ອາ​ຊຽນ ພາ​ຣາ ເກມ ສະ­ໜາມ​ພິ­ສູດ​ນັກ­ກີ­ລາ​ຄົນ​ພິ­ການ​ລາວ - ໂດຍ : ສ.ຈັນ­ທະ​ດາ­ລາ

86 13 ກ.ຍ. 2017 ວົງຈອນກີລາ
ອາ​ຊຽນ ພາ​ຣາ ເກມ ສະ­ໜາມ​ພິ­ສູດ​ນັກ­ກີ­ລາ​ຄົນ​ພິ­ການ​ລາວ - ໂດຍ : ສ.ຈັນ­ທະ​ດາ­ລາ

    ສປປ ລາວ ກໍ່​ຄືກະ­ຊວງ​ສຶກ​ສາ​ທິ​ການ ແລະ ກີ­ລາ ພ້ອມ​ແລ້ວ​ທີ່​ຈະ​ສົ່ງ​ຄະ­ນະ​ນຳ ຄູ​ເຝິກ ແລະ ທັບ​ນັກ­ກີ­ລາ​ຄົນ​ພິ­ການ​ທີມ​ຊາດ​ລາວ ຈຳ­ນວນ 100 ຊີ­ວິດ ຈາກ​ກີ­ລາ 6 ປະ­ເພດ ເຂົ້າ​ຮ່ວມ​ແຂ່ງ­ຂັນ​ງານ​ມະ­ຫະ​ກຳ​ກີ­ລາ​ຄົນ​ພິ­ການ​ອາ​ຊຽນ ຄັ້ງ​ທີ IX  ຫຼື ອາ​ຊຽນ ​ພາ​ຣາ​ ເກມ ທີ່​ປະ­ເທດ​ມາ​ເລ​ເຊຍ ເປັນ​ເຈົ້າ­ພາບ ລະ­ຫວ່າງ​ວັນ​ທີ 17-23 ກັນ­ຍາ 2017 ເຊິ່ງ​ເປັນ​ການ​ພິ­ສູດ​ສັກ­ກະ​ຍະ​ພາບຂອງ​ທີມ​ນັກ­ກີ­ລາ​ຄົນ​ພິ­ການ​ລາວ ໃນ​ການ​ສູ້​ຊົນ​ຍາດ​ເອົາ​ໄຊ­ຊະ­ນະ ຍາດ​ເອົາ​ຫຼຽນ​ມາ​ຄອງ ເພື່ອ​ປະ­ກອບ­ສ່ວນ​ສ້າງ​ຜົນ­ງານສ້າງ​ຄວາມ​ພາກ­ພູມ​ໃຈ ແລະ ສ້າງ​ກຽດ​ຊື່​ສຽງ​ມາ​ໃຫ້​ປະ­ເທດ​ຊາດ.

