ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສປ ຈີນ ຫວຽດ­ນາມ

273 24 ສ.ຫ. 2017 ຫົວຂໍ້ຂ່າວອື່ນໆ

ມື້­ນີ້​ມີ 3 ຂ່າວ​ທີ່​ໜ້າ​ສົນ­ໃຈ​ຈາກ ສປ ຈີນ ປະເທດ​ດຽວ ຈາກ​ນັ້ນກໍ່​ມີ​ເລື່ອງ​ທາງ​ການ​ຫວຽດ­ນາມ ມີ​ຄວາມ​ກັງ­ວົນ​ໃຈ ເລື່ອງຈຳ­ນວນ​ລົດ​ໂດຍ­ສານແທ໋ກ​ຊີ ເພີ່ມ​ຂຶ້ນ​ລື່ນ​ຄວາມ​ຕ້ອງ­ການ​ຂອງ​ຈຳ­ນວນຜູ້​ໃຊ້​ບໍ­ລິ­ການ​ຕົວ​ຈິງ.

ທີ່ ສປ ຈີນ: 1.ຫຼາຍ​ຄົນ​ຄົງ​ຈຳ​ເຫດ­ການ​ແຜ່ນ­ດິນໄຫວ​ທີ່​ເກີດ​ຂຶ້ນ​ຢູ່​ແຂວງ​ສີ​ສວນ ທາງ​ທິດ­ຕາ­ເວັນ­ຕົກສຽງ​ໃຕ້​ຂອງ ສປ ຈີນ ຫວ່າງ​ບໍ່​ເຫິງ​ມາ​ນີ້ ຈາກເຫດ­ການ​ໄພ​ທຳ​ມະ​ຊາດ​ດັ່ງ­ກ່າວ ກໍ່​ມີ​ຜູ້​ຈັງ­ໄຮ​ໄວ​ມື ປ່ອຍ​ຂ່າວ​ລືເພື່ອ​ສ້າງ​ຄວາມ​ສະ­ທ້ານ​ຢ້ານກົວ​ໃນສັງ­ຄົມ​ວ່າ: ມີ​ກໍ­ລະ­ນີ​ແຜ່ນ­ດິນ​ໄຫວ​ຢູ່​ບ່ອນ​ຫັ້ນ​ບ່ອນນີ້​ຕື່ມ ຈາກ​ນັ້ນ​ກໍ່​ມີ​ຜູ້​ແບ່ງ­ປັນ ແລະ ກະ­ຈາຍ​ຕໍ່​ຂ່າວທີ່​ບໍ່​ມີ​ມູນຄວາມ​ຈິງ​ດັ່ງ­ກ່າວ ເຫດ­ການ​ແຜ່ນ­ດິນໄຫວ​ທີ່​ເກີດ​ຂຶ້ນ​ຢູ່​ແຂວງ​ສີ​ສວນເທື່ອ​ແລ້ວ­ນີ້ ​ໄດ້​ສ້າງສະ­ພາບ​ອົກ​ສັ່ນ​ຂວັນ​ເສຍ ແລະ ກະ­ທົບ​ຕໍ່​ຄວາມໝັ້ນ­ຄົງ​ທາງ​ສັງ­ຄົມ​ຊາວ​ຈີນ​ໂດຍ​ທົ່ວ​ໄປ ໄປ​ພ້ອມໆກັບ​ຂ່າວ​ລື​ທີ່​ເສກ​ສັນ​ປັ້ນ​ຂຶ້ນ​ເອງກ່ຽວ​ກັບ​ເຫດ­ການແຜ່ນ­ດິນ​ໄຫວ​ໃນ​ເຂດ​ຕ່າງໆ​ນັ້ນ ກໍ່​ມີ​ຂ່າວ​ທີ່​ບໍ່​ມີ​ມູນຄວາມ​ຈິງ​ກ່ຽວ​ກັບ​ຂະ​ບວນ​ການ​ສົງ­ເຄາະ​ຜູ້​ໄດ້​ຮັບເຄາະ​ຮ້າຍຈາກ​ເຫດ­ການ​ແຜ່ນ­ດິນ​ໄຫວ​ທີ່​ສີ​ສວນ ເພື່ອ​ສະ­ກັດ​ກັ້ນ​ການ​ແຜ່​ລາມ​ຂ່າວ​ລື​ດັ່ງ­ກ່າວ ທາງກະ­ຊວງ​ປ້ອງ​ກັນ​ຄວາມ​ສະ­ຫງົບ​ຂອງ​ຈີນ ຈຶ່ງ​ໄດ້ເລັ່ງ​ສອບ​ສວນ​ຕິດ­ຕາມ​ແຫຼ່ງ​ຂ່າວ​ດັ່ງ­ກ່າວ ແລະ ສາ­ມາດ​ຈັບ​ກຸມ​ຄຸມ​ຂັງ​ຫົວ​ໂປ່​ໂຕ​ການ​ທີ່​ປ່ອຍ​ຂ່າວຫຼອກ​ລວງ​ດັ່ງ­ກ່າວ​ໄດ້​ສີ່​ຄົນ 2.