ຂ່າວຫຼ້າສຸດ

ວາງສະແດງສິນຄ້າການກໍ່ສ້າງ-ອຸປະກອນໄຟຟ້າ ຈະຈັດຂຶ້ນອາທິດໜ້າ

84 13 ກ.ຍ. 2017 ຂ່າວໜ້າ​ໜຶ່ງ

ງານ​ວາງສະແດງ​ສິນຄ້າດ້ານ​ການ​ກໍ່ສ້າງ​ວັດ​ສະ​ດຸ​ກໍ່ສ້າງ ແລະ ອຸປະກອນ​ໄຟຟ້າ ຄັ້ງ​ທີ I ເຊິ່ງ​ຈະ​ຈັດ​ຂຶ້ນລະຫວ່າງວັນ​ທີ 20-24 ກັນຍາ 2017 ນີ້ ຢູ່​ສູນການ​ຄ້າ ລາວ-ໄອ​ເຕັກ (ຕຶກເກົ່າ) ເພື່ອ​ເຮັດ​ໃຫ້ການ​ຈັດ​ງານດັ່ງກ່າວ​ດຳເນີນ​ໄປ​ຕາມ​ຈຸດ​ປະສົງ ເປົ້າ​ໝາຍ ແລະ ແຜນການ​ທີ່ກຳນົດ​ໄວ້ ສະພາ​ການ​ຄ້າ ແລະ ອຸດສາຫະກຳ ນະຄອນຫຼວງ​ວຽງຈັນ ໂດຍ​ຕາງໜ້າ​ໃຫ້​ຄະນະ​ຮັບຜິດ​ຊອບ​ການ​ຈັດ​ງານ​ໄດ້​ຖະແຫຼງຂ່າວ​ຕໍ່​ສື່​ມວນ​ຊົນ ໃນ​ວັນ​ທີ 11 ກັນຍາ 2017 ຢູ່​ທີ່​ຫ້ອງ​ປະຊຸມ​ພະແນກ​ອຸດສາຫະກຳ ແລະ ການຄ້າ​ນະຄອນຫຼວງ.

ທ່ານ ສັງຄົມ ຈັນ​ສຸກ ປະທານສະພາ​ການ​ຄ້າ ແລະ ອຸດ​ສາ​ຫະກຳ ນວ ກ່າວ​ວ່າ: ການ​ຈັດ​ງານດັ່ງກ່າວ​ນີ້ ເພື່ອ​ເປັນ​ການ​ເປີດ​ຕະຫຼາດ​ຈຳໜ່າຍ​ສິນຄ້າ ​ໃຫ້​ແກ່​ຫົວໜ່ວຍ​ທຸລະ​ກິດ​ດ້ານ​ການ​ກໍ່ສ້າງ ວັດ​ສະ​ດຸ​ກໍ່ສ້າງ ແລະ ອຸປະກອນເຄື່ອງໃຊ້​ໄຟຟ້າ​ໃຫ້​ກວ້າງຂວາງອອກ ທັງ​ເປັນ​ການ​ສົ່ງເສີມ​ຜະລິດຕະ​ພັນ​ສິນຄ້າ​ໃຫ້​ເຂົ້າ​ເຖິງ​ຜູ້​ຊົມໃຊ້​ໄດ້​ຢ່າງ​ທົ່ວ​ເຖິງ ເປັນ​ການແລກປ່ຽນ​ໂຄສະນາ​ສິນຄ້າ​ດ້ານການ​ກໍ່ສ້າງ ວັດ​ສະ​ດຸ​ກໍ່ສ້າງ ແລະ ອຸປະກອນ​ເຄື່ອງໃຊ້​ໄຟຟ້າ ເປັນ​ທີ່ຍອມຮັບ​ຂອງ​ສັງຄົມ ສິນຄ້າ​ມີ​ຄຸນະ​ພາບ ແລະ ສາມາດ​ຕອບ​ສະໜອງ ໄດ້​ປະລິມານ​ຄວາມ​ຕ້ອງການ​ຂອງ​ຜູ້​ຊົມໃຊ້ ເປັນ​ການ​ກະຕຸກ​ຊຸກຍູ້​ໃຫ້​ຜູ້​ຜະລິດ ຫຼື ຜູ້​ປະກອບ​ການ​ໄດ້​ມີ​ການ​ພັດທະນາດ້ານ​ການ​ຕະຫຼາດ​ຄຸນະພາບ​ສິນຄ້າ ພ້ອມ​ທັງ​ເປັນ​ການ​ສ້າງ​ລາຍຮັບ ແລະ ສ້າງ​ຄວາມ​ເຂັ້ມແຂງໃຫ້​ແກ່​ຫົວໜ່ວຍ​ທຸລະ​ກິດ​ການ​ກໍ່ສ້າງ ແລະ ອຸປະກອນ​ໄຟຟ້າ ພ້ອມ​ກັນ​ນີ້ ຍັງ​ເປັນ​ການ​ແລກປ່ຽນ​ບົດຮຽນ ລະຫວ່າງພາກທຸລະ​ກິດ​ການ​ກໍ່ສ້າງ ແລະ ຜູ້​ປະກອບ​ການ​ເຄື່ອງໃຊ້​ໄຟຟ້າ​ພາຍໃນ ແລະ ຕ່າງປະເທດ ໃນ​ຍຸກເຊື່ອມ​ໂຍງ​ເສດຖະກິດ​ອາ​ຊຽນ ຫຼື AEC.

ງານ​ວາງສະແດງ ແລະ ຈຳໜ່າຍ​ສິນຄ້າ​ຄັ້ງ​ນີ້ ແມ່ນ​ການຮ່ວມ​ມື​ກັນລະຫວ່າງ​ສະພາ​ການຄ້າ ແລະ ອຸດສາຫະກຳ ນວ ແລະ ກຸ່ມ​ກໍ່ສ້າງ​ຕິດ​ຕັ້ງ​ໄຟຟ້າ ເຊິ່ງ​ຄາດ​ວ່າ​ງານ​ດັ່ງກ່າວ​ນີ້ ຈະ​ມີຜູ້​ຜະລິດ ແລະ ຕົວ​ແທນ​ຈຳໜ່າຍຊັ້ນ​ນຳ​ປະມານ 100 ບໍລິສັດ ແລະ ຈະ​ມີ​ຜູ້​ເຂົ້າ​ຊົມ​ງານ​ຫຼາຍກວ່າ 1 ໝື່ນ​ຄົນ.

ຂ່າວທີ່ກ່ຽວຂ້ອງ