ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ມາ​ເລ​ເຊຍ ອິນ​ໂດ​ເນ​ເຊຍ

365 22 ສ.ຫ. 2017 ຫົວຂໍ້ຂ່າວອື່ນໆ

ບົດ​ປະຈຳ​ວັນ​ນີ້ ມີ​ເລື່ອງ​ທາງ​ການ​ມາ​ເລ​ເຊຍ ຢຶດ​ຊິ້ນ​ສ່ວນ​ຂອງ​ສັດ​ທີ່​ຜິດ​ກົດໝາຍ ແລະ ບັນດາຂ່າວ​ກ່ຽວ​ກັບ​ບັນຫາຄອບຄົວ​ໃນ​ອິນ​ໂດ​ເນ​ເຊຍ.

ທີ່ ມາ​ເລ​ເຊຍ: ໃນ​ໄລຍະ​ຫຼັງໆ​ມາ​ນີ້ ຂ່າວ​ກ່ຽວກັບ​ການ​ຢຶດ​ຊິ້ນ​ສ່ວນ​ສັດ​ປະເພດ​ຫວງ​ຫ້າມ​ທີ່​ໃກ້​ຈະ​ສູນພັນຢູ່​ມາ​ເລ​ເຊຍ ມີຂຶ້ນ​ນັບ​ມື້​ຖີ່ ອັນ​ໄດ້ເລັ່ງມື​ໃຫ້​ທາງ​ການ​ຂອງ​ປະເທດ​ນີ້​ເອົາ​ມາດ​ຕະການ​ເດັດຂາດ​ຕໍ່​ຜູ້​ກະທຳ​ຜິດ ບໍ່​ຊັ້ນ​ມາ​ເລ​ເຊຍ ກໍ່​ຈະກາຍເປັນ​ປະເທດ​ທາງ​ຜ່ານ​ສຳລັບ​ຂະ​ບວນ​ການ​ຄ້າ​ສັດປ່າ.

ໃນ​ວັນ​ທີ 30 ເດືອນ​ກໍລະກົດ​ປີ​ນີ້ ທີ່​ສະໜາມ​ບິນຂອງ​ນະຄອນຫຼວງ​ກົວ​ລາ​ລຳ​ເປີ ເຈົ້າ​ໜ້າທີ່​ພາສີ​ອາກອນ ສາມາດ​ຢຶດ​ງາຊ້າງ​ໄດ້​ຈຳນວນ 23 ອັນ ນ້ຳໜັກ 76 ກິ​ໂລ ແລະ ເກັດລິ່ນ ຈຳນວນ 6 ຖົງ ນ້ຳໜັກ​ກວ່າ 300 ກິ​ໂລ ຢູ່​ສາງ​ສິນຄ້າ​ຂອງ​ສະໜາມບິນ ມູນ​ຄ່າ​ຂອງ​ງາ​ຊ້າງ ແລະ ເກັດລິ່ນ ເມື່ອ​ບວກກັນ​ເຂົ້າ​ແລ້ວ ​ກໍ່​ຕົກ​ເປັນ​ເງິນ​ເກືອບ 