ຂ່າວຫຼ້າສຸດ

“ຊີ​ເກມສ໌” ມາ​ເລ​ເຊຍ​ຄອງ​ເຈົ້າ​ຫຼຽນ​ຄຳ “ຟີ​ລິບ​ປິນ” ຮັບ​ເປັນ​ເຈົ້າ­ພາບ​ຕໍ່ 2019

556 31 ສ.ຫ. 2017 ວົງຈອນກີລາ
“ຊີ​ເກມສ໌” ມາ​ເລ​ເຊຍ​ຄອງ​ເຈົ້າ​ຫຼຽນ​ຄຳ “ຟີ​ລິບ​ປິນ” ຮັບ​ເປັນ​ເຈົ້າ­ພາບ​ຕໍ່ 2019

    ມາ​ເລ​ເຊຍ ເຈົ້າ­ພາບ ຊີ​ເກມສ໌ ຄັ້ງ​ທີ 29 ຈັດ­ການ​ປິດ​ສາກ​ລາຍ­ການ​ທີ່​ເພື່ອນ​ບ້ານ​ອາ​ຊຽນ​ຊົມ­ເຊີຍ​ໃນ​ທາງ​ລົບ ດ້ວຍ​ການ​ເນ­ລະ­ມິດ​ສະ­ໜາມ ບູ​ກິດ ຈາ​ລິວ ໃຫ້​ກາຍ­ເປັນ​ເວ­ທີ​ອຳ​ລາ​ສຸດ​ຄຶກ­ຄັກ ພ້ອມ​ແສງ​ສີ​ສຽງ​ປະ​ທັບ​ໃຈ ກ່ອນ​ສົ່ງ​ທຸງ​ຕໍ່­ໃຫ້ ຟິ​ລິບ​ປິນ ເຈົ້າ­ພາບ​ປີ 2019.

    ວັນ​ທີ 31 ສິງ­ຫາ 2017 ການ​ແຂ່ງ­ຂັນ​ກີ­ລາ​ແຫ່ງ​ມິດ­ຕະ­ພາບ​ຍ່ານ​ອາ­ຊີ​ຕາ­ເວັນ​ອອກ­ສຽງ​ໃຕ້ ຊີ​ເກມສ໌ ເດີນ­ທາງ​ມາ​ເຖິງ​ວັນ​ສຸດ​ທ້າຍ ເຊິງ​່​ຈົບ​ລົງ​ດ້ວຍ​ການ​ທີ່ ມາ​ເລ​ເຊຍ ເຈົ້າ­ພາບ ຄອບ​ຄອງ​ຕຳ­ແໜ່ງ​ເຈົ້າ​ຫຼຽນ​ຄຳ​ອີກ​ຄັ້ງ ເມື່ອ​ໄດ້​ໄປ​ທັ້ງ​ໝົດ 145 ຫຼຽນ ຂະ­ນະ​ທີ່​ຫຼຽນ​ເງິນ 92 ຫຼຽນ ແລະ ຫຼຽນ​ທອງ 86 ຫຼຽນ ລວມ​ເປັນ 323 ຫຼຽນ ນັບ​ຕັ້ງ­ແຕ່​ເປີດ​ສາກ​ແຂ່ງ​ລ່ວງ​ໜ້າ​ເມື່ອ​ວັນ​ທີ 16 ສິງ­ຫາ​ທີ່​ຜ່ານ​ມາ.

    ພິ­ທີ​ປິດ​ຄັ້ງ​ນີ້​ເລີ່ມ​ຕົ້ນ​ເວ­ລາ 20:20 ໂມງ​ຂອງ​ປະ­ເທດ​ເຮົາ ທ່ານ ນາ​ຈິບ ຣາ​ຊັກ ນາ­ຍົກ­ລັດ­ຖະ­ມົນ­ຕີ​ຂອງ ມາ​ເລ​ເຊຍ ໃຫ້​ກຽດ​ຂຶ້ນ​ກ່າວ​ສະ​ດຸ​ດີ​ຜົນ­ງານ​ຂອງ​ນັກ­ກີ­ລາ​ທ້ອງ­ຖິ່ນ​ທີ່​ສ້າງ​ຜົນ­ງານ​ສຸດ​ຄວາມ​ສາ­ມາດ​ຕະ­ຫຼອດ​ລາຍ­ການ ແລະ ຮ່ວມ​ຍິນ​ດີ​ກັບ​ຄວາມ​ສຳ­ເລັດ​ທີ່​ໄດ້​ມາ ກ່ອນ​ທຸກ​ຄົນ​ຈະ​ຮ່ວມ​ກັນ​ຢືນ​ສະ­ແດງ​ຄວາມ​ເຄົາ­ລົບ ເມື່ອ​ເພງ​ຊາດ Negaraku ຖືກ​ບັນ­ເລງ​ຂຶ້ນ​ມາ​ກາງ​ສະ­ໜາມ.

