ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ມຽນ​ມາ ກຳ­ປູ­ເຈຍ ​ສປ ຈີນ

88 12 ກ.ຍ. 2017 ຫົວຂໍ້ຂ່າວອື່ນໆ

ເຊັ່ນ​ດຽວ​ກັບ​ວັນ​ກ່ອນໆ ມື້­ນີ້​ມີ​ເລື່ອງ​ທີ່​ໜ້າ​ສົນໃຈ​ຈາກ​ຕ່າງ​ແດນ​ ເຊັ່ນ: ບັນ­ຫາ​ຂ່າວ​ຫຼອກ​ລວງຜ່ານ​ສື່​ສັງ­ຄົມ​ອອນ​ລາຍ​ຢູ່ມຽນ​ມາ ເລື່ອງ​ກຳ­ປູ­ເຈຍ ປາບ​ປາມ​ກຸ່ມ​ແກ້ງ​ຕົ້ມ​ຕຸນ ແລະ ນະ­ໂຍ­ບາຍ​ດີໆຂອງ ສປ ຈີນ ເພື່ອ​ສະ­ໜອງ​ດ້ານ​ການ​ເງິນໃຫ້​ບໍ­ລິ­ສັດ​ຂະ­ໜາດ​ນ້ອຍ.

ທີ່ ມຽນ​ມາ: ຂ່າວ​ໜັງ­ສື­ພິມ ​ວຽງ​ຈັນ​ ທາມ ໄດ້​ໃຫ້​ຮູ້ໃນ​ວັນ​ທີ 11 ເດືອນ​ນີ້​ວ່າ ຢູ່​ມຽນ​ມາ ໄດ້​ມີ​ຄົນ​ຈັງ­ໄຮໄວ​ມື ​ສົ່ງ​ຂໍ້­ຄວາມຂີ້​ຕົວະ​ຜ່ານ​ສື່​ສັງ­ຄົມ​ອອນ​ລາຍ​ວ່າ ພາຍ​ໃນ​ວັນ​ທີ 11 ເດືອນ​ນີ້​ ຈະ​ມີ​ເຫດ­ການ​ຮ້າຍ​ຂະໜາດ​ໃຫຍ່​ເກີດ​ຂຶ້ນ ຈາກ​ນັ້ນ​ຂ່າວນີ້​ກໍ່​ໄດ້​ແຜ່​ລະບາດ​ໄປ​ໄວ​ປານ​ໄຟ​ໄໝ້​ປ່າ ເຮັດ​ໃຫ້​ຄົນ​ໃນ​ສັງ­ຄົມ​ອົກສັ່ນ​ຂວັນ​ເສຍ​ບໍ່​ແມ່ນ​ຂອງ​ໜ້ອຍ ແຕ່​ໃນ​ທັນ­ທີ​ທັນໃດ​ທາງ​ການ​ຂອງ​ມຽນ​ມາ ​ກໍ່​ສາ­ມາດ​ຕິດ­ຕາມ ແລະ ຄວບ​ຄຸມ​ຂ່າວ​ລື​ດັ່ງ­ກ່າວ​ໄດ້ ພ້ອມ​ທັງ​ໄດ້​ມີ​ມາດຕະ­ການ​ຕົວ​ຈິງ ເພື່ອຮັກ­ສາ​ຄວາມ​ໝັ້ນ­ຄົງ​ທີ່​ອາດ​ຈະໄດ້​ຮັບ​ຜົນ​ກະ­ທົບ​ຈາກ​ຂ່າວ​ທີ່​ຍຸ­ຍົງ​ໃຫ້​ມີ​ສະ­ພາບແຕກ​ຕື່ນ​ດັ່ງ­ກ່າວ ທາງ​ການ​ມຽນ​ມາ ​ໄດ້ອອກ​ປະກາດ​ຫ້າມ​ການ​ເຜີຍ­ແຜ່​ທຸກ​ຮູບ​ການ​ຂ່າວ​ທີ່​ບໍ່​ມີ​ມູນ​ຄວາມ​ຈິງ​ດັ່ງ­ກ່າວ ທັງ​ໄດ້​ຮຽກ­ຮ້ອງ​ໃຫ້​ສັງ­ຄົມ​ຮີບຮ້ອນ​ລາຍງານ​ໃຫ້​ທາງ​ການ​ຊາບ​ດ້ວຍ ​ຖ້າ​ມີ​ກໍ​ລະນີ​ເຜີຍ­ແຜ່​ຂ່າວ​ຜິດ­ພາດ​ກ່ຽວ​ກັບ​ຄວາມ​ຂັດ​ແຍ່ງຕ່າງໆ​ໃນ​ສັງ­ຄົມ.

