ສ້າງ​ນິດ​ໄສ​ຮັກ​ອ່ານ - ໂດຍ : ດັ້ນ​ກີບ​ເມກ

129 11 ກ.ຍ. 2017 ນານາສາລະ

ທຸກ​ມື້­ນີ້​ບໍ່​ແນ່​ໃຈ​ວ່າ ທ່ານ​ຜູ້​ອ່ານ​ຄໍ​ລຳ​ພວກ​ເຮົາ​ໄດ້​ຄິດ​ເຖິງ​ອະ­ນາ­ຄົດ​ຂອງ​ລູກ​ຫຼານ ດ້ວຍ​ການ​ໃຫ້​ຄວາມ​ສຳ­ຄັນ​ໃນ​ການ​ສ້າງ​ນິດ​ໄສ​ຮັກ​ອ່ານ­ໜັງ­ສື​ໃຫ້​ພວກ​ເຂົາ ຫຼື ບໍ່? ເພາະ­ວ່າ​ບາງ​ຄົນ​ກວ່າ​ຈະ​ກ້າວ​ມາ​ຮອດ​ຈຸດ​ນີ້​ຂອງ​ຊີ­ວິດ ປັດ​ໄຈ​ຫຼັກ​ສ່ວນ​ໜຶ່ງອາດ​ສ້າງ​ຕົວ​ມາ​ດ້ວຍ​ການ​ສະ​ສົມ​ຄວາມ​ຮູ້​ຈາກ​ການ​ອ່ານ ແຕ່​ປະ​ໃຫ້​ລູກ​ຫຼານ​ຂອງ​ຕົນ​ໃຊ້​ເວ­ລາບໍ່​ເປັນ​ປະ­ໂຫຍດ ແລ້ວສັງ­ຄົມ​ເຮົາ​ຈະ​ເປັນ​ສັງ­ຄົມແຫ່ງ​ການ​ອ່ານ ແລະ ຮຽນ​ຮູ້​ຕະ­ຫຼອດ​ຊີ­ວິດ​ໄດ້ແນວ­ໃດ?.

ເມື່ອ​ເວົ້າ​ເຖິງ​ການ​ສ້າງ​ນິດ​ໄສ​ຮັກ​ການ​ອ່ານ ສິ່ງທີ່​ຜູ້​ຂຽນ​ຄິດ​ເຫັນ​ທຳ​ອິດ​ກໍ່​ແມ່ນ​ໂຮງ­ພິມ (ສຳ­ນັກພິມ) ແລະ ຮ້ານ​ຂາຍ​ປື້ມ ທັງ​ສອງ​ແຫ່ງ​ນີ້​ເປັນ​ປັດໄຈ​ຫຼັກ​ທີ່​ພົວ­ພັນ​ເຖິງ​ຄົນ​ຂຽນ​ໜັງ­ສື ແຕ່​ຖ້າ​ຕົກ​ຢູ່ໃນ​ລັກ­ສະ­ນະ​ຄົນ​ຂຽນ​ໜັງ­ສື ພໍ​ຂຽນ​ແລ້ວ​ບໍ່​ມີ​ເງິນພິມ ສຳ­ນັກ​ພິມ​ອາດ​ຮັບ​ໄປ​ພິມ​ຂາຍ​ໄດ້ ເຊິ່ງ​ເງື່ອນໄຂ​ກໍ່​ສຸດ​ແຕ່​ຈະ​ຕົກ­ລົງ​ກັນ​ເລື່ອງ​ເປີ­ເຊັນ ​ລະ­ຫວ່າງ ຄົນ​ຂຽນ ແລະ ຄົນພິມ​ຂາຍ ທັງ​ນີ້ກໍ່​ບໍ່​ຄວນ​ລືມວ່າ ​ປັດ​ໄຈ​ທີ່​ອຳ­ນວຍ​ຄວາມ​ສະ­ດວກ ຫຼື ສົ່ງ­ເສີມຄົນ​ຂຽນ ຄົນ​ພິມ ແລະ ຄົນ​ຂາຍ​ປື້ມ​ມັນ​ຈະຊ່ວຍໃຫ້​ຄົນ​ມັກ​ອ່ານ​ໄດ້​ເຂົ້າ​ເຖິງ​ແຫຼ່ງ​ຂໍ້​ມູນ ພ້ອມ​ນີ້ ເລື່ອງ​ລາ­ຄາ ​ຕະ­ຫຼາດ ແລະ ຝ່າຍ​ການ­ຈັດ­ຕັ້ງ ​ກໍ່ຄວນ​ໄດ້​ກວດ­ກາ ແລະ ເຂັ້ມ​ງວດ ຖ້າ​ພົບ​ວ່າ​ມີ​ຜູ້ລະ­ເມີດ​ ຂີ້­ລັກ​ຜົນ­ງານ​ຄົນ​ອື່ນ​ໄປ​ພິມ​ຂາຍ​ກິນ​ແບບໜ້າ​ຕາ​ເສີຍ ເຊິ່ງ​ບາງ​ກໍ­ລະ­ນີ​ກໍ່​ມີ​ຫາງສຽງ​ວ່າ ມີການ​ລັກ​ພິມ​ຜົນ­ງານ​ຂອງ​ນັກ​ຂຽນ​ບາງ​ຄົນ​ອອກຂາຍ ທັງໆ​ທີ່​ຜູ້​ຂຽນ​ທ່ານ​ນັ້ນ​ກໍ່​ຍັງ​ມີ​ຊີ­ວິດ​ຢູ່...?.

