ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ກຳ­ປູ­ເຈຍ ​ເວ​ເນ​ຊູ​ເອ​ລາ ​ເຄນ​ຢາ

143 06 ກ.ຍ. 2017 ຫົວຂໍ້ຂ່າວອື່ນໆ

ບົດ­ຮຽນ​ທີ່​ຄວນ​ສຶກ​ສາ​ຈາກ​ຕ່າງ­ປະ­ເທດ​ປະ­ຈຳ​ວັນ​ນີ້ ມີ​ເລື່ອງ​ກຳ­ປູ­ເຈຍ ໃຊ້​ມາດ​ຕະ­ການ​ຢຸດ​ການ­ເຄື່ອນ­ໄຫວ​ຂອງ​ອົງ­ການ​ຕ່າງ­ປະ­ເທດທີ່​ລະ­ເມີດ​ກົດ­ໝາຍ ເລື່ອງ​ທາງ​ການ​ເວ​ເນ​ຊູ​ເອ​ລາ ສັ່ງ​ປິດ​ສະ­ຖາ­ນີ​ວິ­ທະ­ຍຸ​ທີ່​ວິ­ຈານ​ລັດ­ຖະ­ບານ ແລະ ສຸດ​ທ້າຍ​ໄປ​ເບິ່ງ​ກົດ­ໝາຍ​ຫ້າມ​ໃຊ້​ຖົງ​ຢາງ​ໃນ​ປະ­ເທດ​ເຄນ​ຢາ.

