ຂ່າວຫຼ້າສຸດ

ບົດ­ຮຽນ​ການ​ຄຸ້ມ​ຄອງ​ເສດ­ຖະ­ກິດ - ໂດຍ : ຊຽງ​ເອງ

373 28 ສ.ຫ. 2017 ນານາສາລະ

ການ​ຄຸ້ມຄອງ​ລັດ-ຄຸ້ມຄອງ​ເສດ​ຖະກິດ​-ສັງ­ຄົມ ເປັນ​ວຽກ​ງານ​ໜຶ່ງ​ທີ່​ສຳ­ຄັນ​ທີ່​ສະ­ແດງ​ອອກ​ໃຫ້​ເຫັນເຖິງ​ຄວາມ​ປີ​ຊາ​ສາ­ມາດ​ຂອງ​ບຸ​ຄະ­ລາ​ກອນ ນັບແຕ່​ຫົວ​ແຖວ​ຈົນ​ເຖິງ​ຫາງ​ແຖວ ວ່າ​ຈະ​ມີ​ຄວາມ​ຮູ້ຄວາມ​ສາ­ມາດ ຄຸນ​ທາດ​ການ­ເມືອງ ຄວາມຊື່­ສັດບໍ­ລິ­ສຸດ ໂປ່ງ​ໃສ​ຂາວ​ສະ­ອາດ ໂດຍ​ສະ­ເພາະຂົງເຂດ​ເສດ­ຖະ­ກິດ ຈ້ອນ​ເຂົ້າ​ກວ່າ​ນັ້ນກໍ່​ຄື ລັດ​ວິ​ສາຫະ​ກິດ​ທີ່​ເປັນສາຍ­ເລືອດ​ເສັ້ນ​ສຳ­ຄັນ ​ທີ່​ຈະ​ຫາ​ລາຍ​ໄດ້​ເຂົ້າ​ງົບ­ປະ­ມານ​ຮ່ວມ​ກັບ​ຂະ­ແໜງ­ການ​ອື່ນໆ​ ມາ​ສ້າງ­ສາ​ພັດ­ທະ­ນາ​ປະ­ເທດຊາດ​ໃຫ້​ຈະ­ເລີນ​ຮຸ່ງເຮືອງ​ຕໍ່​ໄປ.

ໄລ­ຍະ​ຜ່ານ​ມາກໍ່​ມີ​ຫຼາຍ​ຫົວ­ໜ່ວຍ​ເສດ­ຖະ­ກິດ ກໍ່​ຄືໜ່ວຍ​ຫາ​ລາຍ​ຮັບ​ຂອງ​ລັດ​ເຮັດ​ໄດ້​ດີ ແລະ ເປັນ​ແບບ­ຢ່າງ​ໃນ​ການ­ຈັດ­ຕັ້ງ​ປະ­ຕິ­ບັດ ສາ­ມາດເປັນ​ຫຼັກ​ແຫຼ່ງ​ແກ່ນ­ສານ​ໃຫ້​ແກ່​ການ​ສ້າງ​ລາຍຮັບ​ເຂົ້າ​ລັດ ເພື່ອ​ນຳ​ໃຊ້​ເຂົ້າ​ໃນ​ເປົ້າ​ໝາຍ​ສຳ­ຄັນຂອງປະ­ເທດ​ຊາດ ແຕ່​ກໍ່​ມີ​ຈຳ­ນວນ​ບໍ່​ໜ້ອຍ ນອກຈາກ​ຫາ​ລາຍ​ໄດ້ ຫຼື ດຳ­ເນີນ​ທຸ­ລະ​ກິດ​ບໍ່​ໄດ້​ຕາມເປົ້າ​ໝາຍ​ແລ້ວ​ ຍັງ​ສ້າງ​ໜີ້ສິນ​ຄຸມ​ເຄືອ​ມະ­ຫາສານ​ໃຫ້​ແກ່​ລັດ ໃຫ້​ລັດ​ເປັນ​ຜູ້​ໃຊ້​ແທນ ແລະ ຖົມຂຸມ​ໃຫ້ ເຊິ່ງ​ປັດ­ຈຸ­ບັນ​ຫາງ​ສຽງ​ສັງ­ຄົມ​ໄດ້​ກ່າວ​ຢ່າງໜາ​ຫູ​ວ່າ “ລັດ​ຕິດ​ໜີ້ ແຕ່​ຄົນ​ທີ່­ຢູ່​ໃນ​ບ່ອນ​ດັ່ງ­ກ່າວລ້ຳ​ລວຍ​ຮັ່ງ­ມີ​ຜິດ​ປົກ­ກະ­ຕິ.”

