ຂ່າວຫຼ້າສຸດ

ທ່ານ​ນາງ ຮາ​ລີ​ມາ ຈາ​ກອບ ກາຍ­ເປັນ​ປະ­ທາ­ນາ­ທິ­ບໍ­ດີ​ຂອງ​ສິງ­ກະ­ໂປ​ຢ່າງ​ແນ່­ນອນ

141 13 ກ.ຍ. 2017 ຂ່າວຕ່າງປະເທດ
ທ່ານ​ນາງ ຮາ​ລີ​ມາ ຈາ​ກອບ ກາຍ­ເປັນ​ປະ­ທາ­ນາ­ທິ­ບໍ­ດີ​ຂອງ​ສິງ­ກະ­ໂປ​ຢ່າງ​ແນ່­ນອນ

ທ່ານ​ນາງ ຮາ​ລີ​ມາ ຈາ​ກອບ (Halimah Yacob) ອາ­ຍຸ 63 ປີ ອະ­ດີດ​ປະ­ທານ​ສະ­ພາ​ແຫ່ງ​ຊາດ​ສິງ­ກະ­ໂປ ຈະ​ກາຍ­ເປັນ​ປະ­ທາ­ນາ­ທິ­ບໍ­ດີ​ເພດ​ຍິງ ເຊື້ອ­ສາຍ​ມາ​ເລ​ເຊຍ​ຄົນ​ທຳ​ອິດ​ໃນ​ປະ­ຫວັດ­ສາດ​ສິງ­ກະ­ໂປ ໃນ​ວັນ​ທີ່​ນຳ​ສະ­ເໜີ​ແຕ່ງ­ຕັ້ງ​ໃນ​ວັນ​ທີ 13 ກັນ­ຍາ​ນີ້ ໂດຍ​ທີ່​ບໍ່​ຈຳ­ເປັນ​ຕ້ອງ​ຜ່ານ​ຮູບ​ການ​ເລືອກ​ຕັ້ງ​ທົ່ວ​ປວງ​ຊົນ ໃນ​ວັນ​ທີ 23 ກັນ­ຍາ​ທີ່​ຈະ​ມາ​ເຖິງ.

ແຈ້ງ​ການ​ຂອງ​ຄະ­ນະ​ກຳ­ມະ­ການການ​ເລືອກ​ຕັ້ງ​ຂອງ​ສິງ­ກະ­ໂປ ທີ່​ມີ​ອອກ​ມາ​ໃນ​ວັນ​ທີ 11 ກັນ­ຍາ ໃຫ້​ຮູ້​ວ່າ ໃນ​ຈຳ­ນວນ​ຜູ້​ສະ­ໝັກ​ຮັບ​ເລືອກ​ຕັ້ງ 5 ຄົນ​ທີ່​ເຂົ້າ​ຮ່ວມ​ສະ­ໝັກ​ເລືອກ​ຕັ້ງ​ເປັນ​ປະ­ທາ­ນາ­ທິ­ບໍ­ດີ​ໃນ​ເທື່ອ​ນີ້ ມີ​ພຽງ​ແຕ່​ນາງ ຮາ​ລີ​ມາ ຈາ​ກອບ ເທົ່າ​ນັ້ນ​ທີ່​ມີ​ຄົບ​ເງື່ອນ­ໄຂ ສຳ­ລັບ​ຕຳ­ແໜ່ງ​ປະ­ທາ­ນາ­ທິ­ບໍ­ດີ ຄົນ­ທີ  8 ຂອງ​ສິງ­ກະ­ໂປ ໃນ​ເມື່ອ​ວ່າ​ນາງ​ເປັນ​ຄົນ​ເຊື້ອ­ສາຍ​ມາ​ເລ​ເຊຍ ແລະ ໄດ້​ຖືກ​ມອບ​ໃບ­ຢັ້ງ­ຢືນ​ຊຸມ​ຊົນ​ມາ​ເລ​ເຊຍ ຢ່າງ​ຖືກ­ຕ້ອງ.

ດຳ­ລັດ​ກ່ຽວ​ກັບ​ການ​ເລືອກ​ຕັ້ງ ຊຶ່ງ​ນາ­ຍົກ­ລັດ­ຖະ­ມົນ­ຕີ​ສິງ­ກະ­ໂປ ຫຼີ ສຽນ​ຫຼົງ ລົງ​ນາມ​ປະ­ກາດ​ໃຊ້​ເມື່ອ​ວັນ​ທີ 28 ສິງ­ຫາ​ທີ່​ຜ່ານ​ມາ ກຳ­ນົດ​ວ່າ ຄະ­ນະ​ກຳ­ມະ­ການ​ການ​ເລືອກ​ຕັ້ງ​ປະ­ທາ­ນາ­ທິ­ບໍ­ດີ ຈະ​ພິ­ຈາ­ລະ­ນາ​ຜູ້​ສະ­ໝັກ​ຮັບ​ເລືອກ​ຕັ້ງ​ທີ່​ມີ​ຄວາມ​ສາ­ມາດ​ບົ່ມ​ຊ້ອນ​ທັງ​ໝົດ ແລະ ປະ­ກາດ​ການ​ຕົກ­ລົງ​ອອກ​ມາ​ກ່ອນ​ວັນ​ທີ 12 ກັນ­ຍາ.

