ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສ ເກົາ­ຫຼີ ​ຍີ່­ປຸ່ນ

314 29 ສ.ຫ. 2017 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້​ມີ​ສອງ​ເລື່ອງ​ທີ່​ໜ້າ​ສົນ­ໃຈ​ຄື: ໜຶ່ງແມ່ນ​ນະ­ໂຍ­ບາຍ​ສົ່ງ­ເສີມ​ຜູ້​ປະ­ກອບ​ການ​ມືໃໝ່ຢູ່ ສ ເກົາ­ຫຼີ ແລະ ເລື່ອງທາງ​ການ​ຍີ່­ປຸ່ນ ປັບປຸງ​ແກ້​ໄຂ​ບັນ­ຫາ​ເດັກ​ທີ່​ຖືກ​ລະ­ເມີດ​ສິດ.

ທີ່ ສ ເກົາ­ຫຼີ: ໃນ​ຕົ້ນ​ເດືອນ​ສິງ­ຫາ​ປີ​ນີ້ມີ​ຂ່າວກ່ຽວ​ກັບ​ນະ­ໂຍ­ບາຍ​ດີໆ​ສຳ­ລັບ​ຜູ້​ລິ​ເລີ່ມ​ເຮັດ​ທຸ­ລະກິດ​ໃໝ່ ຫຼື ຜູ້​ປະ­ກອບ​ການມື​ໃໝ່ ຂ່າວ​ໃຫ້​ລາຍ​ລະອຽດ​ຕື່ມ​ວ່າ ລັດ­ຖະ­ບານ ສ ເກົາ­ຫຼີ ຈະ​ອອກ​ເງິນ​ກູ້ພິ­ເສດ​ຈຳ­ນວນ 100 ຕື້​ວອນ (ເທົ່າ​ກັບ 87,6 ລ້ານໂດ​ລາ​ສະ­ຫະ­ລັດ) ເພື່ອ​ສົ່ງ­ເສີມ​ຄວາມ​ອາດ​ສາມາດ​ຂອງ​ຜູ້​ປະ­ກອບ​ການ​ໜຸ່ມ ໃນ​ການ​ສ້າງ­ຕັ້ງ​ບໍລິ​ສັດ ແລະ ວ່າ​ຈ້າງແຮງ​ງານ ໃນ​ເດືອນ​ກໍ­ລະ­ກົດຜ່ານ​ມາ ກະ­ຊວງ​ທຸ­ລະ​ກິດ​ຂະ­ໜາດ​ນ້ອຍ-ຂະ­ໜາດກາງ (SME) ແລະ ຜູ້​ປະ­ກອບ​ການ​ໃໝ່ ໄດ້​ສະ­ເໜີແຜນ​ເງິນ​ກູ້​ພິ­ເສດ​ຜ່ານ​ລັດ​ຖະ​ສະ­ພາ ຈຸດ­ປະ­ສົງ​ຕົ້ນຕໍ​ຂອງ​ນະ­ໂຍ­ບາຍ​ດີໆ​ດັ່ງ­ກ່າວ ແມ່ນ​ເພື່ອ​ສ້າງ​ວຽກເຮັດງານ​ທຳ​ຜ່ານ​ລະ­ບົບ​ທຸ­ລະ​ກິດ​ທີ່​ມີ​ການ​ແຂ່ງ­ຂັນສູງ ທາງ​ກະ­ຊວງ SME ສ ເກົາ­ຫຼີ ໄດ້​ເປີດ­ເຜີຍ​ວ່າ ຜູ້​ປະ­ກອບ​ການ​ໜຸ່ມ​ທີ່ມີ​ອາ­ຍຸ 39 ປີ ແລະ ຕ່ຳ​ກວ່ານັ້ນ ທີ່​ໄດ້​ວ່າ​ຈ້າງ​ແຮງ​ງານ​ພາຍ​ໃນ​ຂອບ 6 ເດືອນຜ່ານ​ມາ ມີ​ສິດ​ທີ່​ຈະ​ໄດ້​ຮັບ​ທຶນ​ກູ້​ພິ­ເສດ​ນີ້ ສ່ວນ​ຜູ້​ປະກອບ​ການ​ທີ່​ໄດ້​ດຳ­ເນີນ​ທຸ­ລະ​ກິດ​ຂອງ​ຕົນ​ມາ​ແລ້ວ ໃນ​ຂອບ 5 ປີ ກໍ່​ມີ​ສິດ​ເຂົ້າ​ຮ່ວມ​ແຜນ​ງານ​ເງິນ​ກູ້​ພິເສດ​ນີ້​ໄດ້ຄື​ກັນ ດອກ​ເບ້ຍ​ສຳ­ລັບ​ທຶນ​ກູ້​ຢືມ​ພິ­ເສດ​ນີ້ ເກັບ​ຕ່ຳ​ກວ່າ​ລະ­ດັບ​ລາ­ຄາ​ຕະ­ຫຼາດ​ທົ່ວ​ໄປ ຜົນ​ປະໂຫຍດ​ຕ່າງໆ​ທີ່​ຈະ​ໄດ້​ຮັບຈາກ​ນະ­ໂຍ­ບາຍ​ເງິນ​ກູ້​ນີ້ ຈະ​ຊ່ວຍ​ຫຼຸດ­ຜ່ອນ​ພາ­ລະ​ແບກ​ຫາບ​ທາງ​ການ​ເງິນຂອງ​ບັນ­ດາ​ຜູ້​ປະ­ກອບ​ການ​ໃໝ່ ຊຶ່ງ​ເປັນ​ການເອື້ອອຳ­ນວຍ​ໃຫ້​ພວກ​ເຂົາ­ເຈົ້າ​ມີ​ພື້ນ­ຖານ ເພື່ອ​ການເຕີບ​ໂຕ​ທີ່​ໝັ້ນ­ຄົງ​ຕໍ່​ໄປ.

ທີ່ ຍີ່­ປຸ່ນ: ໃນ​ປັດ­ຈຸ­ບັນ ທາງ​ການ​ຍີ່­ປຸ່ນ ມີ​ແຜນເພີ່ມ​ຈຳ­ນວນ​ພະ­ນັກ­ງານ​ຮັບ­ຜິດ­ຊອບ​ດ້ານ​ສະ​ຫວັດດີ​ການ​ຂອງ​ເດັກ­ນ້ອຍທີ່​ຖືກ​ລະ­ເມີດ​ສິດ ເພື່ອ​ຮອງຮັບ​ກັບ​ບັນ­ຫາ ແລະ ໜ້າ​ວຽກ​ທີ່​ເພີ່ມ​ຂຶ້ນ ໃນ​ປີ 2016 ຄະ­ດີ​ລະ­ເມີດ​ສິດ​ເດັກ​ໃນ​ທົ່ວ​ປະ­ເທດຍີ່­ປຸ່ນ ທີ່​ໄດ້​ຮັບ​ການ​ແກ້​ໄຂ​ໂດຍ​ສູນ​ໃຫ້​ຄຳ​ປຶກ­ສາ​ແກ່ເດັກ​ນັ້ນ​ມີ​ສູງ​ເຖິງ 122.578 ເລື່ອງ (Vientiane Times) ອັນ​ໄດ້ສ້າງ​ສະ­ພາບ​ກົດ​ດັນ​ແກ່​ພະ­ນັກງານ​ຮັບ­ຜິດ­ຊອບ​ສະ­ຫວັດ­ດີ​ການ​ຂອງ​ເດັກ​ທີ່​ມີ​ຈຳນວນ​ຈຳ­ກັດ ຂ່າວ​ບອກ​ວ່າ ໃນ 15 ປີ­ຜ່ານ­ມາ ຈຳນວນ​ສູນ​ໃຫ້​ຄຳ​ປຶກ­ສາ​ໄດ້​ເພີ່ມ​ຂຶ້ນ 5 ເທົ່າ ສ່ວນ​ຈຳນວນ​ພະ­ນັກ­ງານ​ຂອງ​ສູນ​ນັ້ນ​ຜັດ​ເພີ່ມ​ຂຶ້ນ​ພຽງ 2 ເທົ່າ ເບື້ອງ​ຫຼັງ​ການ​ເພີ່ມ​ຂຶ້ນ​ຂອງ​ຈຳ­ນວນ​ບັນ­ຫາການ​ລະ­ເມີດ​ສິດ­ທິ​ຂອງ​ເດັກ ​ທີ່​ຜ່ານ​ບັນ­ດາ​ສູນ​ນັ້ນແມ່ນ​ຍ້ອນ​ວ່າ ສັງ­ຄົມ​ຍີ່­ປຸ່ນ ໃນ​ປັດ­ຈຸ­ບັນ ​ມີ​ຄວາມສະ­ດຸ້ງ​ໄວ​ຕໍ່​ບັນ­ຫາ​ສິດ­ທິ​ຂອງ​ເດັກ ແລະ ຈຳ­ນວນ​ຜູ້ທີ່​ກາງ​ຕໍ່​ການ​ຊ່ວຍ­ເຫຼືອ​ຂອງ​ສູນ​ກໍ່​ໄດ້​ເພີ່ມຂຶ້ນເລື້ອຍໆ ໃນ​ເດືອນ​ເມ­ສາ ປີ 2016 ກະ­ຊວງ​ສາ​ທາທາ​ລະ­ນະ​ສຸກຍີ່­ປຸ່ນ ໄດ້​ກຳ­ນົດ​ແຜນ​ເພີ່ມ​ພະ­ນັກງານ​ຂອງ​ສູນ​ຂຶ້ນຕື່ມ​ອີກ​ໃນ ຈຳ­ນວນ 550 ຄົນ ພາຍ​ໃນ 4 ປີ​ຂ້າງ​ໜ້າ ບວກ​ກັບ​ຈຳ­ນວນ​ທີ່​ມີ​ຢູ່ແລ້ວ 3.000 ຄົນ ຄະ­ດີ​ການ​ລະ­ເມີດ​ສິດ­ທິຂອງເດັກ​ໃນ​ຍີ່­ປຸ່ນ​ ນັ້ນລວມ​ມີ ທາງ​ດ້ານ​ຈິດ­ໃຈ ທາງດ້ານ​ຮ່າງ­ກາຍ ແລະ ການ​ລະ­ເມີດ​ທາງ​ເພດ ໃນເດືອນ​ພຶດ­ສະ­ພາ ປີ 2016 ລັດ​ຖະ​ສະ­ພາ​ຍີ່­ປຸ່ນ ໄດ້​ຮັບ­ຮອງ​ເອົາ​ກົດ­ໝາຍ​ວ່າ​ດ້ວຍ​ສະ­ຫວັດ­ດີ​ການ ແລະ ການ​ປ້ອງ​ກັນ​ການ​ລະ­ເມີດ​ສິດ­ທິຂອງ​ເດັກ ກົດໝາຍ​ໄດ້​ຊຸກ­ຍູ້​ສົ່ງ­ເສີມ​ບົດ­ບາດ​ຂອງ​ບັນ­ດາ​ສູນ​ໃຫ້​ຄຳ​ປຶກ­ສາ​ໃນ​ການ​ແກ້​ໄຂ​ບັນ­ຫາ ແຕ່​ຍັງ​ມີ​ຫຼາຍຫາງ​ສຽງເປັນ​ຫວ່ງ​ກ່ຽວ​ກັບ​ພາ­ລະ​ແບກ​ຫາບ​ອັນໜັກ­ໜ່ວງ​ຂອງ​ພະ­ນັກ­ງານ​ຮັບ­ຜິດ­ຊອບ​ທີ່​ມີ​ຈຳນວນ​ຈຳ­ກັດ.

ຂ່າວທີ່ກ່ຽວຂ້ອງ