ຂ່າວຫຼ້າສຸດ

ມວຍ​ລາວ ທອງ​ບາງ ເຊື້ອ​ພົມ ເສຍ​ແບບ​ຄ້ານ​ສາຍ­ຕາ

492 30 ສ.ຫ. 2017 ວົງຈອນກີລາ
ມວຍ​ລາວ ທອງ​ບາງ ເຊື້ອ​ພົມ ເສຍ​ແບບ​ຄ້ານ​ສາຍ­ຕາ

    ປະ­ທານ​ສະ­ຫະ­ພັນ​ມວຍ​ແຫ່ງ​ຊາດ​ລາວ ສະ­ແດງ​ຄວາມ​ຜິດ​ຫວັງ​ກັບ​ຄຳ​ຕັດ­ສິນ​ຂອງ​ກຳ­ມະ­ການ​ຈັດ­ການ​ແຂ່ງ­ຂັນ​ມວຍ​ລາວ ໃນ​ງານ​ມະ­ຫະ​ກຳ​ກີ­ລາ​ຊີ­ເກມ ຄັ້ງ​ທີ 29 ຫຼື ກົວ​ລາ​ລຳ​ເປີ ເກມ ຫຼັງ​ຈາກ ທອງ​ບາງ ເຊື້ອ​ພົມ ນັກ­ກີ­ລາ​ມວຍ​ທີມ​ຊາດ​ລາວ ຂຶ້ນ​ສັງ­ວຽນ​ຟາດ​ຄາງ​ກັບ​ນັກ​ຊົກ​ໄທ ໃນ 3 ຍົກ ລາວ​ໄດ້​ຄະ­ແນນ ເຕັມ 10 ຢ່າງ​ຈະ­ແຈ້ງ ແຕ່​ສຸດ​ທ້າຍ ຍົກ​ມື​ໃຫ້ ສຸ­ລະ​ໄຊ ນັກ​ຊົກ​ໄທ ເປັນ​ຝ່າຍ​ເອົາ​ຊະ­ນະ 29-28 ຄະ­ແນນ.

    ການ​ແຂ່ງ­ຂັນ​ມວຍ​ລາວ ໃນ ກົວ​ລາ​ລຳ​ເປີ ເກມ ຮອບ​ຮອງ​ຊະ­ນະ​ເລີດ ໃນ​ຄັ້ງ​ນີ້ ໄດ້​ມີ​ຂຶ້ນ​ວັນ​ທີ 28 ສິງ­ຫາ ຜ່ານ​ມາ ສຳ­ລັບ​ນັກ­ຊົກ­ມວຍ​ລາວ ໄດ້​ຜ່ານ​ເຂົ້າ​ໄປ​ຊີງ​ຫຼຽນ​ເງິນ​ເຖິງ 2 ຮຸ່ນ ຈາກ ທ້າວ ທອງ​ບາງ ເຊື້ອ​ພົມ ຫຼື ລາຍ​ເພັດ​ນ້ອຍ ປກສ ຮຸ່ນ​ນ້ຳ­ໜັກ 54 ກິ​ໂລກ​ຣາມ ພົບ​ກັບ ສຸ­ລະ​ໄຊ ນັກ​ທາ ນັກ​ຊົກ​ໄທ ແລະ ລາດ​ຊະ​ສັກ ສຸ­ລິ­ຍະ​ວົງ ຫຼື ເຈົ້າ​ສອງ​ເມືອງ (ສິງ​ໃຫຍ່) ຈາກ​ແຂວງ​ຈຳ­ປາ​ສັກ ພົບ​ກັບ ສົມ​ໃຈ​ຍັບ ມາ​ນາ ຈາກ​ໄທ ຮຸ່ນ​ນ້ຳ­ໜັກ 67 ກິ​ໂລກ​ຣາມ.