ໃນ​ນີ້​ບໍ່​ຂໍ​ຍົກ​ຕົວ­ຢ່າງ ຫຼື ຕີ​ຫົວ​ປາ​ໃຫ້​ສະ­ເນືອນຫົວ​ນາກ​ແຕ່​ປະ­ການ​ໃດ ພຽງ​ແຕ່​ເພື່ອ​ສ້າງ​ສະ­ຕິເລັ່ງ​ບາດ­ກ້າວ​ແກ້​ໄຂ​ໃຫ້ໄປ​ຕາມ​ທິດ​ທາງ​ແຫ່ງການ​ປົວ­ແປງ ຖ້າ​ບໍ່​ດັ່ງ­ນັ້ນ ການ​ປົວ­ແປງ​ກໍ່​ຂາດຄວາມ​ໝາຍ ຂໍ​ໃຫ້​ດົມ​ກິ່ນ​ເອົາ​ກໍ່​ພໍ​ເຂົ້າ­ໃຈ ເພາະແນວ­ໃດ​ສື່​ສັງ­ຄົມ​ອອນ​ໄລ ຫຼື ສັງ­ຄົມ​ສະ­ພາ​ກາ­ເຟ-ໂອ​ວັນ​ຕິນ​ປາກ​ຮ່ອມ ເຂົາ​ກໍ່​ວິ­ພາກ​ວິ­ຈານ​ເຖິງການ​ບໍ­ລິ­ຫານ​ທຸ­ລະ​ກິດທີ່​ອ່ອນ­ແອ ບໍ່​ມີ​ປະ​ສິດ­ທິພາບ​ຢູ່​ແລ້ວ ກໍ່​ຄການ​ປະ­ປ່ອຍ​ໃຫ້​ຂົງ­ເຂດ​ດັ່ງກ່າວ​ກາຍ­ເປັນ​ເຄື່ອງ­ມື​ທຳ​ມາ​ຫາ​ກິນ ສ້າງ​ຄວາມລ້ຳ​ລວຍ​ຮັ່ງ­ມີ​ແກ່​ບຸກ­ຄົນ​ທີ່​ຂາດ​ຄຸນ​ທາດ​ທາງການ­ເມືອງ​ຈຳ­ນວນ​ໜຶ່ງ ຄື​ສ້າງ​ຄວາມ​ບໍ່​ຊື່­ສັດ​ບໍ​ລິສຸດ​ຝັງ​ຮາກ​ໄວ້​ທີ່​ນັ້ນ ສືບ­ຕໍ່ກັນ​ໄປ​ເປັນ​ໄລ­ຍະ...ຖ້າບໍ່​ມີ​ການ​ແກ້​ໄຂ​ອາດ​ເຖິງ​ທົດ​ສະ​ວັດ ຫຼື ສະ­ຕະ­ວັດ ກໍ່​ໄດ້.