ກຳ­ປູ­ເຈຍ: ຂ່າວ​ຕ່າງ­ປະ­ເທດ​ໃຫ້​ຮູ້​ວ່າ ລັດ​ຖະບານກຳ­ປູ­ເຈຍ ​ໄດ້​ສັ່ງ​ປິດ​ຫ້ອງ­ການ​ອົງ­ການ​ທີ່​ບໍ່ແມ່ນ​ຂອງ​ລັດ­ຖະ­ບານ ຫຼື ເອັນ​ຈີ​ໂອ (NGO) ພ້ອມທັງ​ເຂກ-ພະ­ນັກ­ງານ​ທີ່​ເປັນ​ຄົນ​ຕ່າງ​ຊາດ​ຂອງ​ອົງການ​ດັ່ງ­ກ່າວ​ ອອກ​ນອກ​ປະ­ເທດ​ພາຍ​ໃນ 7 ວັນ ດ້ວຍ​ເຫດ­ຜົນ​ວ່າ​ ອົງ­ການ​ນີ້​ບໍ່​ໄດ້​ຂຶ້ນ​ທະ­ບຽນ​ຖືກຕ້ອງ​ຕາມ​ກົດ­ໝາຍ ທັງ​ມີ​ຄວາມ​ຜິດ​ຖານ​ຫຼົບ​ຫຼີກພັນ­ທະ​ເສຍ​ພາ­ສີ ອົງ­ການ NGO ເຈົ້າ​ບັນ­ຫາ​ນີ້​ມີຊື່​ເຕັມ​ວ່າ ສະ​ຖາ​ບັນປະ­ຊາ​ທິ​ປະໄຕ​ແຫ່ງ​ຊາດ (NDI-National Democracy Institute) ທີ່​ເຄື່ອນໄຫວ​ໃນ​ກຳ­ປູ­ເຈຍ ມາ​ແຕ່​ປີ 1992 ເຄືອ​ຂ່າຍ​ອົງການ​ນີ້​ມີ​ຢູ່​ຫຼາຍ​ປະ­ເທດ​ ໃນ​ຖາ­ນະ​ເປັນ​ສະ​ຖາ​ບັນພັດ­ທະ­ນາປະ­ຊາ­ທິ­ປະ­ໄຕ ປະ­ທານ​ໃຫຍ່​ຂອງ​ເຄືອຂ່າຍ​ຂອງ​ສະ​ຖາ​ບັນ ແມ່ນ​ທ່ານ​ນາງ ເມ​ເດ​ລິນ ອອນ​ໄບຼ ອະ­ດີດ​ລັດ​ຖະ​ມົນຕີ​ກະ­ຊວງ​ການ​ຕ່າງ​ປະເທດ​ສະ­ຫະ­ລັດ ໃນ​ໄລ­ຍະ​ຜ່ານ​ມາ ອົງ­ການ NDI ຖືກ​ສື່​ຂອງ​ທາງ​ການ​ກຳ­ປູ­ເຈຍ ໂຈມ​ຕີ​ວ່າ​ເປັນ​ອົງການ​ທີ່​ໃຫ້­ການ​ຊ່ວຍ­ເຫຼືອ ແລະ ສະ­ໜັບ­ສະ­ໜູນພັກ​ຝ່າຍ​ຄ້ານ ເພື່ອ​ເປົ້າ​ໝາຍ​ໂຄ່ນ​ລົ້ມ​ລັດ­ຖະ­ບານກຳ­ປູ­ເຈຍ ນອກ­ຈາກ​ອົງ­ການ NDI ແລ້ວ ກະ­ຊວງຕ່າງ­ປະ­ເທດ​ກຳ­ປູ­ເຈຍ ຍັງ​ໃຫ້​ຮູ້​ວ່າ ລັດ­ຖະ­ບານ​ກຳລັງ​ພິ­ຈາ­ລະ­ນາ​ໃຊ້​ມາດ​ຕະ­ການລະ­ດັບ​ດຽວ​ກັນນີ້​ ເພື່ອ​ລົງ­ໂທດ​ອົງ­ການ​ຂອງ​ຕ່າງ­ປະ­ເທດ ແລະ NGO ອື່ນໆ ທີ່​ລະ­ເມີດ​ກົດ­ໝາຍກຳ­ປູ­ເຈຍ ໃນ​ນັ້ນລວມ​ມີ​ບັນ­ດາ​ອົງ­ການ​ທີ່​ດຳ­ເນີນໂດຍ​ພະ­ນັກ­ງານທີ່​ເປັນ​ຄົນ​ອາ​ເມ​ຣິ​ກາ ຫຼື ໄດ້​ຮັບ​ທຶນ​ສະ­ໜັບ­ສະ­ໜູນຈາກ ສ ອາ​ເມ​ຣິກາ ເຊັ່ນ: ໜັງ­ສື­ພິມ​ ແຄມ​ໂບ​ເດຍ ເດລີ Cambodia Daily ວິ­ທະ­ຍຸ ເອ​ເຊຍ ​ເສລີ (Radio Free Asia) ແລະ ວິ­ທະ­ຍຸ ສຽງ​ອາ​ເມ​ຣິ​ກາ ຫຼື ວີ​ໂອ​ເອ (VOA-Voice of America) ອົງ­ການສື່​ມວນ​ຊົນ​ຕ່າງ­ປະ­ເທດ​ໃນ​ກຳ­ປູ­ເຈຍ ໃຫ້​ທັດ­ສະ­ນະວ່າ ມາດ​ຕະ­ການ​ກຳ­ຈັດ​ອົງ​ການ­ຈັດ­ຕັ້ງ​ທີ່​ບໍ່​ແມ່ນຂອງ​ລັດ­ຖະ­ບານ ກໍ່​ຄືໜ່ວຍ​ງານ​ຂອງ​ຕ່າງ​ປະເທດ​ນີ້ ມີ​ເປົ້າ​ໝາຍ​ທາງການ­ເມືອງ ເພື່ອ​ລະ­ງັບການ​ຕຳ​ໜິ​ວິ­ຈານ​ກ່ອນ​ຈະ​ມີ​ການ​ເລືອກ​ຕັ້ງ​ທົ່ວ​ໄປໃນ​ປີ​ຊິ​ມາ​ນີ້.

