ຮ່ວມກັນສ້າງລາຍການທ່ອງທ່ຽວໃຫ້ເກີດຜົນ

162 12 ກ.ຍ. 2017 ຂ່າວໜ້າ​ໜຶ່ງ
ຮ່ວມກັນສ້າງລາຍການທ່ອງທ່ຽວໃຫ້ເກີດຜົນ

ກອງ​ປະຊຸມ​ລັດຖະມົນຕີ​ທ່ອງທ່ຽວ​ອາ​ຊຽນ ​ຄັ້ງ​ທີ 3 ACMECS TOURISM MINISTERS ໄດ້​ຈັດ​ຂຶ້ນ​ໃນວັນ​ທີ 7 ກັນຍາ 2017 ຢູ່​ທີ່​ນະຄອນ​ໂຮ່​ຈີ​ມິງ ​ສສ ຫວຽດນາມ ໂດຍ​ການ​ເຂົ້າ​ຮ່ວມ​ຂອງ​ລັດ​ຖະມົນຕີ​ທ່ອງ​ທ່ຽວ 5 ປະເທດ​ລຸ່ມແມ່ນ້ຳ​ຂອງ ​ພ້ອມ​ດ້ວຍ​ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

ໃນ​ກອງ​ປະຊຸມ​ໄດ້​ມີ​ການ​ປືກສາ​ຫາລື ແລະ ທົບ​ທວນຄືນ​ ຜົນການ​ຮ່ວມ​ມື​ດ້ານ​ການທ່ອງທ່ຽວໃນ​ໄລຍະ​ຜ່ານ​ມາ ແລະ ຮ່ວມ​ກັນວາງ​ແຜນ​ໃນຕໍ່ໜ້າ ເຊິ່ງ​ກອງ​ປະຊຸມ​ໄດ້​ມີ​ການ​ຮຽກຮ້ອງ​ໃຫ້​ມີ​ການຮ່ວມ​ມື​ກັນ​ໃຫ້​ຫຼາຍ​ຂຶ້ນ ໂດຍ​ສະເພາະແມ່ນ​ການ​ສ້າງ​ລາຍການທ່ອງ​ທ່ຽວ​ຮ່ວມ​ກັນ​ໃຫ້​ເກີດ​ຜົນ ພ້ອມ​ທັງ​ສ້າງ​ເງື່ອນໄຂ​ອຳນວຍຄວາມ​ສະດວກ​ດ້ານ​ຕ່າງໆໃຫ້ແກ່​ນັກ​ທ່ອງ​ທ່ຽວ ເພື່ອ​ເປັນ​ການດຶງ​ດູດ​ນັກ​ທ່ອງ​ທ່ຽວ​ໃຫ້​ນັບ​ມື້​ນັບຫຼາຍ​ຂຶ້ນ.

ໃນ​ໂອກາດ​ດັ່ງກ່າວ ທ່ານ ບໍ່ແສງ​ຄຳ ວົງ​ດາລາ ລັດຖະມົນຕີກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ​ສປປ ລາວ ໄດ້​ມີ​ຄຳ​ເຫັນ​ໃນ​ກອງ​ປະຊຸມ ເຊິ່ງທ່ານ​ໄດ້​ຍົກ​ໃຫ້​ເຫັນ​ຕົວ​ເລກ​ທີ່​ນັກທ່ອງ​ທ່ຽວ​ເຂົ້າ​ມາ​ທ່ອງ​ທ່ຽວ​ລາວ ໃນ​ປີ 2016 ມີ​ທັງ​ໝົດ 2,4 ລ້ານ ກວ່າ​ເທື່ອ​ຄົນ ຫຼຸດ​ລົງ​ປະມານ 10% ຖ້າ​ທຽບໃສ່​ປີ 2015 ແລະ 6 ເດືອນ​ຕົ້ນ​ປີ 2017 ມີ​ນັກ​ທ່ອງທ່ຽວ​ເຂົ້າ​ມາ​ທ່ອງ​ທ່ຽວ​ລາວ 2 ລ້ານ​ກວ່າ​ເທື່ອ​ຄົນ ຫຼຸດ​ລົງ​ປະມານ 9,8% ທຽບໃສ່​ໄລຍະ​ດຽວຂອງ​ປີ 2016 ແລະ ໃນຕໍ່ໜ້າ ເພື່ອ​ເປັນ​ການ​ເພີ່ມ​ທະວີ​ການ​ພັດທະ​ນາ​ການທ່ອງທ່ຽວ ໂດຍ​ສະເພາະແມ່ນ​ຈະ​ຕ້ອງ​ໄດ້​ຍົກ​ລະດັບເສັ້ນທາງ​ບົກ ທາງນ້ຳ ແລະ ທາງ​ອາກາດລະ​ຫວ່າງ​ປະເທດໃຫ້​ດີ​ຂຶ້ນ ໂດຍ​ການ​ຮ່ວມ​ມື​ຂອງບັນດາ​ປະເທດ ແລະ ອົງການທ່ອງ​ທ່ຽວ​ໂລກ ເພີ່ມ​ທະວີ​ພັດ​ທະນາ​ຜະລິດ​ຕະ​ພັນ​ການທ່ອງທ່ຽວ ລຽບ​ຕາມ​ແມ່ນ້ຳ​ທີ່​ເປັນ​ແລວທາງ​ໃໝ່ ສຳລັບ​ການທ່ອງທ່ຽວບັນດາ​ປະເທດ​ອາ​ຊຽນ ເປັນຕົ້ນແມ່ນ​ຈາກ​ປະເທດ​ມຽນ​ມາ​ຫາຊຽງ​ໃໝ່ ປະເທດ​ໄທ ຫຼວງ​ພະບາງຫາວຽງ​ຈັນ ປະເທດ​ລາວ ໄປ​ຫາ​ດາ​ນັງ ແລະ ເຫວ ປະເທດຫວຽດນາມ ນອກ​ນັ້ນ ທ່ານ​ຍັງໄດ້​ແຈ້ງ​ຕໍ່​ກອງ​ປະຊຸມ​ໃຫ້​ຮູ້​ວ່າ ລາວ​ເຮົາ​ໄດ້​ກຳນົດ​ເອົາ​ປີ 2018 ເປັນ​ປີ​ທ່ອງ​ທ່ຽວ​ລາວ ໂດຍ​ຈະ​ມີພິທີ​ເປີດ​ປີ​ທ່ອງ​ທ່ຽວ ໃນ​ຕົ້ນ​ເດືອນພະຈິກ ໃນ​ໂອກາດ​ງານ​ບຸນ​ປະເພນີ​ທາດຫຼວງ ພ້ອມ​ນີ້ ກໍ່​ໄດ້​ສະເໜີ​ໃຫ້​ບັນດາ​ປະເທດ​ຕ່າງໆ​ໃຫ້ການ​ສະໜັບສະໜູນ ແລະ ໄດ້ຮຽນ​ເຊີນ​ບັນດາ​ປະເທດ​ຕ່າງໆເຂົ້າ​ຮ່ວມ​ງານ​ດັ່ງກ່າວ.

ຂ່າວທີ່ກ່ຽວຂ້ອງ