1 ລ້ານ​ໂດ​ລາ​ສະຫະ​ລັດ ຊິ້ນສ່ວນ​ສັດ​ທີ່​ຜິດ​ກົດໝາຍ​ນີ້ ມີ​ຕົ້ນ​ທາງ​ມາຈາກ​ບັນດາ​ປະເທດ​ໃນອາ​ຟຣິກ​ກາ ຕອນ​ເລື່ອງ​ນີ້ ເວລາ​ຍັງ​ຕົກ​ເປັນ​ຂ່າວ​ຢູ່​ນັ້ນ ເຈົ້າ​ໜ້າທີ່​ກ່ຽວຂ້ອງມາ​ເລ​ເຊຍ ຍັງ​ບໍ່​ສາມາດ​ສືບ​ຮູ້​ກ່ຽວ​ກັບ​ປາຍທາງຂອງ​ສິນຄ້າ​ຜິດ​ກົດໝາຍ​ດັ່ງກ່າວ ແລະ ບໍ່​ຮູ້​ວ່າ​ໃຜເປັນ​ເປົ້າ​ໝາຍ​ຮັບ ໃນ​ເດືອນ​ພຶດສະພາ​ປີ​ນີ້ ມາ​ເລເຊຍ​ ສາມາດ​ຢຶດ​ເກັດລິ່ນ​ໄດ້​ຫຼາຍ​ເປັນ​ຄັ້ງ​ປະຫວັດການ ​ທີ່​ມີ​ນ້ຳໜັກເຖິງ 700 ກິ​ໂລ ແລະ ໃນ​ໄລຍະໄລ່​ເລ່ຍ​ກັນ​ນັ້ນ ທາງ​ການ​ຮົງ​ກົງ ​ກໍ່​ໄດ້​ຢຶດ​ງາ​ຊ້າງ​ທີ່ລຳລຽງ​ຕໍ່​ໄປ​ຈາກ​ມາ​ເລ​ເຊຍ ຊຶ່ງ​ມີ​ນ້ຳໜັກ​ຫຼາຍກວ່າ 7.200 ກິ​ໂລ ທາງ​ການ​ມາ​ເລ​ເຊຍ​ ເຊື່່ອ​ວ່າ ພະນັກງານ​ຢູ່​ສະໜາມ​ບາງ​ຄົນ​ອາດ​ມີ​ສ່ວນ​ພົວພັນກັບ​ຊິ້ນສ່ວນ​ສັດປ່າ​ຫວງ​ຫ້າມ​ທັງ​ໝົດ​ທີ່​ຢຶດ​ໄດ້ ແຕ່ຍັງ​ຂາດ​ຫຼັກ​ຖານ​ຢືນຢັນ​ເພື່ອ​ຜູກ​ມັດ​ຜູ້​ກະທຳ​ຜິດ ແນວໃດ​ກໍ່​ດີ ທາງ​ການ​ພາສີອາກອນ​ຂອງ​ມາ​ເລເຊຍ ໄດ້​ເພີ່ມ​ມາດ​ຕະການ​ກວດກາ ແລະ ບັງຄັບໃຊ້​ກົດໝາຍ​ເພື່ອ​ສະກັດ​ກັ້ນ​ບັນຫາ​ນີ້​ແລ້ວ.