ທີ່ ເວ​ເນ​ຊູ​ເອ​ລາ: (Venezuela) ຂ່າວ ​ວຽງ​ຈັນ ທາມ ​ສະ­ບັບ​ວັນ​ທີ 28 ເດືອນ​ສິງ­ຫາ​ປີ​ນີ້ ໄດ້​ເວົ້າກ່ຽວ​ກັບ​ທາງ​ການ​ຂອງປະ­ເທດ​ເວ​ເນ​ຊູ​ເອ​ລາ ໄດ້ສັ່ງ​ປິດ​ສະ­ຖາ­ນີ​ວິ­ທະ­ຍຸ 2 ແຫ່ງ ດ້ວຍ​ເຫດ​ທີ່​ສະ­ຖາ­ນີທັງ​ສອງ​ແຫ່ງ​ ໄດ້​ກະ­ຈາຍ​ຂໍ້­ຄວາມ​ວິ­ພາກ​ວິ­ຈານລັດ­ຖະ­ບານ​ຂອງ​ປະ­ທາ­ນາ­ທິ­ບໍ­ດີ​ ນິ​ໂກ​ລາດ ມາ​ດູ​ໂຣ ກ່ອນ​ໜ້າ​ນັ້ນບໍ່​ເຖິງ 2 ວັນ ຄະ­ນະ​ກຳ­ມະ­ການ​ສື່­ສານໂທລະ​ຄົມ­ມະ­ນາ­ຄົມ​ຂອງ​ເວ​ເນ​ຊູ​ເອ​ລາ ​ກໍ່​ໄດ້​ສັ່ງ​ໃຫ້ເຄືອ​ຂ່າຍ​ໂທລະ­ພາບ​ໃຊ້​ສາຍ (ເຄ​ເບິນ) ເລີກ​ຖອນສັນ­ຍານ​ຈາກ​ສະ­ຖາ­ນີໂທລະ­ພາບ​ກາ​ຣາ​ໂກນ (caracol) ແລະ ອາ­ຊີ​ເອນ (RCN) ຂອງ​ປະ­ເທດ​ໂກລົມ​ບີ ທີ່​ມີ​ການ​ກະ­ທຳ​ທີ່​ເປັນ​ການ​ແຊກແຊງ​ເຂົ້າໃນ​ກິດ­ຈະ­ການ​ພາຍ​ໃນ​ຂອງເວ​ເນ​ຊູ​ເອ​ລາ ຫາງສຽງ​ຈາກ​ຝ່າຍ​ກົງ­ກັນ­ຂ້າມ​ວິ­ພາ​ວິ­ຈານ​ລັດ​ຖະບານ​ຂອງ​ປະ­ທາ­ນາ­ທິ­ບໍ­ດີ​ ມາ​ດູ​ໂຣ ວ່າ​ຜະ­ເດັດ­ການ ບ້າ​ອຳ­ນາດ ແຕ່​ພັກ​ຝ່າຍ​ເບື້ອງ​ລັດ­ຖະ­ບານບອກວ່າ ເປັນ​ມາດ​ຕະ­ການ​ເພື່ອ​ບັນ­ລຸທາງ​ອອກ​ດ້ານການ­ເມືອງ ແລະ ເສດ­ຖະ­ກິດ​ທີ່​ພວມ​ປະ​ເຊີນ​ກັບ​ວິ​ກິດ​ການ.

ທີ່ ເຄນ​ຢາ: ໃນ​ວັນ​ທີ 28 ເດືອນ​ສິງ­ຫາຜ່ານ​ມາ ປະ­ເທດ​ເຄນ​ຢາ (ຢູ່​ທະ­ວີບ​ອາ​ຟຣິ​ກາ) ໄດ້ບັງ­ຄັບ​ໃຊ້​ກົດ­ໝາຍ​ຫ້າມ​ໃຊ້​ຖົງປະ­ລາ­ສະ­ຕິກ ຫຼື ຖົງຢາງ ທ່າມ­ກາງ​ຫາງ​ສຽງ​ຂັດ­ຂ້ອງ​ຂອງ​ກຸ່ມ​ທຸ­ລະກິດຜະ­ລິດ​ຖົງ​ປະ­ລາ­ສະ­ຕິກ​ທີ່​ບອກ​ວ່າ ມາດ​ຕະການຫ້າມ​ດັ່ງ­ກ່າວ​ຈະ​ເຮັດ​ໃຫ້​ກຳ­ມະ­ກອນ​ໃນ​ຂະແໜງ​ດັ່ງ­ກ່າວ​ວ່າງ​ງານ​ຫຼາຍ​ຂຶ້ນ ຍ້ອນ​ຈຳ​ຕ້ອງ​ໄດ້ຫຼຸດ​ຈຳ­ນວນ​ແຮງ​ງານ​ລົງ ຕາມ​ສະ­ຖິ­ຕິ​ໃນ​ແຕ່​ລະປີ ການ​ໃຊ້​ຖົງ​ປະ­ລາ­ສະ­ຕິກ​ໃນ​ປະ­ເທດ​ນີ້ ມີ​ເຖິງ 1 ລ້ານ​ຖົງ ກົດ­ໝາຍ​ຜະ­ເດັດ​ເສິກ​ກັບ​ຖົງ​ຢາງ​ສະ­ບັບ​ນີ້ ໄດ້​ກຳ­ນົດ​ບົດ​ລົງ­ໂທດ​ຜູ້​ຝ່າ­ຝືນ​ດ້ວຍ​ການ​ປັບ​ໃໝ​ເປັນ​ຈຳ­ນວນ​ເງິນ​ສູງ​ເຖິງ 38.000 ໂດ​ລາ​ສະ­ຫະ­ລັດ ຫຼື ຕິດ​ຄຸກ​ສູງ​ສຸດ 4 ປີ.

ຂ່າວທີ່ກ່ຽວຂ້ອງ