    ທ່ານ ສີ­ທາດ ຈັນ­ທະ​ບູ​ລີ ຫົວ­ໜ້າ​ກົມ​ກີ­ລາ​ມວນ​ຊົນ ກະ­ຊວງ ສຶກ​ສາ​ທິ​ການ ແລະ ກີ­ລາ ໃຫ້​ສຳ­ພາດ​ຕໍ່​ສື່​ມວນ​ຊົນ ວ່າ: ກ່ອນ​ຈະ​ເຂົ້າ​ຮ່ວມ​ການ​ແຂ່ງ­ຂັນ​ງານ​ກີ­ລາ ອາ​ຊຽນ ​ພາ​ຣາ​ ເກມ ຄັ້ງ​ທີ 9 ນີ້ ແມ່ນ​ໄດ້​ມີ​ການ​ຫ້າງ​ຫາ​ກະ­ກຽມ​ຢ່າງ­ຮອບ­ດ້ານ ແລະ ຈັດ­ການ​ເຄື່ອນໄຫວ​ຮ່ວມ​ແຂ່ງ­ຂັນ ແລະ ທົດ​ສອບ​ຄວາມ​ສາ­ມາດ​ນັກ­ກີ­ລາ ທັງ​ພາຍ​ໃນ ແລະ ຕ່າງ­ປະ­ເທດ ໂດຍ​ສະ­ເພາະ​ກີ­ລາ​ເຕະ­ບານ ​(​ພິ­ການ​ຕາ) ເຊິ່ງ​ໄດ້​ສ້າງ​ຜົນ­ງານ​ຍາດ​ອັນ​ດັບ​ທີ 2 ໃນ​ການ​ແຂ່ງ­ຂັນ​ປະ­ຈຳ​ປີ ທີ່​ປະ­ເທດ​ອິນ​ເດຍ ແລະ ອັນ​ດັບ​ທີ 3 ເຕະ­ບານທົ່ວ​ປະ­ເທດ​ໄທ ແນວ­ໃດ​ກໍ່​ຕາມ ໃນ​ການ​ແຂ່ງ­ຂັນ​ງານ​ກີ­ລາ ​ອາ​ຊຽນ ​ພາ​ຣາ​ ເກມ ​ຄັ້ງ​ນີ້ ຈະ​ມີ​​ນັກ­ກີ­ລາ​ຈາກ 11 ປະ­ເທດ ໃນ​ຂົງ­ເຂດ​ອາ​ຊຽນ​ ເຂົ້າ​ຮ່ວມແຂ່ງ­ຂັນ ທັງໝົດ 16 ປະ­ເພດ​ກີ­ລາ ແລະ ມີ​ການ​ຊີງ​ໄຊ​ກັນ​ເຖິງ 294 ຫຼຽນ​ ຈາກ 883 ລາຍ­ການ ສະ­ເພາະ​ທັບ​ນັກ­ກີ­ລາ​ຄົນ​ພິ­ການ​ລາວ ໄດ້​ສົ່ງ​ຄະ­ນະ​ນຳ ຄູ​ເຝິກ ແລະ ທັບ​ນັກ­ກີ­ລາ​ຄົນ​ ຈຳ­ນວນ 100 ຄົນ ຍິງ 27 ຄົນ ໃນ​ນີ້ ຄູ​ເຝິກ ແລະ ນັກ​ກິ­ລາ 84 ຄົນ ຍິງ 20 ຄົນ ຈາກກີລາ 6 ປະ­ເພດ ປະ­ກອບ​ມີ ເຕະ­ບານ ແລ່ນ-ລານ ລອຍ­ນ້ຳ ຍົກ​ນ້ຳ­ໜັກ ໂກນ​ບານ ແລະ ບານ­ບ້ວງ​ລໍ້​ເລື່ອນ ພ້ອມ​ຕັ້ງ​ເປົ້າ​ຈະ​ພະ­ຍາ­ຍາມ​ສູ້​ຊົນ​ຍາດ​ໃຫ້​ໄດ້ 1 ຫຼຽນ​ຄຳ ຈາກ​ປະ­ເພດ​ກີ­ລາ​ຍົກ​ນ້ຳ­ໜັກ 4 ຫຼຽນ​ເງິນ ຈາກ​ແລ່ນ-ລານ ລອຍ­ນ້ຳ ຍົກ​ນ້ຳ­ໜັກ ໂກນ​ບອນ ແລະ 7 ຫຼຽນ​ທອງ ຈາກ​ລອຍ­ນ້ຳ 2 ຫຼຽນ ສ່ວນ​ອີກ 5 ຫຼຽນ ­ບານເຕະ ບານ­ບ້ວງ​ລໍ້​ເລື່ອນ ໂກນ​ບານ ລອຍ­ນ້ຳ ແລະ ຍົກ​ນ້ຳ­ໜັກ.

    ທ່ານນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີກະ­ຊວງ​ສຶກ​ສາ​ທິ​ການ ແລະ ກີ­ລາ ທັງ​ເປັນ​ປະ­ທານ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ ກ່າວ​ວ່າ: ພັກ-ລັດ­ຖະ­ບານ ເຫັນ​ໄດ້​ຄວາ​ສຳ­ຄັນ​ຕໍ່​ການ​ຟື້ນ​ຟູ​ຈິດ­ໃຈ​ຂອງ​ຄົນ​ພິ­ການ​ ຈຶ່ງ​ໄດ້​ມີ​ແນວ­ທາງ​ນະ­ໂຍ­ບາຍ ແລະ ໄດ້​ເອົາ­ໃຈ­ໃສ່​ຊຸກ­ຍູ້​ຄົນ​ພິ­ການ​ລາວ ໄດ້​ມີ​ການ​ປະ­ກອບ­ສ່ວນຂະ​ບວນ​ການ­ເຄື່ອນ­ໄຫວ​ຂອງ​ອົງ​ການ­ຈັດ­ຕັ້ງພັກ-ລັດ ອົງ​ການ­ຈັດ­ຕັ້ງ​ສັງ­ຄົມ ສົ່ງ­ເສີມ​ຄວາມ​ສະ­ເໝີ­ພາບ​ເທົ່າ​ທຽມ​ກັນ​ກັບ​ຄົນ​ບໍ່​ພິ­ການ ແລະ ມີ​ສິດ​ໄດ້​ຮັບ​ການ​ສຶກ​ສາ-ການ​ກີ­ລາ ການ​ສ້າງ​ອາ­ຊີບ​ທີ່​ໝັ້ນ­ຄົງ ສຳ­ລັບ​ວຽກ​ງານ​ກີ­ລາ-ກາ​ຍະ​ກຳ​ຄົນ​ພິ­ການ ກໍ່​ແມ່ນ​ຍຸດ​ທະ​ສາດ​ໜຶ່ງ​ທີ່​ນອນ​ຢູ່​ໃນ​ເປົ້າ​ໝາຍ​ການ​ພັດ­ທະ­ນາ​ທາງ​ດ້ານ​ຈິດ­ໃຈ ອາ­ລົມ ສະ­ມັດ​ຕະ​ພາບ​ຮ່າງ­ກາຍ ແລະ ສ້າງ​ຄວາມ​ເຂັ້ມ­ແຂງ​ທາງ​ດ້ານ​ຮ່າງ­ກາຍໃຫ້​ແກ່​ຄົນ​ພິ­ການ​ ເຮັດ​ໃຫ້​ຄົນ​ພິ­ການ​ທຸກ​ປະ­ເພດ-ທຸກ​ໄວ ໄດ້​ມີ​ການ​ປະ­ກອບ­ສ່ວນ​ຢ່າງ​ຕັ້ງ­ໜ້າເຂົ້າໃນ​ການ​ພັດ­ທະ­ນາ​ກີ­ລາ-ກາຍ​ກຳ.