    ສຳ­ລັບ​ຜົນ​ການ​ແຂ່ງ­ຂັນ ຄູ່​ລະ­ຫວ່າງ ທອງ​ບາງ ເຊື້ອ​ພົມ ພົບ​ກັບ ສຸ­ລະ​ໄຊ ນັກ​ຊົກ​ໄທ ໃນ 3 ຍົກ ທອງ​ບາງ ປ່ອຍ​ອາ­ວຸດ​ຕີ​ໃສ່ ສຸ­ລະ​ໄຊ ຢ່າງ​ຄົບ​ເຄື່ອງ ແລະ ເຂົ້າ​ເປົ້າ​ໄດ້​ຊັດ​ເຈນ ແລະ ຈະ­ແຈ້ງ ທັງ​ເຕະ ສອກ ຢັນ ໝັດ ແລະ ເຂົ່າ ຈົນ​ເຮັດ​ໃຫ້ ສຸ­ລະ​ໄຊ ລົ້ມ­ລຸກ­ຄຸກ­ຄານ​ໄປ ໂດຍ​ສະ­ເພາະ​ໃນ​ຍຸກ​ທີ 2 ທອງ​ບາງ ເຊື້ອ​ພົມ ເຈາະ​ຢາງ​ນັກ​ມວຍ​ໄທ​ຈົນ​ເສຍ​ຊົງ ລົ້ມ​ລົງ​ໄປ​ນອນ​ກອງ​ກັບ​ພື້ນ 4-5 ຄັ້ງ ແຕ່​ສຸດ​ທ້າຍ ຄະ­ນະ​ຮັບ­ຜິດ­ຊອບ ກໍ່​ຄື ກຳ­ມະ­ການ​ຕັດ­ສິນ ຂອງ​ສະ­ຫະ­ພັນ​ມວຍ​ໄທ​ໂລກ ຍົກ​ມື​ໃຫ້ ນັກ​ຊົກ​ໄທ ໄດ້​ຊະ­ນະ 29-28 ຄະ­ແນນ ໄປ​ແບບ​ຄ້ານ​ສາຍ­ຕາ​ຊາວ​ອາ​ຊຽນ ໂດຍ​ສະ­ເພາະ​ກອງ​ເຊຍ​ລາວ ແລະ ມາ​ເລ​ເຊຍ ສົ່ງ​ຜົນ​ໃຫ້​ນັກ​ຊົກ​ໄທ ໄດ້​ຜ່ານ​ເຂົ້າ​ຊີງ​ຫຼຽນ​ຄຳ ກັບ​ນັກ​ຊົກ​ເຈົ້າ ມາ​ເລ​ເຊຍ.

    ຕໍ່​ເຫດ­ການ​ດັ່ງ­ກ່າວ ເຮັດ​ໃຫ້ ທ່ານ ສາຍ​ສະ​ໜອນ ໄຊ​ຍະ​ສອນ ປະ­ທານ​ສະ­ຫະ­ພັນ​ມວຍ​ລາວ​ແຫ່ງ​ຊາດ ພ້ອມ​ດ້ວຍ​ຄູ​ເຝິກ ແລະ ນັກ­ກີ­ລາ​ທີມ​ຊາດ​ລາວ ບໍ່​ພໍ­ໃຈ​ຕໍ່​ຄຳ​ຕັດ­ສິນ​ຂອງ​ກຳ­ມະ­ການ ຈົນ​ເປັນ​ເຫດ​ໃຫ້​ເສຍ​ຄວາມ​ຮູ້­ສຶກ ແລະ ຫຼັ່ງ​ນ້ຳ​ຕາ​ດ້ວຍ​ຄວາມ­ເຈັບ​ປວດ ຍ້ອນ​ຄື​ແນວ​ນັ້ນ ຄູ່​ຕໍ່​ໄປ ເຊິ່ງ​ເປັນ​ອີກ​ນັກ­ຊົກ­ມວຍ​ລາວ ກໍ່​ຄື ລາດ​ຊະ​ສັກ ສຸ­ລິ­ຍະ​ວົງ ໝົດ​ກຳ­ລັງ​ໃຈ ກໍ່​ຂຶ້ນ​ຕີ​ພໍ​ໃຫ້​ແລ້ວ ແລະ ກໍ່​ເປັນ​ໄປ​ຕາມ​ຄາດ ນັກ​ຊົກ​ໄທ ຊະ­ນະ ຄະ­ແນນ 30-27 ຄະ­ແນນ.

ຂ່າວທີ່ກ່ຽວຂ້ອງ