ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ອູ​ສະ​ເບັກ​ກິດ​ສະ­ຖານ ​ໂຮນ​ລັງ ກຳ­ປູ­ເຈຍ

170 30 ສ.ຫ. 2017 ຫົວຂໍ້ຂ່າວອື່ນໆ

ມື້­ນີ້​ຂໍ​ສະ­ເໜີ​ເລື່ອງ​ລູກ​ສາວ​ອະ­ດີດ​ປະ­ທາ­ນາ­ທິ­ບໍ­ດີອູ​ສະ​ເບັກ​ກິດ​ສະ­ຖານ ຖືກ​ຕັດ­ສິນ​ລົງ­ໂທດ​ໃນຄະ­ດີ​ໂກງ​ກິນ​ເງິນ​ລັດ ຕໍ່ໃສ່​ເລື່ອງ​ການ​ອະ­ນຸ­ມັດ​ທຶນສ້າງ​ໂຮງ­ຮຽນ​ສອນ​ສາ­ສະ­ໜາໃນ​ປະ­ເທດ​ໂຮນ​ລັງ ແລະ ປິດ​ທ້າຍ​ກັບ​ເລື່ອງ​ທາງ​ການ​ກຳ­ປູ­ເຈຍ ສັ່ງປິດ​ສະ­ຖາ­ນີ​ວິ­ທະ­ຍຸ 15 ແຫ່ງ.

ທີ່ ອູ​ສະ​ເບັກ​ກິດ​ສະ­ຖານ: ໜັງ­ສື­ພິມ ເດິ ເນ​ເຊີນ (The Nation) ສະ­ບັບ​ວັນ​ທີ 29 ເດືອນ​ກໍລະ​ກົດ​ຜ່ານ​ມາ ໃຫ້​ຮູ້​ວ່າ ນາງ ກຸນ​ນາ​ຣາ ກາ​ຣິ​ໂມວາ (Gulnara Karimova) ລູກ​ສາວ​ກົກ​ຂອງ​ອະດີດ​ປະ­ທາ­ນາ­ທິ­ບໍ­ດີ​ອິດ​ສະ​ລາມ ກາ​ຣີ​ມົບ ປະ­ເທດອູສະ​ເບັກ​ກິດ​ສະ­ຖານ ໄດ້​ຖືກ​ເຈົ້າ​ໜ້າ­ທີ່​ຈັບ​ກຸມ ແລະ ຖືກ​ຕັດ­ສິນ​ຈຳ​ຄຸກ​ຄະ­ດີ​ສໍ້​ໂກງຄະ­ດີ​ຟອກ​ເງິນ ແລະ ຊຸກ­ເຊື່ອງ​ເງິນ­ຕາ​ຕ່າງ­ປະ­ເທດແຫຼ່ງ​ຂ່າວ​ຈາກຫ້ອງ­ການ​ໄອ​ຍະ​ການ​ສູງ​ສຸດ​ຂອງ​ອູ​ສະ​ເບັກ​ກິດ​ສະຖານ ໃຫ້​ຊາບ​ຕື່ມ​ວ່າ ນາງ ກາ​ຣີ​ໂມ​ວາ ເປັນ​ສະມາ​ຊິກ​ຂອງ​ກຸ່ມ​ອາ​ຊະ​ຍາ​ກຳ​ທີ່​ມີ​ການ­ຈັດ­ຕັ້ງ ຊຶ່ງມີ​ຊັບ​ສິນ​ໃນ​ການ​ຄອບ​ຄອງໃນ​ມູນ​ຄ່າ​ກວ່າ 1,3 ຕື້​ໂດ​ລາ​ສະ­ຫະ­ລັດ ນາງ ກາ​ຣີ​ໂມ​ວາ ເປັນ​ຍິງ​ສັງຄົມ​ສູງ ເປັນ​ນັກ​ຮ້ອງ ແລະ ນັກ​ອອກ​ແບບ ແຕ່ນັ້ນ​ເປັນ​ພຽງ​ອາ­ຊີບ​ບັງ​ໜ້າ​ຊື່ໆ ໃນເນື້ອ​ແທ້​ ຜູ້­ກ່ຽວອາ­ໄສ​ບາ​ລະ​ມີ​ຂອງ​ພໍ່​ທີ່​ເປັນ​ປະ­ທາ­ນາ­ທິ­ບໍ­ດີ (ແຕ່ເສຍ​ຊີ­ວິດ​ແລ້ວ ໃນ​ເດືອນ​ກັນ­ຍາ ປີ 2016 ຍ້ອນໂຣກຫົວ­ໃຈ​ວາຍ) ເຮັດ​ແນວ​ແຕກ​ປອກ​ນອກ​ກົດໝາຍ ແຕ່​ກໍ່​ໜີ​ບໍ່​ມົ້ມ​ເງື້ອມ­ມືກົດ­ໝາຍ.

