ການ​ພະ­ນັນ​ຂັນ​ຕໍ່ - ໂດຍ : ດັ້ນ​ກີບ​ເມກ

220 30 ສ.ຫ. 2017 ນານາສາລະ

ອາ­ທິດ​ຜ່ານມາ​ນີ້ ມີ​ຂ່າວ​ດັງ​ທີ່​ສັງ­ຄົມ​ມີຫາງ​ສຽງ​ທ່າອຽງ​ເຫັນ​ດີ​ເປັນ​ສ່ວນ​ໃຫຍ່ ເລື່ອງ​ແຈ້ງ​ການ​ເລກ​ທີ 1244/ຫສນຍ ລົງວັນ​ທີ 17/8/2017 ກ່ຽວ​ກັບ​ການ­ເຄື່ອນ­ໄຫວ​ຂອງ​ບໍ­ລິ­ສັດ​ລັດ​ວິ​ສາ​ຫະ​ກິດ​ຫວຍ​ພັດທະ​ນາ​ລາວ ແຕ່​ສຳ­ລັບ​ຜູ້​ເຮັດ​ທຸ­ລະ​ກິດດ້ານ​ນີ້​ອາດມີ​ການ​ບໍ່​ພໍ­ໃຈ​ບາງ​ປະ­ການ ແຕ່​ກໍ່​ເປັນ​ສິ່ງ​ທີ່​ສັງ­ຄົມສ່ວນ​ໃຫຍ່​ເຫັນ​ດີ​ນຳ​ໃນ​ການ​ຫຼຸດ­ຜ່ອນ​ການ​ອອກຫວຍ​ຈາກ 2 ຄັ້ງ​ຕໍ່​ໜຶ່ງ​ອາ­ທິດ ມາ​ເປັນ​ອາ­ທິດ​ລະ 1 ຄັ້ງ ຄວາມ​ຈິງ​ເລື່ອງ​ຫວຍ​ຊີງ​ລາ­ງວັນ​ນີ້​ກໍ່​ມີ​ເກືອບທຸກ​ປະ­ເທດ​ໃນ​ໂລກ ຕ່າງແຕ່​ວ່າ​ຝ່າຍ​ກ່ຽວ­ຂ້ອງ​ຈະເລືອກ​ວິ­ທີ​ໃດ​ໃນ​ການ​ຈັດ­ການ​ໃຫ້​ເໝາະ​ສົມ​ກັບ​ສະພາບ​ຂອງ​ສັງ­ຄົມ ເຊິ່ງ​ຖ້າ​ອອກ​ຖີ່ໆໜ່ຳໆເກີນ​ໄປ​ ກໍ່ອາດ​ເປັນ​ສາ­ເຫດ​ໜຶ່ງ​ທີ່ດຶງ​ຄົນ​ຕິດ​ການ​ພະ­ນັນ​ຫວຍຢ່າງ​ງອມ​ແງມ.

ອີງ​ຕາມ​ແຈ້ງ​ການ​ດັ່ງ­ກ່າວອອກ​ໂດຍ​ຫ້ອງ​ວ່າການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ມີ​ດັ່ງ­ນີ້: (1) ເຫັນ​ດີ​ໃຫ້​ຫຼຸດ­ຜ່ອນ​ການອອກ​ລາ­ງວັນ​ຫວຍ​ຂອງລັດ​ວິ​ສາ​ຫະ​ກິດຫວຍ​ພັດ­ທະ­ນາ ຈາກ 2 ຄັ້ງ​ຕໍ່​ໜຶ່ງອາ­ທິດ ມາ​ເປັນ​ອາ­ທິດ​ລະ 1 ຄັ້ງ ແລະ ຮັບ­ປະ­ກັນຄວາມ​ໂປ່ງ​ໃສ​ໃນ​ການ​ອອກ​ລາ­ງວັນ​ແຕ່​ລະ​ຄັ້ງ... (2) ໃຫ້​ຢຸດ​ເຊົາ​ການ­ເຄື່ອນ­ໄຫວ​ຫວຍ​ທວາຍ​ຜົນເຕະ­ບານ ແລະ ດຳ­ເນີນ​ທຸ­ລະ​ກິດ​ຫວຍ SMS ສຳ­ລັບ​ຜະ­ລິດ​ຕະ​ພັນ​ຫວຍ​ທີ່​ໄດ້​ຮັບ​ອະ­ນຸ­ຍາດ​ແລ້ວ ແຕ່​ບໍ່​ທັນ​ໄດ້​ເຄື່ອນ​ໄຫວ​ຄື​ຫວຍ​ປິງ​ໂກ້ ຫວຍ​ໂລ​ໂຕ ແມ່ນ​ໃຫ້​ຍົກ­ເລີກ​ໃບ​ອະ­ນຸ­ຍາດ (3) ສຳ­ລັບ​ຫວຍຂູດ​ແມ່ນ​ໃຫ້​ສືບ­ຕໍ່​ຈຳ­ໜ່າຍ​ຈຳ­ນວນ​ທີ່​ໄດ້​ພິມ​ຕົວຈິງ​ແລ້ວ ແຕ່​ໃຫ້​ຈຳ­ກັດ​ສະ­ຖານ­ທີ່ ແລະ ປະ­ລິມານ​ໃນ​ການ­ຈຳ­ໜ່າຍ​ຫວຍ​ຂູດ​ດັ່ງ­ກ່າວ​ລົງ​ໃຫ້ເໝາະ​ສົມ ເມື່ອ​ຂາຍ​ຈຳ­ນວນ​ເກົ່າ​ໝົດແລ້ວ​ ໃຫ້​ສະຫຼຸບ​ລາຍ​ງານ​ໃຫ້​ລັດ­ຖະ­ບານ ເພື່ອ​ຂໍ​ທິດ​ຊີ້​ນຳ​ໃນ​ຕໍ່ໜ້າ.