ທີ່ ກຳ­ປູ­ເຈຍ: ມີ​ຂ່າວ​ອ່າວ​ເກົ່າ​ອອກ​ມາ​ຈາກ​ກຳປູ​ເຈຍ ​ແຕ່​ກາງ​ເດືອນ​ສິງ­ຫາ​ຜ່ານ​ມາ​ວ່າ ເຈົ້າ​ໜ້າ­ທີ່ຕຳ­ຫຼວດ​ກຳ­ປູ­ເຈຍ ສາ­ມາດ​ຈັບ​ກຸມ​ແກ້ງ​ຫຼອກ​ລວງຜ່ານ​ເຄືອ​ຂ່າຍ​ອິນ​ເຕີ​ເນັດ​ໄດ້​ເກືອບ 400 ຄົນ ເປັນກຸ່ມ​ແກ້ງ​ທີ່​ມາ​ຈາກ ສປ ຈີນ ແລະ ເກາະໄຕ້​ຫວັນ ຄວາມ​ຜິດ​ທີ່​ບັນ­ດາ​ນັກ​ຫຼອກ​ລວງ​ຕົ້ມ​ຕຸ໋ນ​ເຫຼົ່າ​ນີ້​ກໍ່​ຂຶ້ນ ກໍ່​ຄືການ​ໃຊ້​ອຸ­ບາຍ​ລາຍ​ຫຼ່ຽມຍັກ​ຍອກ​ຊັບ​ຂອງເຫຍື່ອ ຕາມ​ການ​ໄຈ້​ແຍກ​ຂອງ​ທາງ​ການ​ກຳ­ປູ­ເຈຍ ພວກ​ແກ້ງ​ກຸ່ມ​ນີ້​ລ້ວນ​ແຕ່​ແມ່ນ​ຜູ້​ເຄີຍ​ມີ​ຄະ­ດີ​ທາງ​ກົດ­ໝາຍ​ມາ​ກ່ອນ ໃນ​ນັ້ນມີ​ທັງ​ຄົນ​ອາ­ຍຸ​ສູງ ນັກສຶກ​ສາ ຄົນ​ວ່າງ​ງານ ແລະ ນັກ­ທຸ­ລະ­ກິດ​ຕົກ­ອັບ ແຕ່​ອ້າງ​ຕົນ​ເອງ​ວ່າ​ເປັນ​ເຈົ້າ​ໜ້າ­ທີ່​ລັດ ເວ­ລາ​ພົວພັນກັບ​ເຫຍື່ອ​ຖ້າ​ບວກ​ກັບ​ນັກ​ຕົ້ມ​ຕຸ໋ນ​ທັງ​ຈາກ​ແຜ່ນດິນ​ໃຫຍ່ ແລະ ເກາະ​ໄຕ້​ຫວັນ ​ທີ່​ທາງ​ການ​ກຳ­ປູ­ເຈຍ ຈັບ​ກຸມ​ໃນ​ຫຼາຍ​ປີ­ຜ່ານ­ມາ ຈຳ­ນວນ​ກໍ່​ຈະ​ສູງ​ກວ່າ 600 ຄົນ ນັບ​ແຕ່​ປີ 2011 ເປັນ­ຕົ້ນ​ມາ ທາງ​ການ ສປ ຈີນ ແລະ ເກາະ​ໄຕ້​ຫວັນ​ໄດ້​ຮ່ວມມື​ກັນ​ສືບ​ສາວທາວ​ຫາ​ບ່ອນ​ກຸ່ມ​ແກ້ງ​ລີ້​ຊ່ອນ ແລະ ເຄື່ອນ​ໄຫວຫຼອກ​ລວງ​ຢູ່​ບັນ­ດາ​ປະ­ເທດ​ໃນ​ອາ​ຊຽນ ເພື່ອ​ຈັບ​ຕົວ​ພວກກ່ຽວ​ເມືອ​ດຳ­ເນີນ​ຄະ­ດີ​ຕາມ​ກົດ­ໝາຍ.

