ຂ່າວຫຼ້າສຸດ

ປະ­ທານ​ຢືນ­ຢັນ ພ້ອມ​ສືບ­ຕໍ່​ພັດ­ທະ­ນາ​ກີ­ລາ​ສະ­ນຸກ​ເກີ​ລາວ

685 14 ກ.ຍ. 2017 ວົງຈອນກີລາ
ປະ­ທານ​ຢືນ­ຢັນ ພ້ອມ​ສືບ­ຕໍ່​ພັດ­ທະ­ນາ​ກີ­ລາ​ສະ­ນຸກ​ເກີ​ລາວ

    ຕາມ​ການ​ໃຫ້​ສຳ­ພາດ​ຂອງທ່ານ ປະ­ສິດ​ໄຊ ຫຼວງ​ໂຄດ ປະ­ທານ​ສະ­ຫະ­ພັນ​ກີ­ລາ​ບິນ​ລຽດ-ສະ­ນຸກ​ເກີ​ແຫ່ງ​ຊາດ​ລາວ ເມື່ອ​ບໍ່​ດົນ​ມາ​ນີ້ ໃຫ້​ຮູ້​ວ່າ: ສຸດ​ທີ່​ມີ​ຄວາມ​ພາກ­ພູມ​ເປັນ​ຢ່າງ​ສູງ ທີ່​ເຫັນ​ຜົນ­ງານ​ຂອງ​ທີມ​ນັກ­ກີ­ລາ​ສະ­ນຸກ​ເກີ​ລາວ ສາ­ມາດ​ສ້າງ​ປະ­ຫວັດ­ສາດ ໃຫ້​ແກ່​ວົງ​ການ​ກີ­ລາ​ສະ­ນຸກ​ເກີ​ລາວ ໃນ​ການ​ຍາດ​ມາ​ໄດ້ 1 ຫຼຽນ​ຄຳ ຈາກ​ທ້າວ ສິດ­ທິ​ເດດ ສັກ​ບ່ຽງ ຫຼື ໜຶ່ງ​ເມືອງ​ລາວ ແລະ 1 ຫຼຽນ​ທອງ ຈາກ​ທ້າວ ສຸ­ລິ­ຍາ ມີ­ນາ​ລາ​ວົງ ລາຍ­ການ​ສະ­ນຸກ​ເກີ​ດ່ຽວ​ຊາຍ ໃນ​ງານ​ມະ­ຫະ​ກຳ​ກີ­ລາ​ຊີ­ເກມ ຄັ້ງ​ທີ 29 ຫຼື ກົວ​ລາ​ລຳ​ເປີ ເກມ ທີ່​ປະ­ເທດ​ມາ​ເລ​ເຊຍ ຕໍ່​ຜົນ­ງານ​ຄັ້ງ​ນີ້ ຈະ​ໄດ້​ສືບ­ຕໍ່​ປະ­ຕິ­ບັດ​ຕາມ​ທີ່​ໃຫ້​ຄຳ​ໝັ້ນ​ສັນ­ຍາ​ຖ້າ​ຫາກ​ໄດ້​ຫຼຽນ​ຄຳ ກໍ່​ຈະ​ໃຫ້​ເງິນ​ລາ­ງວັນ​ສະ­ໜັບ­ສະ­ໜູນ 50 ລ້ານ​ກີບ ຫຼຽນ​ເງິນ 30 ລ້ານ​ກີບ ແລະ ຫຼຽນ​ທອງ 15 ລ້ານ​ກີບ ໃນ​ບໍ່​ດົນ​ນີ້ ກໍ່​ຈະ​ໄດ້​ຈັດ​ງານ​ສະ­ຫຼຸບ​ມອບ​ເງິນ​ອັດ​ສີດ​ສະ­ຫຼອງ​ຫຼຽນ​ປະ­ຫວັດ­ສາດ​ໃຫ້​ສົມ​ກຽດ.