ທີ່ ໂຮນ​ລັງ: (ຫຼື ເນ​ເທີ​ແລນ) ອົງ­ການສານ​ສູງ​ສຸດ​ຂອງ​ປະ­ເທດ​ໂຮນ​ລັງ ໄດ້​ອອກ​ຄຳ​ສັ່ງໃຫ້​ລັດ­ຖະ­ບານ​ຂອງ​ປະ­ເທດ​ນີ້​ອະ­ນຸ­ມັດ​ເງິນ​ທຶນ ສ້າງ​ໂຮງ­ຮຽນ​ສອນ​ສາ­ສະ­ໜາ​ອິດ​ສະ​ລາມ​ຫຼັງ​ໃໝ່​ຂຶ້ນ ໃນ​ນະ­ຄອນ­ຫຼວງ​ອາມ​ສະ​ເຕີ​ດຳ ໃນ​ປີ 2014 ແຜນອະ­ນຸ­ມັດ​ທຶນ​ສ້າງ​ໂຮງ­ຮຽນ​ດັ່ງ­ກ່າວ​ຖືກ​ລັດ​ຖະບານ​ປະ­ຕິ­ເສດ​ດ້ວຍ​ເຫດ­ຜົນ​ຂອງ​ທ່ານ ແຊນ​ເດີ ເດັກ​ເກີ ຮອງ​ລັດ­ຖະ­ມົນ­ຕີກະ­ຊວງ​ສຶກ​ສາ ​ໃນ​ເວ­ລານັ້ນ​ທີ່​ວ່າ ໂຮງ­ຮຽນ​ສອນ​ສາ­ສະ­ໜາ​ອິດ​ສະ​ລາມ ​ມີສ່ວນ​ໃຫ້­ການ​ສະ­ໜັບ­ສະ­ໜູນ​ກຸ່ມ​ຫົວ​ຮຸນ​ແຮງຂອງລັດ​ອິດ​ສະ​ລາມ (IS) ແຕ່​ຕົກ​ມາ​ໃນ​ທ້າຍ​ເດືອນ​ກໍລະ​ກົດ​ປີ​ນີ້ ທາງ​ສະ­ພາ​ແຫ່ງ​ລັດ​ປະ­ເທດ​ໂຮນ​ລັງ ໄດ້​ມີ​ຄຳ​ເຫັນ​ວ່າ “ການ​ປະ­ຕິ­ເສດ​ການ​ອະ­ນຸ­ມັດ​ເງິນສ້າງ​ໂຮງ­ຮຽນ​ສອນ​ສາ­ສະ­ໜາ​ອິດ​ສະ​ລາມ​ຫຼັງ​ໃໝ່ນັ້ນ ​ຂາດ​ເຫດ­ຜົນ​ຕົວ​ຈິງ” ເພາະ​ມີ​ຂໍ້ມູນ​ຢືນ­ຢັນ​ຢ່າງຈະ​ແຈ້ງ­ວ່າ ທາງ​ໂຮງ­ຮຽນ​ບໍ່​ໄດ້​ມີ​ສ່ວນ​ພົວ­ພັນ​ສະໜັບ​ສະ​ໜູນ​ລັດ​ອິດ​ສະ​ລາມ ຫຼື ການ​ກະ­ທຳ​ທີ່​ມີ​ລັກສະນະ​ໃຊ້​ຄວາມ​ຮຸນ​ແຮງ​ໃດໆທັງ​ຊິ້ນ ເປັນ­ຄວາມຈິງ​ທີ່​ວ່າ ເມື່ອ​ກ່ອນ​ມີ​ຄະ­ນະ​ອຳ­ນວຍ​ການ​ຄົນ​ໜຶ່ງຂອງ​ໂຮງ­ຮຽນ ​ໄດ້ສະ­ແດງ​ທັດ­ສະ­ນະ​ສະ­ໜັບ​ສະໜູນ​ລັດ​ອິດ​ສະ​ລາມ ແຕ່​ຜູ້­ກ່ຽວ​ຖືກ​ໄລ່​ອອກ​ຈາກຄະ­ນະ​ນຳ​ຂອງ​ໂຮງ­ຮຽນ​ແລ້ວ ທ່ານ ແຊນ​ເດີ​ ເດັກເກີ ຖືກ​ສານ​ສັ່ງ​ໃຫ້​ລຶ­ບລ້າງ​ຂໍ້​ກ່າວ​ຫາ​ຂອງ​ທ່ານເມື່ອ​ກ່ອນ ແລະ ໃຫ້​ອະ­ນຸ­ມັດ​ເງິນ​ສ້າງ​ໂຮງ­ຮຽນສອນ​ສາ­ສະ­ໜາອິດ​ສະ​ລາມ ​ພາຍ​ໃນ​ວັນ​ທີ 1 ເດືອນສິງ­ຫາ​ປີ​ນີ້ ເພື່ອ​ໃຫ້​ທັນ​ກັບ​ສົກ­ຮຽນ​ໃນ​ປີ​ຕໍ່​ໄປ.