ຂ່າວ​ຕໍ່​ໄປ​ແມ່ນ​ເລື່ອງມາດ​ຕະ­ການ​ໃໝ່​ຂອງ​ຈີນ ໃນ​ການ​ຄວບ​ຄຸມ​ບັນ­ດາໂຮງ­ງານ​ອຸດ­ສາ­ຫະ­ກຳທີ່​ເປັນ­ຕົ້ນ​ເຫດ​ປ່ອຍ​ສານເຄ​ມີ​ ທີ່​ກາຍ­ເປັນ​ມົນ​ລະ​ພິດ​ທຳ­ລາຍ​ສິ່ງ­ແວ­ດລ້ອມ ພາຍ​ໃຕ້​ມາດ​ຕະ­ການ​ດັ່ງ­ກ່າວ ກະ­ຊວງ​ອາ​ນຸ​ຮັກສິ່ງ­ແວ­ດລ້ອມ​ຈີນ ໄດ້​ຂຶ້ນ​ບັນ­ຊີ​ໂຮງ­ງານ​ອຸດ​ສາ​ຫະກຳ​ ຈຳ­ນວນ 82 ປະ­ເພດ ທີ່​ຕ້ອງ​ໄດ້​ຂໍ​ໃບ​ອະ­ນຸ­ຍາດປະ­ກອບ​ທຸ­ລະ​ກິດ​ຈາກ​ທາງ​ການ ພາຍ​ໃນ​ປີ 2020 ໃບ​ອະ­ນຸ­ຍາດ​ທີ່​ທາງ​ການ​ຈະ​ອອກ​ໃຫ້​ນັ້ນ​ຈະ​ມີ ການ​ກຳ­ນົດ​ຢ່າງ​ເຄັ່ງ​ຄັດ ແລະ ລະ­ອຽດ​ກ່ຽວ​ກັບ​ວິທີ​ການ ແລະ ປະ­ລິ­ມານ​ການ​ປ່ອຍ​ມົນ​ລະ​ພິດ​ຂອງບັນ­ດາ​ໂຮງ­ງານ​ທີ່​ກ່ຽວ­ຂ້ອງ ຖ້າ​ມີ​ການ​ລະ­ເມີດ ໂຮງ­ງານ​ເຈົ້າ​ບັນ­ຫາ​ຈະ​ຖືກ​ສັ່ງ​ຢຸດ​ກິດ­ຈະ­ການ​ທັນທີ ຫຼື ອາດ​ຖືກ​ປັບ​ໃໝ​ເປັນ​ຈຳ­ນວນ​ເງິນ​ສູງ​ເຖິງ 1 ລ້ານ​ຢວນ (ປະ­ມານ 7 ແສນ​ໂດ​ລາ​ສະ­ຫະ­ລັດ) 3.ຂ່າວ​ສຸດ​ທ້າຍ​ກ່ຽວ​ກັບ ສປ ຈີນ ກໍ່​ຄືເລື່ອງ​ຄຳ​ປະກາດ​ເຕືອນ​ຢ່າງ​ເຄັ່ງ­ຂຶມ​ຈາກ​ສະ­ຖານ­ທູດ ສປ ຈີນ ທີ່​ນະ­ຄອນ­ຫຼວງ​ແບກ​ແລງ ສ ເຢຍ​ລະ​ມັນ ໃຫ້​ນັກທ່ອງ​ທ່ຽວ​ຈີນ​ທຸກ​ຄົນນັບ­ຖື ແລະ ປະ­ຕິ­ບັດ​ຕາມ​ລະບຽບ​ກົດ­ໝາຍ ຮີດ­ຄອງ​ປະ­ເພ­ນີ ແລະ ວັດ​ທະນະ​ທຳ​ຂອງ​ປະ­ເທດ​ທີ່​ພວກ​ຕົນ​ໄປ​ທ່ອງ​ທ່ຽວ ຫຼີກເວັ້ນ​ການ​ກະ­ທຳ​ທີ່​ຈະ​ກາຍ­ເປັນໂທດ ທີ່​ສະ­ຖານ­ທູດ ສປ ຈີນ ຕ້ອງ​ໄດ້​ອອກ​ມາ​ເຕືອນກໍ່​ເພາະ­ວ່າ ຫວ່າງບໍ່​ດົນ​ມາ​ນີ້ ນັກ​ທ່ອງ​ທ່ຽວ​ຈີນ​ສອງ​ຄົນ ຖືກ​ທາງການ​ເຢຍ​ລະ​ມັນ​ຈັບ​ກຸມ ຍ້ອນ​ສະ­ແດງ​ທ່າ​ຄຳ­ນັບແບບ​ນາ​ຊີ​ຮິດ​ເລີ ເວ­ລາ​ຖ່າຍ­ຮູບ​ຢູ່​ໃກ້ໆ​ລັດ​ຖະ​ສະພາ ຢູ່​ເຢຍ​ລະ​ມັນ ກົດ­ໝາຍ​ໄດ້​ກຳ­ນົດ​ຫ້າມ​ທຸກການ​ກະ­ທຳ​ທີ່​ເປັນ​ສັນ­ຍະ­ລັກ​ຂອງ​ລະ­ບອບ​ນາ​ຊີຮິດ​ເລີ ຜູ້​ລະ­ເມີດ​ມີ​ສິດ​ຕິດ​ຄຸກ​ເຖິງ 3 ປີ ນັກທ່ອງທ່ຽວ​ຈີນ​ທັງ​ສອງ​ສາ­ລະ­ພາບ​ວ່າ ພວກ​ຕົນ​ບໍ່​ໄດ້​ຕັ້ງໃຈ ພຽງ​ແຕ່​ເຮັດ​ຫຼິ້ນໆ​ຫົວໆ​ຊື່ໆ ຂ່າວ​ບອກ​ວ່າ ນັກທ່ອງ​ທ່ຽວ​ທັງສອງ​ໄດ້​ຖືກ​ປັບ​ໃໝ​ຜູ້​ລະ 500 ເອີ​ໂຣ (ເທົ່າ​ກັບ 600 ໂດ​ລາ​ສະ­ຫະ­ລັດ).

