ຂ່າວຫຼ້າສຸດ

ລາວ ຕັ້ງ​ເປົ້າ 1 ຫຼຽນ​ຄຳ ກີ­ລາ​ອາ​ຊຽນ ພາ​ຣາ ເກມ

123 11 ກ.ຍ. 2017 ວົງຈອນກີລາ
ລາວ ຕັ້ງ​ເປົ້າ 1 ຫຼຽນ​ຄຳ ກີ­ລາ​ອາ​ຊຽນ ພາ​ຣາ ເກມ

ພິ­ທີ​ຖະ­ແຫຼງ​ຂ່າວ​ເຂົ້າ​ຮ່ວມ​ແຂ່ງ­ຂັນ​ງານ​ມະ​ຫະ​ກຳ​ກີ­ລາ​ຄົນ​ພິ­ການ​ອາ​ຊຽນ ຄັ້ງ​ທີ 9 ຫຼື ອາ​ຊຽນ ພາ​ຣາ ເກມ ທີ່​ປະ­ເທດ​ມາ​ເລ​ເຊຍ ໄດ້​ຈັດ​ຂຶ້ນ​ວັນ​ທີ 6 ກັນ­ຍາ 2017 ທີ່​ໂຮງ­ແຮມ​ລ້ານ​ຊ້າງ ໂດຍ​ມີ​ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ທັງ​ເປັນ​ປະ­ທານ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ (ຄອລ) ມີ​ທ່ານ ບົວ​ລານ ສິ­ລິ​ປັນ­ຍາ ຮອງ​ລັດ­ຖະ­ມົນ­ຕີ ກະ ຊວງ ສສກ ຮອງ​ປະ­ທານ ຄອລ ທັງ​ເປັນ​ປະ­ທານ​ຄະ­ນະ​ກຳ­ມະ­ການ​ພາ​ຣາ​ແລມ​ປິກ​ແຫ່ງ​ຊາດ ພ້ອມ​ດ້ວຍ​ບັນ­ດາ​ຫົວ­ໜ້າ​ກົມ​ທີ່​ກ່ຽວ­ຂ້ອງ ຄະ­ນະ​ນຳ ຄູ​ເຝິກ ແລະ ນັກ­ກີ­ລາ.

ທ່ານ ສີ­ທາດ ຈັນ­ທະ​ບູ​ຣີ ຫົວ­ໜ້າ​ກົມ​ກີ­ລາ​ມວນ​ຊົນ ກະ­ຊວງ ສສກ ກ່າວ​ວ່າ: ກ່ອນ​ຈະ​ເຂົ້າ​ຮ່ວມ​ການ​ແຂ່ງ­ຂັນ​ງານ​ກີ­ລາ​ດັ່ງ­ກ່າວ ພວກ​ເຮົາ​ໄດ້​ມີ​ການ​ຫ້າງ​ຫາ​ກະ­ກຽມ​ຢ່າງ­ຮອບ­ດ້ານ ແລະ ຈັດ​ການ­ເຄື່ອນ­ໄຫວ​ຮ່ວມ​ແຂ່ງ­ຂັນ ແລະ ທົດ​ສອບ​ຄວາມ​ສາ­ມາດ​ນັກ­ກີ­ລາ ທັງ​ພາຍ​ໃນ ແລະ ຕ່າງ­ປະ­ເທດ ເຊິ່ງ​ໃນ​ການ​ແຂ່ງ­ຂັນ​ຄັ້ງ​ນີ້ ຈະ​ຈັດ​ຂຶ້ນ​ລະ­ຫວ່າງ​ວັນ​ທີ 17Œ23 ກັນ­ຍາ 2017 ມີ​ນັກ­ກີ­ລາ​ຈາກ 11 ປະ­ເທດ ໃນ​ຂົງ­ເຂດ​ອາ​ຊຽນ​ເຂົ້າ​ຮ່ວມ ແຂ່ງ­ຂັນ 16 ປະ­ເພດ​ກິ­ລາ ແລະ ມີ​ການ​ຊີງ​ຫຼຽນ 294 ຫຼຽນ​ຄຳ ຈາກ 883 ລາຍ­ການ ສະ­ເພາະ ສປປ ລາວ ໄດ້​ສົ່ງ​ຄະ­ນະ​ນຳ ຄູ​ເຝິກ ແລະ ທັບ​ນັກ­ກີ­ລາ​ຄົນ​ພິ­ການ​ທີມ​ຊາດ​ລາວ ຈຳ­ນວນ 100 ຄົນ ຍິງ 27 ຄົນ ໃນ​ນີ້ ຄູ​ເຝິກ ແລະ ນັກ­ກີ­ລາ 84 ຄົນ ຍິງ 20 ຄົນ ຈາກ 6 ປະ­ເພດ ພ້ອມ​ຕັ້ງ​ເປົ້າ​ຈະ​ພະ­ຍາ­ຍາມ​ສູ້​ຊົນ​ຍາດ​ໃຫ້​ໄດ້ 1 ຫຼຽນ​ຄຳ ຈາກ​ຍົກ​ນ້ຳ­ໜັກ 4 ຫຼຽນ​ເງິນ ຈາກ​ແລ່ນŒລານ ລອຍ­ນ້ຳ ຍົກ​ນ້ຳ­ໜັກ ໂກນ​ບອນ ແລະ 7 ຫຼຽນ​ທອງ ຈາກ​ລອຍ­ນ້ຳ 2 ຫຼຽນ ສ່ວນ​ອີກ 5 ຫຼຽນ ເຕະ­ບານ ບານ­ບ້ວງ​ລໍ້​ເລື່ອນ ໂກນ​ບານ ລອຍ­ນ້ຳ ແລະ ຍົກ​ນ້ຳ­ໜັກ.