    ທ່ານ​ກ່າວ​ຕື່ມ​ວ່າ: ເພື່ອ​ເປັນ​ການ​ສືບ­ຕໍ່​ປ້ອງ​ກັນ​ຫຼຽນ​ຄຳ ງານ​ມະ­ຫະ​ກຳ​ກີ­ລາ​ຊີ­ເກມ ຄັ້ງ​ທີ 30 ທີ່​ປະ­ເທດ​ຟິ​ລິບ​ປິນ ເປັນ​ເຈົ້າ­ພາບ ໃນ​ປີ 2019 ຈະ​ໄດ້​ສືບ­ຕໍ່​ສົ່ງ­ເສີມ​ການ​ພັດ­ທະ­ນາ​ວົງ​ການ​ກີ­ລາ​ສະ­ນຸກ​ເກີ​ລາວ​ຢ່າງ­ຮອບ­ດ້ານ ໂດຍ​ຈະ​ສ້າງ​ສູນ​ສະ­ໜຸກ​ເກີ​ທີ່​ໄດ້​ມາດ­ຕະ­ຖານ​ລະ­ດັບ​ສາ­ກົນ ແລະ ຈະ​ມີ​ການ​ຮັກ­ສາ​ຄຸ້ມ​ຄອງ​ຢ່າງ​ເປັນ​ລະ­ບົບ ຫຼີກ​ເວັ້ນ​ບັນ­ຫາ​ຫຍໍ້­ທໍ້​ຕ່າງໆ ພ້ອມ​ຈະ​ຈັດ­ການ​ແຂ່ງ­ຂັນ​ໃຫ້​ໄດ້​ເປັນ​ລະ­ດັບ​ອາ­ຊີບ ທັງ​ນີ້ ກໍ່​ເພື່ອ​ເປັນ​ການ​ສະ­ໜັບ­ສະ­ໜູນ​ນັກ­ກີ­ລາ​ສະ­ນຸກ​ເກີ​ລາວ ໂດຍ​ສະ­ເພາະ​ສ້າງ​ຮຸ່ນ​ສືບ​ທອດ ເພື່ອ​ກ້າວ​ຂຶ້ນ​ມາ​ທົດ​ແທນ​ທີມ​ຊາດ​ໃນ​ອະ­ນາ­ຄົດ.

    ໃນ​ການ​ເຂົ້າ​ຮ່ວມ​ແຂ່ງ­ຂັນ ຊີ­ເກມ ທີ່​ປະ­ເທດ​ມາ​ເລ​ເຊຍ ຄັ້ງ​ນີ້ ມີ​ການ​ຊີງ​ຫຼຽນ 6 ຫຼຽນ​ຄຳ ຈາກ​ປະ­ເພດ​ສະ­ນຸກ​ເກີ​ດ່ຽວ​ຊາຍ ທີມ​ຄູ່​ຊາຍ ພູລ​ດ່ຽວ​ຊາຍ ທີມ​ຄູ່​ຊາຍ ແລະ ບິນ​ລຽດ​ດ່ຽວ​ຊາຍ ແລະ ທີມ​ຄູ່​ຊາຍ ມີ 10 ປະ­ເທດ ສົ່ງ​ເຂົ້າ​ຮ່ວມ​ແຂ່ງ­ຂັນ ບໍ່​ມີ​ພຽງ ຕິ​ມໍ ເລ​ສ​ເຕ ສະ­ເພາະ​ນັກ­ກີ­ລາ​ສະ­ນຸກ​ເກີ​ລາວ ສົ່ງ​ຮ່ວມ 4 ລາຍ­ການ ຄື: ປະ­ເພດ​ສະ­ນຸກ​ເກີ​ດ່ຽວ​ຊາຍ ທີມ​ຄູ່​ຊາຍ ພູ​ລ​ດ່ຽວ​ຊາຍ ແລະ ທີມ​ຄູ່​ຊາຍ.

ຂ່າວທີ່ກ່ຽວຂ້ອງ