ຕາມ​ນັ້ນ­ແລ້ວ ຖ້າ​ຫາກ​ມີ​ຜູ້​ສະ­ໝັກ​ຮັບ​ເລືອກ​ຕັ້ງ​ທີ່​ຖືກ­ຕ້ອງ​ຕາມ​ລະ­ບຽບ​ການ​ພຽງ​ຄົນ​ດຽວ ກໍ​ແມ່ນ​ຜູ້​ນັ້ນ​ຈະ​ໄດ້​ຮັບ​ການ​ປະ­ກາດ​ໃຫ້​ເປັນ​ປະ­ທາ­ນາ­ທິ­ບໍ­ດີ ພາຍ​ໃນ​ມື້​ປະ­ກາດ​ແຕ່ງ­ຕັ້ງ​ໃນ​ວັນ​ທີ 13 ກັນ­ຍາ ໃນ​ກໍ­ລະ­ນີ​ທີ່​ມີ​ຜູ້​ໄດ້​ຮັບ​ການ​ສະ­ເໜີ​ແຕ່ງ­ຕັ້ງ​ຫຼາຍ​ກວ່າ 1 ຄົນ ກໍ​ແມ່ນ​ປະ­ຊາ­ຊົນ​ສິງ­ກະ­ໂປ ຈະ​ໄປ​ປ່ອນ​ບັດ​ເລືອກ​ຕັ້ງ​ປະ­ທາ­ນາ­ທິ­ບໍ­ດີ ໃນ​ວັນ​ທີ 23 ກັນ­ຍາ ຕາມ​ຮູບ​ການ​ຫົວ​ຄະ­ແນນ​ສາ­ມັນ.

ດັ່ງ­ນັ້ນ ນາງ ຮາ​ລີ​ມາ ຈາ​ກອບ ຈະ​ໄດ້​ກາຍ­ເປັນ​ປະ­ທາ­ນາ­ທິ­ບໍ­ດີ​ຄົນ­ທີ 8 ຂອງ​ສິງ­ກະ­ໂປ ຢ່າງ​ເປັນ​ທາງ​ການ ພ້ອມ​ກັນ​ນັ້ນ​ນາງ​ກໍ​ເປັນ​ປະ­ທາ­ນາ­ທິ­ບໍ­ດີ​ຄົນ­ທີ​ສອງ​ໃນ​ປະ­ຫວັດ­ສາດ​ສິງ­ກະ­ໂປ ທີ່​ມາ​ຈາກ​ເຊື້ອ­ສາຍ​ມາ​ເລ​ເຊຍ ນາງ ຮາ​ລີ​ມາ ຈາ​ກອບ ຍັງ​ເປັນ​ຄົນ​ທຳ​ອິດ​ທີ່​ໄດ້​ຮັບ​ຄັດ​ເລືອກ​ໃນ​ການ​ເລືອກ​ຕັ້ງ​ປະ­ທາ­ນາ­ທິ­ບໍ­ດີ​ທີ່​ຈັດ​ສັນ​ໃຫ້​ແກ່​ຜູ້​ສະ­ໝັກ​ຮັບ​ເລືອກ ຕັ້ງ​ປະ­ທາ­ນາ­ທິ­ບໍ­ດີ ໃຫ້​ແກ່​ບັນ­ດາ​ຜູ້​ສະ­ໝັກ​ຮັບ​ເລືອກ​ຕັ້ງ​ທີ່​ມາ​ຈາກ​ຊຸມ​ຊົນ​ໜຶ່ງ.

ກ່ອນ​ດຳ­ລົງ​ຕຳ­ແໜ່ງ​ປະ­ທານ​ສະ­ພາ​ແຫ່ງ​ຊາດ​ສິງ­ກະ­ໂປ ເປັນ​ເທື່ອ​ທຳ​ອິດ ແຕ່​ປີ 2013 ຮອດ​ເດືອນ​ສິງ­ຫາ ປີ 2017 ນາງ ຮາ​ລີ​ມາ ຈາ​ກອບ ໄດ້​ຢູ່​ໃນ​ຫຼາຍ​ຕຳ­ແໜ່ງ​ທີ່​ສຳ­ຄັນ ເຊັ່ນ ລັດ­ຖະ­ມົນ­ຕີ​ພັດ­ທະ­ນາ​ຊຸມ​ຊົນŒຊາວ​ໜຸ່ມ ແລະ ກິ­ລາ ຮອງ​ເລ­ຂາ­ທິ­ການ​ກຳ­ມະ­ບານ​ແຫ່ງ​ຊາດ​ສິງ­ກະ­ໂປ (NTUC) ແລະ ອື່ນໆ.

ຂ່າວ​ໃຫ້​ຮູ້​ອີ​ກວ່າ ວັນ​ທີ 11 ກັນ­ຍາ​ນີ້ ທ່ານ ຕັນ ຈວານ ຈິນ (Tan Chuan Jin) ອະ­ດີດ​ລັດ­ຖະ­ມົນ­ຕີ ພັດ­ທະ­ນາ​ຄອບ­ຄົວ ແລະ ສັງ­ຄົມ​ຂອງ​ສິງ­ກະ­ໂປ ໄດ້​ຮັບ​ການ​ເລືອກ​ຕັ້ງ​ຢ່າງ​ເປັນ​ທາງ​ການ ໃຫ້​ດຳ­ລົງ​ຕຳ­ແໜ່ງ​ປະ­ທານ​ສະ­ພາ​ແຫ່ງ​ຊາດ​ສິງ­ກະ­ໂປ ແທນ​ທີ່​ນາງ ຮາ​ລີ​ມາ ຈາ​ກອບ.

ຂ່າວທີ່ກ່ຽວຂ້ອງ