ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ອິນ​ເດຍ IMF

74 13 ກ.ຍ. 2017 ຫົວຂໍ້ຂ່າວອື່ນໆ

ພົບ​ກັນ​ປະ­ຈຳ​ວັນ​ນີ້​ມີ​ເລື່ອງ​ກ່ຽວ​ກັບ​ຂໍ້​ຫ້າມ​ຂ້າ ແລະ ບໍ­ລິ­ໂພກ​ຊີ້ນ​ງົວ​ຢູ່​ອິນ​ເດຍ ຕໍ່​ໃສ່​ເລື່ອງ​ຄຳ​ແນະ­ນຳ​ຂອງ​ຜູ້­ອຳ­ນວຍ­ການ​ອົງ­ການ​ກອງ​ທຶນ​ສາ­ກົນ (IMF) ກ່ຽວ​ກັບ​ທິດ​ແກ້​ໄຂ​ສິ່ງ​ທ້າ​ທາຍ​ຕໍ່​ເສດ­ຖະ­ກິດ​ໃນ​ທະ­ວີບ­ອາ­ຊີ.

ທີ່ ອິນ​ເດຍ: ໃນ​ສອງ-ສາມ​ເດືອນ​ຜ່ານ​ມາ​ນີ້ ມີ​ເລື່ອງ​ໃຫຍ່​ທີ່​ພົວ­ພັນ​ກັບ​ປາກ-ທ້ອງ​ຢູ່​ອິນ​ເດຍ ເພາະ­ວ່າ​ທາງ​ການ​ຂອງປະ­ເທດ​ນີ້​ ໄດ້​ປະ­ກາດ​ຫ້າມ​ຂ້າ ແລະ ບໍ­ລິ­ໂພກ​ຊີ້ນ​ງົວ​ ທີ່​ຖື​ວ່າ​ເປັນ​ສັດ​ສັກ­ສິດ​ໃນ​ສາ­ສະ­ໜາ​ຮິນ​ດູ ການ​ປະ­ກາດ​ຫ້າມ​ດັ່ງ­ກ່າວ​ໄດ້​ເຮັດ​ໃຫ້​ມີ​ສຽງ​ຄັດ­ຄ້ານ​ຟົດ​ສະ​ນັ່ນ​ຂຶ້ນ ທາງ​ເບື້ອງ​ກຸ່ມ​ທຸ­ລະກິດ​ທີ່​ສົ່ງ​ອອກ​ຊີ້ນ ຫຼື ຜະ­ລິດ​ຕະ​ພັນ​ຊີ້ນ​ງົວ​ ຕ່າງ​ກໍ່​ສະແດງ​ຄວາມ​ກັງ­ວົນ​ໃຈ​ເລື່ອງ​ລາຍ​ໄດ້​ຈະ​ຕົກ­ຕ່ຳ ແລະ ເລື່ອງ​ບັນ­ຫາ​ວ່າງ​ງານ​ຂອງ​ແຮງ​ງານ​ໃນອຸດ­ສາ­ຫະ­ກຳ​ດັ່ງ­ກ່າວ ສ່ວນ​ຂ່າວ​ຕ່າງ­ປະ­ເທດ​ໃນວັນ​ທີ 9 ເດືອນ​ກັນ­ຍາ​ນີ້ (ວຽງ​ຈັນ​ ທາມ 9/9/2017) ຜັດ​ມີ​ຂ່າວ​ໜ້າ​ສົນ­ໃຈ​ຕື່ມ​ອີກ​ກ່ຽວ​ກັບ​ການບໍ­ລິ­ໂພກ​ຊີ້ນ​ງົວ​ໃນ​ອິນ​ເດຍ ເມື່ອ​ທ່ານ ເຄ​ເຈ ​ອານ​ຟອນ (KJ Alphons) ລັດ­ຖະ­ມົນ­ຕີ​ທ່ອງ​ທ່ຽວ​ອິນ​ເດຍ ​ໄດ້​ອອກ​ມາ​ຂໍຮ້ອງ​ໃຫ້​ນັກ​ທ່ອງ​ທ່ຽວ​ຕ່າງ­ປະ­ເທດ​ກິນ​ຊີ້ນ​ງົວໃຫ້​ເຕັມ​ອີ່ມ​ ກ່ອນ​ຈະ​ເດີນ­ທາງ​ໄປ​ທ່ຽວ​ປະ­ເທດ​ອິນເດຍ ຄຳ​ປະ­ກາດ​ນີ້​ມີຄວາມ​ໝາ­ຍວ່າ ຫ້າມ​ກິນ​ຊີ້ນງົວ​ຢູ່​ອິນ​ເດຍ ຫຼື ຢູ່​ອິນ​ເດຍ​ຈະ​ບໍ່​ມີ​ອາ­ຫານ​ຊີ້ນ​ງົວຈານ​ເດັດ​ໃຫ້​ກິນ ທ່ານ​ລັດ­ຖະ­ມົນ­ຕີ​ທ່ອງທ່ຽວ​ໄດ້ເປີດ­ເຜີຍ​ເລື່ອງ​ນີ້​ຕໍ່​ນັກ​ຂ່າວ​ທີ່​ພູ​ບັນ​ເນ​ສະ​ວາ ນະຄອນ​ຫຼວງ​ຂອງ​ລັດ​ໂອ​ດີ​ຊາ (Odisha) ໃນ​ວັນ​ທີ 8 ເດືອນ​ນີ້​ເອງ ທີ່​ເປັນ​ໜ້າ​ສົນ­ໃຈ​ແຮງ​ກໍ່​ເພາະ­ວ່າ ໃນ​ມື້ສາ­ບານ​ຕົນ​ເຂົ້າ​ຮັບ​ຕຳ­ແໜ່ງ​ລັດ­ຖະ­ມົນ­ຕີ​ທ່ອງ​ທ່ຽວນັ້ນ ທ່ານ ເຄ​ເຈ ​ອານ​ຟອນ ໄດ້​ເວົ້າ​ວ່າ ພັກ​ພາ​ຣາຕິ​ຢາ​ຈາ​ນາ​ຕາ (BJP) ເຊິ່ງ​ເປັນ​ພັກ​ກຳ​ອຳ­ນາດ​ໃນປັດ­ຈຸ­ບັນ ບໍ່​ໄດ້​ອອກ​ລະ­ບຽບ​ບັງ­ຄັບ​ເລື່ອງ​ອາ­ຫານການ​ກິນໃຫ້​ທຸກໆ​ລັດ​ຕ້ອງ​ປະ­ຕິ­ບັດ​ຕາມ​ ເຊັ່ນ ຄົນຢູ່​ລັດກົວ (Goa) ແລະ ລັດເກ​ຣາ​ລາ (Kerala) ທີ່​ນິ­ຍົມ​ກິນ​ຊີ້ນງົວ ​ກໍ່​ມີ​ສິດ​ສືບ­ຕໍ່​ກິນ​ຊີ້ນ​ງົວ​ໄດ້ ພັກ​ເຄັ່ງສາ­ສະ­ໜາ​ຮິນ​ດູ​ ທີ່​ກຳ​ອຳ­ນາດ​ໃນ​ປັດ­ຈຸ­ບັນ ​ໄດ້​ປະ­ກາດ​ຫ້າມ​ຂ້າ ແລະ ບໍ­ລິ­ໂພກຊີ້ນ​ງົວ​ຫວ່າງ​ບໍ່ດົນ​ມາ​ນີ້ ນອກ­ຈາກ​ນັ້ນ ທາງ​ເບື້ອງ​ສານ​ສູງ​ສຸດຂອງ​ອິນ​ເດຍ ກໍ່​ໄດ້​ຮຽກ­ຮ້ອງ​ໃຫ້​ລັດ­ຖະ­ບານ​ກາງ ແລະ ອຳ­ນາດ​ການ​ປົກ­ຄອງ​ລັດ​ຕ່າງໆ ເອົາ​ມາດ​ຕະການ​ຕົວ​ຈິງເພື່ອ​ປົກ​ປ້ອງ​ງົວ​ຈາກ​ການ​ຖືກ​ຂ້າ ແລະ ບໍ­ລິ­ໂພກ​ຊີ້ນ ຂ່າວ​ໃຫ້​ຮູ້ຕື່ມ​ວ່າ ງົວ​ເປັນ​ສັດ​ສັກ­ສິດຕາມ​ການ​ເຊື່ອ​ຖື​ຂອງ​ຊາວ​ຮິນ​ດູ​ໃນ​ຫຼາຍ​ພື້ນ​ທີ່​ຂອງປະ­ເທດ ໂດຍ​ສະ­ເພາະແມ່ນ​ໃນ​ລັດ​ທີ່​ພັກ BJP ກຳອຳ­ນາດ​ນັ້ນ ໄດ້​ມີ​ກົດ­ໝາຍ​ບັງ­ຄັບ​ຫ້າມ​ຢ່າງ​ເຄັ່ງ​ຄັດການ​ຂ້າ ແລະ ບໍ­ລິ­ໂພກ​ຊີ້ນ​ງົວ ​ໃນ 3 ປີ​ຜ່ານມາ ມີ​ຜູ້​ຖືກ​ຂ້າຕາຍ​ກວ່າ 10 ຄົນ ທີ່​ເກີດ​ຈາກ​ຄວາມຂັດ​ແຍ່ງ​ເລື່ອງ​ການ​ບໍ­ລິ­ໂພກ​ຊີ້ນ​ງົວ ສະ­ນັ້ນ ນັກທ່ອງ​ທ່ຽວ​ຄົນ​ໃດ​ທີ່​ຈະ​ໄປ​ທ່ຽວ​ອິນເດຍ ​ຕ້ອງ​ສຶກ​ສາບັນ­ຫາ​ນີ້​ຢ່າງ​ຄັກ­ແນ່ ບໍ່​ຊັ້ນ​ອາດ​ເກີດ​ມີ​ບັນ­ຫາ​ຕາມມາ.