    ນອກ­ຈາກ​ນີ້ ທ່ານ​ລັດ­ຖະ­ມົນ­ຕີ ຍັງ​ໄດ້​ເນັ້ນ​ໝັກໃຫ້​ຄະ­ນະ​ນຳ ຄູ​ເຝິກ ໄດ້​ເອົາ­ໃຈ­ໃສ່​ໃນ​ການ​ຕິດຕາມ ເບິ່ງ­ແຍງ ກວດ­ກາ ປະ​ເມີນ​ການ­ເຝິກ­ແອບ​ຢ່າງ​ໃກ້­ຊິດ ສ້າງ​ທຸກ​ເງື່ອນ­ໄຂ​ໃນ​ການ­ເຝິກ­ແອບ​ໃຫ້​ມີ​ປະ ສິດ­ທິ​ພາບ ພ້ອມ​ທັງ​ກະ­ກຽມ​ຄວາມ​ພ້ອມ​ຮອບ­ດ້ານ ເພື່ອ​ໃຫ້​ທ່ວງ​ທັນ​ກັບ​ກຳ­ນົດ​ເວ­ລາ​ທີ່​ກຳ­ນົດ​ໄວ້ ເປັນ­ຕົ້ນ ດ້ານ​ງົບ­ປະ­ມານ ອຸ­ປະ­ກອນ​ການ​ແຂ່ງ­ຂັນ ເຄື່ອງ­ນຸ່ງ ໜັງ­ສື​ເດີນ­ທາງ ແລະ ການ​ປະ­ສານ​ງານ​ກັບ​ປະ­ເທດ​ເຈົ້າ­ພາບຢ່າງ​ເປັນ​ປົກ­ກະ­ຕິ ຮັບ­ປະ­ກັນ​ບໍ່​ໃຫ້​ມີ​ຂໍ້​ຜິດ­ພາດ​ຕ່າງໆ ທີ່​ຈະ​ສົ່ງ​ຜົນ​ສະ­ທ້ອນ​ຕໍ່​ການ​ແຂ່ງ­ຂັນຂອງ​ນັກ­ກີ­ລາ​ຄົນ​ພິ­ການ​ທີມ​ຊາດ​ລາວ ບັນ­ດາ​ຄູ​ເຝິກ ແລະ ນັກ­ກີ­ລາ​ທຸກໆ​ປະ­ເພດ ຕ້ອງ​ເອົາ­ໃຈ­ໃສ່​ໃນ​ທັດ­ສະ­ນະ​ຄຸນ​ສົມ​ບັນ ມີ​ລະ­ບຽບ​ວິ­ໄນ ຕັ້ງ­ໜ້າ​ເຂົ້າ​ຮ່ວມ​ແຂ່ງ­ຂັນ​ຢ່າງ​ມີ​ພິກ­ໄຫວ ແລະ ໃຊ້​ຄວາມ​ສາ­ມາດເຂົ້າ​ໃນ​ການ​ແຂ່ງ­ຂັນ​ຢ່າງ​ສຸດ​ຄວາມ​ສາ­ມາດ ຍາດ​ເອົາ​ໄຊ­ຊະ­ນະ​ມາ­ສູ່​ປະ­ເທດ​ຊາດ​ຂອງ​ພວກ​ເຮົາ.

    ທັງ​ໝົດ​ນີ້ ເປັນ​ຄຳ​ເຫັນ​ທີ່​ຂ້າ­ພະ­ເຈົ້າ​ຄິດ​ວ່າ​ຈະ​ເປັນ​ສ່ວນ​ໜຶ່ງ ທີ່​ຈະ​ຊ່ວຍ​ໃຫ້​ຄະ­ນະ​ນຳ ຄູ​ເຝິກ ນັກ​ກີ ລາ​ທັງ​ໝົດ ໄດ້​ນຳ­ໄປ​ຜັນ​ຂະ­ຫຍາຍ ແລະ ຈັດ​ຕັ້ງ​ປະ­ຕິ­ບັດ ເພື່ອ​ເຂົ້າ​ຮ່ວມ​ງານ​ມະ­ຫະ​ກຳ​ກີ­ລາ​ຄົນ​ພິ­ການ​ອາ​ຊຽນຄັ້ງ​ນີ້ ໄດ້​ຮັບ​ຜົນ­ສຳ­ເລັດ​ຕາມ​ຄາດ­ໝາຍ​ທີ່​ວາງ​ໄວ້.

ຂ່າວທີ່ກ່ຽວຂ້ອງ