ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ອິນ​ໂດ​ເນ​ເຊຍ ​ໄທ ກຳປູເຈຍ

308 22 ສ.ຫ. 2017 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ​ກ່ຽວ​ກັບ​ແຜນ​ພັດທະ​ນາ​ການ​ຄ້າ​ດ້ວຍ​ລະ­ບົບ​ດີ​ຈີ​ຕອນ ໃນ​ອິນ​ໂດ​ເນເຊຍ ເລື່ອງ​ແຜນ​ຫຼຸດ­ຜ່ອນຄວາມ​ແອ​ອັດ​ຢູ່​ສະ­ໜາມບິນ​ດອນ​ເມືອງ​ຂອງ​ໄທ ແລະ ປິດ​ທ້າຍ​ດ້ວຍ​ຂ່າວຄຳ­ເຕືອນ​ເລື່ອງ​ຂ່າວ​ສັງ­ຄົມ​ອອນ​ລາຍ​ໃນ​ກຳປູເຈຍ.

ທີ່ ອິນ​ໂດ​ເນ​ເຊຍ: ຂ່າວ​ຕ່າງ­ປະ­ເທດ​ໃຫ້​ຊາບຫວ່າງ​ບໍ່​ດົນ​ມາ​ນີ້​ວ່າ ພາຍ​ໃນ​ທ້າຍ​ປີ​ນີ້ ອິນ​ໂດ​ເນເຊຍ ຈະ​ປະ­ກາດ​ໃຊ້​ແຜນພັດ­ທະ­ນາ​ເສດ­ຖະ­ກິດຜ່ານ​ລະ­ບົບ​ດີ​ຈີ​ຕອນ ຫຼື ທີ່​ຮູ້​ກັນ​ຢ່າງ​ກວ້າງ­ຂວາງວ່າ ການ​ຄ້າ​ທາງ​ລະ­ບົບ​ເອ​ເລັກ​ໂຕຣ​ນິກ ຫຼື ອີຄອມ​ເມີດ (e-Commerce) ແຜນ​ພັດ­ທະ­ນາ​ທີ່​ມີລັກ­ສະ­ນະ​ຄົບ​ຊຸດ​ດັ່ງ­ກ່າວ ຈະ​ເນັ້ນ​ສົ່ງ­ເສີມ​ດ້ານເຕັກ​ໂນ​ໂລ​ຊີ ໂລ​ຈິ​ສຕິກ ຄວາມ​ໝັ້ນ­ຄົງ​ຂອງ​ລະບົບ​ອິນ​ເຕີ​ເນັດ (ໄຊ​ເບີ) ການ​ພາ­ສີ ການ​ພັດ­ທະ­ນາຊັບ­ພະ­ຍາ­ກອນ​ມະ­ນຸດ ກໍ່​ຄື​ການ​ປົກ​ປ້ອງສິດ­ທິຂອງ​ຜູ້​ຊົມ­ໃຊ້ ໜຶ່ງ​ໃນ​ບັນ­ຫາ​ສຳ­ຄັນ​ທີ່​ໄດ້​ກຳ­ນົດ​ໄວ້ໃນ​ແຜນ­ການກໍ່​ຄື ລະ­ບົບ​ການ​ຈ່າຍພາຍ​ໃຕ້​ການຕິດ­ຕາມ​ກວດ­ກາ​ຂອງ​ທະ­ນາ­ຄານ​ອິນ​ໂດ​ເນ​ເຊຍ ທີ່​ຂຽນ​ເປັນ​ໂຕ​ຫຍໍ້​ວ່າ NPG ກະ­ຊວງ​ການ​ສື່­ສານ ແລະ ຖະ­ແຫຼງ​ຂ່າວ​ອິນ​ໂດ​ເນ​ເຊຍ ໄດ້​ກຳ­ນົດ​ມາດຕະ­ການ​ເກັບ​ກຳ​ຂໍ້​ມູນ​ຂ່າວ­ສານ​ກ່ຽວ​ກັບ​ການ​ເຮັດທຸ­ລະ​ກຳ​ທາງ​ອອນ​ລາຍ​ຈາກ​ຕະ­ຫຼາດ ໂດຍ​ການຮ່ວມມື​ກັບ​ກະ­ຊວງ​ການ​ເງິນ ສຳ­ນັກ­ງານ​ສະ­ຖິ­ຕິສູນ​ກາງ ແລະ ທະ­ນາ­ຄານ​ອິນ​ໂດ​ເນ​ເຊຍ.