ການ​ສ້າງ​ນິດ​ໄສ​ຮັກ​ອ່ານ​ຈຶ່ງ​ບໍ່​ຂຶ້ນ​ກັບ​ຄົນ​ມີ​ເງິນໃນ​ກະ­ເປົາ​ຢ່າງ​ດຽວ ແຕ່​ມັນ​ຂຶ້ນ​ຢູ່​ກັບ​ຫຼາຍ​ປັດ​ໄຈ ເງື່ອນ­ໄຂ​ທີ່​ສັງ­ຄົມ ຫຼື ພາກ­ສ່ວນ​ກ່ຽວ­ຂ້ອງ​ຕ້ອງ​ໄດ້ສົ່ງ­ເສີມ​ທັງ​ຄົນ​ຂຽນ ຄົນ​ຂາຍ ຄົນ​ພິມ ແລະ ຄົນຊື້ (ເລື່ອງ​ລາ­ຄາ​ຕ້ອງ​ບໍ່​ແພງ​ເກີນ​ໄປ) ສົມ­ມຸດວ່າ ຄົນ​ມີ​ເງິນ​ໃນ​ກະ­ເປົາ​ຢາກ​ໄດ້​ປື້ມ​ດີໆ​ມາ​ອ່ານ ພໍຍ່າງ​ເຂົ້າ​ຮ້ານ​ພັດ​ມີ​ແຕ່​ປື້ມ​ກາ​ຕູນ ແລະ ນິ­ຍາຍ​ທີ່ບໍ່​ກົງ​ກັບ​ຄວາມຕ້ອງ­ການ​ຂອງ​ຜູ້­ກ່ຽວ​ທີ່​ຢາກ​ອ່ານປື້ມ​ວິ­ຊາ​ການ ກໍ­ລະ­ນີ​ນີ້​ມັນ​ສະ­ທ້ອນ​ເຖິງ​ຕະ­ຫຼາດ ໜັງ­ສື​ບ້ານ​ເຮົາ​ ວ່າ​ຈະ​ສາ­ມາດ​ສະ­ໜອງ​ຄວາມຕ້ອງ­ການ​ແກ່​ຄົນ​ມັກ​ອ່ານ ຄົ້ນ­ຄວ້າ​ແລ້ວ ຫຼື ຍັງ? ສຸດ​ທ້າຍ​ຖ້າ­ວ່າ​ຕະ­ຫຼາດ​ບໍ່​ສາ­ມາດ​ສະ­ໜອງ​ຄວາມຕ້ອງ­ການຂອງ​ສັງ­ຄົມ​ໄດ້​ແລ້ວ ການ​ທີ່​ພວກ​ເຮົາພາ­ກັນ​ສ້າງ​ສັງ­ຄົມ​ແຫ່ງ​ການ​ຮຽນ​ຮູ້​ຕະ­ຫຼອດ​ຊີ­ວິດ ກໍ່​ຍັງ​ຄົງ​ເປັນ​ພຽງ​ຄວາມ​ຝັນ​ຍັງ​ບໍ່ທັນ​ເກີດ​ຜົນ.

ສັງ​ລວມ​ວ່າ ທັງ​ໜັງ­ສື ໂຮງ­ພິມ ຄົນ​ຂຽນ​ ຕ້ອງສ້າງ​ເງື່ອນ­ໄຂ​ສະ­ໜອງ​ຄວາມ​ຕ້ອງ­ການ​ຂອງ​ຕະຫຼາດ ເຊັ່ນ​ວ່າ: ຫົວ­ຂໍ້​ຊິ​ຂຽນ​ຕະ­ຫຼາດ​ຕ້ອງ­ການ ຫຼື ບໍ່? ການ​ແປ​ປື້ມ​ຈາກ​ຕາ­ເວັນ­ຕົກ​ເໝາະ​ສົມ​ກັບ​ວິຖີ​ຊີ­ວິດ​ຄົນ​ລາວ ຫຼື ບໍ່? ໝາຍ​ຄວາມ​ວ່າ​ ບໍ່​ແມ່ນຂຽນ​ປື້ມ ຫຼື ຜະ­ລິດ​ປື້ມ​ຕາມ­ໃຈ​ຜູ້​ຂຽນ ແລະ ໂຮງພິມ ເວົ້າ​ເລື່ອງ​ການ​ອ່ານ​ນີ້​ເພິ່ນ​ວ່າ​ແມ່ນ​ການ​ສະແຫວງ​ຫາ​ຄວາມ​ຮູ້ ແລະ ຖອດ​ຖອນ​ບົດ­ຮຽນ​ດ້ວຍຕົນ​ເອງ​ທີ່​ດີ​ກວ່າ​ໝູ່​ໝົດ ສະ­ນັ້ນ ພໍ່​ແມ່​ຜູ້​ປົກ­ຄອງ ຄູ-ອາ­ຈານ ຕ້ອງ​ຮັກ​ການ​ອ່ານ ການ​ຄົ້ນ­ຄວ້າເຮັດ​ເປັນ​ແບບ­ຢ່າງ​ແກ່​ລູກ​ຫຼານ​ເຍົາ­ວະ​ຊົນ ລວມທັງ​ການ​ສ້າງ​ຫ້ອງ​ສະ­ໝຸດ​ກໍ່​ແມ່ນ​ຄຳ​ຕອບ​ໜຶ່ງ​ທີ່ຈະ​ສ້າງ​ນິດ​ໄສ​ຮັກ​ການ​ອ່ານ​ແກ່​ລູກ​ຫຼານ ແລະ ສັງ­ຄົມ​ໄດ້ ອັນ​ນີ້​ແມ່ນ​ຝາກ​ໃຫ້​ຄິດ​ຊ່ວຍ​ກັນ​ເບິ່ງນໍ!.

ຂ່າວທີ່ກ່ຽວຂ້ອງ