ໃນ​ລັດ​ຖະ​ທຳ​ມະ­ນູນ ແຫ່ງ ສປປ ລາວ ສະ­ບັບປັດ­ຈຸ­ບັນ ກຳ­ນົດ​ໄວ້​ເຖິງ​ການ​ຄຸ້ມ​ຄອງ​ລັດ-ຄຸ້ມ​ຄອງເສດ­ຖະ­ກິດ-​ສັງ­ຄົມ​ດ້ວຍ​ກົດ­ໝາຍ ແລະ ມີ​ກົດ­ໝາຍຮ້ອຍ​ປາຍ​ກວ່າ​ສະ­ບັບ​ໃນ​ການ​ປົກ​ປ້ອງ​ວຽກ​ງານໃນ​ຂະ­ແໜງ­ການ ຫຼື ຂົງ­ເຂດ​ຕ່າງໆ ແລະ ປັດ­ຈຸ­ບັນເປັນ​ຍຸກ​ສະ­ໄໝ​ແຫ່ງ​ການ​ນຳ​ໃຊ້​ຄວາມ​ຊື່­ສັດຜ່ານ​ເຕັກ​ໂນ​ໂລ​ຊີ​ຕ່າງໆ ແລະ ໝົດ​ຍາມ​ປົວ​ພະຍາດ​ກູ້​ເອົາຄົນ ເຊິ່ງ​ອີງ­ໃສ່​ແຕ່​ການ​ອະ­ນຸ­ໂລມ​ຕໍ່ການ​ກະ­ທຳ​ທີ່​ຜິດ​ກົດ­ໝາຍ ແລະ ຈັນ­ຍາ­ທຳ​ຕະຫຼອດ​ມາ ອົງ­ການ​ປົກ​ປ້ອງ​ກົດ­ໝາຍທີ່​ມີ​ສ່ວນ​ກ່ຽວຂ້ອງ​ໃນ​ການ​ກວດ­ກາ ຕ້ອງ​ຊອກ​ຫາ​ຂໍ້​ມູນ​ຂອງການ​ຂາດ­ທຶນ ການ​ບໍ່​ໄປ​ບໍ່​ມາ​ໃຫ້​ໄດ້ ເພື່ອ​ສະ­ກັດກັ້ນ​ສະ­ພາບ​ດັ່ງ­ກ່າວ​ບໍ່​ໃຫ້​ແກ່­ຍາວ ຝັງ​ຮາກ​ອັນຍາວ​ນານ​ ຕ້ອງ​ຢຸດ­ຕິ​ໃຫ້​ໄດ້​ຫາງ​ສຽງ​ວ່າ” ພະ­ນັກງານ​ລາວຄຸ້ມ​ຄອງ​ເອງ​ບໍ່​ມີ​ປະສິດ­ທິ​ຜົນ” ບັນ­ຫາ​ນີ້ ຕ້ອງ​ເອົາ​ຕາ​ອອກ​ຈາກ​ໂຕ​ເພື່ອ​ເບິ່ງ​ໂລກ ເບິ່ງ​ປະເທດ​ອ້ອມ​ຂ້າງ​ວ່າ​ເຂົາ​ເຮັດ​ກັນ​ແນວ­ໃດ? ຂໍ​ອະ­ນຸຍາດ​ເບິ່ງ​ບົດ­ຮຽນ​ປະ­ເທດສິງ­ກະ­ໂປ ປະ­ຊາ­ຊົນສາມ​ເຊື້ອ​ຊາດ​ຢູ່​ຮ່ວມ​ກັນ ໂດຍ​ຄວາມ​ສາ­ມັກ­ຄີເປັນ​ຍອດ ປະ­ເທດ​ກໍ່ນ້ອຍ ຊ້ຳ­ບໍ່­ໜຳ​ຍັງ​ຊອກ​ດິນ​ມາຖົມ​ທະ­ເລ​ຕໍ່​ໄປ​ໃຫ້​ໃຫຍ່​ຂຶ້ນ ພື້ນ­ຖານ​ຊັບ​ພະ­ຍາກອນ​ບໍ່​ມີ​ຫຍັງ ແມ່ນ​ແຕ່​ນ້ຳ​ຈືດ​ໃຊ້​ໃນ​ຊີ­ວິດ​ປະ­ຈຳວັນ​ກໍ່​ຍັງ​ຊື້​ຈາກ​ຕ່າງ­ປະ­ເທດ​ມາ​ໃຊ້ ແຕ່​ເຂົາ​ຍັງ​ມີການ​ຜະ­ລິດ ແລະ ບໍ­ລິ­ການ​ເປັນ​ໜຶ່ງຫຼັກໆ​ທີ່​ເປັນເສົາ­ຄ້ຳ “ຄວາມ​ຊື່­ສັດ ຄວາມ​ມີ​ລະ­ບຽບ​ໃນ​ການປະ­ຕິ­ບັດ​ກົດ­ໝາຍ​ເຄັ່ງ​ຄັດ” ທຸກ​ປາ­ກົດ­ການ​ຫຍໍ້­ທໍ້ລ້ວນ​ແຕ່​ຖືກ​ຈຳ­ກັດ​ດ້ວຍ​ກົດ­ໝາຍ​ໃຫ້​ຢູ່​ມື ​ແລ້ວທຸກຢ່າງ​ເຂົາ​ກໍ່​ກາຍ­ເປັນ​ປະ­ເທດ​ເສດ­ຖະ­ກິດ​ທີ່​ໂດດເດັ່ນ​ໃນ​ອາ​ຊຽນ ແລະ ໃນ​ໂລກ.

ຂ່າວທີ່ກ່ຽວຂ້ອງ