນ­ຄົງ​ຂອງ​ຊາດ (The Nation 26/09/2016).

    ທີ່ ຍີ່­ປຸ່ນ: ມີ​ຂ່າວ​ຈາກ​ຍີ່­ປຸ່ນ​ ໃນ​ຕົ້ນ​ເດືອນ​ນີ້​ວ່າ ທາງ​ການ​ຂອງ​ປະ­ເທດ​ນີ້ ໄດ້​ມີ​ມາດ​ຕະ­ການ​ເຝົ້າ​ລະວັງ​ເພື່ອ​ປ້ອງ​ກັນການ​ຂ້າ​ໂຕ​ຕາຍ​ຂອງ​ເດັກ​ນັກ­ຮຽນ  ທີ່​ເລີ່ມ​ສົກ­ຮຽນ​ໃໝ່​ປະ­ຈຳ​ປີ​ນີ້ ຂ່າວ​ບອກ​ວ່າ ​ຈຳນວນ​ການ​ຂ້າ​ຕົວ​ຕາຍ​ໃນ​ໝູ່​ເດັກ​ນັກ­ຮຽນ​ມັນ​ຈະ​ພຸ່ງຂຶ້ນ​ສູງ​ໃນ​ໄລ­ຍະ​ໄຂ​ສົກ​ສຶກ​ສາ​ໃໝ່ ປະ­ຈຳ​ແຕ່​ລະປີ ຍ້ອນ​ວ່າ​ໄລ­ຍະ​ນີ້​ເດັກ​ນັກ­ຮຽນ​ຈຳ­ນວນ​ໜຶ່ງ​ມີ​ອາການ​ເຄັ່ງ​ຄຽດ ເກັບ​ກົດ ມີ​ຄວາມ​ຢ້ານ ແລະ ວິ­ຕົກກັງ­ວົນ​ຢ້ານ​ຮຽນ​ບໍ່​ໄດ້ ຢ້ານ​ມີ​ບັນ­ຫາ​ກັບ​ເພື່ອນນັກຮຽນ ແລະ ອື່ນໆ ກຸ່ມ​ຄົນ​ທີ່​ມີ​ບົດ­ບາດ​ສຳ­ຄັນ​ໃນ​ການເຂົ້າ​ໄປ​ໃຫ້​ຄວາມ​ອົບ​ອຸ່ນ ແລະ ກຳ­ລັງ​ໃຈ​ແກ່​ເດັກນັກ­ຮຽນ ​ໄດ້­ແກ່​ ເຫຼົ່າ​ດາ​ລາ ນັກ­ສະ­ແດງ ກໍ່​ຄືບຸກ­ຄົນທີ່​ມີ​ບົດ­ບາດ​ໃນ​ສັງ­ຄົມ ນອກ­ຈາກ​ນັ້ນ ສຳ­ລັບ​ຢູ່​ນະຄອນ​ຫຼວງ​ໂຕ​ກຽວ ທາງ​ການ​ກໍ່​ຍັງ​ໄດ້​ຈັດ​ສະ­ຖານ­ທີ່ໜຶ່ງ​ໄວ້​ຢູ່​ເຂດ​ສວນ­ສັດ​ ເພື່ອ​ເປັນ​ບ່ອນ​ໃຫ້​ເດັກ​ນັກຮຽນ​ທີ່​ມີ​ອາ­ການ​ຄຽດ​ໄດ້​ລະ­ບາຍ​ອາ­ລົມ ໃນ​ກຸ່ມ​ປະເທດ​ສະ­ມາ­ຊິກ​ຈີເຈັດ (G7 ກຸ່ມ 7 ປະ­ເທດ​ອຸດ​ສາຫະ​ກຳ​ຂັ້ນ​ແນວ​ໜ້າ​ຂອງ​ໂລກ) ຍີ່­ປຸ່ນ ​ມີ​ສະ­ຖິ­ຕິ​ຄົນຂ້າ​ຕົວ​ຕາຍ​ສູງ​ທີ່​ສຸດ ຄື: ຫຼາຍ​ກວ່າ 20.000 ຄົນຕໍ່​ປີ.