ທີ່ ອິນ​ໂດ​ເນ​ເຊຍ: ຫວ່າງ​ບໍ່​ດົນ​ມາ​ນີ້ ມີ​ຂ່າວ​ວ່າ ຫ້ອງການ​ສານ​ເມືອງປູ​ບາ​ລິງ​ກາ (Purbalingga) ຢູ່​ພາກ​ກາງ​ເກາະ​ຈາລາ ໄດ້​ສະເໜີ​ໃຫ້​ອຳນາດ​ການ​ປົກຄອງ ແລະ ບັນດາ​ຜູ້ນຳທາງ​ສາສະໜາ​ປະຈຳ​ທ້ອງຖິ່ນ​ຍື່ນ​ມື​ເຂົ້າ​ມາ​ຊ່ວຍແກ້​ໄຂບັນຫາ​ການ​ຢ່າ​ຮ້າງ​ທີ່​ເພີ່ມ​ຂຶ້ນ ເນື່ອງ​ມາຈາກ​ບັນດາ​ເຈົ້າ​ພໍ່​ເຮືອນ (ຜົວ) ໃນ​ຫຼາຍໆ​ຄອບ​ຄົບຂອງ​ເມືອງ​ນີ້ ​ມົວເມົາ​ນຳ​ແຕ່ການ​ພະນັນ ແຂ່ງ​ນົກກາງແກ​ກັນ​ຢູ່​ທ້ອງ​ທົ່ງ ແຕ່​ເຊົ້າ​ຄຸງ​ຄ່ຳ ບໍ່​ສົນ​ນຳ​ຊີວິດ​ການ​ເປັນ​ຢູ່​ຂອງ​ເມຍ ແລະ ລູກໆ ບໍ່​ພາ​ສ້າງພາສາ ເຮັດ​ໃຫ້​ຊີວິດ​ເສດຖະກິດ​ຄອບຄົວ​ຕົກອັບ ຍ້ອນ​ແນວ​ນີ້​ເອງ ຜູ້​ເປັນ​ເມຍ​ຈຶ່ງ​ພາກັນ​ຍື່ນ​ຄຳ​ຮ້ອງເຖິງ​ຫ້ອງການ​ສານ ເພື່ອ​ຂໍ​ຢ່າ​ຮ້າງ​ກັບ​ຜົວ​ຂີ້​ການ​ພະນັນ ຂ່າວ​ບອກ​ວ່າ ໃນ​ເດືອນ​ມິຖຸນາ​ປີ​ນີ້ ຈຳນວນນາງ​ເມຍ​ທີ່​ຂໍ​ຢ່າ​ຮ້າງ​ກັບ​ຜົວ​ນັ້ນມີຈຳນວນ 13 ກໍລະ​ນີ ແລະ ໄດ້​ເພີ່ມ​ຂຶ້ນ​ເປັນ​ຫຼາຍ​ກວ່າ 90 ກໍລະນີ ໃນ​ເດືອນ​ກໍລະກົດ ຕໍ່​ມາ​ເລື່ອງ​ມີ​ຢູ່​ວ່າ ຜູ້​ຊາຍ​ສ່ວນຫຼວງຫຼາຍ​ໃນ​ເມືອງ​ນີ້​ນັ້ນ​ບໍ່​ມີ​ວຽກ​ເຮັດ ເລີຍ​ໂງ​ໃສ່ການ​ພະນັນ ​ເອົາ​ນົກກາງແກ​ຂາວ​ມາ​ເຝິກແອບ ບົວລະ​ບັດ​ຮັກສາ​ໃຫ້ປີກ​ກ້າ​ຂາ​ແຂງ ແລ້ວ​ເອົາ​ໄປ​ແຂ່ງກັນ​ກິນ​ເງິນ ແຕ່​ລະ​ມື້​ຜູ້​ຊາຍ​ກຸ່ມ​ນີ້​ຈະ​ນັດ​ພົບ​ກັນ​ຢູ່ທ້ອງ​ທົ່ງ ​ເພື່ອ​ປ່ອຍ​ນົກ​ແຂ່ງ​ກັນ ແຕ່ 10 ໂມງ​ເຊົ້າ ຮອດ​ຄ່ຳ​ມືດ​ປືດ​ຕາ​ຈຶ່ງ​ກັບ​ເຮືອນ ເວລາ​ຢູ່​ເຮືອນ​ກໍ່​ໄດ້ແຕ່​ມົວເມົາ​ຫຼິ້ນ​ກັບ​ນົກ ບົວລະບັດ ແລະ ເອົາໃຈໃສ່​ນົກກວ່າ​ເມຍ ແລະ ລູກໆ ເປັນ​ແນວ​ນີ້ ຝ່າຍເມຍ​ເລີຍ​ທົນ​ບໍ່​ໄຫວ ​ຈຶ່ງ​ຮ້ອນ​ຮອດ​ຫ້ອງການ​ສານ ຄາດ​ວ່າອຳນາດ​ການ​ປົກຄອງ ແລະ ຜູ້ນຳ​ທາງສາສະໜາ​ຈະ​ມີ​ວິທີ​ການ​ສຶກ​ສາ​ອົບຮົມ​ໃຫ້​ພວກຕິດ​ການ​ພະນັນ​ແຂ່ງ​ນົກກາງແກເຫັນ​ຜົນ​ຮ້າຍຂອງ​ການ​ເສບ​ຕິດ​ດັ່ງກ່າວ​ ທີ່​ສົ່ງ​ຜົນ​ກະທົບ​ຕໍ່​ຊີວິດ ຄອບຄົວ ອ່ານ​ຂ່າວ​ນີ້​ແລ້ວເລີຍ​ຄິດ​ເຫັນ​ບັນຫາ “ບ້າ​ບູນ” ຂອງ​ບາງ​ຄົນ​ທີ່​ຫັນເອົາ​ກີລາ​ຕີ​ບູນ​ເປັນເວທີ​ຊຸມ​ແຊວ ຈົນ​ລືມ​ຢ້າວ​ລືມ​ເຮືອນ.

ຂ່າວທີ່ກ່ຽວຂ້ອງ