ທຄຕລ ປັບປຸງການອະນຸມັດສິນເຊື່ອ ໄປສູ່ຄວາມທັນສະໄໝ

226 14 ກ.ຍ. 2017 ຂ່າວໜ້າ​ໜຶ່ງ
ທຄຕລ ປັບປຸງການອະນຸມັດສິນເຊື່ອ ໄປສູ່ຄວາມທັນສະໄໝ

ທະນາຄານ​ການ​ຄ້າ​ຕ່າງ​ປະເທດ​ລາວ​ມະຫາຊົນ (​ທຄຕລ) ຕົກລົງ​ໃຫ້​ບໍລິສັດ ​ເອີນ​ແອນ​ຢັງລາວ ຈຳກັດ (E&Y) ເປັນ​ທີ່​ປຶກສາ​ດຳເນີນ​ການ​ປະຕິບັດ “ໂຄງການ ການ​ໃຫ້​ບໍລິການ​ທີ່​ປຶກສາ ເພື່ອ​ປັບປຸງ​ຂັ້ນ​ຕອນ​ການ​ອະນຸມັດສິນ​ເຊື່ອ ​ໄປ​ສູ່​ຄວາມ​ທັນ​ສະໄໝ ໂດຍ​ນຳ​ໃຊ້​ລະບົບ LOS (Loan Origination System) ແລະ ສ້າງ​ລະບົບ​ຈັດ​ອັນ​ດັບ​ສິນ​ເຊື່ອ (Credit Rating System).

ພິທີ​ລົງ​ນາມ​ສັນຍາ​ການຮ່ວມ​ມື ໄດ້​ຈັດ​ຂຶ້ນ​ວັນ​ທີ 11 ກັນຍາ 2017 ຢູ່​ສຳນັກງານ​ໃຫຍ່ ​ທຄຕລ ລະຫວ່າງທ່ານ ພູ​ຂົງ ຈັນທະ​ຈັກ ຜູ້ອຳນວຍການ​ໃຫຍ່ ​ທຄຕລ ແລະ ທ່ານ​ນາງ ເຢືອງ ຫງວຽນ ຜູ້​ບໍລິຫານ E&Y ໂດຍ​ຊ້ອງ​ໜ້າທ່ານ​ນາງ ວັດທະນາ ດາລາ​ລອຍ ຮອງ​ຜູ້​ວ່າ​ທະນາຄານ​ແຫ່ງ ​ສປປ ລາວ ທ່ານ​ນາງ ນະຄອນ​ສີ ມະໂນ​ທຳ ຮອງ​ຫົວໜ້າ​ສຳນັກງານ ຄະນະ​ກຳມະການ​ຄຸ້ມ​ຄອງ​ຫຼັກຊັບ ແລະ ພາກສ່ວນ​ກ່ຽວຂ້ອງ.

ທ່ານ ພູ​ຂົງ ຈັນທະ​ຈັກ ກ່າວວ່າ: ການ​ປັບປຸງ​ຂັ້ນ​ຕອນ​ການ​ອະນຸ​ມັດ​ສິນ​ເຊື່ອ​ໄປ​ສູ່​ຄວາມ​ທັນ​ສະໄໝ ໂດຍ​ນຳ​ໃຊ້​ລະບົບ LOS ແລະ Credit Rating System ຈະ​ນຳ​ຜົນ​ປະໂຫຍດ​ຫຼາຍ​ຢ່າງມາສູ່ ​ທຄຕລ ໂດຍ​ສະເພາະ ການ​ຍົກ​ລະດັບ​ຂັ້ນ​ຕອນ​ການ​ເຮັດວຽກ​ຂອງ​ວຽກ​ງານ​ສິນ​ເຊື່ອ ເຊິ່ງເປັນ​ຫົວໃຈ​ຫຼັກ​ໃນ​ການ​ດຳເນີນ​ທຸລະ​ກິດ​ທະນາຄານ ໃນ​ນີ້ ລະບົບດັ່ງກ່າວ​ຈະ​ສາມາດ​ຊ່ວຍ​ອະນຸມັດ​ສິນ​ເຊື່ອ​ໄດ້​ຢ່າງ​ວ່ອງໄວ ຫຼຸດຜ່ອນຕົ້ນ​ທຶນ​ໃນ​ການ​ນຳ​ໃຊ້​ບຸ​ຄະລາກອນ ແລະ ເອກະສານ​ຫຼາຍ​ເກີນຄວາມ​ຈຳເປັນ ພ້ອມ​ນີ້ ຍັງ​ສາມາດ​ອະນຸມັດ​ສິນ​ເຊື່ອ​ຢ່າງ​ມີ​ປະສິດທິ​ພາບ​ອີກ​ດ້ວຍ.

ຂ່າວທີ່ກ່ຽວຂ້ອງ