ທີ່ ​ໄທ: ມີ​ຂ່າວ​ດີ​ອອກ​ມາ​ຈາກ​ບາງ­ກອກວ່າ ຜູ້­ໂດຍ­ສານ​ຄົນ​ໄທ​ທີ່​ໃຊ້​ບໍ­ລິ­ການ​ຢູ່​ສະ­ໜາມ​ບິນສາ­ກົນ​ດອນ​ເມືອງ ບາງ­ກອກ ຈະ​ບໍ່​ຈຳ­ເປັນ​ຕື່ມແບບ​ຟອມ​ແຈ້ງ​ການ​ເຂົ້າ-ອອກຄື​ແຕ່​ກ່ອນ​ອີກແລ້ວ​ ທັງ​ນີ້​ກໍ່​ເພື່ອ​ຫຼຸດ­ຜ່ອນ​ສະ­ພາບ​ຄັບ­ຄາ​ໜາ​ແໜ້ນຂອງ​ຈຳ­ນວນ​ຜູ້­ໂດຍ­ສານ​ຂາ​ເຂົ້າ ນອກ­ຈາກ​ນັ້ນ ທາງ​ສະ­ໜາມ​ບິນ​ຍັງ​ມີ​ແຜນ­ການ​ເພີ່ມ​ເຈົ້າ​ໜ້າ­ທີ່ໃຫ້​ບໍ­ລິ­ການ​ຜູ້­ໂດຍ­ສານ ແລະ ຈະ​ຕິດ​ຕັ້ງ​ຊ່ອງ​ຜ່ານຫຼາຍ​ຂຶ້ນ​ຕື່ມ.

ທີ່ ກຳ­ປູ­ເຈຍ: ຂ່າວ​ໜັງ­ສື­ພິມ​ວຽງ​ຈັນ ​ທາມ ສະບັບ​ວັນ​ທີ 3 ເດືອນ​ສິງ­ຫາ​ນີ້​ໃຫ້​ຮູ້​ວ່າ ທ່ານ ຮຸນ​ເຊນ ນາ­ຍົກ­ລັດ­ຖະ­ມົນ­ຕີກຳ­ປູ­ເຈຍ ໄດ້​ມີ​ຄຳ​ເຫັນ​ໃນ​ພິ­ທີມອບ​ໃບ​ປະ­ກາ­ສະ­ນີ­ຍະ­ບັດ​ແກ່​ນັກ​ສຶກ​ສາມະ­ຫາ​ວິທະ​ຍາ​ໄລ​ກົດ­ໝາຍ ແລະ ເສດ­ຖະ­ກິດ​ໂດຍ​ທ່ານ​ໄດ້ຮຽກ­ຮ້ອງ​ໃຫ້​ຜູ້​ຊົມ­ໃຊ້​ຂ່າວ­ສານ​ສັງ­ຄົມ​ອອນລາຍ ໂດຍ​ສະ­ເພາະແມ່ນ​ເຟດ​ບຸກ ມີ​ຄວາມ​ລະມັດ​ລະ­ວັງ​ໃນການ​ແບ່ງ­ປັນ ແລະ ສົ່ງ­ຕໍ່​ຂໍ້​ມູນ ເນື່ອງຈາກວ່າ​ໃນ​ໄລ­ຍະ​ຫຼັງໆ​ມາ​ນີ້ ​ໄດ້​ມີ​ປາກົດ​ການການ​ແບ່ງ­ປັນ ແລະ ການ​ສົ່ງ​ຂໍ້​ມູນຂ່າວ­ສານ​ທີ່ຂາດ​ພື້ນ­ຖານຄວາມ​ເປັນ​ຈິງ ແລະ ບໍ່​ມີ​ປະ­ໂຫຍດ ທ່ານ​ນາ­ຍົກ​ບອກ​ວ່າ ມີ​ບາງ​ເນື້ອ​ໃນ​ສາ­ມາດ​ກໍ່​ໃຫ້ເກີດຄວາມ​ບໍ່​ສະ­ຫງົບ​ໃນ​ສັງ­ຄົມ​ໄດ້ ທ່ານ ຮຸນ​ເຊນ ໄດ້​ຍົກ​ຕົວ­ຢ່າງ​ກໍ­ລະ­ນີ​ມີ​ການ​ເຜີຍ­ແຜ່​ຂໍ້​ມູນ​ຂ່າວ​ລືທາງ​ອິນ​ເຕີ​ເນັດ ​ກ່ຽວ​ກັບອຸ­ບັດ​ຕິ​ເຫດ​ເຄື່ອງ​ບິນ​ຕົກ​ຢູ່​ສຽມ​ລຽບ ກ່ຽວ​ກັບ​ສຸ­ຂະ­ພາບ​ຂອງ​ທ່ານ​ນາ­ຍົກເອງ ກໍ່​ຄືເລື່ອງ​ການ​ລັກ​ເດັກ­ນ້ອຍ ຂໍ້​ມູນ​ບໍ່​ມີ​ມູນຄວາມ​ຈິງ​ເຫຼົ່າ​ນີ້​ໄດ້​ສ້າງ​ຄວາມ​ແຕກ​ຕື່ນ ແລະ ຄວາມ​ຂັດ​ແຍ່ງ​ໃນ​ສັງ­ຄົມ ຂ່າວ​ໃຫ້​ຮູ້​ຕື່ມ​ວ່າ ທາງກະ­ຊວງ​ພາຍ​ໃນ​ຂອງກຳ­ປູ­ເຈຍ ໄດ້​ປະ­ກາດ​ໃຫ້​ທົ່ວສັງ­ຄົມ​ຊາບ​ກ່ຽວ​ກັບ​ຂະບວນ​ການ​ສືບ­ສວນ​ກວດສອບ​ຂ່າວ​ລື​ຜ່ານ​ອອນ​ລາຍ​ດັ່ງ­ກ່າວ ໂດຍເນັ້ນ​ວ່າ ທາງ​ການ​ກຳ­ປູ­ເຈຍ ຈະ​ນຳ​ໃຊ້​ມາດ​ຕະ­ການ​ທາງກົດ­ໝາຍ​ຢ່າງ​ເດັດ­ຂາດ​ຕໍ່​ຜູ້​ໃຊ້​ສື່​ສັງ­ຄົມ​ອອນລາຍ​ທຸກໆ​ຄົນ ທີ່​ມີຄວາມ​ຜິດ​ເລື່ອງ​ຂ່າວ​ລື​ຜ່ານສັງ­ຄົມ​ອອນ​ລາຍ​ຢູ່​ກຳ­ປູ­ເຈຍ ແມ່ນ​ບົດ­ຮຽນ​ອຸ​ທາຫອນ​ສອນ​ໃຈ​ວ່າ “ເຟດ​ບຸກ” ຖ້າ​ໃຊ້​ໄປ​ໃນທາງ​ຜິດ ມັນ​ກໍ່​ຈະ​ກາຍ­ເປັນ “ເຜດ​ບຸກ” ຄື​ເປັນ “ຜີ​ເຜດ” ບຸກໂຈມ​ຕີ​ສັງ­ຄົມ​ພວກ​ເຮົາ.

ຂ່າວທີ່ກ່ຽວຂ້ອງ