ເຫັນ​ວ່າ​ແຈ້ງ​ການ 3 ຂໍ້​ຂ້າງ​ເທິງ​ນີ້​ ຄົງ​ເປັນ​ການຫຼຸດ­ຜ່ອນ​ໃຫ້​ສັງ­ຄົມ​ບໍ່​ໃຊ້​ຈ່າຍ​ເງິນ​ລົງ​ໃສ່​ການ​ພະນັນ​ຫວຍ​ຫຼາຍ​ເກີນ​ໄປ ແລະ ເຫັນ​ວ່າ​ນະ­ໂຍ­ບາຍດັ່ງ­ກ່າວ​ຈະ​ສົ່ງ​ຜົນ​ດີ​ໄລ­ຍະ​ຍາວ​ຫຼາຍ​ປະ­ການ ເຊິ່ງຖ້າ​ທຽບ­ໃສ່​ບັນ­ດາ​ປະ­ເທດ​ໃນ​ໂລກ​ທີ່​ດຳ­ເນີນ​ທຸ­ລະກິດ​ຫວຍ ເພາະ​ຖ້າ​ເລືອກ​ວິ­ທີ​ເໝາະ​ສົມ ມັນ​ຈະສົ່ງ​ຜົນ​ດີ​ແກ່​ທັງ​ສອງ​ຝ່າຍ ທັງ​ຜູ້​ຊື້ ແລະ ຜູ້​ຂາຍ ຂໍເວົ້າ​ເຖິງ​ບາງຄົນ​ທີ່​ມີ​ນິ­ໄສ​ໜັກ​ໄປ​ທາງ​ການ​ພະ­ນັນ ກໍ່​ຈະ​ເຫັນ​ວ່າ​ແຈ້ງ​ການ​ດັ່ງ­ກ່າວ​ຈະ​ຊ່ວຍ​ໃຫ້​ເກີດ​ມີສະ­ຕິ​ຄິດ​ໄດ້ ແລະ ຮູ້­ຈັກ​ແບ່ງ​ໃຊ້ຈ່າຍ​ຊັບ​ສິນ​ໄປ​ໃນທາງ​ທີ່​ເກີດ​ປະ­ໂຫຍດ​ແກ່​ຄອບ­ຄົວ​ຫຼາຍ​ຂຶ້ນ ຄື​ດັ່ງ​ທີ່ຮູ້​ແກ່​ໃຈ​ກັນ​ຢູ່​ແລ້ວ ທຳ​ມະ​ຊາດ​ຂອງ​ທຸ­ລະ​ກິດ ຄືຜົນ​ກຳ­ໄລ​ເປັນ​ເປົ້າ​ໝາຍ ສຳ­ລັບ​ຜູ້​ມີ​ສະ­ຕິ​ມີ​ປັນ­ຍາແຍກ​ແຍະ​ເຫດ­ຜົນ ​ຄິດ​ວ່າ​ຄື​ຊິ​ບໍ່​ມີ​ບັນ­ຫາ​ໃນ​ເລື່ອງການ​ພະ­ນັນ​ຂັນ​ຕໍ່.

ເມື່ອ​ອີງ­ໃສ່​ກະ­ແສ​ສຽງ​ທ່າ​ອຽງ​ຂອງ​ສັງ­ຄົມ ຈຶ່ງຖື​ໄດ້​ວ່າ ​ແຈ້ງ​ການ​ດັ່ງ­ກ່າວ​ເປັນ​ນະ­ໂຍ­ບາຍ​ສ້າງ­ສັນສັງ­ຄົມ​ໃຫ້​ຢູ່​ໃນ​ຄວາມ​ເໝາະ​ສົມ​ໃນ​ເລື່ອງ​ການ​ຊື້ຫວຍ ຫຼິ້ນ​ຫວຍ ເພາະ​ຜ່ານ​ມາ​ພວກ​ເຮົາ​ກະ​ຊິ​ຮູ້ນຳ​ກັນ​ວ່າ ຜູ້​ຫວັງ​ຢາກ​ຖືກ​ຫວຍ​ກໍ່​ລົງ­ທຶນ​ຫາຂອງດີ​ໄປ​ລົງ​ເລກ ປ່າ­ຕຶບ​ດົງ​ໜາ ຜີ​ສາງ​ນາງ​ໄມ້​ກະ​ບໍ່ຍ້ານ ຫຼື ຍ້ານ​ແຕ່​ກະ­ຍອມ​ລົງ­ທຶນ​ສ່ຽງ ເພື່ອ​ໃຫ້​ໄດ້ເລກ​ເດັດ ທີ່​ເວົ້າມາ​ກະ​ຍັງ​ບໍ່​ແນ່​ໃຈ​ວ່າ ມີ​ໃຜ​ລວຍດ້ວຍ​ການ​ພະ­ນັນ ຫຼື ບໍ່?.

ຂໍ​ຊົມ­ເຊີຍ​ແຈ້ງ​ການ​ດັ່ງ­ກ່າວ​ຢ່າງ​ສຸດ​ອົກ​ສຸດ​ໃຈ!...

ຂ່າວທີ່ກ່ຽວຂ້ອງ