ອຸບັດຕິເຫດຍັງເປັນບັນຫາໜັກທີ່ຈະຕ້ອງໄດ້ແກ້ໄຂ

97 12 ກ.ຍ. 2017 ຂ່າວໜ້າ​ໜຶ່ງ

ເຈົ້າ​ໜ້າທີ່​ກົມ​ຕຳຫຼວດ​ຈະລາຈອນ ກະຊວງ​ປ້ອງ​ກັນ​ຄວາມ​ສະຫງົບ​ໃຫ້​ຮູ້​ວ່າ: ສະພາບ​ການ​ເກີດອຸບັດ​ຕິ​ເຫດ​ຕາມ​ຖະໜົນ ​ຍັງ​ຖື​ວ່າເປັນ​ປາກົດການ​ຫຍໍ້ທໍ້​ທີ່​ພົ້ນ​ເດັ່ນໃນ​ສັງຄົມ ແລະ ມີ​ສະພາບ​ເກີດຂຶ້ນ​ເປັນ​ກະແສ​ລາຍ​ວັນ.

ໃນ​ໄລຍະ 8 ເດືອນ​ຜ່ານ​ມາ ທົ່ວ​ປະເທດ​ມີ​ອຸບັດ​ຕິ​ເຫດ​ເກີດ​ຂຶ້ນ 3.873 ກໍລະນີ ມີ​ຜູ້​ເສຍ​ຊີວິດ 700 ກວ່າ​ຄົນ ສະເລ່ຍ​ການ​ເກີດອຸບັດ​ຕິ​ເຫດ​ໃນ​ແຕ່​ລະ​ວັນ​ມີ​ຫຼາຍກວ່າ 3 ກໍລະນີ ແຂວງ​ທີ່​ເກີດຫຼາຍ​ກວ່າ​ໝູ່​ແມ່ນນະຄອນຫຼວງວຽງ​ຈັນ 912 ກໍລະນີ ມີ​ຄົນ​ເສຍຊີວິດ 151 ຄົນ ຮອງ​ລົງ​ມາ​ແມ່ນແຂວງ​ສະຫວັນ​ນະ​ເຂດ 460 ກໍລະ​ນີ ເສຍ​ຊີວິດ 80 ຄົນ ແລະ ແຂວງ​ຈຳປາ​ສັກ 522 ກໍລະນີ ເສຍ​ຊີວິດ 63 ຄົນ.

ທ່ານ​ພັນ​ໂທ ແກ້ວ​ມາລາ ແສງ​ທອງ ຮອງ​ຫົວໜ້າ​ກົມ​ຕຳຫຼວດ​ຈະລາຈອນ ກ່າວ​ໃນ​ກອງປະຊຸມ​ສະຫຼຸບ​ວຽກ​ງານ​ຈະລາຈອນ​ເມື່ອ​ບໍ່​ດົນ​ນີ້​ວ່າ: ສະພາບການ​ເກີດ​ອຸບັດ​ຕິ​ເຫດ​ເປັນ​ບັນຫາທີ່​ໜັກໜ່ວງ ແລະ ຈະ​ຕ້ອງ​ເລັ່ງແກ້​ໄຂ​ໃຫ້​ຫຼຸດຜ່ອນ​ລົງ ໂດຍ​ສາເຫດ​ສ່ວນ​ໃຫຍ່​ທີ່​ພາໃຫ້​ເກີດ​ມີ 3 ປັດ​ໄຈ​ຫຼັກຄື: ດື່ມ​ສິ່ງ​ມຶນເມົາ ຂັບຂີ່​ລົດ​ໄວ ແລະ ບໍ່​ເຄົາລົບ​ກົດ​ລະບຽບ​ຈະລາຈອນ ດັ່ງນັ້ນ ກົມ​ຕຳຫຼວດ​ຈະລາຈອນ ​ໄດ້​ກຽມ​ສ້າງແຜນ​ງານ​ສະເໜີ​ເປີດ​ກອງ​ປະຊຸມຖອດ​ຖອນ​ບົດຮຽນ ​ວຽກ​ງານ​ຈະລາ​ຈອນ​ທົ່ວ​ປະເທດ ເພື່ອ​ແກ້​ໄຂຈະລາຈອນ​ແອ​ອັດ ແລະ ຫຼຸດຜ່ອນ​ອຸບັດ​ຕິ​ເຫດ​ຈະລາຈອນ​ທາງບົກ ປີ 2017-2020 ແລະ ປະສານ​ສົມທົບ​ກັບ​ຫົວໜ່ວຍ​ທຸລະກິດ ເພື່ອ​ຈັດ​ຕັ້ງ​ປະຕິບັດ​ກິດ​ຈະກຳ​ຕາມ​ໂຄງການ​ໂຄສະນາ “ດື່ມຢ່າງ​ມີ​ສະຕິ ຂັບ​ຂີ່​ປອດ​ໄພ” ແລະ ສຸມ​ໃສ່​ຄົ້ນຄວ້າ​ແກ້​ໄຂ​ຄະດີ​ອຸບັດຕິ​ເຫດ ​ທີ່​ມີ​ການ​ຮ້ອງ​ຟ້ອງ​ໃນ​ທົ່ວປະເທດ ແລະ ເກັບ​ກຳ​ສະຖິຕິ​ອຸບັດ​ຕິ​ເຫດ​ປະຈຳ​ອາທິດ ແລະ ປະຈຳ​ເດືອນ ເພື່ອ​ລາຍ​ງານ​ຂັ້ນ​ເທິງ ສືບຕໍ່​ຊຸກຍູ້​ການ​ປະຕິບັດ​ວຽກງານ​ວິຊາ​ສະເພາະ​ຈະລາຈອນ ຕາມ​ສາຍ​ຕັ້ງ​ຢູ່​ທ້ອງຖິ່ນ​ໃຫ້​ດີ​ຂຶ້ນເທື່ອ​ລະ​ກ້າວ.

ຂ່າວທີ່ກ່ຽວຂ້ອງ