ທີ່ ສປ ຈີນ: ໃນ​ທ້າຍ​ເດືອນ​ສິງ­ຫາ​ປີ​ນີ້ ມີ​ຂ່າວອອກ​ມາ​ຈາກ ສປ ຈີນ ກ່ຽວ​ກັບ​ລະ­ບຽບ​ການ​ໃໝ່​ເພື່ອ​ສົ່ງ­ເສີມ​ດ້ານ​ການ​ເງິນໃຫ້​ແກ່​ບໍ­ລິ­ສັດ​ຂະ­ໜາດ​ນ້ອຍ ແລະ ຫົວ­ໜ່ວຍ​ປະ­ກອບ​ການ​ຢູ່​ຕາມ​ເຂດ​ຊົນນະ​ບົດ ລະ­ບຽບ​ການ​ດັ່ງ­ກ່າວ​ຈະ​ເລີ່ມ​ມີ​ຜົນໃນ​ທາງປະ­ຕິ­ບັດ​ນັບ​ແຕ່​ວັນ​ທີ 1 ເດືອນ​ຕຸ­ລາ​ປີ​ນີ້​ເປັນ­ຕົ້ນ​ໄປ ໃນ ສປ ຈີນ ອຸດ­ສາ­ຫະ­ກຳ​ຄ້ຳ­ປະ­ກັນ​ດ້ານ​ການ​ເງິນ ໄດ້​ຮັບການ​ພັດ­ທະ­ນາ​ຢ່າງ​ວ່ອງ­ໄວ​ໃນ​ຊຸມ​ປີ​ປັດ­ຈຸ­ບັນ ແຕ່​ການ​ຕິດ­ຕາມ​ກວດ­ກາ​ນັ້ນ​ຍັງ​ເຮັດ​ບໍ່​ເຕັມເມັດ​ເຕັມ​ໜ່ວຍ ຍັງ​ມີ​ການ­ເຄື່ອນ­ໄຫວ​ທີ່​ບໍ່​ໄປ​ຕາມຂອບ ເຊິ່ງ​ພາ­ໃຫ້​ເກີດ​ມີ​ຄວາມ​ສ່ຽງ ດັ່ງ­ນັ້ນ ອຸດ​ສາຫະ​ກຳ​ຂະ­ແໜງ​ນີ້​ຕ້ອງ​ມີ​ກົດ​ລະ­ບຽບ​ທີ່​ເຄັ່ງ​ຄັດ​ເພື່ອຄຸ້ມ​ຄອງ​ການ­ເຄື່ອນ­ໄຫວ ຂ່າວ​ບອກ​ວ່າ​ ລະ­ບຽບການ​ໃໝ່​ກ່ຽວ​ກັບ​ການ​ຮັບ­ປະ­ກັນ​ດ້ານ​ການ​ເງິນ​ໃຫ້​ແກ່​ບໍ­ລິ­ສັດ​ຂະ­ໜາດ​ນ້ອຍ ແລະ ໜ່ວຍ​ປະ­ກອບ​ການຢູ່​ຊົນ­ນະ­ບົດ​ສະ­ບັບ​ນີ້​ ຈະ​ປູ​ພື້ນ­ຖານ​ໄປ​ສູ່​ການ​ສ້າງ­ຕັ້ງ​ບໍ­ລິ­ສັດ​ຄ້ຳ­ປະ­ກັນ​ດ້ານ​ການ​ເງິນ​ໃນ­ຕໍ່­ໜ້າ ​ລະບຽບ​ການ​ໄດ້​ກຳ­ນົດ​ໃຫ້​ບໍ­ລິ­ສັດ​ຄ້ຳ­ປະ­ກັນ​ດ້ານ​ການເງິນ​ທີ່​ຈະ​ສ້າງ­ຕັ້ງ​ຂຶ້ນ ​ຕ້ອງ​ເພີ່ມ​ການ​ໃຫ້​ບໍ­ລິ­ການ ແກ່​ທຸ­ລະ​ກິດ​ຂະ­ໜາດ​ນ້ອຍ ແລະ ທຸ­ລະ​ກິດ​ໃນເຂດຊົນ­ນະ­ບົດ​ດ້ວຍ​ດອກ​ເບ້ຍ​ຕ່ຳ ອຳ­ນາດ​ການ​ປົກຄອງ​ທ້ອງ­ຖິ່ນ​ຕ້ອງເພີ່ມ​ການ​ສະ­ໜັບ­ສະ­ໜຸນ​ດ້ານການ​ເງິນ​ໃຫ້​ບໍ­ລິ­ສັດ​ເຫຼົ່າ​ນີ້ ໄປ​ຄຽງ​ຄູ່​ກັບ​ການ​ຫັນລະ­ບົບ​ເຕັກ​ໂນ​ໂລ​ຊີ​ຂໍ້​ມູນ​ຂ່າວ­ສານ​ເຂົ້າ​ໃນ​ການ​ຮັບໃຊ້​ຄວາມ​ຕ້ອງ­ການ​ໂຕ​ຈິງ​ຂອງ​ບໍ­ລິ­ສັດ​ຂະ­ໜາດນ້ອຍ ແລະ ຂະ­ແໜງ​ພັດ­ທະ­ນາ​ຊົນ­ນະ­ບົດ.

ຂ່າວທີ່ກ່ຽວຂ້ອງ