ເບຍລາວ ນຳສະເໜີສື່ໂຄສະນາໃໝ່ ສົ່ງເສີມປີທ່ອງທ່ຽວລາວ

125 13 ກ.ຍ. 2017 ຂ່າວໜ້າ​ໜຶ່ງ
ເບຍລາວ ນຳສະເໜີສື່ໂຄສະນາໃໝ່ ສົ່ງເສີມປີທ່ອງທ່ຽວລາວ

ເພື່ອ​ເປັນ​ການ​ສົ່ງເສີມ​ສະໜັບສະ​ໜູນ​ນະໂຍບາຍ​ພາກ​ລັດ​ ໃນການ​ກຽມພ້ອມ​ທີ່​ຈະ​ເປັນ​ເຈົ້າພາບ​ໃນ​ປີ​ທ່ອງ​ທ່ຽວ​ລາວ 2018 ທີ່​ຈະ​ມາ​ເຖິງ​ນີ້ ທາງ​ບໍລິສັດຈຶ່ງໄດ້​ສ້າງ​ໜັງ​ໂຄສະນາອີກ​ເລື່ອງໜຶ່ງ​ ທີ່​ມີ​ເນື້ອ​ໃນ​ນຳ​ສະເໜີ​ໃຫ້ແຂກ​ນັກ​ທ່ອງ​ທ່ຽວ​ຕ່າງປະເທດ​ຮູ້ຈັກ ແລະ ຮັບ​ຮູ້​ເຂົ້າໃຈ​ເຖິງຄວາມ​ເປັນ​ລາວ ທີ່​ຍາມ​ໃດ​ກໍ່​ມີຄວາມ​ໂອບ​ເອື້ອ​ອາລີ ຍິ້ມແຍ້ມ ແຈ່ມ​ໃສ ຈິງ​ໃຈ ແລະ ມີ​ຮີດຄອງວັດທະນະທຳ​ທີ່​ມີ​ຄວາມ​ເປັນເອກະລັກ ແລະ ສະຖານທີ່​ທ່ອງທ່ຽວ​ຕ່າງໆ​ອັນ​ເປັນ​ທີ່​ໜ້າ​ພາກພູມໃຈ​ຂອງ​ຄົນ​ລາວ.

ງານ​ຖະແຫຼງ​ຂ່າວ​ນຳ​ສະເໜີສື່​ໂຄສະນາ​ໃໝ່​ຂອງ​ຜະລິດ​ຕະ​ພັນບໍລິສັດ ເບຍ​ລາວ ຈຳກັດ ຢ່າງເປັນ​ທາງ​ການ​ ຈັດ​ຂຶ້ນໃນ​ວັນ​ທີ 8 ກັນຍາ 2017 ທີ່​ໂຮງແຮມ​ຄຣາວພລາ​ຊາ ມີ​ທ່ານ ສູນ​ທອນ ພົມມະ​ຈັກ ປະທານ​ບໍລິສັດ ເບຍ​ລາວ ຈຳກັດ ມີ​ບັນດາ​ພາກສ່ວນ​ກ່ຽວຂ້ອງ ສື່​ມວນ​ຊົນ​ຈາກ​ຫຼາຍ​ຂະແໜງ​ການ ລູກ​ຄ້າ​ຄູ່​ຮ່ວມ​ທຸລະກິດ​ເບຍ​ລາວ ບັນດາ​ສິລະ​ປີນ ແລະ ແຂກ​ຖືກ​ເຊີນ​ເຂົ້າ​ຮ່ວມ.

ທ່ານ ສູນ​ທອນ ພົມ​ມະ​ຈັກ ກ່າວ​ວ່າ: ຕະຫຼອດ 44 ປີຜ່ານມາ ​ທີ່​ເບຍ​ລາວ​ມີ​ສ່ວນ​ຮ່ວມ ແລະ ຄຽງ​ຄູ່​ກັບ​ສັງຄົມ​ລາວ​ມາ​ຕະຫຼອດ ໄດ້​ມີ​ການ​ເຕີບ​ໃຫຍ່​ຂຶ້ນຢ່າງ​ໝັ້ນຄົງ ຄຽງ​ຄູ່​ກັບ​ການ​ເຕີບໃຫຍ່​ຂະຫຍາຍຕົວ​ຂອງ​ປະເທດຊາດ​ໃນ​ແຕ່​ລະ​ໄລຍະ ບໍລິສັດ ເບຍ​ລາວ ໄດ້​ກາຍເປັນ​ຜູ້ນຳ​ອັນດັບ​ໜຶ່ງດ້ານ​ນະ​ວັດຕະ​ກຳ​ການຜະລິດ​ເຄື່ອງ​ດື່ມ ກໍ່​ຄືສິນຄ້າຂອງ​ລາວໃນ ​ສປປ ລາວ ເບຍລາວ ເປັນ​ຜະລິດ​ຕະ​ພັນ​ຫຼັກ​ຂອງບໍລິສັດ​ທີ່​ເປັນຄວາມ​ພູມໃຈ​ຂອງຄົນ​ລາວ​ປັດຈຸບັນ ພວກ​ເຮົາ​ໄດ້ສົ່ງ​ເບຍ​ລາວ​ອອກ​ໄປ​ຂາຍ​ໃນ 23 ປະເທດ ແລະ ຕົວ​ເລກ​ນີ້ກໍ່​ຍັງ​ຈະສືບຕໍ່​ເພີ່ມ​ຂຶ້ນ ມັນ​ສະແດງ​ໃຫ້ເຫັນ​ວ່າ ບັນດາ​ນາໆ​ປະເທດ​ໃນໂລກ ເລີ່ມ​ໃຫ້​ຄວາມ​ສົນໃຈ​ຕໍ່​ເບຍລາວ​ຂອງ​ພວກ​ເຮົາ ທີ່​ມີ​ເອກະລັກສະເພາະ ມັນ​ບໍ່​ພຽງ​ແຕ່​ເບຍ​ລາວມີ​ລົດ​ຊາດ ແລະ ຄຸນະພາບ​ທີ່​ດີເທົ່າ​ນັ້ນ ແຕ່​ມັນ​ແມ່ນ​ເບຍ​ລາວ ເປັນ​ຕົວ​ແທນ​ຂອງ​ວັດທະນະທຳທີ່​ເປັນ​ເອກະລັກ​ຂອງ​ລາວ ແລະ ຄຸນຄ່າ​ຂອງ​ປະເທດ​ລາວ.

ຂ່າວທີ່ກ່ຽວຂ້ອງ