ຂ່າວຫຼ້າສຸດ

ພາ­ຍຸ​ເອີ​ມາ ພັດ​ຜ່ານ​ກູ​ບາ ມີ​ຜູ້​ເສຍ​ຊີ­ວິດ 10 ຄົນ

125 13 ກ.ຍ. 2017 ຂ່າວຕ່າງປະເທດ
ພາ­ຍຸ​ເອີ​ມາ ພັດ​ຜ່ານ​ກູ​ບາ ມີ​ຜູ້​ເສຍ​ຊີ­ວິດ 10 ຄົນ

ລັດ­ຖະ­ບານ​ກູ​ບາ ແຈ້ງ​ໃຫ້​ຮູ້­ເມື່ອ​ວັນ​ທີ 11 ກັນ­ຍາ​ນີ້​ວ່າ ມີ​ຜູ້​ເສຍ​ຊີ­ວິດ​ແລ້ວ 10 ຄົນ ຫຼັງ​ຈາກ​ທີ່​ພາ­ຍຸ​ເອີ​ມາ (Irma) ພັດ​ຜ່ານ​ກູ​ບາ ເມື່ອ​ທ້າຍ​ອາ­ທິດ​ທີ່​ຜ່ານ​ມາ ເຮັດ​ໃຫ້​ຍອດ​ຜູ້​ເສຍ​ຊີ­ວິດ​ຍ້ອນ​ພາ­ຍຸ​ນີ້ ໄລ່​ມາ​ຮອດ​ປັດ­ຈຸ­ບັນ​ເພີ່ມ​ຂຶ້ນ​ເປັນ 38 ຄົນ ພາ­ຍຸ​ເອີ​ມາ ພັດ​ຂຶ້ນ​ຝັ່ງ​ໃນ​ກູ​ບາ ມາ​ຕັ້ງ­ແຕ່​ວັນ​ທີ 8 ກັນ­ຍາ ຊຶ່ງ​ນັບ​ວ່າ​ເປັນ​ພາ­ຍຸ​ແຮງ​ລະ­ດັບ 5 ຫົວ​ທຳ​ອິດ​ທີ່​ພັດ​ຂຶ້ນ​ຝັ່ງ​ປະ­ເທດ​ນີ້ ນັບ​ແຕ່​ປີ 1932 ເປັນ­ຕົ້ນ​ມາ.

ໃນ​ຂະ­ນະ​ດຽວ​ກັນ ບໍ­ລິ­ສັດ​ພະ­ຍາ­ກອນ​ອາ­ກາດ AccuWeather ໃຫ້​ຮູ້​ວ່າ ຄວາມ​ເສຍ​ຫາຍ​ທາງ​ດ້ານ​ເສດ­ຖະ­ກິດ​ທີ່​ເກີດ​ຈາກ​ພາ­ຍຸ​ຮາ­ວີ (Harvey) ແລະ ເອີ​ມາ ຢູ່​ໃນ​ສະ­ເພາະ​ແຕ່ ສ ອາ​ເມ​ຣິ​ກາ ນັ້ນ​ອາດ​ມີ​ເຖິງ 290 ຕື້​ໂດ​ລາ​ສະ­ຫະ­ລັດ ກວມ​ເອົາ​ປະ­ມານ 1,5% ຂອງ​ຍອດ​ຜະ­ລິດ​ຕະ​ພັນ​ພາຍ​ໃນ​ປະ­ເທດ (GDP).

ທ່ານ ໂຈ​ແອ​ລ ໄມ​ເອີ ຜູ້­ອຳ­ນວຍ­ການ​ໃຫຍ່ ທັງ​ເປັນ​ຜູ້​ກໍ່​ຕັ້ງ​ບໍ­ລິ­ສັດ AccuWeather ເວົ້າ​ວ່າ ໃນ​ຂະ­ນະ​ທີ່​ຄວາມ​ເສຍ​ຫາຍ​ທີ່​ເກີດ​ຈາກ​ພາ­ຍຸ​ເອີ​ມາ ຢູ່​ທີ່​ປະ­ມານ 100 ຕື້​ໂດ​ລາ​ສະ­ຫະ­ລັດ​ນັ້ນ ພາ­ຍຸ​ຮາ­ວີ ທີ່​ພັດ​ຂຶ້ນ​ຝັ່ງ​ໃນ​ລັດ​ເທັກ​ຊັສ ແລະ ລູຍ​ເຊຍ​ນາ ເມື່ອ​ທ້າຍ​ເດືອນ​ສິງ­ຫາ​ທີ່​ຜ່ານ​ມາ ນັບ​ວ່າ​ເປັນ​ໄພ​ທຳ​ມະ​ຊາດ​ທີ່​ຂີ້­ຮ້າຍ​ທີ່​ສຸດ​ໃນ​ປະ­ຫວັດ­ສາດ ໂດຍ​ເຮັດ​ໃຫ້​ເກີດ​ຄວາມ​ເສຍ​ຫາຍ​ເປັນ​ມູນ​ຄ່າ 190 ຕື້​ໂດ​ລາ​ສະ­ຫະ­ລັດ ກວມ​ເອົາ 1% ຂອງ GDP.

ທ່ານ ໄມ​ເອີ ເວົ້າ​ວ່າ AccuWeather ໄດ້​ນຳ​ເອົາ​ຕົວ​ເລກ​ຄາດ​ຄະ­ເນ​ດັ່ງ­ກ່າວ​ອອກ​ມາ ໂດຍ​ອີງ­ໃສ່​ການ​ທີ່​ບັນ­ດາ​ວິ​ສາ​ຫະ​ກິດ​ຕ້ອງ​ງົດ​ການ­ເຄື່ອນ­ໄຫວ​ການ​ຄົມ­ມະ­ນາ­ຄົມ ແລະ ພື້ນ­ຖານ​ໂຄງ​ລ່າງ​ຖືກ​ທຳ­ລາຍ ພືດ​ຜັກ​ຖືກ​ທຳ­ລາຍ ລາ­ຄາ​ເຊື້ອ​ໄຟ​ເພີ່ມ​ຂຶ້ນ ແລະ ເອ­ກະ­ສານ​ທີ່​ສຳ­ຄັນ​ຖືກ​ເປ່​ເພ​ເສຍ​ຫາຍ.

ຂ່າວທີ່ກ່ຽວຂ້ອງ