ໃນ​ໂອ­ກາດ​ດັ່ງ­ກ່າວ ກໍ່​ຍັງ​ມີ​ບັນ­ດາ​ຜູ້​ໃຫ້­ການ​ສະ­ໜັບ­ສະ­ໜູນ​ຊ່ວຍ​ທີມ​ນັກ­ກີ­ລາ​ຄົນ​ພິ­ການ​ທີມ​ຊາດ​ລາວ ໃນ​ນັ້ນ​ປະ­ກອບ​ມີ ບໍ­ລິ­ສັດ​ລັດ​ວິ​ສາ​ຫະ​ກິດ​ຜະ­ລິດ​ອຸ­ປະ­ກອນ​ການ​ສຶກ​ສາ 10 ລ້ານ​ກີບ ຮ້ານ​ວິ­ລະ​ໄຊ​ຂາຍ­ເຄື່ອງ​ໃຊ້​ຫ້ອງ­ການ ແລະ ເຄື່ອງ­ໃຊ້​ໄຟ­ຟ້າ 7 ລ້ານ​ກີບ ສະ­ມາ­ຄົມ​ກີ­ລາ​ພື້ນ­ເມືອງ (ກີ­ລາ​ສັດ) 4.5 ລ້ານ​ກີບ ລັດ​ວິ​ສາ​ຫະ​ກິດ​ໂຮງ­ພິມ​ສຶກ​ສາ 5 ລ້ານ​ກີບ ລັດ​ວິ​ສາ​ຫະ​ກິດ​ຫວຍ​ພັດ­ທະ­ນາ 5 ລ້ານ​ກີບ ທະ­ນາ­ຄານ​ພັດ­ທະ­ນາ​ລາວ 1 ລ້ານ​ກີບ ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ ມະ­ຫາ­ຊົນ 1 ລ້ານ​ກີບ ວິ­ທະ­ຍາ­ໄລ​ເຕັກ­ນິກ​ແຂວງ​ສະ­ຫວັນ​ນະ​ເຂດ 5 ແສນ​ກີບ ນອກ­ຈາກ​ນັ້ນ ກໍ່​ຍັງ​ມີ​ບັນ­ດາ​ນິ­ຕິ­ບຸກ­ຄົນ ບໍ­ລິ­ສັດ ຫ້າງ​ຮ້ານ ຊຸກ­ຍູ້​ເຄື່ອງ​ບຳ­ລຸງ ແລະ ອາ­ຫານ​ການ​ກິນ ລວມ 12 ລ້ານ​ກວ່າ​ກີບ ລວມ​ມູນ​ຄ່າ​ທັງ​ໝົດ 34 ລ້ານ​ກວ່າ​ກີບ.

ຂ່າວທີ່ກ່ຽວຂ້ອງ