ຂ່າວຫຼ້າສຸດ

ຖອດ​ຖອນ​ບົດ­ຮຽນ​ຊີ­ເກມ ເພື່ອ​ສືບ­ຕໍ່​ພັດ­ທະ­ນາວົງການກີລາ

136 11 ກ.ຍ. 2017 ວົງຈອນກີລາ
ຖອດ​ຖອນ​ບົດ­ຮຽນ​ຊີ­ເກມ ເພື່ອ​ສືບ­ຕໍ່​ພັດ­ທະ­ນາວົງການກີລາ

ກອງ​ປະ­ຊຸມ​ຖອດ​ຖອນ​ບົດ­ຮຽນ​ໃນ​ການ​ກະ­ກຽມ ແລະ ສົ່ງ​ນັກ­ກີ­ລາ​ເຂົ້າ​ຮ່ວມ​ແຂ່ງ­ຂັນ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 29 ທີ່​ປະ­ເທດ​ມາ​ເລ​ເຊຍ ເປັນ​ເຈົ້າ­ພາບ ຈັດ​ຂຶ້ນ​ວັນ​ທີ 6 ກັນ­ຍາ 2017 ທີ່​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ (ຄອລ) ໂດຍ​ເປັນ​ປະ­ທານ​ຂອງ​ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ບັນ­ດາ​ຫົວ ໜ້າ​ກົມ ແລະ ຜູ້­ຕາງ­ໜ້າ​ຈາກ ສະ­ຫະ­ພັນ​ກີ­ລາ​ແຫ່ງ​ຊາດ​ເຂົ້າ​ຮ່ວມ.

ທ່ານ ສົມ​ພູ ພົງ­ສາ ຜູ້​ຊ່ວຍ​ລັດ­ຖະ­ມົນ­ຕີ ກະ­ຊວງ ສສກ ທັງ​ເປັນ​ຮອງ​ປະ­ທານ ແລະ ເລ­ຂາ­ທິ­ການ ຄອລ ໄດ້​ລາຍ​ງານ​ຜົນ­ສຳ­ເລັດ ແລະ ການ​ຖອດ​ຖອນ​ບົດ­ຮຽນ​ການ​ກະ­ກຽມ ແລະ ການ​ເຂົ້າ​ຮ່ວມ​ຊີ­ເກມ ຄັ້ງ​ທີ 29 ສຳ­ລັບ​ລາວ​ເຮົາ​ໄດ້​ສົ່ງ​ນັກ­ກີ­ລາ​ເຂົ້າ​ຮ່ວມ 22 ປະ­ເພດ​ກີ­ລາ ຈາກ​ທັງ​ໝົດ 38 ປະ­ເພດ ໂດຍ​ມີ​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ 350 ຄົນ ໃນ​ນີ້​ນຳ​ໃຊ້​ງົບ­ປະ­ມານ​ຂອງ​ລັດ­ຖະ­ບານ 296 ຄົນ ພ້ອມ​ກັນ​ນັ້ນ​ຍັງ​ມີ​ຄະ­ນະ​ສັງ­ເກດ​ການ ຄະ­ນະ​ສະ­ຫະ­ພັນ​ກີ­ລາ​ແຫ່ງ​ຊາດ ຜູ້​ຕິດ­ຕາມ ແລະ ຜູ້​ໃຫ້­ການ​ອຸ­ປະ­ຖຳ​ສະ­ຫະ­ພັນ​ກີ­ລາ​ແຫ່ງ​ຊາດ​ຕ່າງໆ 54 ທ່ານ ເຂົ້າ​ຮ່ວມ​ໂດຍ​ຮັບ­ຜິດ­ຊອບ​ທາງ​ດ້ານ​ງົບ­ປະ­ມານ​ກຸ້ມ​ຕົນ​ເອງ​ຮອບ­ດ້ານ ສະ­ຫຼຸບ​ແລ້ວ​ລັດ­ຖະ­ບານ​ໃຫ້­ການ​ສະ­ໜັບ­ສະ­ໜູນ​ດ້ານ​ງົບ­ປະ­ມານ​ຕົວ​ຈິງ 18,37 ຕື້​ກີບ ນັກ­ກີ­ລາ​ເຂົ້າ​ສູນ​ເຝີກ​ແອບ​ຕົວ​ຈິງ​ບາງ​ປະ­ເພດ​ກີ­ລາ​ທີ່​ມີ​ເປົ້າ​ໝາຍ​ຫຼຽນ​ຄຳ​ສູງ​ສຸດ 4 ເດືອນ ສ່ວນ​ຜົນ­ງານ​ຍາດ​ໄດ້ 26 ຫຼຽນ ປະ­ກອບ​ມີ 2 ຫຼຽນ​ຄຳ 3 ຫຼຽນ​ເງິນ ແລະ 21 ຫຼຽນ​ທອງ ຈັດ​ຢູ່​ໃນ​ອັນ​ດັບ​ທີ 9 ຂອງ​ຕາ­ຕະ­ລາງ ຈາກ 11 ປະ­ເທດ.

ໂອ­ກາດ​ນີ້ ທ່ານ​ລັດ­ຖະ­ມົນ­ຕີ ໄດ້​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ​ຕໍ່​ຄະ­ນະ​ນຳ ແລະ ນັກ­ກີ­ລາ​ທຸກ​ຄົນ​ທີ່​ໄດ້​ພ້ອມ​ກັນ​ທຸ້ມ­ເທ​ທັງ​ດ້ານ​ເຫື່ອ­ແຮງ ແລະ ສະ­ຕິ​ປັນ­ຍາ​ໃນ​ການ​ກະ­ກຽມ​ນັກ­ກີ­ລາ ແລະ ເຂົ້າ​ຮ່ວມ​ແຂ່ງ­ຂັນ ຈົນ​ສາ­ມາດ​ຍາດ​ໄດ້­ຜົນ​ງານ​ອັນ​ດີ ພ້ອມ​ນັ້ນ​ກໍ່​ຮຽກ­ຮ້ອງ​ໃຫ້​ທຸກ​ຄົນ​ຈົ່ງ​ພ້ອມ​ກັນ​ຄົ້ນ­ຄວ້າ ແລະ ຊອກ​ຫາ​ວິ­ທີ​ທາງ​ຮ່ວມ​ກັນ​ໃຫ້​ສາ­ມາດ​ຮູ້​ໄດ້​ເຖິງ​ສາ­ເຫດ ຈຸດ​ດີ ຈຸດ​ອ່ອນ ແລະ ຂໍ້­ຄົງ­ຄ້າງ​ທີ່​ເຮັດ​ໃຫ້​ທັບ​ນັກ­ກີ­ລາ​ລາວ​ເຮົາ​ບໍ່​ບັນ­ລຸ​ຄາດ­ໝາຍ​ໃນ​ຊີ­ເກມ ເພື່ອ​ຈະ​ໄດ້​ແກ້​ໄຂ​ໃຫ້​ທ່ວງ​ທັນ​ແນ­ໃສ່​ກຽມ​ສ້າງ​ຜົນ­ງານ​ໃນ​ລາຍ­ການ​ຕ່າງໆ​ທັງ​ພາຍ​ໃນ​ພາກ​ພື້ນ ແລະ ສາ­ກົນ​ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