ການ­ເຄື່ອນ­ໄຫວ​ລ້ຳ​ລຶກ​ເຖິງ​ຜູ້​ເຄາະ​ຮ້າຍ ໃນ​ເຫດ­ການ 11 ກັນ­ຍາ ໃນ ສ ອາ​ເມ​ຣິ​ກາ

84 13 ກ.ຍ. 2017 ຂ່າວຕ່າງປະເທດ
ການ­ເຄື່ອນ­ໄຫວ​ລ້ຳ​ລຶກ​ເຖິງ​ຜູ້​ເຄາະ​ຮ້າຍ ໃນ​ເຫດ­ການ 11 ກັນ­ຍາ ໃນ ສ ອາ​ເມ​ຣິ​ກາ

ຄົບ­ຮອບ 16 ປີ (11/9/ 2001 ຫາ 11/9/2017) ຫຼັງ​ເກີດ​ເຫດ­ການ​ໂຈມ​ຕີ​ກໍ່​ການ​ຮ້າຍ​ຢູ່​ໃນ ສ ອາ​ເມ​ຣິ​ກາ ຊຶ່ງ​ໄດ້​ເຮັດ​ໃຫ້​ມີ​ຜູ້​ເສຍ​ຊີ­ວິດ​ເກືອບ 3.000 ຄົນ​ນັ້ນ ໃນ​ວັນ​ທີ 11 ກັນ­ຍາ​ນີ້ ມີ​ຊາວ​ອາ​ເມ​ຣິ​ກັນ​ຈຳ­ນວນ​ຫຼາຍ ໄດ້​ໄປ​ເຕົ້າ­ໂຮມ​ຢູ່​ໃນ​ຫຼາຍ​ຈຸດ​ໃນ​ທົ່ວ​ປະ­ເທດ ເພື່ອ​ເຮັດ​ພິ­ທີ​ໄວ້­ອາ­ໄລ​ຫາ​ບັນ­ດາ​ຜູ້​ໄດ້​ຮັບ​ເຄາະ​ຮ້າຍ​ທີ່​ບໍ່​ມີ​ໂທດ​ກຳ​ຫຍັງ.

ທີ່​ນະ­ຄອນ­ຫຼວງ​ວໍ​ຊິງ​ຕັນ ປະ­ທາ­ນາ­ທິ­ບໍ­ດີ ສ ອາ​ເມ​ຣິ​ກາ ໂດ​ນາ​ລ ທຣັມ ແລະ ພັນ​ລະ​ຍາ ພ້ອມ​ດ້ວຍ​ບັນ­ດາ​ເຈົ້າ​ໜ້າ­ທີ່ ໄດ້​ໃຊ້​ເວ­ລາ 1 ນາ­ທີ ໃນ​ການ​ໄວ້­ອາ­ໄລ​ຢູ່​ໃນ​ເຂດ South Lawn (ເດີນ​ຫຍ້າ​ທາງ​ທິດ­ໃຕ້​ຂອງ​ທຳ​ນຽບ​ຂາວ) ໃນ​ເວ­ລາ 8 ໂມງ 40 ນາ­ທີ (ເວ­ລາ​ໃນ​ທ້ອງ­ຖິ່ນ) ຊຶ່ງ​ກໍ​ເປັນ​ເວ­ລາ​ດຽວ​ທີ່​ພວກ​ກໍ່​ການ​ຮ້າຍ​ຈີ້ ແລະ ບັນ­ຊາ​ເຮືອ­ບິນ​ລຳ​ທຳ​ອິດ​ໄປ​ພຸ່ມ​ຕຳ​ໃສ່​ຕຶກ​ຂອງ​ສູນ​ການ​ຄ້າ​ໂລກ (World Trade Center) ໃນ​ນະ­ຄອນ​ນີວ​ຢອກ.

ທີ່​ນະ­ຄອນ​ນີວ​ຢອກ ມີ​ປະ­ມານ 1.000 ຄົນ ທີ່​ເປັນ​ຍາດ­ຕິ​ພີ່­ນ້ອງ​ຂອງ​ຜູ້​ທີ່​ໄດ້​ເສຍ​ຊີ­ວິດ​ໃນ​ເຫດ­ການ​ກໍ່​ການ​ຮ້າຍ​ດັ່ງ­ກ່າວ ໄດ້​ເຕົ້າ­ໂຮມ​ກັນ​ຢູ່​ໃນ​ເຂດ​ເລກ 0 (Ground Zero) ຊຶ່ງ​ປັດ­ຈຸ­ບັນ​ເປັນ​ພິ​ພິ​ທະ​ພັນ​ໄວ້­ອາ­ໄລ​ບັນ­ດາ​ຜູ້​ໄດ້​ຮັບ​ເຄາະ​ຮ້າຍ​ຈາກ​ເຫດ­ການ 11 ກັນ­ຍາ ແລະ ໃນ​ເຂດ​ສູນ​ການ​ຄ້າ​ໂລກ​ແຫ່ງ​ໃໝ່ ເພື່ອ​ໄວ້­ອາ­ໄລ​ຫາ​ຜູ່​ທີ່​ໄດ້​ຈາກ​ໄປ.

ຂ່າວທີ່ກ່ຽວຂ້ອງ