ທີ່ ຫວຽດ­ນາມ: ເລື່ອງ​ຈຳ­ນວນ​ລົດ​ໂດຍ­ສານແທ໋ກ​ຊີ​ເພີ່ມ​ຂຶ້ນເກີນ​ຄວາມ​ຕ້ອງ­ການ​ຕົວ​ຈິງ​ຂອງຜູ້​ຊົມ­ໃຊ້ ໄດ້​ສ້າງ​ຄວາມກັງ­ວົນ​ໃຈ​ໃຫ້­ການ​ນຳການ​ປົກ­ຄອງ​ຢູ່​ນະ­ຄອນ­ຫຼວງ​ຮ່າ​ໂນ້ຍ ແລະ ນະຄອນ​ໂຮ​ຈີ​ມິງ ຂອງ​ຫວຽດ­ນາມ ຢູ່​ຮ່າ​ໂນ້ຍ ຈຳ­ນວນ ລົດ​ແທ໋ກ​ຊີ ມີ​ເຖິງ 17.400 ຄັນ ແຕ່​ມີບ່ອນ​ຈອດຮອງ​ຮັບ​ໄດ້​ພຽງ 200 ຄັນ ຢູ່​ນະ­ຄອນ​ໂຮ່​ຈີ​ມິງ ມີລົດ​ແທ໋ກ​ຊີ 10.400 ຄັນ ຫຼາຍ​ເກີນ​ໄປ​ສຳ­ລັບ​ເສັ້ນທາງ​ຂອງ​ນະ­ຄອນ​ທີ່​ມີ​ຄວາມ​ຍາວ 4.100 ກິ​ໂລແມັດ ໃນ​ນັ້ນ 41% ມີ​ຄວາມ​ກວ້າງ 7 ແມັດ ແລະ ອີກ 51% ເປັນ​ທາງ​ບໍ່​ໄດ້​ປູ ຫຼື ມີ​ຄວາມ​ກວ້າງໜ້ອຍ​ກວ່າ 1 ແມັດ (ຈາກ​ໜັງ­ສື­ພິມ​ລາວ​ພັດ​ທະນາ 9/8/2017) ການເພີ່ມ​ຂຶ້ນ​ເກີນ​ກຳ­ນົດ​ຂອງ​ລົດແທ໋ກ​ຊີ​ໄດ້​ສ້າງ​ສະ­ພາບ​ແອ​ອັດ ແລະ ບັນ­ຫາ​ມົນລະ​ພິດ​ທາງ​ອາ­ກາດ​ຢ່າງ​ຮ້າຍ​ແຮງ.

ຂ່າວທີ່ກ່ຽວຂ້ອງ