    ຈາກ​ນັ້ນ​ເປັນ​ຄິວ​ຂອງ​ເຫຼົ່າ​ນັກ­ກີ­ລາ​ຈາກ​ຊາດ​ຕ່າງໆ ທະ­ຍອຍ​ເຂົ້າ​ສູ່​ສະ­ໜາມ​ເພື່ອ​ຮ່ວມ​ອຳ​ລາ​ກັບ​ມະ​ຫະ​ກຳ​ກີ­ລາ​ຄັ້ງ​ຫຼ້າ​ສຸດ ລວມ​ເຖິງ​ເຫຼົ່າ​ທີມ​ງານ​ອາ­ສາ​ສະ­ໝັກ​ທົ່ວ​ປະ­ເທດ ທີ່​ອິດ­ເມື່ອຍ​ກັນ​ມາ​ນານ ແລະ ກໍ​ມີ “ຣິ​ເມົາ” ມາ​ສ​ຄອດ​ມາ​ເລ​ເຊຍ​ທີ່​ສຸດ​ໜ້າ​ຮັກ ອອກ​ມາ​ສ້າງ​ສີ­ສັນ​ໃຫ້​ຄົນ​ຊົມ​ມີ​ຮອຍ​ຍິ້ມ ແລະ ເນື່ອງ​ໃນ​ວັນ​ປິດ​ການ​ແຂ່ງ­ຂັນ ກົງ​ກັບ​ວັນ​ທີ່​ພວກ​ເຂົາ​ສະ­ຖາ­ປະ­ນາ​ຕົນ​ເອງ​ເປັນ​ຊາດ​ອິດ​ສະ­ລະ ເປັນ​ເອ­ກະ­ລາດ​ຈາກ​ອັງ­ກິດ​ຄົບ­ຮອບ 60 ປີ​ພໍ­ດີ ເຈົ້າ​ບ້ານ​ຈຶ່ງ​ຂົນ​ການ­ສະ­ແດງ​ຊຸດ​ໃຫຍ່​ມາ​ກຳ­ນັນ​ຄົນ​ຊົມ ແສງ​ສີ​ສຽງ​ຕະ­ການ​ຕາ​ບໍ່​ນ້ອຍ​ໜ້າ​ວັນ​ເປິດ ຈາກ​ນັ້ນ​ກໍ​ເປັນ​ຄິວ​ຂອງ ຟິ​ລິບ​ປິນ ທີ່​ອອກ​ມາ​ທຳ​ການ­ສະ­ແດງ​ຕໍ່ ປານ​ກັບ​ເປັນ​ການ​ເຊື້ອ​ເຊີນ​ໃຫ້​ທຸກ​ຄົນ​ໄດ້​ຮູ້­ຈັກ​ກ່ອນ​ການ​ແຂ່ງ­ຂັນ​ອີກ 2 ປີ​ຂ້າງ​ໜ້າ​ຈະ​ມາ​ເຖິງ ໂດຍ​ມີ​ການ​ສົ່ງ­ຕໍ່​ມອບ​ທຸງ​ຊີ​ເກມສ໌ ໃຫ້​ແກ່​ຕົວ​ແທນ​ຂອງ ຟິ​ລິບ​ປິນ ເປັນ​ຫຼັກ​ຖານ​ຢືນ­ຢັນ​ສຳ­ລັບ​ການ​ຮັບ​ໜ້າ­ທີ່​ເປັນ​ເຈົ້າ­ພາບ​ຕໍ່​ໄປ.

    ສະ­ຫຼຸບ​ຜົນ­ງານ​ຂອງ​ທີມ​ນັກ­ກີ­ລາ​ລາວ​ໃນ​ຄັ້ງ​ນີ້ ໄດ້​ໄປ​ທັງ​ໝົດ 26 ຫຼຽນ ແບ່ງ​ເປັນ 2 ຫຼຽນ​ຄຳ 3 ຫຼຽນ​ເງິນ ແລະ 21 ຫຼຽນ​ທອງ ຄອງ​ອັນ​ດັບ 9 ຂອງ ຊີ​ເກມສ໌ 2017.

ຂ່າວທີ່ກ່ຽວຂ້ອງ