ຈີນ ຊ່ວຍເຫຼືອກໍ່ສ້າງຫ້ອງອາຫານ ຢູ່ຫໍປະຊຸມແຫ່ງຊາດ

873 15 ສ.ຫ. 2017 ຂ່າວໜ້າ​ໜຶ່ງ
ຈີນ ຊ່ວຍເຫຼືອກໍ່ສ້າງຫ້ອງອາຫານ ຢູ່ຫໍປະຊຸມແຫ່ງຊາດ

ລັດຖະບານ ​ສປ ຈີນ ໃຫ້​ທຶນຊ່ວຍເຫຼືອ​ລ້າ 78,3 ລ້ານ​ຢວນ ຫຼື ປະມານ 97 ຕື້​ກີບ ກໍ່ສ້າງ​ຫ້ອງອາຫານ​ຢູ່​ຫໍ​ປະຊຸມ​ແຫ່ງ​ຊາດ ເພື່ອ​ຮອງ​ຮັບ​ດ້ານ​ອາຫານ​ຮັບ​ໃຊ້ໃຫ້​ແກ່​ບັນດາ​ການ​ນຳ​ທີ່​ມາ​ເຂົ້າຮ່ວມ​ງານ​ສຳຄັນ​ຕ່າງໆ ທັງ​ເປັນການ​ເພີ່ມ​ສິ່ງ​ອຳນວຍ​ຄວາມ​ສະດວກ​ຢ່າງ​ຄົບ​ຊຸດ​ໃຫ້​ຫໍ​ປະຊຸມ​ດັ່ງກ່າວ​ຕື່ມ​ອີກ.

ພິທີ​ລົງ​ນາມ​ສັນຍາ​ໂຄງການດັ່ງກ່າວ ໄດ້​ຈັດ​ຂຶ້ນ​ວັນ​ທີ 11 ສິງຫາ 2017 ຢູ່​ຫໍ​ປະຊຸມ​ແຫ່ງ​ຊາດ ລະຫວ່າງທ່ານ​ນາງ ວຽງ​ສະຫວັນ ດວງ​ສະຫວັນ ຮອງ​ລັດ​ຖະມົນຕີ ຮອງ​ຫົວໜ້າ​ຫ້ອງ​ວ່າການສຳນັກງານ​ນາຍົກລັດຖະມົນຕີ ແລະ ທ່ານ ຫວັງ ຊີ​ຮຸຍ ທີ່​ປຶກສາດ້ານ​ເສດຖະກິດ ແລະ ການ​ຄ້າ ສະຖານທູດ ​ສປ ຈີນ ປະຈຳ ​ສປປ ລາວ ໂດຍ​ຊ້ອງ​ໜ້າ​ບັນດາ​ກົມ ຂະແໜງການ ແລະ ພາກສ່ວນກ່ຽວຂ້ອງ.

ໂຄງການ​ກໍ່ສ້າງ​ຫ້ອງ​ອາຫານດັ່ງກ່າວ ເປັນ​ອາຄານ​ຊັ້ນ​ດຽວ ​ທີ່ມີ​ລັກສະນະ​ກົມ​ກືນ​ກັບ​ອາຄານຫໍ​ປະຊຸມ​ແຫ່ງ​ຊາດ ລວມ​ເນື້ອທີ່ຂອງ​ອາຄານ​ແຕ່​ລະ​ຫ້ອງ 3.450 ຕາ​ແມັດ ໃນ​ອາຄານ​ປະກອບ​ມີຫ້ອງ​ອາຫານ​ລະດັບ​ປະມຸກ​ລັດ ບັນຈຸ​ໄດ້ 15-20 ທ່ານ 1 ຫ້ອງ ລະດັບ​ລັດຖະມົນຕີ​ບັນຈຸ​ໄດ້ 60-80 ທ່ານ 1 ຫ້ອງ ແລະ ຫ້ອງໂຖງ​ບັນຈຸ​ໄດ້ 800-1.000 ທ່ານ 1 ຫ້ອງ ເຊິ່ງ​ການ​ກໍ່ສ້າງ​ຈະ​ເລີ່ມລົງມື​ໃນ​ທ້າຍ​ປີ 2017 ແລະ ຈະໃຊ້​ເວລາ​ກໍ່ສ້າງ 2 ປີ.

ຂ່າວທີ່ກ່ຽວຂ້ອງ