    ທີ່ ອາ​ຟຣິ​ກາ​ໃຕ້: ມີ​ເລື່ອງ​ອ່າວ​ແປກ​ແຕ່​ເປັນຄວາມ​ຈິງ ຄວາມ​ຈິງ​ທີ່​ເກີດ​ມາ​ຈາກ​ແນວ​ຄິດ​ລັງກຽດ​ເຊື້ອ​ຊາດ​ຜິວ​ພັນ​ຢູ່ອາ​ຟຣິ​ກາ​ໃຕ້​ ເຊິ່ງ​ເຄີຍ​ຖືກຄົນ​ຜິວ​ຂາວສ່ວນ​ໜ້ອຍ​ປົກ­ຄອງ​ມາ​ເປັນ​ເວ­ລາ​ຫຼາຍສິບ​ປີ​ ກ່ອນ​ຄົນ​ຜິວ​ດຳເຊິ່ງ​ເປັນ​ພົນ­ລະ­ເມືອງ​ຈຳນວນ​ຫຼາຍ​ຂອງ​ປະ­ເທດ ​ຈະ​ໄດ້​ກຳ​ອຳ­ນາດ​ເມື່ອ​ຊຸມ​ປີ 1990 ແຕ່​ຍ້ອນ​ວ່າ­ຄວາມ​ກຽດ​ຊັງ​ຄົນ​ຜິວ​ດຳ​ຍັງຝັງ​ເລິກໃນ​ຈິດ­ໃຈ​ຂອງ​ຄົນ​ຜິວ​ຂາວ ດັ່ງ­ນັ້ນ ຈຶ່ງ​ມີເຫດ­ການ​ທີ່​ກາຍ­ເປັນ​ຂ່າວ​ແປກໆຄື ໃນ​ວັນ​ທີ 26 ເດືອນ​ສິງ­ຫາ​ຜ່ານ​ມາ ສານອາ​ຟຣິ​ກາ​ໃຕ້ ທີ່​ເມືອງມິດ​ເດັນ​ເບີກ (Middelbuerg) ໄດ້​ຕັດ­ສິນ​ຄວາມ​ຜິດຂອງ​ຊາຍ​ຜິວ​ຂາວສອງ​ຄົນ ​ທີ່​ໄດ້​ຈັບ​ພໍ່​ນາ​ຜິວດຳ ຊື່​ທ້າວ ມະ​ລົດ​ຊະ­ວາ (Mlotshwa) ຍັດ​ເຂົ້າ​ໂຮງສົບ ປິດ​ຝາ ແລ້ວ​ເອົາ​ຕີນ​ຢຽບ​ໄວ້ ພ້ອມ​ທັງ​ອອກປາກຂູ່​ວ່າ ​ຊິ​ໃຊ້​ໄຟເຜົາ​ເຫຍື່ອ​ທັງ​ເປັນ ຮູບ​ພາບ​ເຫດການ​ສະ​ຫຍົດ​ສະ­ຫຍອງ​ນີ້ ໄດ້​ຖືກ​ເຜີຍ­ແຜ່​ຜ່ານ​ອອນລາຍ ​ໃນ​ສານຊາຍ​ຜິວ​ຂາວ​ບອກວ່າ ​ທີ່​ເຮັດ​ໄປຍ້ອນ​ວ່າ​ທ້າວ ມະ​ລົດ​ຊະ­ວາ ໄດ້​ລັກ​ສາຍ​ລວດ​ທອງ ແລະ ຂູ່​ວ່າ​ຈະ​ທຳ­ຮ້າຍ​ຄອບ­ຄົວ​ຂອງ​ພວກ​ເຂົາ­ເຈົ້າ ແນວ­ໃດ​ກໍ່​ດີ ຊາຍ​ຜິວ​ຂາວ​ທັງ​ສອງ​ກໍ່​ໜີ​ບໍ່​ມົ້ມ​ບ້ວງໂທດ​ຖານ​ລັກ​ພາ​ຕົວ ຂົ່ມ­ຂູ່​ໃຫ້​ຫວາດ​ກົວ ແລະ ມີເຈ­ຕະ­ນາ​ທຳ­ຮ້າຍຮ່າງ­ກາຍ​ເຫຍື່ອ.

ຂ່າວທີ່ກ່ຽວຂ້ອງ