ທີ່ ກຳ­ປູ­ເຈຍ: ຂ່າວ​ຕ່າງ­ປະ­ເທດ ໃນ​ວັນ​ທີ 28 ເດືອນ​ສິງ­ຫາ​ປີ​ນີ້ ​ໃຫ້​ຮູ້​ວ່າ: ພາຍ­ຫຼັງ​ທາງ​ການ​ກຳ​ປູເຈຍ ໄດ້​ສັ່ງ​ປິດ​ສະ­ຖາ­ນີວິ­ທະ­ຍຸ​ກະ­ຈາຍ­ສຽງ 15 ແຫ່ງ​ໃນ​ທົ່ວ​ປະ­ເທດ ກະ­ຊວງ​ຖະ­ແຫຼງ​ຂ່າວ​ກຳ​ປູເຈຍ ໄດ້​ອອກ​ມາ​ປະ­ຕິ­ເສດ​ວ່າ ການ​ສັ່ງ​ປິດ​ສະ­ຖາ­ນີວິ­ທະ­ຍຸ​ດັ່ງ­ກ່າວ​ບໍ່​ໄດ້​ມີ​ເປົ້າ​ໝາຍ​ກົດ​ດັນ​ກັ່ນ​ແກ້ງສະ­ຖາ­ນີ​ວິ­ທະ­ຍຸ​ອິດ­ສະ­ຫຼະ​ແຕ່​ປະ­ການ​ໃດ ແລະ ບັນຫາ​ກັບ​ໜັງ­ສື­ພິມ​ ແຄມ​ໂບ​ເດຍ ເດລີ (Cambodia Daly) ກໍ່​ບໍ່​ມີ​ສ່ວນ​ພົວ­ພັນ​ກັບ​ການ​ທີ່​ໜັງ­ສື­ພິມ​ດັ່ງກ່າວ​ບໍ່​ເສຍ​ພາ­ສີ ກ່ອນ​ໜ້າ​ນັ້ນໄດ້​ມີ​ຫາງ​ສຽງ​ວ່າ ການ​ສັ່ງ​ປິດ​ສະ­ຖາ­ນີ​ວິ­ທະ­ຍຸ 15 ແຫ່ງ ແມ່ນ​ເພື່ອ​ກົດດັນ​ສື່​ທີ່​ເປັນ​ອິດ­ສະ­ຫຼະ ສ່ວນ​ກະ­ຊວງ​ການ​ຕ່າງ​ປະເທດ ສ ອາ​ເມ​ຣິ​ກາ ນັ້ນ ເຄີຍ​ອອກ­ສຽງ​ຕຳ​ນິ​ທາງການ​ກຳ­ປູ­ເຈຍ ວ່າເກັບ​ພາ­ສີ​ສື່​ແພງ​ເກີນ​ໄປ ແລະ ມີ​ອະ­ຄະ­ຕິ.

ຂ່າວທີ່ກ່ຽວຂ້ອງ