ທີ່ ສ ເກົາ­ຫຼີ: ຂ່າວ​ຕ່າງ­ປະ­ເທດ​ຈາກ ສ ເກົາ­ຫຼີ ໃຫ້​ຊາບ​ໃນ​ຕົ້ນ​ເດືອນ​ນີ້​ວ່າ ທ່ານ​ນາງ ຄຣິດ​ສະ​ຕິນ ລາ​ກາກ ອຳ­ນວຍ​ການໃຫຍ່​ອົງ­ການ​ກອງ​ທຶນ​ສາກົນ (IMF) ໄດ້​ມີ​ຄຳ​ເຫັນ​ໃນ​ກອງ​ປະ­ຊຸມ​ພາຍ​ໃຕ້​ຫົວຂໍ້ ສິ່ງ​ທ້າ​ທາຍ​ໃໝ່​ຕໍ່​ເສດ­ຖະ­ກິດ​ໃນ​ທະ­ວີບ­ອາ­ຊີ ຈັດຂຶ້ນ​ທີ່​ນະ­ຄອນ­ຫຼວງ​ເຊ​ອູນ ສ ເກົາ­ຫຼີ ໂດຍ​ໄດ້​ຮຽກຮ້ອງ​ໃຫ້​ບັນ­ດາ​ປະ­ເທດ​ໃນ​ພາກ​ພື້ນ​ນີ້​ ເພີ່ມ​ຈຳ­ນວນເພດ​ຍິງເຂົ້າ​ໃນ​ຕະ­ຫຼາດ​ແຮງ​ງານ​ໃຫ້​ຫຼາຍ​ຂຶ້ນ ເພື່ອແກ້​ໄຂ​ບັນ­ຫາ​ການ​ຂາດ­ແຄນ​ແຮງ​ງານ ຍ້ອນ​ຈຳ­ນວນ​ພົນ­ລະ­ເມືອງ​ອາ­ຍຸສູງ​ເພີ່ມ​ຂຶ້ນ ໂດຍ​ສະ­ເພາະແມ່ນ​ຢູ່ ສ ເກົາ­ຫຼີ ແລະ ຍີ່­ປຸ່ນ ຜູ້­ອຳ­ນວຍ­ການ IMF ໄດ້​ກ່າວ​ຕຳ​ໜິ​ວ່າ ຢູ່​ຫຼາຍໆ​ປະ­ເທດ​ແຮງງານ​ເພດ​ຍິງ​ຍັງ​ໄດ້​ຮັບ​ຄ່າ​ຈ້າງ​ໜ້ອຍ​ກວ່າ​ເພດ​ຊາຍ ​ທີ່​ເຮັດວຽກ​ໃນ​ອາ­ຊີບ​ດຽວ​ກັນ ທ່ານ​ໄດ້​ກ່າວ​ຕື່ມ​ວ່າ ຖ້າ ສ ເກົາ­ຫຼີ ແລະ ຍີ່­ປຸ່ນ ສາ­ມາດ​ອັດ​ຊ່ອງ​ຫວ່າງ​ຄວາມ​ບໍ່ສະ­ເໝີ­ພາບ​ຍິງ-ຊາຍ​ໃນ​ຕະ­ຫຼາດ​ແຮງ​ງານ ຍອດຜະ­ລິດ​ຕະ​ພັນ​ພາຍ​ໃນ (ຈີດີ​ພີ) ຂອງ​ສອງ​ປະ­ເທດ​ນີ້ ຈະ​ເພີ່ມ​ຂຶ້ນ​ເຖິງ 10% ແລະ 9% ຕາມ​ລຳ­ດັບ ສ່ວນບັນ­ຫາ​ປະ­ເທດ​ທີ່​ເສດ­ຖະ­ກິດ​ພວມ​ເຕີບໃຫຍ່ ເຊັ່ນ: ກຳ­ປູ­ເຈຍ ແລະ ອິນ​ເດຍ ​ນັ້ນ ກໍ່​ຈະ​ໄດ້​ຮັບ​ຜົນ​ປະໂຫຍດ​ສູງ​ດ້ວຍ​ນະ­ໂຍ­ບາຍ​ຍົກ​ສູງ​ຄຸ­ນະ­ພາບຂອງການ​ສຶກ​ສາ​ສຳ­ລັບ​ເດັກ​ຍິງ ແລະ ການ​ສົ່ງ­ເສີມໃຫ້​ແມ່­ຍິງ​ເຂົ້າ​ເຖິງ​ຕະ­ຫຼາດ​ການ​ເງິນ.

ຂ່າວທີ່ກ່ຽວຂ້ອງ